Ua Molimau Mai Saulo e Uiga ia Iesu Keriso

Faamoemoega

Ia fesoasoani i tamaiti taitoatasi ina ia mananao e lototetele i le molimau atu e uiga ia Iesu Keriso.

Sauniuniga

Suesue ma le agaga tatalo le Galuega 13:2–4; 14 ma le 16:16–34. Ona suesue lea o le lesona ma iloilo pe faapefea ona e manao e aoao atu le tala faatusi paia. (Tagai “Saunia o Au Lesona,” itulau 0 [vi,] ma le “Aoao Atu Mai Tusitusiga Paia,” itulau 0 [vii].)
Filifili ia fesili e talanoaina ma gaoioiga e faamauoa mai ai lea o le a aafia ai tamaiti ma o le a sili ona fesoasoani ia i latou ia mauaina le faamoemoega o le lesona.
Saunia se kopi o le paso o loo i le faaiuga o le lesona. Tusi le upu LOTOTOA i ni mataitusi lapopoa e faalava i le itu i tua a o le i otiina vaega eseese.
Mea e manaomia:
1. Se Tusi Paia po o se Feagaiga Fou mo tamaiti taitasi.
2. Se fasipepa ma se penitala mo tamaiti taitoatasi.

Faalautelega Fautuaina o le Lesona

Tofi se tamaitiiti e faia le tatalo amata.

Gaoioiga e Faatosina Mai Ai

Ia tufatufa atu vaega o le paso i tamaiti. Ia talanoaina le uiga o upu taitasi o lo o i vaega o le paso ma ia faafetaui e i latou vaega taitasi. Ia fuli i luga e tamaiti fasipepa ma ia faafetaui le itu i tua o le paso ina ia latou maua ai se isi upu. Tusi le upu LOTOTOA i luga o le laupapa.

Gaoioiga e Faatosina Mai Ai

O le a le uiga o le lototoa? Ia faamatala atu o upu o lo o i vaega o le paso e fesoasoani lea e faamatala le uiga o le lototoa.
O a upu o lo o tusia i le paso e te manatua? Ia tusi upu pe faapipii vaega o le paso i lalo o le upu LOTOTOA.

Tala Faatusi Paia

Ia toe faamanatu puupuu le liua o Saulo i le Talalelei, ma ia ta’u atu i tamaiti na suia le igoa o Saulo ia Paulo. Sa le toe faasaua Paulo i soo o Iesu ma sa avea o ia ma se Aposetolo lototoa ma se faifeautalai mo Iesu Keriso.

Ia aoao atu i tamaiti le tala e uiga ia Paulo ma Panapa o lo o maua i le Galuega 13:2–4; 14 ma le tala e uiga i le tuuina o Paulo ma Sila i le Falepuipui e pei ona maua i le Galuega 16:16–34. (Mo ala fautuaina e aoao atu ai tala faatusi paia, tagai “Aoao Atu Mai Tusitusiga Paia,” itulau vii.) Ia fai atu i tamaiti e faalogologo lelei mo auala na molimau atu ai ma le lototoa Paulo, Panapa, ma Sila e uiga ia Iesu Keriso ma lana talalelei.

Talanoaga ma Fesili e Faatatau i Ai

Suesue fesili ma mau o lo o taua i lalo a o e saunia lau lesona. Faaaoga fesili e te lagona o le a sili ona fesoasoani ai i tamaiti ia malamalama i mau ma faaaoga ai mataupu faavae i o latou olaga. O le faitauina faatasi ma tamaiti o mau i le vasega o le a fesoasoani latou te mauaina ai malamalamaaga i tusitusiga paia.

Talanoaga ma Fesili e Faatatau i Ai

O le a le mea na valaauina ai e le Alii Paulo ma Panapa e fai? (Galuega 13:2–4.)
Ina ua uma ona faamalolo e Paulo ma Panapa se tagata ua pipili i Lusa, o ai sa manatu tagata o i laua ia? (Galuega 14:11–12.) (Ia faamatala atu e faapea o Seu ma Hereme o ni Atua pepelo ia sa tapuai i ai tagata. Sa leiloa e i latou le Tama Faalelagi ma Iesu Keriso.) O le a le mea sa taumafai Paulo ma Panapa e aoao atu i tagata e uiga ia Iesu Keriso? (Galuega 14:14–17.)
O a mea na fai e tagata Iutaia o Anetioka ma Ikonio ia Paulo? (Galuega 14:19.) O le a le pogai ua e manatu ai sa faaauau pea lana talaiga o le talalelei e tusa lava pe leaga mea a tagata sa fai mai ia te ia?
Aisea na feita ai nisi tagata i Maketonia ina ua faamalolo e Paulo ma Sila se fafine e ala i le tuliesea o agaga leaga mai ia te ia? (Galuega 16:19.) O le a le mea na faia e ia tagata ia Paulo ma Sila? (Galuega 16:20–23.)
O le a le mea na fai e Paulo ma Sila a o i ai i laua i le falepuipui? (Galuega 16:25.) Aisea e te manatu ai na tatalo i laua ma usu viiga i le Atua? O le a se suiga ua e manatu na mafua ona o mea sa laua fai i isi tagata o le falepuipui?
Aisea e te manatu ai sa nonofo pea Paulo ma Sila i le falepuipui ina ua matala faitotoa o le falepuipui ona o se mafuie? (Galuega 16:27–31.) Pe sa faapefea ona faamanuiaina le leoleo o le falepuipui ma lona aiga ona o mea sa la fai? (Galuega 16:32–34.) O a ituaiga o avanoa tatou te maua e molimau atu ai ma aoao atu i isi e uiga ia Iesu Keriso?
Ia faitau e tamaiti le Galuega 14:3 ma le 16:18, 25, 31. Pe faapefea ona faaalia e nei mau sa lototoa Paulo i lana molimau e uiga ia Iesu Keriso i soo se mea sa ia alu atu i ai? Pe mafai faapefea ona tatou faailoa atu i isi tagata ua ia i tatou ni molimau malolosi e uiga ia Iesu Keriso?
O a nisi o lu’i tatou te feagai a o tatou taumafai e lototoa i le molimau e uiga ia Iesu Keriso?

Ia tuuina atu se lu’i i tamaiti ina ia mafaufau i ni mea patino e mafai ona latou faia i lenei vaiaso e faaali atu ai ua ia i latou ni molimau malolosi e uiga ia Iesu Keriso. Ia tusia e i latou ia le itiiti ifo i le tasi se manatu ma ia tuu le pepa i se mea e mafai ona latou iloa atu ai i le tele o taimi. E mafai foi ona e faatonuina i latou e tusi upu mai le paso ia latou pepa.

Gaoioiga e Faamauoa Ai

E mafai ona e faaaogaina se tasi pe sili atu foi o nei gaoioiga i soo se taimi o le lesona pe faaaoga foi o se toe iloiloga, otootoga, po o se lu’i.

Ia saunia fasipepa o upu o lo o tusia i lalo po o le tusi o ia upu i luga o le laupapa.
- Ia tuuina atu malosi le molimau e uiga ia Iesu Keriso
- Sa aoao atu e uiga “i le Atua soifua”
- “Sa tatalo ma pepese i viiga i le Atua”
- Sa nonofo i le falepuipui ma faasaoina le leoleo o le falepuipui
- Sa aoao atu i le leoleo o le falepuipui ina ia “talitonu i le Alii o Iesu Keriso”
Ia tusi mau nei i ni fasipepa eseese: Galuega 14:3, Galuega 14:15, Galuega 16:25, Galuega 16:28, Galuega 16:31.

Faaali atu fasipepa o upu ma ia tufatufa atu mau i tamaiti. Ia faitau e tamaiti mau, ia auauai ma filifili po o le fea fasipepa o upu e fetaui. Ia faamatala atu sa avea Paulo ma molimau lototoa a Iesu Keriso i soo se mea na alu atu i ai ma soo se mea na ia faia.
Faitau upu o lo o tusia i fasipepa o le paso ma ia talanoaina e tamaiti le auala e mafai ai ona latou molimau atu ai ma le lototele e uiga ia Iesu Keriso i nei mea. Atonu e te manao ia tusia tulaga, e pei o ia o lo o i lalo, i luga o fasipepa. Ona filifili lea e tamaiti taitoatasi o se pepa ma ia tau mai le auala o le a filifili ai o ia e faafetaiai lena lu’i:
- Ua taufaalili mai se uo ia te oe ona ua e le alu e aau i le Aso Sapati.
- Na valaaulia oe e te alu i se tifaga e le talafeagai ma tulaga o le Ekalesia.
- Ua amata ona fai e au uo ulaga ma tala leaga.
- Sa tago se tasi o au uo i se mama i le faleoloa ma tuu i totonu o lana taga ma uunaiina oe ina ia e faia lea lava mea e tasi.
- Ua faia e se tasi o lau vasega faamatalaga sese e uiga i mataupu o le ekalesia.
- Ua faaosoosoina oe e tilotilo atu i le pepa a se isi tagata a o faia se suega.
Ia faia e tamaiti taga o le tala e uiga ia Paulo ma Sila i le falepuipui. Ona faafoliga lea o loo latou faia ni faatalanoaga o Paulo, Sila, tagata i le falepuipui, leoleo o le falepuipui, ma lona aiga. Ia fesili atu ia Paulo ma Sila po o le a le pogai na tuu ai i laua i le falepuipui ma po o le a le mea na tupu ia i laua iina. Ia fesili atu i isi tagata i le falepuipui po o le a se lagona na maua e i latou ina ua tatalo Paulo ma Sila ma fai pesega ma tatala ese mafuie faitotoa o le falepuipui. Fesili i le leoleo o le falepuipui po o le a se lagona na ia maua ina ua ia iloa ua matala faitotoa o le falepuipui ma pe aisea na papatiso ai o ia ma lona aiga.
Ia usu pe faitau upu o le pese “O le a Ou Lototoa” (Tusipese a Tamaiti, i. 162.), “Fai le Mea Tonu” (Tusipese a Tamaiti, i. 158), po o le “Tu Mo le Mea Moni” (Tusipese a Tamaiti, i. 159).

Faaiuga

Molimau

Ia tuuina atu lau lava molimau e uiga ia Iesu Keriso. Afai e talafeagai ai, ia faamatala atu se taimi na faamanuiaina ai oe e le Tama Faalelagi ina ua e molimau atu ma le lototoa e uiga ia Iesu Keriso.

Tusi Fautuaina e Faitau i le Fale

Ia fautuaina e suesue e tamaiti le Galuega 16:16–34 i le fale e fai ma toe faamanatu o lenei lesona.

Tofi se tamaitiiti e faia le tatalo faaiu.

Ata

puzzle