Tusi ma Lesona
Mataupu 25: O Le Anapogi

Mataupu 25

O Le Anapogi

Ata
A Fijian man in an outdoor setting. He is holding a copy of the scriptures and has his eyes closed in prayer.

O Le Ala Sa’o e Anapogi Ai

  • O le a se mea e mafai ona tatou faia e avea ai le anapogi o se aafiaga e olioli ai?

Talu mai ona po o Atamu, sa anapopogi lava tagata e fesoasoani ia i latou e faalatalata atili ai i le Alii ma tapuai ia te Ia. Sa faaali mai e Iesu le taua o le anapogi i Ana lava faataitaiga (tagai i le Luka 4:1–4). Ua tatou iloa mai faaaliga o aso e gata ai, ua faamoemoeina e le Alii ona tagata ia anapopogi ma tatalo e le aunoa (tagai i le MFF 88:76).

O le uiga o le anapogi, o le le taumafa lea i se meaai pe inu i se vai. O le anapogi i nisi taimi e aoga mo o tatou tino, ma fesoasoani i o tatou mafaufau ia lelei atili.

Sa aoao mai e le Faaola ia i tatou, o le anapogi mo se faamoemoe, e sili atu nai lo le na o le lē ai ma le lē inu. E tatau foi ona tatou gauai atu i mea faaleagaga.

E Tatau Ona Tatou Tatalo Pe A Tatou Anapopogi

O le tatalo o se vaega taua o le anapogi. Ua ta’ua i tusitusiga paia uma le o faatasi o le tatalo ma le anapogi. E tatau ona o faatasi a tatou anapogi ma le tatalo faatauanau, ma e tatau ona amata ma faaiu a tatou anapogi i le tatalo.

E Tatau Ona Tatou Anapopogi Mo Se Faamoemoe

E mafai ona tele faamoemoega ua faia ai le anapogi E mafai ona tatou manumalo i vaivaiga po o faafitauli e ala i le anapogi ma le tatalo. O nisi taimi atonu tatou te fia anapogi ma tatalo mo se fesoasoani po o se taitaiga mo isi, e pei o tagata o o tatou aiga e mamai ma manaomia se faamanuiaga (tagai i le Mosaea 27:22–23). O le anapogi e mafai ai ona tatou iloa le moni o mea e pei ona iloa e le perofeta o Alema i le Tusi a Mamona. Fai mai a ia: “Na ou anapogi ma tatalo i aso e tele ina ia ou iloa nei mea mo a’u lava. O lenei foi, ua ou iloa mo a’u lava ua moni, aua ua faaalitinoina ia te a’u e le Alii le Atua i Lona Agaga Paia” (Alema 5:46).

E mafai ona tatou anapopogi e fesoasoani ai i isi ina ia talia le upumoni. E mafai ona fesoasoani le anapogi e faamafanafanaina i tatou i taimi o le faanoanoa ma le faavauvau (tagai i le Alema 28:4–6). E mafai ona fesoasoani le anapogi ia i tatou ia tatou lotomaulalo ma faalatalata atili atu i lo tatou Tama Faalelagi (tagai i le Helamana 3:35).

E le tatau ona tatou anapopogi e faaali atu ai le fia lelei i isi tagata. Na lapatai mai le Alii:

“Pe a outou anapopogi, aua nei outou mata faanoanoa pei o tagata pepelo; aua ua latou faaleaga o latou mata ina ia iloa e tagata ua latou anapopogi.

“E moni, ou te fai atu ia te outou, ua maua e i Latou lo latou taui.

“A o oe, pe a e anapogi, ia uu lou ulu, ma mulumulu ou mata; ina ia le iloa e tagata ua e anapogi” (Mataio 6:16–18).

E tatau ona tatou mata fiafia pe a tatou anapopogi, ma aua le ta’u atu fua i isi ua tatou anapopogi.

  • E faapefea e o tatou uiga ona uunaia o tatou aafiaga a o tatou anapopogi?

O Le Aso Anapogi

E tasi le Aso Sa i masina taitasi e anapopogi ai tagata o le Au Paia o Aso e Gata Ai. I le aso lena, tatou te le aai pe inu ai mo ‘aiga sosoo e lua. Afai e tali le sua i le afiafi o le Aso Toonai, o lona uiga tatou te le aai pe inu sei oo i le taligasua i le afiafi o le Aso Sa.

O tagata uma o le Ekalesia o e malolosi faaletino e tatau ona anapopogi. E tatau ona tatou faamalosiau atu ia tatou fanau ia anapopogi, pe a uma ona papatiso, ae le tatau lava ona tatou faia faamalosia i latou. O le aso anapogi, o se aso faapitoa lea mo i tatou e faamaulalo ai i luma o le Alii i le anapogi ma le tatalo. O se aso e tatalo atu ai mo le faamagaloga o a tatou agasala, ma ole atu ai mo le mana e manumalo ai i o tatou vaivaiga ma faamagalo atu i isi.

I le Aso Sa anapogi, e faapotopoto faatasi ai tagata o le Ekalesia ma aai ma feinu i le faamanatuga. Latou te fefaamalosia’i i latou o le tasi ma le isi e ala i le tuuina atu o molimau i le sauniga anapogi ma molimau.

  • Ua faapefea ona faamanuiaina oe mai le faasoa atu o lau molimau i le sauniga anapogi ma molimau? Ua faapefea ona faamanuiaina oe i lou faalogologo o faasoa mai molimau a isi?

Taulaga Anapogi

  • Aisea tatou te saofaga ai i le taulaga anapogi?

Pe a tatou anapopogi i masina taitasi, ua poloaiina i tatou e le Alii ia fesoasoani atu i e manaomia le fesoasoani. O le tasi ala tatou te faia ai lenei mea o le tuuina atu lea i taitai e tatau ai o le perisitua o tupe ia sa faamoemoe e faaaogaina i meaai mo taumafataga e lua sa tatou anapopogi ai. E tatau ona tatou matuai lima foai i le mea e gata ai lo tatou mafai. O a tatou taulaga anapogi e avea ai i tatou ma soa a le Alii i le faia o mea e manaomia e o tatou uso ma tuafafine ua lima vaivai.

E Faamanuiaina i Tatou Pe A Tatou Anapopogi

  • O a faamanuiaga e mafai ona tatou maua pe a tatou anapopogi i le auala tatau?

O Isaia, se perofeta o le Feagaiga Tuai, na tusia e uiga i folafolaga ‘oa a le Alii i e anapopogi ma fesoasoani atu i e matitiva. Ua folafola mai ia i tatou le filemu, le soifua maloloina, ma le taitaiga faaleagaga. Ua ta’u mai e Isaia ia i tatou, a tatou anapopogi: “Ona gafoa mai ai lea o lou malamalama e pei o le tafa o ata, e taalise ona tupu mai foi o lou malolo: e alu atu foi lau amiotonu i ou luma; e muliau mai le pupula o Ieova ia te oe. Ona e valaau lea, ae tali mai ai Ieova; e te alaga atu, ae fetalai mai o Ia, O a’u lenei” (Isaia 58:8–9).

E faaalualuina i luma o tatou olaga i le anapogi, ma tatou maua ai le malosi faaopoopo. E fesoasoani ia i tatou le anapogi e ola ai i isi mataupu o le talalelei, ma tatou latalata atili atu ai i le Alii.

O Le Anapogi e Aoaoina Ai Le Lotopulea

E fesoasoani le anapogi e maua ai le malosi o o tatou uiga. A tatou anapopogi i le ala sa’o, o le a tatou iloa pulea o tatou tuinanau, ma o tatou manaoga. E faamalosia atili i tatou i lo tatou faamaonia ia i tatou lava, ua tatou pulea lelei i tatou lava. Afai tatou te aoao a tatou fanau e anapopogi, o le a latou faatupuina le malosi e tetee atu ai i faaosoosoga tetele e oo mai i o latou olaga i aso o i luma.

O Le Anapogi Tatou Te Maua Ai Le Mana Faaleagaga

A tatou anapopogi ma le poto ma le agaga tatalo, e faateleina lo tatou faatuatua. Faatasi ma lena faatuatua, o le a tatou maua le mana tele faaleagaga. Mo se faataitaiga, ua faamatala mai e Alema (le perofeta o le Tusi a Mamona) se tala o la latou feiloaiga ma atalii o Mosaea, ina ua mavae le tele o tausaga talu le faaliliuina faavavega o i latou. Sa ia lagona le olioli tele ina ua ia iloa ua faamalosia lo latou faatuatua ma faateleina lo latou mana faaleagaga. Na latou mauaina lenei mana ona “sa latou tatalo faatauanau ma ua anapogi, o le mea lea ua i ai ia te i latou le agaga o le perofetaga ma le agaga o faaaliga” (Alema 17:3).

E sefulufa tausaga o talai atu atalii o Mosaea i tagata sa Lamana. Talu ai ona sa anapopogi ma tatalo atalii o Mosaea, sa faateleina e le Agaga o le Alii le mamana o a latou upu. O lea na latou maua ai le manuia tele i la latou galuega faafaifeautalai. (Tagai i le Alema 17:4.)

Na fetalai atu le Faaola i e na anapopogi i le ala sa’o, “O lou Tama foi o loo silasila i le mea lilo, Na te avatu faaaliali se taui ia te oe” (Mataio 6:18).

  • E mafai faapefea e le anapogi ona faateleina lo tatou malosi faaleagaga e tetee atu ai i faaosoosoga? e maua ai faaaliga? e faia ai galuega amiotonu?

Mau Faaopoopo