Tusi ma Lesona
Mataupu 3: O Iesu Keriso, O Lo Tatou Taitai Ma le Faaola Filifilia

Mataupu 3

O Iesu Keriso, O Lo Tatou Taitai Filifilia Ma le Faaola

Ata
Cropped portion of Carl Bloch's painting depicting Christ sitting at a table with the two men with whom He walked on the road to Emmaus.

Sa Manaomia Se Faaola Ma Se Taitai

  • Aisea na manaomia ai ona tatou tuua le afioaga o lo tatou Tama Faalelagi? Aisea tatou te manaomia ai se Faaola?

Ina ua tuuina mai ia i tatou le fuafuaga mo lo tatou faaolataga i le lalolagi o agaga, sa tatou matua fiafia lava ma sa tatou alalaga ai i le olioli (tagai i le Iopu 38:7).

Sa tatou malamalama lelei o le a tatau ona tatou tuua lo tatou aiga faalelagi mo se vaitaimi. O le a tatou le nonofo pea i le afioaga o lo tatou Tama Faalelagi. A o tatou nonofo ese mai ia te Ia, o le a tatou agasala uma, ma o nisi o i tatou o le a se ese. Sa silafia lelei e lo tatou Tama Faalelagi i tatou taitoatasi, ma alofa ia i tatou taitoatasi. Sa Ia silafia o le a tatou manaomia se fesoasoani, o lea na Ia fuafuaina ai se ala e fesoasoani mai ai ia i tatou.

Sa tatou manaomia se Faaola e totogia a tatou agasala ma aoao mai ia i tatou le ala e toe foi atu ai i lo tatou Tama Faalelagi. Sa fetalai lo tatou Tama, “O ai se ou te auina atu?” (Aperaamo 3:27). Sa faapea mai Iesu Keriso, o le sa ta’ua o Ieova, “O a’u lenei, auina atu a’u” (Aperaamo 3:27; tagai foi i le Mose 4:1–4).

Sa finagalo malie Iesu e afio mai i le lalolagi, e tuuina atu Lona soifua mo i tatou ma tauave i Ona luga a tatou agasala. Sa finagalo o Ia, e pei o lo tatou Tama Faalelagi, ia tatou filifili pe tatou te usiusitai i poloaiga a lo tatou Tama Faalelagi pe leai. Sa Ia silafia e tatau ona tatou saoloto e filifili ina ia mafai ona faamaonia lo tatou agavaa mo le faaeaga. Na fetalai mai Iesu, “Lo’u Tama e, ia faia Lou finagalo, ma ia ia te Oe pea le mamalu e faavavau” (Mose 4:2).

Sa alu ane foi Satani, o le sa igoa ia Lusifelo, ma faapea mai, “Faauta, o a’u lenei, auina atu a’u, ia avea a’u mou atalii, ma o le a ou togiolaina le fanauga uma a tagata ina ia le se ese se agaga e toatasi, ma e moni o le a faapea lava ona ou faia; o le mea lea, ia tuu mai ia te a’u lou mamalu” (Mose 4:1). Sa manao Satani e fai faamalosi i tatou uma e faia le mea e loto i ai o ia. I lana fuafuaga, o le a le maua ai e i tatou se avanoa e filifili ai. O le a ia aveese le saolotoga e filifili ai lea na tuuina mai e lo tatou Tama ia te i tatou. Sa manao Satani ia maua e ia le mamalu uma mo lo tatou faaolataga. E tusa ai ma lana fuafuaga, o le a faaletonu ai le faamoemoega mo lo tatou o mai ai i le lalolagi (tagai i le Aoaoga a Peresitene o le Ekalesia: Tavita O. MaKei [2003], 207).231

Ua Avea Iesu Keriso Ma o Tatou Taitai Ma Faaola Filifilia

  • A o e faitauina lenei vaega, mafaufau i ou lagona mo le Faaola.

Ina ua maea ona Ia faafofoga atu i atalii uma e toalua, ona tulei mai lea o lo tatou Tama Faalelagi, “O le a ou auina atu Lē na muamua” Aperaamo 3:27

Sa filifilia ma faauuina Iesu Keriso e avea ma o tatou Faaola. E tele mau o loo ta’u mai ai lenei mea (tagai, mo se faataitaiga, 1 Peteru 1:19–20; Mose 4:1–2). Ua faamatala mai ia i tatou e se tasi mau, a o le i taitai ona fanau mai Iesu, na faaali o Ia i le uso o Iareto, o se perofeta i le Tusi a Mamona, ma fetalai atu: “Faauta, o a’u o lē na saunia talu le faavaeina o le lalolagi e togiolaina lo’u nuu. Faauta, o a’u o Iesu Keriso. … O a’u e maua ai e tagata uma le ola, o i latou lava o e faatuatua i lo’u igoa” (Eteru 3:14).

A o soifua Iesu i le lalolagi, sa Ia aoao mai: “Aua ou te le’i alu ifo mai le lagi e fai lo’u lava loto, a o le finagalo o Lē ua auina mai a’u. … O lenei foi le finagalo o Ia ua auina mai a’u, ia maua le ola e faavavau e i latou uma o e vaai i le Atalii ma faatuatua ia te ia, ou te toe faatuina foi i latou i le aso gataaga” (Ioane 6:38, 40).

O Le Taua i Le Lagi

Talu ai ua filifilia Iesu Keriso e lo tatou Tama Faalelagi e avea ma o tatou Faaola, o lea na ita ai ma fouvale Satani. Sa tupu se taua i le lagi. Sa tau ai Satani ma ana ‘au e tetee ia Iesu Keriso ma i latou na mulimuli ia te Ia. O soo o le Faaola na “manumalo ia [Satani] ona o le toto o le Tamai Mamoe, ma le upu a la latou mau” (Faaaliga 12:11).

Ona o lenei fouvalega tele, sa tuli ese ai Satani ma agaga uma sa mulimuli ia te ia mai luma o le Atua ma ua tuliesea mai le lagi. O le tasi vaetolu o agaga i le lagi na faasalaina ona o le mulimuli ia Satani (tagai i le MFF 29:36). Sa le tuuina atu ia i latou le aia tatau e maua ai ni tino faaletino.

Talu ai ona ua tatou i ai i lenei lalolagi ma maua ni tino faaletino, o lea ua tatou iloa ai sa tatou filifili e mulimuli ia Iesu Keriso ma lo tatou Tama Faalelagi. O loo i ai foi Satani ma e ua mulimuli ia te ia, ae ua na o ni agaga. E le galo i tatou ia i latou, ma ua latou siomia i tatou i aso uma e faaosooso ma faatosina i tatou e fai mea e le fiafia i ai lo tatou Tama Faalelagi. I lo tatou muai olaga, sa tatou filifili e mulimuli ia Iesu Keriso ma talia le fuafuaga a le Atua. E ao ina faaauau pea ona tatou mulimuli ia Iesu Keriso i lenei lalolagi. Na o le mulimuli lava ia te Ia e mafai ai ona tatou toe foi atu i lo tatou aiga faalelagi.

  • O a ni auala o loo faaauau ai pea le Taua i le Lagi i ona po nei?

Ua Tatou Maua Aoaoga a Le Faaola e Mulimuli Ai

  • Mafaufau i auala ua uunaia ai oe e aoaoga a le Faaola.

Mai lava i le amataga, sa faaali mai e Iesu Keriso le talalelei, ua ta’u mai ia i tatou mea e ao ina tatou faia e mafai ai ona tatou toe foi atu i lo tatou Tama Faalelagi. I le taimi atofaina, na afio mai ai o Ia Lava i le lalolagi. Sa Ia aoao mai ia i tatou le ata o le faaolataga ma le faaeaga e ala i Ana afioga ma le ala na Ia soifua ai. Sa Ia faatuina Lana Ekalesia ma Lana perisitua i le lalolagi. Sa Ia tauaveina i Ona luga a tatou agasala.

O le mulimuli i Ana aoaoga, e mafai ai ona maua so tatou nofoaga i le malo selesitila. Sa Ia faia Lana vaega e fesoasoani mai ai ia i tatou ia toe foi atu i lo tatou aiga faalelagi. Ua tuuina mai nei ia i tatou taitoatasi e fai a tatou vaega, ma ia agavaa ai mo le faaeaga.

Mau Faaopoopo