Lesona 13

Ua Faamalolo E Iesu Mai

Faamoemoega

Ina ia fesoasoani i tamaiti ia maua le naunautaiga e faaalia ai le alofa ma le agalelei i isi e pei ona faia e Iesu i lona faamaloloina o mai.

Sauniuniga

Suesue ma le agaga tatalo le Mataio 8:5–10, 13; 25:34–40; Mareko 1:40–45; Luka 4:38–40; 7:11–17; ma le Ioane 4:46–54; 13:34–35. Ona suesue lea o le lesona ma iloilo pe faapefea ona e manao e aoao atu le tala faatusi paia (tagai “Saunia o Au Lesona,” i. 0 [vi], ma le “Aoao Atu Mai Tusitusiga Paia,” i. 0 [vii] ).
Filifili ia fesili e talanoaina ma gaoioiga e faamauoa mai ai lea o le a aafia ai tamaiti ma o le a sili ona fesoasoani ia i latou ia maua le faamoemoega o le lesona.
Mea e manaomia:
1. Se Tusi Paia po o se Feagaiga Fou mo tamaiti taitasi.

Faalautelega Fautuaina o le Lesona

Tofi se tamaititi e faia le tatalo amata.

Gaoioiga e Faatosina Mai Ai

Faamatala atu le tala e uiga ia Hipa J. Kurene o lo o taua i lalo, lea na avea ma Peresitene lona fitu o le Ekalesia.

Sa pulupulu le ofu manifinifi o Hipa ma ua maalili lava. Toeititi lava oo i lona aso fanau, ma e na o le pau lava le mea o lo o ia manao i ai, o sona ofu mafanafana. Ae peitai, e le mafai ona faatau sona ofu ona o lo latou matitiva. O nisi taimi e latou te vave momoe ai ona ua leai se suauu e faamafanafana ai le fale, ao nisi foi taimi e lagona lava e ia le fia ai ona e le lava meaai. Mo le sueina o le tupe, e masani lava ona galue le tina o Hipa i le leva o le po, mo le suiina o ofu o isi tagata.

I le aso fanau o Hipa, sa tuuina atu ai e lona tina ia te ia se ofu talaloa mafanafana matagofie sa suiina i fasiie e totoe mai suisuiga. Sa le mafai ona faatali Hipa i lona fia alu atu i fafo ina ia faalogoina le mafanafana o lona ofu.

I ni nai vaiaso mulimuli ane, sa vaaia ai e Hipa se alii e pei lava o ia o lo o tagi. O lo o ofuina na o lona mitiafu limauumi, ma ua iloa e Hipa ua matuai maalili lava o ia. Sa tilotilo mai lenei alii i le ofu talaloa mafanafana o Hipa. Sa tu Hipa, e aunoa ma ni ona mafaufauga, tatala le ofu talaloa ma tuuina atu i le tamaititi.

I le aoauli lena sa vaaia e le tina o Hipa o lo o ofuina lava e Hipa lona ofu talaloa tuai. Sa ia fesili, “A o fea lou ofu talaloa fou?” Sa mafaufau Hipa pe faapefea ona ia tauina atu i lona tina. Ona ia faapea atu lea, “Sa ou vaaia se alii o lo o sili atu ona ia manaomia nai lo a’u, o lea sa ou tuuina atu loa i ai.”

“Aisea na e le tuuina atu ai lou ofu tuai?” o lana fesili lea.

Sa vaai atu Hipa i lona tina, ma lona faamoemoe o lo o ia malamalama, ma ia iloa ai ua faatumulia ona mata i loimata. Sa ia opoina o ia, ao ia taliina lana lava fesili. “Ioe e le mafai, Hipa,” o lana tala lea. “Ioe e te le mafai.” (Siiina mai i le “O le Ofu Talaloa,” sa toe faamatala e Lucile C. Reading, Children’s Friend, Nov. 1966, p.5).

Fesili atu i tamaiti e mafaufau pe na faapeī lagona o Hipa ina ua ia vaaia le tamaititi o lo o tagi ona o le maalili. Faamatala atu sa i ai lagona alofa ma le agalelei o Hipa mo le tamaititi. Ua manao Iesu ina ia tatou alolofa atu i isi e pei ona faia e Peresitene Kurene. Faamatala atu o lo o faaalia e lenei lesona faataitaiga na faia e Iesu i le alofa ma le agalelei e ala i le faamaloloina o mai.

O Le Isi Gaoioiga e Faatosina Mai Ai

Ia tusia upu taitasi mai le Ioane 13:34 i luga o ni fasipepa. Faafefiloi pepa ma tuuina atu i tamaiti e toe faatulaga sao. Ia faaaoga a latou tusitusiga paia pe a manaomia le fesoasoani.

Tala Faatusi Paia

Aoao atu tala nei ia Iesu ma ana faamalologa faavavega. (Mo ala fautuaina e aoao atu ai le tala faatusi paia, tagai i le “Aoao Atu Mai Tusitusiga Paia,” i. vii.) Fesoasoani i tamaiti ina ia malamalama e alofa tele Iesu ma agalelei i e mamai.

Tala Faatusi Paia

O le faamaloloina o le auauna a le taitai o le toaselau (Mataio 8:5–10, 13). Faamatala atu o le taitai o le toaselau o se tagata Roma na te faatonuina fitafita e toatele. Sa ia faalogo e uiga ia Iesu ma sa ia faatuatua ia te ia.
Faamaloloina o le lepela (Mareko 1:40–45). Faamatala atu o lepela e mafatia i faamai matautia o le pau. Ona o le mai o le lepela e vave ona pipisi, o le mafuaaga lea o le lē faatagaina o i latou e nonofo i taulaga ma sa alofia foi e tagata e le maua i le lepela.
Faamaloloina o le tina o le toalua o Peteru ma le toatele o isi (Luka 4:38–40).
Toe faatulai mai le oti le tama a le fafine ua oti lana tane (Luka 7:11–17).
Faamaloloina se atalii o se tasi tamalii (Ioane 4:46–54).

Talanoaga ma Fesili e Faatatau I Ai

Suesue fesili ma mau o lo o taua i lalo a o e saunia lau lesona. Faaaoga fesili e te lagona e sili ona fesoasoani ai i tamaiti ia malamalama i mau ma faaaoga ai mataupu faavae i o latou olaga. O le faitauina faatasi ma tamaiti o mau i le vasega o le a fesoasoani latou te mauaina ai malamalamaaga i tusitusiga paia.

Talanoaga ma Fesili e Faatatau I Ai

E te manatu aisea na faia ai e Iesu ia vavega? (Mareko 1:41; Luka 7:13; Ioane 9:1–3.)
Na faapefea ona aafia olaga o isi tagata sa auai i nei faamalologa? (Luka 7:2; 12; Ioane 4:52–53.)
O a ni uiga taua maualuga e manaomia ona faia i o tatou olaga pe afai tatou te mulimuli i faataitaiga a le Faaola o lo o i nei tala? (Ioane 13:34–35. Atonu o le a e manao e tuuina atu le taimi i tamaiti e vasevase ai nei fuaiupu.) E faapefea ona o tatou faaali atu lo tatou alolofa, agalelei, ma le manatu i isi o lo o manaomia le fesoasoani? Ia valaaulia tamaiti e faamatala mai ni mea na tutupu ma ni o latou lagona i e fesoasoani atu ia i latou.
Pe iloa ea e Iesu tagata uma na te faamaloloina? (Mataio 8:5–8.) O le a se mea o tauina mai e lea mea ia i tatou i e e tatau ona tatou fesoasoani i ai pe a manaomia?
Ina ua uma ona faamalolo e Iesu lepela, o le a le mea na Ia fai atu ia te ia e fai? (Mareko 1:43–44.) O le a le mea na tauina mai e lea mea ia i tatou e uiga i le ala tatou te fesoasoani atu ai i isi?
E faapefea ona o tatou vavalalata ma lo tatou Tama Faalelagi ma Iesu i le tuuina atu o la tatou fesoasoani i e manaomia? (Mataio 25:45). E faapei ou lagona pe a e fesoasoani atu i se tasi? Valaaulia tamaiti o le vasega e faamatala mai ni mea na tutupu ia i latou e ala i lo latou fesoasoani atu i nisi na manaomia po o lo latou mauaina foi o le fesoasoani mai isi.

Gaoioiga e Faamauoa Ai

E mafai ona e faaaogaina se tasi pe sili atu foi o nei gaoioiga i soo se taimi o le lesona pe faaaoga foi o se toe iloiloga, otootoga, po o se lu’i.

Tofi se tamaititi e faitau le 1 Ioane 3:18. Faamatala atu o lo o tauina mai e le fuaiupu lenei ia i tatou e le gata ina o tatou tau atu i tagata tatou te alolofa ia i latou, a ia faailoa atu lo tatou alofa e ala i a tatou galuega. O se mea tatou te faia i se tasi e faailoa atu ai lo tatou alolofa ia i latou. Tuuina atu i tamaiti e faailoa mai auala e mafai ai ona faaalia lo latou alolofa i o latou aiga ma uo.
Ia faitauina e se tamaititi upusii nei a Peresitene Spencer W. Kimball: “Ua silafia i tatou e le Atua, ma na te leoleoina i tatou. Ae masani lava, e auala mai i le isi tagata na te faafetauia ai o tatou manaoga” (Galuega Laiti o le Auauna Atu,” O Le Liahona, Tesema. 1974, itu. 5). Fai atu i tamaiti e faamatala mai se mea na tupu ina ua faataunuuina e le Tama Faalelagi ona manaoga e ala i le isi tagata. E mafai foi ona e faamatala atu i tamaiti e uiga i se tagata e te iloa na fesoasoani i se isi tagata na manaomia. Faamanino atu o lenei tagata sa ia faatupuina le alofa, agalelei, ma manatu mamafa i isi ma sa ia faaalia atu lena alofa e ala i galuega auauna atu.
Ia faitau e tamaiti mau nei o lo o taua i lalo e uiga i le auauna atu i isi: Mataio 25:34–40 ma le Mosaea 2:17–18, 4:14–15. Ia faia se lisi o mea o lo o tauina mai i mau e tatau ona tatou faia mo isi. Ia tuu atu i tamaiti e filifili ni galuega auauna atu e mafai ona o latou faatinoina i le vaiaso o le a sau.
Ia vaevae le vasega i ni vaega toalaiti ma tuuina atu i vaega taitasi tulaga e pei ona taua i lalo. E mafai foi ona e faia nisi mea e faaopoopo i ai. Tuu atu i tamaiti e faatino mai auala e mafai ona faaali atu ai le alofa ma le agalelei ma le auauna atu ai i tagata.

O se tamaitiiti fou ua sau i le Peraimeri ae leai se tasi e masani ai.

Ua mai se tamaitiiti o lau vasega o le Peraimeri.

O lau uo e le o se tagata o le Ekalesia a Iesu Keriso o le Au Paia o Aso e Gata Ai.

Ua faaesea se tasi o lau uarota po o le paranesi.

O lo o pisi lava ou matua ma ua fesiligia lau fesoasoani mo le vaaiga o si ou uso po o lou tuagane laititi.

Ua upuleaga e se tasi sau uo.

Faaiuga

Molimau

Faaali atu lou agaga faafetai i le soifuaga ma faataitaiga a le Faaola. Molimau atu o loo tatou mulimuli i aoaoga a Iesu pe a tatou faaali atu lo tatou alolofa ma le agalelei i e o loo siosiomia ai i tatou. Fautua atu i tamaiti ao faagasolo le vaiaso, ia taumafai e faaali atu lo latou alolofa ma faia ni galuega laiti e auauna atu ai i tagata o lo latou aiga ma isi.

Tusi Fautauina e Faitau i le Fale

Ia fautuaina e suesue e tamaiti le Mareko 1:40–45 ma le Luka 7:11–17 i le fale e fai ma toe faamanatu o lenei lesona.

Tofi se tamaitiiti e faia le tatalo faaiu.