Lesona 23

O Le Leoleo Mamoe Lelei

Faamoemoega

Ina ia aoao atu tamaiti e talitonuina Iesu aua o ia o le Leoleo Mamoe Lelei.

Sauniuniga

Suesue ma le agaga tatalo le Ioane 10:1–18, Mareko 10:13–16, ma le 3 Nifae 11:37–38. Ona suesue lea o le lesona ma iloilo pe faapefea ona e manao e aoao atu le tala faatusi paia. (Tagai “Saunia o Au Lesona,” i. 0 [vi,] ma le “Aoao Atu Mai Tusitusiga Paia,” i. 0 [vii]).
Tusi faitau faaopoopo: Mataio 19:13–15 ma le Luka 18:15–17.
Filifili ia fesili e talanoaina ma gaoioiga e faamauoa mai ai lea o le a aafia ai tamaiti ma o le a sili ona fesoasoani ia i latou ia mauaina le faamoemoega o le lesona.
Mea e manaomia:
1. Se Tusi Paia po o se Feagaiga Fou mo tamaiti taitasi.
2. Se Tusi a Mamona mo tamaiti taitasi.
3. Ata 7–19, O Le Leoleo Mamoe Lelei, ma le 7–24, O Keriso ma Tamaiti (Taga o Ata o le Talalelei 216; 62467).

Faalautelega Fautuaina o le Lesona

Tofi se tamaitiiti e faia le tatalo amata.

Gaoioiga e Faatosina Mai Ai

Faamatala atu i tamaiti o le a e tauina atu ia i latou tiutetauave patino e gafa ma se tagata. Tau atu i ai o le a e tauina atu se faaataataga o mea a lena tagata e fai. Afai latou te manatu ua latou iloa mea a lena tagata e fai, ona sau lea i luma ma musumusu mai i lou taliga le tali. Afai e sao i latou, ona tu ai pea lea. Ae afai e sese, ona nofo lea i lalo. Faaaoga faaataataga nei:

Gaoioiga e Faatosina Mai Ai

Ou te galue i fafo.
Ou te manatu mamafa ia i latou o loo i lalo o la’u vaavaaiga.
O nisi taimi ou te tau ma manu feai po o tagata gaoi.
Ou te mataala.
Ou te puipui i ē iti.
Ou te sailia i latou ua leiloloa.
O i latou o lo o ou vaavaaia, latou te iloa lou leo ma mulimuli mai.
Ou te saili i meaai lelei ma vai mama mo i latou o loo ou vaaia.
Sa faasilasila atu e agelu le fanau mai o Iesu Keriso i nisi tagata o loo i ai nei tiutetauave.
Ou te leoleoina mamoe.

A iloa uma loa e tamaiti o lea tagata o le leoleo mamoe, ona toe foi atu lea i o latou nofoaga. Faamatala atu i le taimi o le lesona o le a latou aoao e uiga i le Leoleo Mamoe Lelei, o Iesu Keriso lea.

Tala Faatusi Paia

Faaali le ata o le Leoleo Mamoe Lelei. Faamatala atu o le leoleo mamoe o loo faaalia ai le fegalegaleaiga a Iesu ma ona soo aua o leoleo mamoe lelei e tuuina atu atoatoa o latou taimi i a latou mamoe. I vaitaimi faatusi paia, pe a aveina atu le lafu i totonu o le pa (puipui maualuluga ma pito talatala e tetee atu ai luko mai lo latou taumafai e feosofi i totonu) i le po, o leoleo mamoe taitasi latou te taitaiina atu mamoe e ala lea i lo latou taooto faalalava i le pa e ulufale atu ai mamoe, ma avea ai ma faitotoa (Ioane 10:7, 9). Afai e osofaia e se manu feai le pa, e tuuina atu e le leoleo mamoe lona ola mo le faasaogalemuina o mamoe. Afai e valaau e leoleo mamoe a latou lafu i le taeao, e maitau lava e le mamoe le valaau a lona matai. Mo le saogalemu lelei o le mamoe, e tatau ona mulimuli atu i lona matai ao ia taitaiina i latou i le vao mua.

Aoao atu i tamaiti le faataoto i le Leoleo Mamoe Lelei mai le Ioane 10:1–6.

(Mo ala fautuaina e aoao atu ai tala faatusi paia, tagai “Aoao Atu Mai Tusitusiga Paia,” i.0 ( vii.)

Talanoaga ma Fesili e Faatatau I Ai

Suesue fesili ma mau o lo o taua i lalo a o e saunia lau lesona. Faaaoga fesili e te lagona o le a sili ona fesoasoani ai i tamaiti ia malamalama i mau ma faaaoga ai mataupu faavae i o latou olaga. O le faitauina faatasi ma tamaiti o mau i le vasega o le a fesoasoani latou te mauaina ai malamalamaaga i tusitusiga paia.

Talanoaga ma Fesili e Faatatau I Ai

Aisea e mulimuli ai mamoe i o latou leoleo mamoe? (Ioane 10:4.) E te manatu o le a le uiga o le “iloa lona leo”? O le leo o ai e tatau ona tatou iloa? E faapefea ona tatou iloa le leo o le Faaola?
O ai le au gaoi faaleagaga ma le au faomea o i ai nei? (Ioane 10:1). (Fesoasoani i tamaiti e mafaufau i tagata po o mea o lo o taumafai e aveesea i latou mai lo latou leoleo mamoe o Iesu.) Aisea na lē taitaieseina ai mamoe e le “au gaoi ma le au faomea”? (Ioane 10:8.) E faapefea ona tatou puipuia i tatou lava mai aafiaga a le tiapolo? O ai e mafai ona fesoasoani e puipuia i tatou mai ia aafiaga? (O le Agaga Paia, o le perofeta, matua, uo lelei, faiaoga, ma le epikopo.)
E faapefea ona Lelei le Leoleo Mamoe o Iesu? (Ioane 10:9–11.) Afai o Iesu o le Leoleo Mamoe Lelei, o ai la i tatou? E faapefea ona fesoasoani le iloa o Iesu o le Leoleo Mamoe Lelei tatou te mulimuli ai ia te Ia?
E faapefea ona faailoa atu le alofa o le Leoleo Mamoe Lelei i ana mamoe? (Ioane 10:11.) O ai na maua mai ai e Iesu le mana e aveese ai lona ola ma toe aumaia? (Ioane 10:17–18. Sa mafai ona maliu o ia ona o lona tina o se tagata ola. Sa mafai foi ona toe ola o ia aua o lona tama, le Tama Faalelagi, e ia te ia le tino ola pea.) O le a le uiga ia i tatou “o le leoleo mamoe lelei e foai atu lona ola mo ana mamoe”? (Ioane 10:11.) E mafai faapefea e le taulaga a Iesu ona toe faatasia i tatou ma lo tatou Tama Faalelagi?

Fesoasoani atu i tamaiti ina ia malamalama o le tasi auala e taua ai Iesu o le Leoleo Mamoe Lelei aua sa ia mafatia mo a tatou agasala, ma ofoina mai lona ola mo i tatou. O le mea lea, o le a tatou toe tutu uma ai ma e mafai foi ona tatou salamo, papatisoina ma faamagaloina a tatou agasala.

Faamatala atu o le a e faamatalaina se tasi tala e faaali ai le alofa o le Leoleo Mamoe Lelei i ana mamoe. Faaali atu le ata o Keriso ma Tamaiti.

Aoao atu le tala ia Iesu ma le Faamanuiaina o tamaiti (tagai i le Mareko 10:13–16.)

Talanoaga ma Fesili e Faatatau I Ai

Aisea na taumafai ai le au soo e vavao tamaiti? (Faaliliuga a Iosefa Samita Mataio 19:13.) O le a le fetalaiga a Iesu ina ua taumafai ona soo e vavao ia i latou? (Mareko 10:14.) O le a le mea na ia faia mo tamaiti? (Mareko 10:16.) O le a sou manatu pe ana faapea o oe o le isi tamaitiiti sa i ai? E faapefea ona faigaofie ona tatou mulimuli ia Iesu ina ua tatou iloa e alofa ia i tatou?
Sa faapea mai Iesu e tatau ona avea i tatou “faapei o se tamaitiiti” pe a tatou fia ulufale atu i le malo o le Atua (Mareko 10:15; Mosaea 3:19; 3 Nifae 11:37–38). O le a sou mafaufau i le uiga o le “avea faapei o se tamaitiiti”? E tatau ona tatou faapei o ai ina ia mafai ona tatou ulufale atu i le malo i le lagi? Aisea e manao ai Iesu tatou te ulufale atu i le malo i le lagi?

Gaoioiga e Faamauoa Ai

E mafai ona e faaaogaina se tasi pe sili atu foi o nei gaoioiga i soo se taimi o le lesona pe faaaoga foi o se toe iloiloga, otootoga, po o se lu’i.

Tuuina atu i tamaiti se manoa pe tusa ma le sefululua inisi lona umi. Fai atu i tamaiti e faataatia a latou manoa faalava i luga ma lalo i luga o le laulau po o luga foi o le sima i o latou luma ma taumafai e aveese le manoa ma i latou. Ona toe fai atu lea i tamaiti e toso a latou manoa agai atu ia i latou. Faatusatusa lenei gaoioiga i le auala e taitaiina ai e leoleo mamoe a latou mamoe. (Ioane 10:4). Faamatala i totonu o Isaraelu, e taitai e leoleo mamoe a latou mamoe i lo latou savavali lea i luma o mamoe. I nisi atunuu, e ave e leoleo mamoe a latou mamoe i se taavale. O Iesu, lo tatou Leoleo Mamoe Lelei, na te taitaiina le auala ma tau mai ia i tatou e mulimuli atu ia te Ia.
Faitau ma talanoaina faatasi ma tamaiti le Salamo 23.
Vavae le vasega i ni vaega toalaiti. Tuu atu ia i latou e mafaufau i auala sa faasino mai ma o loo faasino mai pea e Iesu lona alofa mo i tatou (o nisi o manatu e pei o le totogiina o le Agasala a Atamu, mafatia mo a tatou agasala, aoaoina mai ia i tatou o le talalelei e ala i tusitusiga paia, avea ma se faataitaiga, fesoasoani ia i tatou pe a manaomia, ma isi). Talanoaina le fesoasoani o nei tulaga uma ia i tatou ina ia tatou iloa le alofa o Iesu ia i tatou.
Faitau ma talanoaina le tala ia Iesu ma le faamanuiaina o fanau a Sa Nifae (3 Nifae 17:12–13, 21–24).
Toe faamanatu faatasi ma tamaiti mataupu faavae muamua e tolu o le faatuatua.
Fesoasoani i tamaiti e tauloto le Ioane 10:11.
Usu pe faitau upu o le “Ua Ou Lagona Le Alofa o le Faaola” (Tusipese a Tamaiti, i. 0).

Faaiuga

Molimau

Tuuina atu lau molimau i le alofa o Iesu ia i tatou uma faatasi ai ma lona manao tatou te mulimuli atu ia te Ia. Faamatala se mea na tupu i lou olaga i lou lagonaina o le alofa o Iesu, ina ua e mulimuli ia te Ia ma ua e manuia ai.

Mau Fautuaina e Faitau i le Fale

Fautua atu i tamaiti e aoao le Ioane 10:1–18 i le fale e fai ma toe faamanatu o lenei lesona.

Tofi se tamaitiiti e faia le tatalo faaiu.