Lesona 16

Sa Faia e Iesu Keriso Vavega

Faamoemoega

Ina ia fesoasoani i tamaiti e faamalosia lo latou faatuatua ia Iesu Keriso e ala i lo latou aoao faapea e tutupu vavega e tusa ai ma le finagalo o le Tama Faalelagi pe a iai lo tatou faatuatua.

Sauniuniga

Suesue ma le agaga tatalo le Mareko 2:1–12, 5:21–43, ma le 1 Nifae 7:12. Ona suesue lea o le lesona ma iloilo pe faapefea ona e manao e aoao atu le tala fatusi paia. (Tagai “Saunia o Au Lesona,” i. 0 [ vi,] ma le “Aoao Atu Mai Tusitusiga Paia,” i. 0 [vii] ).
Tusi faitau faaopoopo: Mataio 9:1–8, 18–31; 17:20; Luka 8:41–56; Eteru 12:6, 12, 16, 18; ma le Aoaoga Faavae o le Talalelei mataupu 18.
Filifili ia fesili e talanoaina ma gaoioiga e faamauoa mai ai lea o le a aafia ai tamaiti ma o le a sili ona fesoasoani ia i latou ia mauaina le faamoemoega o le lesona.
Mea e manaomia:
1. Se Tusi Paia po o se Feagaiga Fou mo tamaiti taitasi.
2. Ata 7–18, O Iesu O Loo Faamanuia le Afafine o Iairo (Taga o Ata o le Talalelei 215; 62231).

Faalautelega Fautuaina o le Lesona

Tofi se tamaitiiti e faia le tatalo amata.

Gaoioiga e Faatosina Mai Ai

Fesili i tamaiti pe sa iai se aso na mamai tigaina ai. Fai iai e faamatala mai pe sa faapefea ni o latou faalogona ma faamatala mai pe sa faapefea ona fesoasoani atu o latou aiga ina ia latou toe malolosi. Tuu atu i tamaiti sa maua o latou faamanuiaga faaleperisitua e faamatala atu i isi tamaiti mea na oo ia i latou. Fesoasoani atu i tamaiti ina ia o latou malamalama ua faaalia lo latou faatuatua ia Iesu Keriso i le tatalo ma le fesili atu mo se faamanuiaga faaleperisitua pe a latou mamai pe fetaiai foi ma faafitauli.

Faamatala atu i tamaiti o tala o lo o i lenei lesona e faatatau lea i tagata sa faamaloloina e Iesu ona o lo latou faatuatua tele ia te ia.

Tala Faatusi Paia ma Talanoaga ma Fesili e Faatatau I Ai

Aoao atu le tala faatusi paia ia Iesu ma le faamaloloina o mai o lo o lisiina i le vaega o “Sauniuniga”. (Mo ala fautuaina e aoao atu ai tala faatusi paia, tagai i le “Aoao Atu Mai Tusitusiga Paia.” i. vii.)

Tala Faatusi Paia ma Talanoaga ma Fesili e Faatatau I Ai

Ua Faamaloloina e Iesu le Tagata Mai Supa (Mareko 2:1–12)
- O le a le fetalaiga muamua a Iesu i le supa (musele ua le mafai ona taofia le tetete)? (Mareko 2:5.) O a ni uiga faaalia o le au tusiupu i le fetalaiga a Iesu? (Mareko 2:7.) O le a le upu leaga? (Faaalia o le lē faaaloalo i le Atua po o le taufaasese fai mai o le Atua.) Pe sa upu leagaina ea Iesu? Fesoasoani i tamaiti ina ia malamalama e mafai ona faamagalo e Iesu agasala aua o ia o le Alo o le Atua, ae sa le talitonu le au tusiupu o Iesu o le Alo o le Atua.
- O le a le fetalaiga a Iesu i le au tusiupu? (Mareko 2:8–9.) O le a lana fetalaiga i le supa? (Mareko 2:10–11.)
- O a ni uiga faaalia o tagata ina ua malolo le tagata mai supa? (Mareko 2:12.) O le a sou manatu i le mafuaaga ua malolo ai lenei alii?
Ua faatuina e Iesu le Afafine o Iairo mai le Oti (Mareko 5:21–24, 35–43)

Faaali le ata 7–18, O Iesu o loo Faamanuia le Afafine o Iairo.
- O ai Iairo? E faapefea ona tatou iloa sa ia faatuatua ia Iesu? (Mareko 5:22–23.) Sa faapefea ona fesoasoani Iesu ia Iairo ina ia tumau le malosi o lona faatuatua? (Mareko 5:35–36.)
- Ina ua o mai Iesu ma Iairo i le fale o Iairo, o a mea a nisi tagata sa fai? (Mareko 5:38. Faamatala o se tasi lea o tu ma aga i na aso, o le lauē ma fetagisi leotetele pe a maliu se tasi.) O le a le eseesega o le mea na faia e tagata na iai i le maliu ma le mea na faia e Iairo?
- O le a sou manatu i le mafuaaga na tuliesea ai e Iesu le au le talitonu ae lei ulufale atu o ia i le potu o le tamaitai mo lona faamalologa? (Mareko 5:40.)
Ua faamaloloina e Iesu le Fafine Ua I Ai le Puna Toto (Mareko 5:25–34)
- Na faapefea ona faaalia e le fafine na pai atu i le ofu o Iesu lona faatuatua ia te Ia? (Mareko 5:27–28.)
- Sa faapefea ona iloa e Iesu ua pai atu le fafine i lona ofu? (Mareko 5:30.) Aisea e le faigata ai ona ia iloa se tagata e pai atu ia te Ia? (Mareko 5:31.)
- Aisea na faamaloloina ai lenei fafine? (Mareko 5:34.) Faamatala e leai se mea faamaneta i le tuupao o le ofu o Iesu. Sa faamaloloina le fafine ona o lona faatuatua ia Iesu faatasi ai ma le finagalo o le Tama Faalelagi. O a nisi vavega e tutupu i o tatou olaga ona o ni galuega laiti faatauvaa tatou te faataunuuina?

Talanoaga Otooto ma Fesili e Faatatau I Ai

O le a sou manatu i le mafuaaga na faia ai e Iesu vavega? (Mataio 9:29–30; Mareko 1:41; 2:5, 10; 5:36. Ina ia faamaonia ai o ia o le Alo e toatasi o le Atua, ina ia faamalosia ai le faatuatua o i latou e talitonu ia te ia, ona e alofa o ia ma agalelei ia i latou o loo manaomia se fesoasoani, faatasi ai ma le faatuatua o i latou o lo o talitonu ia te Ia.)
O a nisi o vavega o lo o i ai i o tatou olaga i taimi nei?

Fesoasoani i tamaiti ina ia malamalama afai tatou te faatuatua ia Iesu Keriso ma ola amiotonu, o le a tatou iloa vavega e tusa ai ma le finagalo o le Atua (tagai i le 1 Nifae 7:12).

Talanoaga Otooto ma Fesili e Faatatau I Ai

Faamatala o nisi taimi e le mafai ona malolo se tagata mai po o se tagata foi e vaivai le mafaufau i tatalo e tuuina atu. O lona uiga e leai so tatou faatuatua? Aisea? Aisea e faapea ai atonu e le o le finagalo o le Atua e malolo ai se tagata? (Atonu o lo o finagalo le Atua e tofotofoina le faatuatua o tagata o le aiga, atonu o lo o finagalo o ia e faatupuina le onosai, faatasi ai ma isi.)

Tagai i le saunoaga lenei a Peresitene Spencer W. Kimball: “E le faamaloloina i taimi uma e le Alii tagata mamai, pe faasaoina foi i latou o lo o puapuagatia. E na te le faasaolotoina foi i tatou i taimi uma mai mafatiaga ma tiga, o nei tulaga le maalofia o se vaega o faamoemoega ma fuafuaga” (Tragedy of Destiny, p. 5).

Talanoaga Otooto ma Fesili e Faatatau I Ai

O le a le uiga o le faatuatua ia Iesu Keriso? (O le talitonu lea o Iesu Keriso o le Alo o le Atua ma le Faaola o le lalolagi, o le talitonu lea ua ia Iesu mana uma, e talitonuina ai o le Tama Faalelagi ma Iesu e faia mea lelei mo i tatou, o le taliaina o le finagalo o le Atua, ma le naunautai e usitai i tulafono a le Atua.)
E faapefea ona faatupulaia lou faatuatua ia Iesu Keriso?

Gaoioiga e Faamauoa Ai

E mafai ona e faaaogaina se tasi pe sili atu foi o nei gaoioiga i soo se taimi o le lesona pe faaaoga foi o se toe iloiloga, po o se lu’i.

Ia fai faatele le faatuatuaga lona fa o le faatuatua, ma fesili atu i tamaiti po o le a so latou manatu i le “faatuatua i le Alii o Iesu Keriso” o le mataupu faavae muamua o le talalelei. Fai i ai e tauloto mai le fuaiupu muamua pe fesoasoani foi i ai ina ia latou taulotoina.
Fesoasoani i tamaiti e tauloto le 1 Nifae 7:12, amata mai i le fuaitau “e mafai e le Atua.”
Fai i tamaiti e faamatala mai pe faapefea ona tatou iloa o lo o soifua Iesu Keriso. E mafai ona e tusia i fasipepa mea nei faatasi ai ma nisi tali o lo o e mafaufau i ai. E mafai foi ona e tusia ni upu tatala i luga o le laupapa.

O tusitusiga paia sa tusia e perofeta o loo ta’u mai ai e uiga ia Iesu.

O isi sa latou molimauina o Ia.

Tatou te lagonaina lona alofa.

Sa vaai Iosefa Samita ia te ia ma sa faatonuina ina ia toefuatai lana ekalesia.

Afai e ia i tatou le agaga tatalo, o le a molimau mai le Agaga Paia ia i tatou o loo soifua Iesu.
Usu pe faitau upu o le “Faatuatua” (Tusipese a Tamaiti, i.–).
Fai i tamaiti e faitau le Mataio 17:20. Faamatala atu o se fatu sinapi e matua laitiiti, ae e mafai ona tupu ma avea o se laau mafala. Afai e malosi lo tatou faatuatua faapei o se fatu o lo o faamoemoe e tupu ma avea ma se laau, e mafai ona tatou faataunuuina mea tetele.

Faaiuga

Molimau

Molimau atu afai tatou te faatuatua ia Iesu Keriso, e mafai ona tatou faia vavega e pei o tagata i le vaitaimi o Iesu. Atonu e te manao e faamatala atu se vavega mai lou olaga po o le tofi foi o se tamaititi o le vasega e faaali mai se vavega o se mea na tupu i lona olaga.

Tusi Fautuaina e Faitau i le Fale

Ia fautuaina tamaiti e suesue i le Mareko 2:1–12 i le fale e fai ma toe faamanatu o lenei lesona.

Tofi se tamaitiiti e faia le tatalo faaiu.