Mataupu 13
O Le Perisitua
O Le A Le Perisitua?
O le perisitua o le mana ma le pule a le Atua. Na Ia faia ma pulea le lagi ma le lalolagi e ala i le mana o le perisitua. O le mana lena ua faatumauina ai le atoatoa o le faatulagaina o le atulaulau i lona tulaga e pei ona i ai. O lenei mana na Ia faataunuuina ai Lana galuega ma Lona mamalu, ia “faataunuuina le faaofuina o le tagata i le tino ola pea ma le ola faavavau” (Mose 1:39).
Ua tuuina mai e lo tatou Tama Faalelagi le mana o Lona perisitua i alii agavaa uma o le Ekalesia. O le perisitua ua mafai ai e i latou ona galulue i le suafa o le Atua mo le faaolataga o le aiga o tagata. E ala mai i lenei perisitua ua tuuina atu ai ia te i latou le pule e tala’i atu le talalelei, faia sauniga o le faaolataga, ma pulea ai le malo o le Atua i le lalolagi.
-
Mafaufau i le taua o le faatagaina e le Atua o Lana perisitua ia umia e alii ma tama talavou agavaa.
Aisea Tatou Te Manaomia Ai Le Perisitua i le Lalolagi?
E tatau ona tatou maua le pule o le perisitua tatou te galulue ai i le suafa o le Atua e fai ai sauniga paia o le talalelei, e pei o le papatisoga, faamauga o le papatisoga, faamanuiaina o le faamanatuga, ma faaipoipoga i le malumalu. E tusa pe faamaoni le tagata, ae afai e le o ia te ia le perisitua, e le talia e le Alii sauniga na te faia (tagai i le Mataio 7:21–23; Mataupu Faavae o le Faatuatua 1:5). O ia sauniga taua, e tatau ona faia i le lalolagi e alii o loo umia le perisitua.
E manaomia e alii le perisitua e pulefaamalumalu ai i le Ekalesia a Iesu Keriso o le Au Paia o Aso e Gata Ai, ma taitai ai le galuega a le Ekalesia i vaega uma o le lalolagi. A o soifua Keriso i le lalolagi, sa Ia filifilia Ana Aposetolo ma tofia i latou ina ia mafai ona latou taitaia Lana Ekalesia. Sa Ia tuuina atu ia i latou le mana ma le pule o le perisitua e galulue ai i Lona suafa. (Tagai i le Mareko 3:13–15; Ioane 15:16.)
O le tasi pogai ua manaomia ai le perisitua i le lalolagi, ia tatou malamalama ai i le finagalo o le Alii ma faataunuu Ona faamoemoega. E faaali mai e le Atua Lona finagalo i Lona sui tofia o le perisitua i le lalolagi, o le perofeta lea. O le perofeta, o le Peresitene o le Ekalesia, e avea ma fofoga fetalai o le Atua i tagata uma o le Ekalesia, ma tagata uma o le lalolagi.
-
Aisea e taua ai le i ai i se tagata o le pule tatau pe a ia faia se sauniga?
E Faapefea Ona Maua e Alii Le Perisitua?
Ua saunia e le Alii se ala faatulagaina lelei mo le tuuina atu o Lana perisitua i Ona atalii i le lalolagi. E maua e se alii agavaa o le Ekalesia le perisitua i le “faaee atu o lima, o e o i ai le pule, e talai atu ai le Talalelei ma faia sauniga o i ai.” (Mataupu Faavae o le Faatuatua 1:5).
O le auala lava lea e tasi na maua ai e tagata le perisitua i ona po anamua, e oo lava i ona po o Mose: “E le faia fua foi e se tasi lenei faiva mamalu, tau o le ua filifilia e le Atua e pei o Arona” (Eperu 5:4). Sa maua e Arona le perisitua mai ia Mose, lona taitai perisitua (tagai i le Esoto 28:1). Na o i latou ua umia le perisitua e mafai ona faauuina isi i le perisitua, ma e faatoa mafai ona latou faia pe a faatagaina e i latou o e ua umia ki mo lena faauuga (tagai i le mataupu e 14 i le tusi lenei).
E le mafai e alii ona faatau mai pe faatau atu le mana ma le pule o le perisitua. E le mafai foi ona latou ave i o latou lava luga lenei pule. Tatou te faitau i le Feagaiga Fou i se tala e uiga i se alii e igoa ia Simona sa ola i le taimi na pulefaamalumalu ai le Au Aposetolo a Keriso i le Ekalesia. Sa liua Simona ma papatisoina i le Ekalesia. Talu ai ona o lona atamai e fai togafiti faataulaitu, sa talitonu ai tagata sa ia te ia le mana o le Atua. Peitai sa le umia e Simona le perisitua, ma sa ia iloa lena mea.
Sa iloa e Simona o loo i ai i le Au Aposetolo ma isi taitai perisitua o le Ekalesia le mana moni o le Atua. Sa ia vaai i lo latou faaaogaina o o latou perisitua e fai ai le galuega a le Atua, ma sa ia manao ai ia ona mauaina lena mana. Sa ofo atu o ia na te fia faatauina mai le perisitua. (Tagai i le Galuega 8:9–19.) Peitai sa tali atu ia te ia Peteru, le Aposetolo taitai, “Ia fano lau ario faatasi ma oe, aua ua e manatu e faatauina le mea foaifua a le Atua i tupe” (Galuega 8:20).
-
Aisea e taua ai le “le faia fua foi e se tasi o lenei faiva mamalu [o le perisitua]?”
E Faapefea Ona Faaaoga Tatau E Alii le Perisitua?
E tatau ona faaaoga le perisitua e faamanuia ai olaga o fanau a lo tatou Tama Faalelagi i le lalolagi. E tatau i e ua umia le perisitua ona pulefaamalumalu i le alofa ma le agalelei. E le tatau ona latou faamalosia o latou aiga ma isi ia usiusitai ia i latou. Ua ta’u mai e le Alii ia i tatou e le mafai ona pulea le mana o le perisitua sei vagana ai i le amiotonu (tagai i le MFF 121:36). A tatou taumafai e faaaoga le perisitua tatou te saili ai oa po o tulaga po o isi lava faamoemoega i le amioletonu, “faauta, e punitia le lagi; e tiga le Agaga o le Alii; pe a aveeseina foi, Amene i le perisitua po o le pule a lena tagata” (MFF 121:37).
A faaaoga e se alii le perisitua “i le tauanau atu, i le faapalepale, agalelei, ma le agamalu, ma le alofa faamaoni” (MFF 121:41), o le a mafai ona ia faia le tele o mea matagofie mo lona aiga faapea ma isi tagata. E mafai ona ia papatiso atu, faia faamauga, ma faamanuia le faamanatuga pe a tuuina atu i ai le faatagaga e e o loo umia ki mo na sauniga. E mafai ona ia faamanuia e mamai. E mafai ona ia tuu atu faamanuiaga faaleperisitua i tagata o lona aiga e faalototele ma puipuia ai i latou, pe a latou manaomia se feasoasoani faapitoa. E mafai foi ona ia fesoasoani atu i isi aiga i le faia o ia sauniga ma faamanuiaga, pe a talosagaina ai o ia.
E faaaoga e alii le pule o le perisitua e pulefaamalumalu ai i le Ekalesia i valaauga e pei o le peresitene o le paranesi, epikopo, peresitene o le korama, peresitene o le siteki, ma le peresitene o le misiona. O alii ma tamaitai ua umia ni tulaga i le Ekalesia e avea ma taitai ma faiaoga, e galulue i lalo o le taitaiga a taitai perisitua ma i lalo o le taiala a le Agaga Paia.
O a Faamanuiaga E Maua Pe A Tatou Faaaoga Tatau le Perisitua?
Ua folafola mai e le Alii ni faamanuiaga sili i tagata amiotonu ua latou umia le perisitua ma ua latou faaaoga le perisitua e faamanuia ai isi tagata:
“Ona malosi ai lea o lou faatuatua fai ifo i luma o le Atua; ma totō ifo i lou agaga le mataupu faavae o le perisitua e pei o le sau mai le lagi.
“E avea le Agaga Paia ma au aumea tumau, a o lou tootoo ma tootoo le feliuliuai o le amiotonu ma le upu moni; o lou malo foi o le a faia ma malo faavavau, e aunoa foi ma faiga faamalosi o le a tafe ia te oe e faavavau faavavau lava” (MFF 121:45–46).
Ua folafola mai e se tasi o perofeta maoae o aso e gata ai, o Tavita O. MaKei, i alii taitoatasi e faaaoga le perisitua i le amiotonu “o le a ia iloaina le manaia o lona olaga, o le a matuai malosi lona iloatinoina o mea ina ia vave fuafua ai le va o le sao ma le sese, o ona lagona e malu ma toamalie, ae peitai e malosi ma toa i le puipuia o le mea moni; o le a ia iloaina o le perisitua o se faapogai e le muta o le fiafia—o se vaipuna ola e puna pea e tau atu i le ola e faavavau” (Aoaoga a Peresitene o le Ekalesia: Tavita O. MaKei [2003], 129).
-
O a nisi o faamanuiaga ua e maua e ala i le perisitua?
Mau Faaopoopo
-
MFF 84; 107 (faaaliga e uiga i le perisitua, e aofia ai tautoga ma feagaiga o le perisitua i le MFF 84:33–40)
-
MFF 20:38–67 (faamatalaina o tiute o le perisitua)