Tusi ma Lesona
Mataupu 22: O Meaalofa a le Agaga

Mataupu 22

O Meaalofa a le Agaga

Ata
Two elder missionaries in Korea talking to a young man. They are standing on a sidewalk.

O Meaalofa a le Agaga

  • O a meaalofa faaleagaga ua tuuina mai e le Alii ia i tatou?

Ina ua mavae le papaptisoga, sa faaee lima i luga o o tatou ulu taitoatasi ma tuu mai ia i tatou le meaalofa o le Agaga Paia. Afai tatou te faamaoni, e mafai ona tatou maua Lona mana e faatasi ma i tatou e le aunoa. E ala mai ia te Ia, e mafai ai e i tatou taitoatasi ona faamanuiaina i ni mana faaleagaga faapitoa ua ta’ua o meaalofa a le Agaga. O ia meaalofa e tuuina mai ia te i latou o e faatuatua ia Keriso. “O nei meaalofa uma foi e maua mai i le Atua, mo le manuia o le fanau a le Atua” (MFF 46:26). E fesoasoani ia meaalofa ia i tatou ia tatou iloa ma aoao atu upu moni o le talalelei. O ia meaalofa e fesoasoani mai ia i tatou e faamanuia atu i isi. O ia meaalofa o le a toe taitai atu ai i tatou i lo tatou Tama Faalelagi. Ina ia faaaoga ma le poto a tatou meaalofa, e tatau ona tatou iloaina po o a, ma iloa ala e mafai ona tatou atiina ae ai, ma tatou iloa ai faataitaiga pepelo a Satani o ia meaalofa.

Ua ta’u mai e tusitusiga paia le tele o meaalofa a le Agaga. Sa tuuina mai ia meaalofa a le Agaga i tagata o le Ekalesia moni i soo se vaitaimi sa i ai i le lalolagi (tagai i le Mareko 16:16–18). O meaalofa a le Agaga e aofia ai mea o loo ta’ua i lalo:

O Le Meaalofa o Gagana (MFF 46:24)

O nisi taimi e taua ai le tuuina atu o le talalelei i se gagana tatou te masani ai. Pe a tupu se mea faapena, e mafai e le Alii ona faamanuiaina i tatou ia mafai ona tatou tautala atu i lena gagana. E toatele faifeautalai sa latou mauaina le meaalofa o gagana (tagai i le ata o loo i le mataupu lenei). O se faataitaiga, o Elder Alonzo A. Hinckley sa faamisiona i Holani, sa itiiti lava lona malamalama ma lana tautala i le gagana Holani, e ui ina sa tatalo faatauanau ma aoao malosi. Ina ua toe foi atu o ia i se aiga sa asiasi i ai muamua, sa tatala mai e se tamaitai le faitotoa ma fai mai ia te ia ma le ita tele i le gagana Holani. Sa tei lenei uso i lona malamalama i upu uma sa lafo mai e lenei tamaitai. Sa oo ia te ia se lagona malosi e fia fai atu lana molimau i lea tamaitai i le gagana Holani. Sa amata ona ia tautala atu, ma sa manino lelei upu na ia tuuina atu i le gagana Holani. Ae ina ua foi atu e faaali atu i le peresitene o lana misiona ua mafai ona ia tautala i le gagana Holani, ua sola ese le tomai mai ia te ia. E toatele uso faamaoni o le Ekalesia ua faamanuiaina i le meaalofa o gagana. (Tagai i le Joseph Fielding Smith, Answers to Gospel Questions, tuu faatasia e Joseph Fielding Smith Jr., 5 voluma [1957–66], 2:32–33.)

O Le Meaalofa o le Faamatala Faaliliuina o Gagana (MFF 46:25)

E tuuina mai ia i tatou lenei meaalofa i nisi taimi pe a tatou le malamalama i se gagana, ae ua manaomia ona tatou maua se savali taua mai le Atua. O se faataitaiga, sa i ai se naunautaiga malosi na oo ia Peresitene Tavita O. MaKei e tautala atu i le Au Paia i Niu Sila e aunoa ma se faamatala upu. Sa ia fai atu ia i latou ua ia faamoemoe o le a faamanuia mai le Alii ia i latou, ina ia latou malamalama i upu o le a ia tuuina mai. Sa ia saunoa atu i le gagana Peretania. E tusa e fasefulu minute le umi o lana saunoaga. Ao ia saunoa atu, sa ia silafia i le foliga mai o le au paia ma le maligi ifo o o latou loimata, ua latou malamalama i lana savali. (Tagai i le Answers to Gospel Questions, 2:30–31.)

O Le Meaalofa o le Faaliliuga o Gagana (MFF 5:4)

Afai e valaaulia i tatou e taitai o le Ekalesia e faaliliu le afioga a le Alii, e mafai ona tatou maua le meaalofa o le faaliliuga o gagana, e sili atu nai lo le tatou poto faaletagata. E pei o meaalofa uma lava, e tatau ona tatou ola amiotonu, suesue malosi, ma tatalo ia tatou mauaina lenei meaalofa. A tatou faia ia mea, e faia e le Alii ia tatou lagona se faalogoga mu i totonu ia i tatou, tatou te iloa ai le sa’o o le faaliliuga (tagai i le MFF 9:8–9). Sa maua e Iosefa Samita le meaalofa o le faaliliuga o gagana i le taimi na ia faaliliuina ai le Tusi a Mamona. Na o taimi lava sa tasi ai o ia ma le Agaga, sa mafai ai ona ia maua lenei meaalofa.

O Le Meaalofa o le Poto (MFF 46:17)

E i ai nisi o i tatou ua faamanuiaina i le poto e malamalama ai i tagata ma mataupu faavae o le talalelei e faatatau i o tatou olaga i aso taitasi. Ua ta’u mai ia i tatou:

“Ae afai ua leai se poto i so outou, ina ole atu ia i le Atua, o Le foai tele mai i tagata uma ma le le toe tautaua; ona foaiina mai ai lea ia te ia.

“A ia ole atu ma le faatuatua, ‘aua lava ne‘i masalosalo. Aua o lē masalosalo e tusa ia ma le peau o le sami ua sousou i le matagi ma felafoaiina ai.

“Aua lava ne’i manatu lea tagata na te maua se mea e tasi mai le Alii” (Iakopo 1:5–7).

Ua fetalai mai le Alii, “Aua le saili i oa a o le poto, ma faauta, o le a faaalia ia te oulua mea lilo a le Atua” (MFF 6:7).

O Le Meaalofa o le Malamalama (MFF 46:18)

O i latou uma o e e avea e pei o lo tatou Tama Faalelagi, o le a oo ina latou iloa mea uma. O le malamalama o le Atua ma Ana tulafono, e faaali mai e le Agaga Paia (tagai i le MFF 121:26). E le mafai ona faaolaina i tatou pe afai tatou te le malamalama i ia tulafono (tagai i le MFF 131:6).

Ua fetalai mai le Alii, “Afai foi e maua e se tasi le malamalama ma le faautauta sili atu i lo se isi i lenei olaga ona o lona filiga ma le usiusitai, o le a faapea ona sili atu ōna avanoa i le olaga a sau” (MFF 130:19). Ua poloaiina i tatou e le Alii ia tatou aoao mea uma e mafai ona tatou aoaoina e uiga i Lana galuega. E finagalo o Ia ina ia tatou aoao e uiga i lagi, le lalolagi, mea ua tutupu mai pe o le a tutupu mai, mea i o tatou atunuu ma mea i atunuu ese (tagai i le MFF 88:78–79). E ui i lea, ua i ai nisi ua latou taumafai e maua le malamalama i lo latou lava suesue na o i latou. Latou te le ole atu mo se fesoasoani a le Agaga Paia. O i latou ia e suesue pea lava pea, ae le mafai lava ona latou iloa le mea moni (tagai i le 2 Timoteo 3:7). A tatou maua le malamalama e ala i faaaliga mai le Agaga Paia, e fetalai mai Lona Agaga i o tatou mafaufau ma o tatou loto (tagai i le MFF 6:15, 22–24; 8:2; 9:7–9).

O Le Meaalofa o le Aoao Atu o le Poto ma le Malamalama (Moronae 10:9–10)

E i ai nisi tagata e tuuina mai i ai se meaalofa faapitoa o le faamalamalama atu ma molimau atu i upu moni o le talalelei. E mafai ona faaaogaina lenei meaalofa pe a tatou faiaoga i se vasega. E mafai ona faaaoga e matua lenei meaalofa e aoao ai a latou fanau. E mafai foi ona fesoasoani mai lenei meaalofa ia i tatou i le aoaoina o isi, ina ia latou malamalama i le talalelei.

O Le Meaalofa o le Iloa o Iesu Keriso O Le Alo o Le Atua (MFF 46:13)

Sa tuuina atu lenei meaalofa i perofeta ma aposetolo o e sa valaaulia e avea ma molimau faapitoa ia Iesu Keriso. E ui i lea, ua tuuina atu foi lenei meaalofa i isi. E mafai e tagata uma ona maua se molimau e ala i musumusuga a le Agaga Paia. Na aoao mai Peresitene Tavita O. MaKei: “Ua fetalai mai le Alii i le Mataupu Faavae ma Feagaiga, Ua foaiina atu i nisi e le Agaga Paia ia iloa ai o Iesu Keriso o le Atalii o le Atua ma sa faasatauroina o Ia mo agasala a le lalolagi [tagai i le MFF 46:13]. O i latou ia ua ou fai atu ai o e tutumau i luga o le papa o faaaliga i molimau latou te tuuina atu i le lalolagi” (Aoaoga a Peresitene o le Ekalesia: Tavita O. MaKei [2003], 184).

O Le Meaalofa o le Talitonu i Molimau a Isi (MFF 46:14)

E mafai ona tatou iloa le moni o mea uma e ala i le mana o le Agaga Paia. Afai tatou te fia iloa pe ua tautala se tasi i le upu moni, e ao ina tatou ole atu i le Atua i le faatuatua. Afai e moni le mea ua tatou tatalo atu ai, e fetalai mai e le Alii le filemu i o tatou mafaufau (tagai i le MFF 6:22–23). O le ala lea e mafai ai ona tatou iloa pe moni ua maua e se tasi tagata, o le perofeta lava lea, se faaaliga. Sa ole atu Nifae i le Alii ia tuu mai ia te ia ia mafai ona ia vaai, lagona, ma iloa pe ua moni le miti a lona tamā (tagai i le 1 Nifae 10:17–19).

O Le Meaalofa o Valoaga (MFF 46:22)

O i latou e oo i ai faaaliga moni e uiga i taimi ua mavae, ona po nei, ma le lumanai, ua i ai le meaalofa o valoaga. Ua i ai i perofeta lenei meaalofa, ae e mafai foi ona tatou mauaina lea meaalofa e fesoasoani ia i tatou e taitaita ai o tatou lava olaga (tagai i le 1 Korinito 14:39). E mafai ona tatou maua faaaliga mai le Atua mo i tatou lava ma o tatou lava valaauga, ae le mafai ona tatou mauaina se faaaliga mo le Ekalesia po o ona ta’ita’i. Ua le tusa ai ma le faatulagaga o le lagi ona maua e se tagata se faaaliga mo se tasi ua tu i se tulaga e maualuga atu ia te ia. Afai ua i ai moni ia i tatou le meaalofa o valoaga, tatou te le mauaina se faaaliga e le talafeagai ma mea ua fetalaia mai e le Alii i tusitusiga paia.

O Le Meaalofa o le Faamaloloina o Ma’i (MFF 46:19–20)

E i ai i nisi le faatuatua e faamalolo atu ai, ma isi ua i ai le faatuatua e faamaloloina ai. E mafai e tatou uma ona faaaoga le faatuatua e faamaloloina ai pe a tatou mama’i (tagai i le MFF 42:48). E toatele e ua umia le perisitua ua i ai le meaalofa latou te faamalolo ai ma’i. O isi ua tuuina atu i ai le poto i ala e faamalolo ai ma’i.

O Le Meaalofa o le Faia o Vavega (MFF 46:21)

E tele taimi ua faamanuiaina ai e le Alii Ona tagata i ala faavavega. Ina ua totoina faatoaga muamua a le au paionia i Iuta, sa toeitiiti faaumatia uma e se akerise. Sa tatalo faatauanau atu le au paionia i le Alii e laveai a latou faatoaga, ma sa auina mai ai e le Alii ia gogo e ‘aia se akerise. A tatou manaomia tele se fesoasoani ma ole atu ia te Ia i le faatuatua, afai o se mea mo lo tatou lelei, e faia e le Alii vavega mo i tatou (tagai i le Mataio 17:20; MFF 24:13–14).

O Le Meaalofa o le Faatuatua (Moronae 10:11)

Sa i le Uso o Iareto le meaalofa o le faatuatua malosi. Ona o lona faatuatua, sa ia maua ai isi meaalofa. Sa matuā tele lava lona faatuatua ma o lea sa afio ifo ai le Faaola ia te ia (tagai i le Eteru 3:9–15). A leai le faatuatua, e le mafai ona tuuina mai isi meaalofa. Ua folafola mai e Moronae, “Ai se faatuatua ia Keriso ma le le masalosalo, o mea uma na te ole atu ai i le Tama i le suafa o Keriso, e foaiina mai ia te ia” (Mamona 9:21). E tatau ona tatou saili ia faateleina lo tatou faatuatua, saili po o a meaalofa ua tatou maua ma faaaoga na meaalofa.

E i ai nisi tagata ua matua leai lava se faatuatua, ua latou faafitia le moni o le i ai o ia meaalofa a le Agaga. Fai mai Moronae e uiga ia i latou na:

“Ou te toe fai atu ia te outou o e faafitia faaaliga a le Atua, ma faapea ane, ua mavae, e leai ni faaaliga, ma valoaga, ma meaalofa, ma le faamaloloina o ma’i, ma le tautala i gagana eseese, ma le faamatalaga o gagana eseese;

“Faauta ou te fai atu ia te outou, o lē faafitia nei mea, ua le iloa e ia le talalelei a Keriso; ioe, e le i faitauina e ia o tusi paia, afai na faitauina, ua le malamalama i ai” (Mamona 9:7–8).

  • Aisea e tuuina mai ai e le Alii meaalofa faaleagaga ia i tatou?

E Mafai Ona Tatou Atiina Ae a Tatou Meaalofa

  • E faapefea ona tatou “matua saili atu i meaalofa sili”? (MFF 46:8).

Ua fetalai mai le Alii: “Auā e le tuuina mai meaalofa uma ia te i latou; auā e tele meaalofa, ma ua tuuina mai i tagata taitoatasi se meaalofa a le Agaga o le Atua. Ua tuuina mai i nisi le tasi, ao isi ua tuuina atu i ai se isi, ina ia manuia ai i latou uma” (MFF 46:11–12).

Ina ia atiina ae a tatou meaalofa, e tatau ona tatou iloa po o a meaalofa ua ia i tatou. Tatou te iloa e ala i le tatalo ma le anapogi. E tatau ona tatou saili atu mo meaalofa e sili ona lelei (tagai i le MFF 46:8). O nisi taimi, e ta’u mai e faamanuiaga faapeteriaka ia i tatou meaalofa ua tuuina mai ia i tatou.

E ao ina tatou usiusitai ma faamaoni ina ia tuuina mai ia i tatou a tatou meaalofa. Ona tatau lea ona tatou faaaoga ia meaalofa e faia ai le galuega a le Alii. Ua le tuuina mai ia i tatou meaalofa e faamalie ai lo tatou fia iloa o se mea, pe faamaonia mai ai ia i tatou ona ua leai so tatou faatuatua. Ua fetalai mai le Alii e uiga ia tatou meaalofa faaleagaga, “Ua tuuina atu ia mea mo le lelei o e alolofa mai ia te a’u ma tausi a’u poloaiga uma, ma lē tausisi e faia faapea” (MFF 46:9).

  • Mafaufau i ni meaalofa faaleagaga o le a faamalosia ai oe lava ia pe fesoasoani atu ai ia te oe e te auauna ai i le Alii ma isi. O le a le mea e te faia e saili atu ai nei meaalofa?

E Faataitai e Satani Meaalofa a le Agaga

  • E faapefea ona tatou iloa le eseesega i le va o meaalofa moni a le Agaga ma mea ua faataitai e Satani?

E mafai e Satani ona faataitaia meaalofa o gagana, valoaga, faaaliga, faamalologa o ma’i, ma isi vavega. Sa tauva Mose ma faataitaiga a Satani i le maota o Farao (tagai i le Esoto 7:8–22). E manao Satani ia tatou talitonu i ana perofeta pepelo, tagata pepelo e faamaloloina ma’i, ma tagata fai vavega pepelo. Atonu e foliga mai ia i tatou ua moni ia mea, ma e pau lava le ala e mafai ona tatou iloa ai pe ua moni, o le ole atu lea i le Atua mo le meaalofa o le iloatino. E mafai e le tiapolo ona sau faapei o se agelu o le malamalama (tagai i le 2 Nifae 9:9).

E manao Satani e faatauaso i tatou i le mea moni, ma taofi i tatou mai le saili atu i meaalofa moni a le Agaga. O aitu vavalo, o e popoto i fetu, o taulaitu, ma vaa faatau, ua musuia e Satani e tusa pe latou te fai mai ua latou mulimuli i le Atua. O a latou galuega ua inosia i le Alii (tagai i le Isaia 47:12–14; Teuteronome 18:9–10). E tatau ona tatou aloese mai mea uma e i ai le mana o Satani.

E Ao Ina Tatou Faaeteete Ia Tatou Meaalofa a le Agaga

  • E faapefea ona tatou faaaloalo i le paia o meaalofa faaleagaga?

Ua fetalai mai le Alii, “A ou te tuuina atu ia te i latou le poloaiga, ia le mitamita ia i latou lava i nei mea, pe tautala ai i luma o le lalolagi; aua ua tuuina atu ia te outou mo lo outou manuia atoa ma le faaolataga” (MFF 84:73). E ao ina tatou manatua o meaalofa faaleagaga, ua paia (MFF 6:10).

Ia taui atu mo le tuuina mai o ia meaalofa, ua fetalai mai le Alii e ao ina tatou “faafetai atu i le Atua i le Agaga i soo se faamanuiaga e faamanuiaina ai [tatou]” (MFF 46:32).

Mau Faaopoopo