O Tupe Iti a le Fafine ua Oti Lana Tane

Faamoemoega

Ina ia uunaia tamaiti e totogi ma le faamaoni le sefuluai ma taulaga anapogi.

Sauniuniga

Suesue ma le agaga tatalo le Mareko 12:41–44, 3 Nifae 24:10; ma le Mataupu Faavae ma Feagaiga 119:4. Ona suesue lea o le lesona ma iloilo pe faapefea ona e manao e aoao atu le tala faaletusi paia. (Tagai “Saunia o Au Lesona,” i. 0 [i,] ma le “Aoao Atu Mai Tusitusiga Paia,” i. 0 [vii]).
Tusi faitau faaopoopo: Luka 21:1–4 ma le Mataupu Faavae ma Feagaiga 64:23.
Filifili ia fesili e talanoaina ma gaoioiga e faamauoa mai ai lea o le a aafia ai tamaiti ma o le a sili ona fesoasoani ia i latou ia mauaina le faamoemoega o le lesona.
Mea e manaomia:
1. Se Tusi Paia po o se Feagaiga Fou mo tamaiti taitasi.
2. Tupe siliva se sefulu (po o le tusi o ni lio se sefulu i luga o le laupapa e suitulaga i tupe).
3. Pepa ma penitala mo tamaiti taitasi.

Faalautelega Fautuaina o le Lesona

Tofi se tamaititi e faia le tatalo amata.

Gaoioiga e Faatosina Mai Ai

Faaali atu tupe e sefulu i le vasega.

Gaoioiga e Faatosina Mai Ai

O ai e manao i tupe nei?
Afai ou te aveina atu tupe uma nei ma oe, pe e mafai ona e toe aumaia le tasi mo au? Aisea? E mafai ona e aumaia le lua po o le tolu ia te au, pe o le toe aumai uma foi?

Faamatala atu ua faatonuina i tatou e le Tama Faalelagi e totogi le sefuluai, o le tuuina atu lea o le tasi vae sefulu o mea uma tatou te maua. Sa ia poloaiina foi i tatou e tuuina atu isi foai e pei o le taulaga anapogi, fesoasoani mo faifeautalai, mo le faaalualuina i luma o lana galuega i lenei fogaeleele.

Faamanatu atu i tamaiti o mea uma lava o lo o i luga o le fogaeleele sa faia e le Tama Faalelagi ma Iesu Keriso. Ua faamanuiaina i tatou e le Tama Faalelagi i ni tino ma ni mafaufau tatou te galulue ma mafaufau ai. O mea uma tatou te maua mai i lenei fogaeleele o se meaalofa mai ia te Ia. E manao le Tama Faalelagi e faaali atu lo tatou loto faafetai, faatuatua, usiusitai e ala i le totogiina o le sefuluai ma isi foai i le Ekalesia.

Tala Faatusi Paia

Aoao atu le tala i tupe a le fafine ua oti lana tane (Mareko 12:41–44). (Mo ala fautuaina e aoao atu ai le tala faatusi paia, tagai “Aoao Atu Mai Tusitusiga Paia,”i.0 ( vii). Faamatala atu o lo o faatonuina mai pea e le Tama Faalelagi ma Iesu tagata ina ia totogi le sefuluai ma nisi foai ina ia fesoasoani mo le faia o mea o lo o manaomia e le Ekalesia.

Talanoaga ma Fesili e Faatatau I Ai

Suesue fesili ma mau o lo o i lalo a o e saunia lau lesona. Faaaoga fesili e te lagona o le a sili ona fesoasoani ai i tamaiti ia malamalama i mau ma faaaoga ai mataupu faavae i o latou olaga. O le faitauina faatasi ma tamaiti o mau i le vasega o le a fesoasoani latou te mauaina ai malamalamaaga i tusitusiga paia.

Talanoaga ma Fesili e Faatatau I Ai

O a mea a tagata mauoa na lafo i le mea e teu ai tupe? (Mareko 12:41.) O le a le mea a le fafine ua oti lana tane na tuu atu i le mea e teu ai tupe? (Mareko 12:42. Faamatala atu o le tupe ititi o se vaega tupe itiiti tele.) Aisea na matuai fiafia ai Iesu i le foai a le fafine ua oti lana tane nai lo tagata mauoa? (Mareko 12:43–44.)
O le a le aofaiga ua faatonuina ai i tatou e le Tama Faalelagi e totogi atu mo le sefuluai? (MFF 119:4. Faamatala atu o “tupe maua” o lona uiga soo se tinoitupe tou te maua. I le faaaogaina o pepa ma penitala, faaali atu i tamaiti le faiga o le sefuluai.) O le a le uiga o le totogi ma le faamaoni o le sefuluai?
O le a le aofaiga ua faatonuina i tatou e le Tama Faalelagi e totogi atu mo le taulaga anapogi? O le a le aofaiga ua ia faatonuina i tatou e totogi atu mo le teugatupe a faifeautalai? Fesoasoani i tamaiti ina ia malamalama, e le tutusa le aofaiga ua faatonuina i tatou e totogi mo le sefuluai ma le taulaga anapogi ma le foai mo faifeautalai, ae tatou te filifilia lava le aofaiga i luga o mea tatou te maua ma o tatou manaoga. Ua talosagaina e le Tama Faalelagi e tatau ona tatou limafoa’i, aua o le tele o la tatou foai, o le tele foi lena o lo tatou faaali atu o lo tatou tautino atu o lo o tatou faia le galuega a le Tama Faalelagi.
O a nisi auala tatou te fesoasoani atu ai mo le faaalualuina i luma o le galuega a le Tama Faalelagi? (Esoto 25:1–8; MFF 124:26–27.) Faamatala atu o tagata o le au paia i aso ua mavae sa talosagaina la latou foai mo le fausiaina o malumalu. I le taimi nei, ua fausia malumalu i soo se itu o le lalolagi, ma o le a faamanuiaina i tatou pe a tatou foai atu pe afai tatou te i ai i se itumalo o lo o fausia ai se malumalu fou.
Aisea ua faatonuina ai i tatou e le Alii e totogi le sefuluai? O a faamanuiaga tatou te maua pe a tatou totogi ma le atoatoa le sefuluai? (3 Nifae 24:10.) O le a le uiga o le a tatala mai pupuni o le lagi mo i tatou? O a ituaiga faamanuiaga tatou te maua pe a tatou totogiina isi foai?

Talanoaina le faamatalaga o lo o i lalo mai ia Peresitene Spencer W. Kimball, le Peresitene lona sefululua o le Ekalesia:

“Ua folafola mai e le Alii o le a tatala mai pupuni o le lagi pe a tatou usiusitai i ana tulafono. O le a ia tuuina mai ia i tatou ni totogi lelei, na te faamasinoina foi i tatou i le faaaluina o a tatou tupe. Na te tuuina mai ia i tatou le malosi sili atu, na te tuuina mai foi le malamalama sili ina ia tatou maua ai ni tulaga lelei. Na te fesoasoani mai foi ia i tatou ina ia mafai ona faia mea tatou te mananao ai” (The Teachings of Spencer W. Kimball, p. 212).

Faamalamalama atu o faamanuiaga silisili tatou te maua mai le totogiina o sefuluai ma isi foai e faaleagaga. O le a faatuputeleina lo tatou faatuatua i taimi uma tatou te filifili ai e usiusitai i le tulafono o le sefuluai ma limafoai mo le taulaga anapogi ma le foai mo faifeautalai.

Talanoaga ma Fesili e Faatatau I Ai

Na faapefea ona faamanuiaina oe po o se tasi e te iloa i le totogiina o le sefuluai po o isi foai? Faamatala i tamaiti ni mea na tutupu ia te oe po o le valaaulia foi o tamaiti e faamatala atu ni mea na tutupu ia i latou ina ua faamanuiaina i latou ona o a latou foai.
O le a le taimi tatou te totogi ai le sefuluai? (E mafai ona tatou totogi le sefuluai i soo se taimi lava o le tausaga, ae sili ona totogi i soo se taimi lava e maua ai se tupe.) O ai tatou te tuuina atu i ai a tatou sefuluai ma foai? (O le epikopo po o ona fesoasoani. O le epikopo na te tuuina atu tupe o le sefuluai i le ofisa autu o le Ekalesia, o lo o i ai taitai o le Ekalesia latou te faafoeina le faaaogaina mo galuega a le Alii. O taulaga anapogi ma foai mo faifeautalai e faaaoga i le eria lava ia; o isi tupe faasili e aveina atu i le ofisa autu o le Ekalesia.
E faapefea ona faaaoga tupe o a tatou sefuluai? (Tagai i le vaega 2 o le gaoioiga e faamauoa ai.) E faapefea ona faaaoga taulaga anapogi? (O taulaga anapogi e lagolagoina le polokalama o le uelefea a le Ekalesia.)
O le a le faatalanoaga o le sefuluai? (O se fonotaga lea e faia faatasi i le tausaga ma le epikopo. Tatou te iloiloina faamaumauga o le sefuluai ma isi foai na totogi ma tau i ai pe o tatou faamaoni i le totogiina o le sefuluai. Tatou te mautinoa o i tatou o ni tagata totogi sefuluai atoatoa pe a tatou totogiina le tasi vaesefulu o mea tatou te maua i le Alii.)
Aisea e te manatu ai e taua pe a tatou naunau e totogi le sefuluai? (Moronae 7:6–8. Afai e laitiiti a tatou tupe maua, pe tatau pea ona totogi a tatou sefuluai? Aisea?

Talanoaina le faamatalaga lenei a Peresitene Spencer W. Kimball: “O lo o i ai tagata o lo o latou faapea mai e le mafai ona totogi a latou sefuluai ona e laititi la latou tupe maua … E leai se tasi e mativa i le totogiina o le sefuluai” (The Teachings of Spencer W. Kimball, p. 212).

Talanoaga ma Fesili e Faatatau I Ai

Aisea e taua ai le totogi o isi foai? E faapefea ona tatou faaaogaina le foai a le fafine ua oti lana tane e avea ma faataitaiga o le faia o foai mo le Ekalesia? Fesoasoani i tamaiti ina ia malamalama i le lumanai, atonu o le a fesiligia i tatou e tuuina atu mea uma tatou te maua mo le Ekalesia. Ae i le taimi nei, o lo o manaomia le tuuina atu o soo se mea lava tatou te mafaia ae o lo o mafai lava ona faafetaia’ia o tatou manaoga.

Gaoioiga e Faamauoa Ai

E mafai ona faaaoga se tasi pe sili atu foi o nei gaoioiga i soo se taimi o le lesona pe faaaoga foi o se toe iloiloga, otootoga, po o se lu’i.

I le faaaogaina o tupe faata’ita’i (faia lava au oe tupe), avea tamaiti faapei o se aiga ma faia se paketi mo le aofaiga ua e tuuina atu ia i latou. Tuu atu ia i latou e paketi mo meaai, fale totogi, vai ma le eletise, lavalava, ma isi tulaga. Fai i ai e tuu i ai ma le sefuluai ma isi taulaga ia latou paketi ma ia faamuamua i a latou lisi. Faamatala atu i tamaiti e tatau ona totogi muamua a tatou sefuluai aua o le tasi vae sefulu lena a le Alii.
Ia e savali faataamilo atu i le potu ma fesiligia tamaiti taitasi e ta’u mai ni mea o loo faaaoga i ai tupe o lana sefuluai. Tuuina atu fautuaga mai le lisi o loo i lalo pe a talafeagai.

Fausia o falelotu, malumalu, seminare ma aoaoga faalelotu, nofoaga tutotonu mo le aoaoina o faifeautalai, ma nofoaga tutotonu o talafaasolopito o aiga.

Totogiina o gaoioiga a uarota ma paranesi faatasi ai ma tusi lesona ma mea o lo o manaomia.

Totogiina o le vaaia o falelotu, vai ma le eletise.

Totogiina o femalagaaiga ma mea o lo o manaomia e faifeautalai.

Totogiina o femalagaaiga ma tupe faaalu a le Au Pulega Aoao.

Mo komepiuta o lo o faaaoga i galuega ma talafaasolopito o aiga.

Fesoasoani i le lolomiina o mekasini a le Ekalesia.

Totogiina o le satelite mo faasalalauga a le Ekalesia.

Totogiina o le faaliliuina ma le lolomiina o tusitusiga paia.
Tufatufa ia tofu tamaiti ma se pepa ma se penitala ona fai lea iai e savavali i se faamalama e mafai ai ona latou vaai atu ai i fafo. Fai i ai e tusia i lalo mea uma o lo o latou vaai i ai i ni minute. Afai e toe foi atu tamaiti i o latou nofoaga, ona fesili atu lea e ta’u mai mea na latou vaai i ai. Faamatala i ai ua foaiina mai e le Tama Faalelagi mea uma ua tatou maua, ma o le totogiina o le sefuluai ma isi foai o se auala lea e faaali atu ai lo tatou loto faafetai mo Ia.
Tau atu le tala lenei na faamatala e Peresitene Ezra Taft Benson, ma talanoaina le faatuatua o lo o manaomia i le totogiina o sefuluai ma faamanuiaga e ala mai i le usiusitai i tulafono.

“I se tasi mea na tupu ao ou talavou, sa ou faalogoina ai o talanoa Tama ma Tina i le sauniuniga o tupe mo le faatalanoaga o le sefuluai i le aso e sosoo ai. O Tama [o loo aitalafu] i le faletupe i le luasefululima tala, lea e tatau ona totogi i le vaiaso. I le fuafuaina o la laua sefuluai, sa sili atu ma le luasefulu lima tala le aitalafu. Sa ia te ia se piki vao mago [o se mea lea e piki ai i luga vao mago i luga o le pusavao] sa ia fausiaina. Sa ia taumafai e faatau atu, ae le i taulia.

“O le a le mea e tatau ona la faia—[totogi] le faletupe, ae totogi mulimuli le sefuluai, po o le totogi o le sefuluai ae faamoemoe e mafai ona [totogi le faletupe] i ni nai aso? Ina ua uma ona talanoaina le mataupu, sa ou mautinoa na la tatalo faatasi ao le i malolo, sa filifili Tama e alu i le faatalanoaga o le sefuluai ma totogi uma le luasefulu lima tala, ina ia avea o ia ma se totogi sefuluai faamaoni. Ao ia tietie mai i le fale i lana solofanua, sa taofi o ia e se tasi o ona tuaoi ma fesili mai, ‘Siaosi, ou te mautinoa o loo i ai lau piki vao o loo fia faatau. E fia le tau?’

“Sa faapea atu Tama, ‘Luasefulu lima tala.’ Sa faapea mai le tuaoi, ‘Ou te le i vaai i ai, ae ou te iloa o le auala na e fausia ai ua tutusa lelei lava ma le luasefulu lima tala. Faatali mai mo se minute, se i ou alu atu i totonu o le fale e siaki. Ou te manao i ai.’ O le lesona lenei e le mafai ona ou faagaloina” (The Teachings of Ezra Taft Benson, pp. 471–72).
Faamatala le tala lenei:

Ina ua lima ou tausaga po o le ono foi, sa ou nofo i le laulau ai faatasi ma lo matou aiga toatele ma faalogologo ao talanoaina le sefuluai. Sa latou faapea mai o le sefuluai o le tasi o vae sefulu o mea tatou te maua, ma e totogi atu i le Alii e i latou o e alolofa ia te Ia.

“Ina ua uma le aiga o le afiafi, sa ou aumaia sau tupe sa teu ma taumafai e fuafua pe fia o lo o ou aitalafu ai i le Alii i le sefuluai. O lea na ou alu atu ai i le potu e tasi o le fale e i ai le loka – o le faletaele — ma ou tootuli ai i tafatafa o le tapu. Faatasi ma tupe e tolu pe fa o lo o uu e ou lima, sa ou fai atu i le Alii e talia ia tupe — ioe ma e mautinoa o le a ia talia. Sa ou talosaga i le Alii mo sina taimi, ae sa i ai pea tupe i ou lima. E leai se isi tamaitiiti sa lagonaina le tetee e pei o au. Ua talia e le Alii sefuluai a ou matua ma isi ou uso matutua. Ae aisea e le talia ai au? Ina ua ou tulai, sa ou lagona le le agavaa ma ou te le i tauina i se tasi le mea na tupu. Na o le Alii na ia silafia.

“I ni nai aso mulimuli ane i le Peraimeri, sa faapea mai le faiaoga ua ia lagona le faagaeetia e talanoa i se mea e le o i le lesona. Sa ou nofo ma le maofa ao ia aoao mai ia i matou le auala e totogi ai le sefuluai. A o le mea sa ou aoaoina sa matuai mamao lava mai le auala e totogi ai le sefuluai. Ua ou aoao, sa tali mai le Alii i lau tatalo, e alofa ia te au, ma taua au ia te Ia” (Ariel Ricks, O Tupe mo le Alii,” Liahona, Tesema 1990, p. 47).
Usu pe faitau upu o le Pese “Ona Ua Maua Tele” (Viiga, i. 124).

Faaiuga

Molimau ma le Lu’i

Tuuina atu lau molimau i le taua o le totogi o sefuluai. Faamatala ou lagona e uiga i le faamanuiaga ua tatou maua e totogi ai le sefuluai, o se auala e faaali atu ai lou loto faafetai i le Tama Faalelagi ma Iesu Keriso. Faamatala, pe tofi se tasi e faamatala mai, soo se aafiaga na maua ina ua tupu tele lou faatuatua i le Tama Faalelagi ma Iesu i le totogiina o sefuluai.

Tufa ia tofu tamaiti ma se lisiti o foai ma se teutusi ma lu’iina e totogi se sefuluai faamaoni i soo se taimi e maua ai ni a latou tupe.

Mau Fautuaina e Faitau i le Fale

Fautuaina tamaiti e suesue le Mareko 12:41–44 i le fale e fai ma toe faamanatu o lenei lesona.

Tofi se tamaitiiti e faia le tatalo faaiu.