Lesona 47

E Mafai E Le Perisitua Ona Faamanuiaina O Tatou Olaga (Lesona Faasauniuni mo le Perisitua)

Faamoemoega

O lenei lesona ua tusiaina ina ia fesoasoani ai i tamaiti ua ta’isefulutasi tausaga le matutua ina ia malamalama i faamanuiaga ma tiutetauave o le perisitua. E tatau ona aoaoina atu lenei lesona a o le i aulia e le tamaitiiti muamua o lau vasega le sefululua o ona tausaga.

Sauniuniga

1. Suesue ma le agaga tatalo le “Molimau a le Perofeta o Iosefa Samita” i le faatomuaga o le Tusi a Mamona po o le Talafaasolopito o Iosefa Samita 2:29–54, 59, 66–72; Mataupu Faavae ma Feagaiga 13, e aofia ai le faaulutala: Mataupu Faavae ma Feagaiga 121:34–36.

2. Suesue le lesona ma fuafua pe faapefea ona e manao e aoao atu i tamaiti le tala faatusi paia. Filifili ia fesili e talanoaina ma gaoioiga e faamauoa mai ai na o le a sili ona fesoasoani i tamaiti e maua ai le faamoemoega o lenei lesona.

3. Mea e manaomia:

   1. Se Tusi a Mamona mo tamaiti uma.

   2. Se Mataupu Faavae ma Feagaiga.

   3. Se mea e maua mai ai le malamalama e pei o se moliuila, se matauila, po o se moli matagi.

   4. Ata 7-1, Iesu le Keriso (Taga o Ata o le Talalelei 240; 62572); Ioane le Papatiso o loo Faaee atu le Perisitua Arona (Taga o Ata o le Talalelei 407; 62013); ma le Faauuina o le Perisitua (62341).

Faalautelega Fautuaina o le Lesona

Tofi se tamaitiiti e faia le tatalo amata.

Gaoioiga e Faatosina Mai Ai

Faaali atu se mea e maua mai ai le malamalama.

Gaoioiga e Faatosina Mai Ai

• O le a se mea e moomia ina ia maua ai e lenei mea le malamalama? Afai e i ai sau moliuila, ia faaali atu e moomia ni maa, o se matauila, ma se ki e mafai ona galulue uma ina ia maua ai se malamalama. O se matauila e tatau ona lelei ona totoga ma e tatau ona faamau i se soketi lea e faapipii atu i le mea e maua mai ai le malosiaga. E tatau foi ona faaola le ki ina ia mafai ai ona sosolo atu le eletise.

Fai atu i tama o le vasega e tutu i luga. O nei tamaiti o lo o i ai le faamoemoega latou te mauaina le perisitua, o se malosiaga lea e sili atu nai lo le eletise aua o le mana lea ma le pule e galue ai i le suafa o le Atua. O lenei mana e mafai ai ona papatisoina fanau a le Tama Faalelagi ma mauaina isi sauniga o le Ekalesia. Ae ina ia mafai ona mauaina lenei mana ma faaaogaina e pei ona faamoemoeina e le Atua, e tatau i se tama ona agavaa ma saunia lelei.

Tala Faatusi Paia

I le faaaogaina o ata i taimi e talafeagai ai, ia aoao atu le tala i le mauaina e Iosefa Samita o papatusi auro ma le faauuina i le Perisitua Arona mai le “Molimau a Iosefa Samita” po o le Talafaasolopito o Iosefa Samita 2:29–54, 59, 66–72. (Mo auala filifilia e aoao atu ai tala faatusi paia, tagai “Aoao atu mai Tusitusiga Paia,” i. vii.) Atonu e moomia lou iloiloina faapuupuu faatasi ma le vasega ia mea na tutupu seia oo atu i le mauaina e Iosefa o papatusi auro.

Talanoaga ma Fesili e Faatatau I Ai

Suesue i fesili nei ma mau mai tusitusiga paia a o e saunia lau lesona. Faaaoga fesili e te lagonaina o le a sili ona fesoasoani i tamaiti ia malamalama ai i mau ma faatatau ai mataupu i o latou olaga. O le faitauina ma talanoaina faatasi ma tamaiti i lau vasega o le a fesoasoani ia i latou e maua ai so latou malamalama.

Talanoaga ma Fesili e Faatatau I Ai

• Aisea na le mafai ai e Iosefa Samita ona faaliliu papatusi auro, maua le perisitua, ma faavaeina le Ekalesia i le taimi lava na uma ai ona maua le Uluai Faaaliga? (E le i saunia o ia; sa moomia lona tuputupuae i le poto ma le malamalama.)

• O le a le galuega taua muamua lava na tau atu e le Alii ia Iosefa na te faia? (Ia faaliliuina ia papatusi auro ina ia mafai ona tatou mauaina le Tusi a Mamona.)

• O le a le mea a Iosefa sa faia i le po na faaali muamua atu ai le agelu o Moronae ia te ia? (Talafaasolopito o Iosefa Samita 2:29–30.) Na faafia ona faaali atu Moronae ia Iosefa Samita a o le i vaai Iosefa i papatusi auro mo le uluai taimi? (Talafaasolopito o Iosefa Samita 2:30, 44–49; e faafa.) O le a sou manatu aisea na ta’u faatolu atu ai e Moronae lana savali?

• O a isi faatonuga na mauaina e Iosefa a o le i mafai e ia ona amata le faaliliuga o papatusi auro? (Talafaasolopito o Iosefa Samita 2:53–54.) Na faapefea ona fesoasoani lenei faatonuga e saunia ai Iosefa Samita mo isi mea ofoofogia o le a ia faia? O le a se mea o lo o e faia e te saunia ai mo le lumanai?

• O a tiute faapitoa e tauaveina e le toatele o alii talavou o le Au Paia o Aso e Gata Ai i le sefululua o o latou tausaga? (Latou te mauaina le Perisitua Arona ma faauuina o ni tiakono.)

• Na faapefea ona mauaina e Iosefa Samita le Perisitua Arona? (Talafaasolopito o Iosefa Samita 2:68–70.) E faapefea ona mauaina e se alii talavou le Perisitua Arona i aso nei? (E faatalanoaina o ia mo le agavaa ma faauuina e ala i le faaee atu o lima e se alii ua i ai le pule e faaauina ai o ia.)

• E tatau faapefea ona saunia tama laiti e mauaina le perisitua? E tatau faapefea ona saunia teine laiti ina ia mauaina faamanuiaga o le perisitua? (O tama ma teine e saunia uma i le auala lava e tasi. Latou te tatalo, ia faatuatua, aoao le talalelei mai matua ma faiaoga, ola agavaa, usitai i poloaiga, auauna atu i isi, faaaloalo i isi, ma ia faamaoni.) (Tagai i le gaoioiga e faamauoa mai ai lona 4.)

• O a tiutetauave o tiakono o i ai i le Ekalesia? (MFF 20:59.) E faapefea ona latou faataunuuina nei tiutetauave? (Tufaina o le faamanatuga, aoina o le taulaga anapogi, avea o se avefeau a le epikopo i sauniga faamanatuga, ma faia se faataitaiga lelei.)

• O ai le tagata muamua lava na ia tufaina atu le faamanatuga? (O Iesu Keriso.) Aisea e matuai paia ai lava le faamanatuga? (O se sauniga e faailoa ai le taulaga na faia e Iesu Keriso mo i tatou.)

  Faitau e oe pe tuu atu i se tasi o le vasega e faitauina le upusii lenei mai ia Elder Jeffery R. Holland: “Matou te faapea atu ia te outou alii talavou o le Perisitua Arona ina ia saunia ma faamanuia ma tufaina atu nei faatusa o le taulaga a le Faaola ma le agavaa ma le faaaloalo. E maeu lenei avanoa ofoofogia ma se faatuatuaga paia ua tuuina atu i se talavou! E le mafai ona ou manatuaina se isi faamatalaga sili atu e mafai e le lagi ona fai atu ia te outou. Matou te alolofa ia te outou. Ia outou ola i se olaga e sili atu, ma ia sili ona outou aulelei pe a outou auai i le faamanatuina o le Talisuaga a le Alii” (Liahona Ianuari, 1996. i. 80).

• E mafai faapefea ona tatou faamamaluina ma lagolagoina uma le perisitua? (Ia taliaina valaauga mai taitai o le perisitua; auauna atu i isi; tautala ma le faaaloalo i taitai o le Ekalesia; ma tatalo mo tama, uso, tagata o le aiga, ma isi o lo o umiaina le perisitua.) (Tagai i le gaoioiga e faamauoa mai ai lona 3.) E mafai faapefea e lou faia o nei mea ona fesoasoani i lou tama po o lou uso po o lou tuagane e faamamaluina lona perisitua? E mafai faapefea ona latou fesoasoani ia te oe ia e mauaina le perisitua po o faamanuiaga o le perisitua?

Gaoioiga e Faamauoa Ai

E mafai ona e faaaogaina se gaoioiga se tasi po o le sili atu foi o nei gaoioiga i soo se taimi o le lesona e avea o se iloiloga, aotelega poo se lu’i.

1. Tusi i luga o ni fasi pepa eseese ia faamanuiaga nei e ala mai i le perisitua:

   • Mauaina o se igoa ma se faamanuiaga

   • Papatisoina

   • Mauaina o le meaalofa o le Agaga Paia

   • Mauaina o se faamanuiaga pe a mai

   • Taumafa i le faamanatuga

   • Auauna atu faamisiona

   • Faaipoipo i le malumalu

   Vaevae le vasega i ni vaega ma tuu atu i ai ni pepa taitasi. Ia valaaulia tamaiti i vaega taitasi e fetufaai mai ni tulaga faaleaiga po o le faaletagata lava ia e faatatau i le faamanuiaga o lo o tusia i luga o a latou pepa.

2. Fai atu i tamaiti e mafaufau i se taimi sa latou i ai i se nofoaga pogisa lava. Ona faamatala atu lea o le tala i se vaega o tagata tafafao o e na malaga atu i totonu o se ana pogisa lava. Ina ua latou oo i totonu o le ana, sa tape loa e le tagata taiala ia moli, ma latou faatali mo ni nai minute, ona fai atu lea i tagata uma e tusi o latou lima i le auala e toe foi ai i fafo. Ina ua toe ola ia moli, sa tofu uma lava tagata ma itu eseese sa tusi atu i ai o latou lima.

   Faamatala atu le upusii lenei mai ia Elder Robert D. Hales: “Afai ana leai le mana o le perisitua i luga o le fogaeleele, semanu o le a maua e le tiapolo lona saolotoga e fesavaliai ma nofotupu ai e aunoa ma se faalavelavea. Semanu o le a le i ai se meaalofa o le Agaga Paia e taitaiina ma faamalamalamaina i tatou; e leai ni perofeta e tautatala mai i le suafa o le Alii; e leai ni malumalu e mafai ai ona tatou osia ai ni feagaiga paia ma faavavau; leai se pule e faamanuia po o le papatiso ai, poo le faamalolo ma faamafanafana ai … Semanu o le a le i ai se malamalama, leai se faamoemoe—ae na o le pogisa” (Liahona Ianuari, 1996, itulau 39).

3. Faitau pe faamatala atu le tala lenei i se mea na faia e se tasi aiga e lagolagoina ai lo latou tama i lona valaauga faaperisitua:

   “Sa matou nonofo [i se Konafesi Aoao i tausaga ua mavae] faatasi ma le fanau e toaono a Elder Ezra Taft Benson, o se tasi o i latou sa ma potu faatasi i le kolisi. Sa faateleina lo’u naunau ina ua tula’i i luga Peresitene McKay ma faailoa mai le failauga o le a sosoo ai. Sa ou vaai atu ma le faaaloalo ia Elder Ezra Taft Benson, o le ou te le i feiloai i ai, o savali ane i le masini faaleotele leo. O ia o se tagata maualuga, e silia ma le ono futu lona umi. O ia o se tagata o lo o i ai se faailoga maualuga, o se alii ua lauiloa i le atunuu atoa o le Failautusi o Faatoaga a le Iunaite Setete ma o se molimau faapitoa a le Alii, o se alii e foliga mai e manino ma mautinoa, o le ua lauga atu i le lalolagi atoa. E le i pine ae tago mai se tasi i lo’u lima. Na punou mai se teine laitiiti ma musumusu mai ia te au ma le gauai, ‘Tatalo mo Tama.’

   “Sa ou le mautonu, o lo’u manatu lea, ‘O lenei savali sa tuufaasolo atu i le laina, ma e tatau ona ou tuuina atu i le isi. E tatau ea ona ou faapea atu, “Tatalo mo Elder Benson”? Pe tatau ea ona ou faapea atu, “E tatau ona e faia se tatalo mo lou tama?” Na ou lagonaina le tatau ona ou vave gaoioi, o lea na ou punou atu ai ma musumusu atu ma le faigofie, ‘Tatalo mo Tama.’

   “Na ou vaaia lea musumusuga ua agai atu i le laina seia oo lava i le mea o lo o nofo ai Sister Benson, ua taufai punonou uma.

   “I le tele o taimi talu mai lena aso ou te manatuaina ai lava le savali—Tatalo mo Tama, o le peteriaka o le aiga. Tatalo mo ia a o avea o se peresitene o le itu po o se faiaoga o aiga. Tatalo mo ia pe a avea ma se failautusi faapitoa o se faalapotopotoga faalemalo, pe afai e faamanuiaina sana pisinisi, pe afai foi e tipi lona totogi. Tatalo mo ia pe a ia tuuina atu se fautuaga i le afiafi faaleaiga. Tatalo mo Tama o lo o galue i ni itula uumi ina ia mafai ona alu Jerold i se misiona ma mafai ona alu atu Diane i le kolisi. Tatalo mo ia pe a lauga atu i le sauniga faamanatuga po o le tuuina atu foi ia Tina o se faamanuiaga ina ia mafai ona toe malosi o ia. A oo i le afiafi, pe a foi mai o ia ua vaivai, ma le fiafia, ia tatalo mo ia. Tatalo mo Tama i mea uma o le a ia faia—o mea laiti ma mea tetele.

   “Ao tuanai atu tausaga, ua tuanai atu foi ia konafesi aoao, ma soo se taimi lava e tulai ai i luga Peresitene Benson e lauga, ou te mafaufau lava, ‘I lana fanau, o lo o salalau solo i lenei konitineta, o lo o aufaatasi i lenei taimi i le tatalo mo lo latou tama.’

   “Ma ua ou talitonu ai o si savali puupuu na tuuina atu i le laina o tagata i tausaga e tele ua mavae o se savali sili lena e mafai e se aiga ona fetufaai ai. O se mana ma se faatuatua faaopoopoina e mafai ona maua e soo se alii na te faafetaiaia ai luitau o aso taitasi o lenei olaga pe afai o sona atalii po o sona afafine i soo se vaega o le lalolagi o i ai o lo o musumusu ane faapea, ‘Tatalo mo Tama’” (Elaine McKay, “Pray for Dad,” New Era, June 1975, p. 33).

4. Afai tatou te ola i le talalelei o le a tatou saunia e taliaina tiutetauave ma olioli i faamanuiaga o le perisitua. Faitau le ‘O O’u Tulaga o le Talalelei” (Tamaitusi O O’u Aso o Faataunuuga [35317 890], faavaa pito i tua), taofi pe a mavae ia tulaga taitasi ma tuu atu i tamaiti e mafaufau po o le a lo latou ola agavaa o i ai i le tausiga o lena tulaga. A maea ona e faitauina le lisi, atonu o le a e manao e iloilo e ala lea i lou faia o taga po o le tauina atu o upu autu.

   O O’u Tulaga o le Talalelei

   1. O le a ou manatua a’u feagaiga o le papatisoga ma faalogo i le Agaga Paia.

   2. O le a ou faamaoni i le Tama Faalelagi, o isi, ma a’u lava.

   3. O le a ou saili ni uo lelei ma tausi i isi i le agalelei.

   4. O le a faia lelei o’u lavalava ina ia faaali atu ai lo’u faaaloalo i le Tama Faalelagi ma a’u lava.

   5. O le a ou faitau ma matamata na o mea e logoleleia i le Tama Faalelagi.

   6. O le a na o musika e logoleleia i le Tama Faalelagi ou te faalogo i ai.

   7. O le a ou faaaogaina le suafa o le Tama Faalelagi ma Iesu Keriso ma le faaaloalo. Ou te le tauto pe ou te faia ni upu eleelea.

   8. O le a ou tausia lou tino ina ia mama ma paia.

   9. Ou te le ‘ai pe inu lava i soo se mea oona.

   10. O le a ou faia i le Aso Sapati na o mea ou te lagonaina ai lo’u latalata atu i le Tama Faalelagi.

   11. O le a ou filifili le sa’o. Ou te iloa e mafai ona ou salamo pe a ou faia se mea sese.

   12. O le a ou ola nei ina ia ou agavaa e alu atu i le malumalu ma faia se misiona.

   13. O le a ou mulimuli i le fuafuaga a le Tama Faalelagi mo a’u.

5. Faamatala atu le upusii lenei mai ia Peresitene Gordon B. Hinckley, le Peresitene lona sefululima o le Ekalesia: O lenei ekalesia e le o se ekalesia a le Peresitene. O lona ao o le Alii o Iesu Keriso, o lona suafa lea e tauaveina i o tatou luga uma i le taimi o le papatisoga. O lo o tatou i ai faatasi uma lava i lenei galuega ofoofogia. Ua tatou i ai iinei ina ia tatou fesoasoani i lo tatou Tama i Lana galuega ma Lona mamalu; ‘o le faaofuina lea o le tagata i le tino ola pea ma le ola e faavavau’ (Mose 1:39). O lo outou tiute e tutusa lona taua e pei foi o lo’u tiute. E leai se valaauga i lenei ekalesia e laitiiti pe faatauvaa. O i tatou uma lava i le faataunuuina o o tatou tiute e aafia ai olaga o isi” (Liahona, Iulai 1996, i. 76).

6. Usu pe faitau upu o le “O Lo o Tautalagia Iinei le Alofa” (Tusipese a Tamaiti, i. 190).

Faaiuga

Molimau

Atonu e te manao e tuuina atu lau molimau e faapea o le perisitua na toefuataiina mai ma o le pule lena e galue ai mo le Atua. Ia uunai alii ina ia ola agavaa nei e umia le Perisitua Arona, ma tagata uma o le vasega ina ia ola agavaa e mauaina faamanuiaga uma o le perisitua. Ia uunai tamaiti e faamamalu ma lagolagoina o latou taitai perisitua.

Fetufaaiga Fautuaina mo le Aiga

Ia uunai tamaiti taitoatasi e fetufaai ma o latou aiga se vaega patino o lenei lesona, e pei o se tala, fesili, po o se gaoioiga, po o le faitau faatasi foi ma o latou aiga ia le “Tusi Fautuaina e Faitau i le Fale.”

Tusi Fautuaina e Faitau i le Fale

Ia fautuaina tamaiti e suesue le Mataupu Faavae ma Feagaiga e 121:34–46 i le fale e avea o se toe faamanatu o lenei lesona.

Tofi se tamaitiiti e faia le tatalo faaiu.