Tusi ma Lesona
Mataupu 39: O Le Tulafono o le Legaviā

Mataupu 39

O Le Tulafono o le Legaviā

Ata
Holding hands of a newly married couple.

O Se Faaaliga i Matua

O lenei mataupu ua aofia ai ni vaega e maotua atu mo fanau talavou. E sili ona faatali le aoaoina atu o nei vaega o le mataupu i fanau seia lava lo latou matutua e malamalama ai i sootaga faalefeusuaiga ma le foafoaina o fanau. Ua ta’u mai e o tatou taitai o le Ekalesia, o le tiute o matua le aoao atu ia latou fanau e uiga i le fanauina o fanau (o le ala lea e foafoa ma fanau mai ai fanau). E tatau foi i matua ona aoao atu ia latou fanau le tulafono o le legavia, lea o loo faamatala atu i le mataupu lenei.

E mafai e matua ona aoaoina fanau e uiga i amioga tatau e faatatau i o latou tino ao iti lava fanau. O le talatalanoa sao i fanau i le faaaloalo ma le faaaoga o igoa sao mo vaega ma le aoga o ia vaega o le tino o le a fesoasoani ia i latou e tuputupu ae e aunoa ma le ma fua e uiga i o latou tino.

O le natura lava o tamaiti o le fia iloa o lea mea ma lea mea. Latou te fia iloa pe faapefea ona galue o latou tino. Latou te fia iloa pe o fea e o mai ai pepe. Afai e tali vave ma le manino e matua fesili faapena ina ia malamalama ai le fanau, o le a faaauau pea e le fanau ona avatu a latou fesili i o latou matua. Peitai, afai e tali e matua fesili i se ala e lagona ai e tamaiti le maasiasi, teena po o le le faamalieina, atonu o le a latou o atu i se tasi tagata ma a latou fesili atonu o le a latou maua mai ai manatu e le sa’o ma amioga e le tatau ai.

E ui i lea, ua le poto pe tatau ona faamatala atu i fanau mea uma i le taimi e tasi. E tatau i matua ona tuuina atu ia te i latou na o le faamatalaga na latou fesili ai ma mafai ona malamalama i ai. Ao tali atu i nei fesili, e mafai e matua ona aoaoina fanau i le taua o le faaaloalo i o latou tino ma tino foi o isi. E tatau i matua ona aoaoina fanau i le faia o lavalava e tatau ai. E tatau ona latou faasa’o manatu sese ma gagana leaga latou te aoao mai i isi tagata.

I le taimi e matutua ai le fanau, e tatau i matua ona talanoaina malamalama ma i latou le foafoaina o fanau. E tatau ona malamalama le fanau o ia mana e lelei ma ua tuuina mai ia i tatou e le Alii. Ua faamoemoe le Alii ia tatou faaaogaina ia mana i totonu o tuaoi ua Ia tuuina mai ia te i tatou.

E o mai fanau iti i le lalolagi mai le Tama Faalelagi ma le mamā ma le le ponā. Ao tatalo matua mo se taitaiga, o le a musuia i latou e le Alii ina ia aoaoina a latou fanau i le taimi sa’o ma i le ala sa’o.

O Le Mana e Foafoaina ai Fanau

  • Aisea e tatau ai ona aoao e matua a latou fanau e uiga i le mana o le foafoaga ma le ola mamā? E mafai faapefea ona latou faia lea tulaga ma le talafeagai?

Sa poloaiina e le Atua meaola taitasi ia uluola i lona lava ituaiga (tagai i le Kenese 1:22). O le uluola po o le fanafanau o se vaega lea o Lana fuafuaga ina ia tumau pea mea ola uma i le fogaeleele.

Ona Ia tuuina lea o Atamu ma Eva i le lalolagi. Sa ese lava i laua mai isi Ana foafoaga uma aua o i laua o Lana fanau agaga. Sa Ia faaipoipoina Atamu ma Eva i le Faatoaga i Etena, ma poloaiina i laua ia fanafanau ma uluola ma ia tumu ai le lalolagi (tagai i le Kenese 1:28). E ui i lea, sa pulea o laua olaga i tulafono o le amiolelei, nai lo le pulea e lagona.

Sa finagalo le Atua ia fananau mai Ana fanau agaga i se aiga, ina ia tausia ma aoaoina lelei i latou. O i tatou, e pei o Atamu ma Eva, e saunia tino faaletino mo nei fanau agaga. Ua saunoa mai le Au Peresitene Sili ma le Korama a Aposetolo e Toasefululua, “Matou te tautino atu o le ala ua foafoaina ai le ola faitino, ua faatuina i le finagalo paia” (“O Le Aiga: O se Folafolaga i le Lalolagi,” O Le Liahona, Iuni 1996, 10). Ua poloaiina i tatou e le Atua e na o le faaipoipoga lava e faatagaina ai i tatou e faia sootaga feusuai. O lenei poloaiga ua ta’ua o le tulafono o le legaviā.

O Le Tulafono o le Legaviā

  • O le a le tulafono o le legaviā?

Ua faatagaina i tatou e faia sootaga feusuai ma na o o tatou lava taitoalua ua tatou faaipoipo i ai i le tulafono. E le tatau i soo se tasi, alii po o se tamaitai, ona faia sootaga feusuai ma se tasi ao lei faaipoipo. A uma ona faaipoipo, e na o o tatou lava taitoalua ua faatagaina tatou te faia sootaga feusuai.

Sa fetalai le Alii i le fanauga a Isaraelu, “Aua e te mulilua” (Esoto 20:14). O le fanauga a Isaraelu o e sa solia lenei tulafono sa faasalaina i latou i faasalaga tugā. Sa toe tuuina mai e le Alii lenei poloaiga i aso e gata ai (tagai i le MFF 42:24).

Ua aoao mai ia i tatou o le tulafono o le legaviā e tele mea e aofia ai nai lo na o le feusuaiga. Ua lapatai mai le Au Peresitene Sili i tagata talavou e uiga i isi agasala o feusuaiga:

“Ao lei faaipoipoina, ia aua lava nei faia se mea e faaosofia ai lagona malolosi ia e na o totonu o le faaipoipoga e tatau ona faaalia ai. Aua lava nei e auai i le faatinoina o ni feakisiga e faaosofia ai lagona malolosi, aua nei e taoto i luga o se isi tagata, pe tago i vaega lilo, po o itutino sa o se isi tagata, pe o fai ni ofu pe leai foi. Ia aua lava nei faatagaina se tasi e faia na mea ia te oe. Aua nei e faaosofiaina na lagona i lou tino” (Mo Le Malosi o le Autalavou [tamai tusi, 2001], 27).

E pei lava o isi soliga o le tulafono o le legaviā, o amioga faatauatane po o le faatauafafine o se agasala matuia. Ua saunoa perofeta o aso e gata ai e uiga i tulaga matautia o amioga faatauatane po o le faatauafafine faapea le popolega o le Ekalesia mo tagata o e atonu e i ai ia uiga. Ua saunoa mai Peresitene Gordon B. Hinckley:

“O le mea muamua, tatou te talitonu o le faaipoipoga i le va o le alii ma le tamaitai e faauuina e le Atua. Tatou te talitonu e mafai ona faavavau le faaipoipoga e ala i le faaaogaina o le mana faavavau o le perisitua i le maota o le Alii.

“E fesilisili tagata e uiga i lo tatou talitonuga ia i latou ua manatu ia i latou lava o faafafine po o faaulugalii o tane (gays) po o tamaitai foi lava latou (lesbians). O la’u tali, tatou te alolofa ia i latou o ni atalii ma afafine o le Atua. Atonu e i ai ni o latou faanaunauga patino e malolosi, ma atonu e faigata ona puleaina. O le tele o tagata e i ai faanaunauga patino i se ituaiga e tasi, po o se isi foi mai lea taimi i lea taimi. Afai latou te le faatinoina ia faanaunauga, ona mafai lea ona latou agai i luma e pei lava o isi tagata o le Ekalesia. Afai latou te solia le tulafono o le legavia ma tulaga faatonuina o le Ekalesia o le ola mama, ona tatau lea ona faia aoaiga faale-Ekalesia, e pei o ona faia i isi.

“Tatou te mananao e fesoasoani i nei tagata, e faamalolosia i latou, e fesoasoani i o latou faafitauli ma fesoasoani ia i latou i o latou faigata. Peitai, e le mafai ona tatou gūgū pe nofonofovale pe afai ua latou faamatuu atu i faiga le mama, pe afai ua latou taumafai e tausisia ma puipuia ma ola ai i ia tulaga faaulugalii o le itupa e tasi. O le faatagaina o ia ituaiga faiga, o le a faamamasagia ai le faavae moni ma le paia o le faaipoipoga ua faapaiaina e le Atua ma lona faamoemoega autu, o le tausia lea o aiga.” (in Conference Report, Oct. 1998, 91; po o le Ensign, Nov. 1998, 71).

E Manao Satani Ia Tatou Solia Le Tulafono o le Legaviā

  • O a nisi o auala ua faaosoosoina ai i tatou e Satani ina ia solia le tulafono o le legaviā?

O le fuafuaga a Satani o le faasese o le toatele o i tatou e mafai ona ia faaseseina, ina ia taofia ai i tatou mai le toe foi atu i nonofo faatasi ma lo tatou Tama Faalelagi. O se tasi o mea e sili ona leaga e mafai ona ia faia o le faaosooso mai lea ia i tatou ia tatou solia le tulafono o le legaviā. E poto leaga ma malosi tele Satani. E manao ia tatou talitonu e le o se agasala le solia o lenei tulafono. E toatele tagata ua faaseseina ai. E ao ina tatou puipui i tatou lava e tetee atu i faatosinaga leaga a le tiapolo.

E osofaia e Satani le tulaga faatonuina o le ola mama. E manao o ia ia tatou talitonu ona o le manaia o le tino faaletino, e tatau ai ona faaaliali ma faatosina ai. E finagalo lo tatou Tama Faalelagi ia ufiufi lelei o tatou tino ina ia tatou le faaosoina manatunatuga leaga i mafaufau o isi.

Ua le gata ina faaosoosoina i tatou e Satani e fai ofu e faaaliali ai o tatou tino, ae ua ia faaosooso foi i tatou ia mafaufau i mea e le mama ma mea e le tatau ai. Na te faia lenei mea i ata, tifaga, tala, tala malie, musika, ma siva e faatosina ai le faia o amioga le mama. O le tulafono o le legavia e manaomia ia mama o tatou mafaufauga faapea foi ma a tatou taga fai. Sa aoao mai le perofeta o Alema, a faamasinoina i tatou e le Atua, e “ta’usalaina i tatou i o tatou manatu; ao faapena ona matautia tele, tatou te le faamalosi e tepa ae i lo tatou Atua” (Alema 12:14).

Sa aoao mai Iesu, “Ua outou faalogo na fai mai e anamua, Aua e te mulilua:

“Ae ou te fai atu ia te outou, Ai se vaai atu i le fafine ina ia manao i ai, ua mulilua ma ia i lona loto” (Mataio 5:27–28).

Na lapatai mai Peresitene Gordon B. Hinckley: “Ua outou ola i se lalolagi o faaosoosoga e sili ona matautia. O ponokalafi, ma ona eleelea matagā, ua lilofia ai le lalolagi e pei o se tai lofituina matautia. O se mea ’ona. Aua le matamata ai pe faitau ai. O le a faataumaoia ai oe pe afai e te faia. O le a aveesea ai mai ia te oe lou faaaloalo mo oe lava. O le a faoa ai lou sane po o le lagona talisapaia o mea matagofie o le olaga. O le a talepe ai oe ma toso i lalo oe i le lopala o mafaufauga leaga ma ono oo ai i faiga faatiapolo. Ia taumamao mai ai. Aloese mai ai e pei ona e aloese mai se faamai leaga, aua e tutusa lava le faataumaoi. Ia e mamā i manatu ma galuega. Ua totoina e le Atua i totonu ia te oe, mo se faamoemoega, se uunaiga faalelagi e ono faigofie ona liliu atu i faiga leaga ma le faataumaoi. Ao e talavou, aua e te auai i tafaoga faamasani fai fai soo. A e oo atu i se tausaga o lou matua ua e mafaufau ai i le faaipoipoga, o le taimi lena e tatau ai ona e auai. Ae o outou tama o loo i aoga maululuga [high school], tou te le manaomia lea tulaga, ma e le manaomia foi e tamaitai” (in Conference Report, Oct. 1997, 71–72; or Ensign, Nov. 1997, 51).

O nisi taimi e faaosooso mai Satani ia i tatou e ala mai i o tatou lagona. Na te iloa taimi tatou te lagona ai le nofotoatasi, fenumiai, ma lē mautonu ai. Na te filifili le taimi o lo tatou vaivai e faaosooso ai i tatou e soli le tulafono o le legavia. E mafai e lo tatou Tama Faalelagi ona tuu mai ia i tatou le malosi tatou te sao mai ai i ia faaosoosoga e aunoa ma so tatou afaina ai.

Ua faamatala mai e tusitusiga paia ia i tatou e uiga i se alii talavou amiotonu e igoa ia Iosefa, sa faatuatuaina tele e lona matai, o Potifara. Sa tuu atu e Potifara ia Iosefa le pule i ana mea uma. Sa tuinanau lava le ava a Potifara ia Iosefa, ma sa ia faaosoosoina [Iosefa] la te mulilua ma ia. Ae sa tetee e Iosefa o ia ma sola ese mai ai. (Tagai i le Kenese 39:1–18.)

Na aoao mai Paulo, “Ua le maua outou e se tofotofoga e ese i lo tagata: a ua faamaoni le Atua, o le Na te le tuuina atu outou i le tofotofoga e sili i se mea ua outou lavatia, ae saunia foi faatasi ma le tofotofoga se mea e sao ai, ina ia outou lava oono” (1 Korinito 10:13). Sa faamamafa mai e Alema o le a “le tofotofoina [i tatou] …e sili i mea e mafai ona [tatou] onosai ai,” ao tatou “faamaulalo [i tatou lava] i luma o le Atua, ma valaau atu i Lona suafa paia, ma ia mataala ma tatalo e le aunoa” (Alema 13:28).

  • E faapefea ona fesootai le mama o ofu ma foliga vaaia ma le legavia? E faapefea ona aoao e matua a latou fanau ina ia mama i ofu, gagana, ma amioga?

  • E faapefea ona tatou tetee atu i le salalau ma le uunaiga a ponokalafi?

  • O a folafolaga ua tuuina mai e le Alii ia i tatou e fesoasoani tatou te teena ai faaosoosoga a Satani?

O Le Solia o le Tulafono o le Legavia o se Mea e Matua Mamafa

Sa faanoanoa le perofeta o Alema ina ua solia e se tasi o ona atalii le tulafono o le legavia. Sa fai atu Alema i lona atalii o Korianetona, “E te le iloa ea, lo’u atalii e, ua inosia ia mea i le silafaga a le Atua, ioe, ua sili ona inosia i agasala uma, toe lava o le faamasaaina o le toto o le ua le sala ma le faafiti i le Agaga Paia?” (Alema 39:5). O le legavia, e pito atu lona mamafa i le fasioti tagata

Afai e solia e se alii ma se tamaitai le tulafono o le legavia ma maua ai se tamaitiiti, atonu e faaosoosoina i laua e faia se isi agasala e sili ona inosia: o le faapa’ūina o le pepe. Ua leai lava se ala e tatau ai ona faapa’ū se pepe. Ua saunoa mai taitai o le Ekalesia e i ai ni tulaga uiga ese e ono tatau ai le faapa’ū o se pepe, e pei o se maitaga na mafua mai i le matane po o le toe ui i fanau, po o le fai faamalosi [rape], pe afai foi ua tusa ai ma fuafuaga a fomai popoto ua ogaoga le tulaga lamatia o le soifua po o le soifua maloloina o le tina, pe afai foi ua tusa ai ma fuafuaga a fomai popoto o le pepe o loo i ai ni faaletonu ogaoga o le a le mafai ai ona ola pe a fanau mai. Ae o ia lava foi tulaga e le faapea o le a matua tatau ai lava ona faapa’ū se pepe. O i latou ua feagai ma ia ituaiga o tulaga, e tatau ona faatoa manatu lava i le faapa’ū o se pepe pe a maea ona talanoa atu i o latou taitai faale-Ekalesia ma maea ona maua se faamaoniga e ala i le tatalo faatauanau.

“A maua e se alii ma se tamaitai se pepe ao lei faaipoipoina i laua, e tatau ona faia mea uma e mafai e faamalosiau ai ia i laua ina ia faaipoipoina. Pe afai e i ai se tulaga e ono faafaigata ai ona faamanuiaina se faaipoipoga ona o tulaga i tausaga o le matua po o nisi lava tulaga, e tatau ona fautuaina matua e lei faaipoipo ina ia tuuina atu le tamaitiiti mo le faateaina e ala i le Tautua a le Au Paia o Aso e Gata mo Aiga (LDS Family Services) ina ia faamautinoa ai o le a faamauina le tamaitiiti i ni matua agavaa e ulu atu le malumalu” (Tusi mai le Au Peresitene Sili, Iuni 26, 2002, ma Iulai 19, 2002).

Ua taua tele i lo tatou Tama Faalelagi le usiusitai o Lana fanau i le tulafono o le legavia. O tagata o le ekalesia o e solia lenei tulafono pe uunaia isi ia faia o lea, e tatau i ai le aoaiga a le Ekalesia.

E Mafai Ona Faamagaloina i Latou O E Solia Le Tulafono o le Legavia

E mafai ona maua e i latou o e solia le tulafono o le legavia le filemu. Ua fetalai mai le Alii ia i tatou, “Afai e liliu ese le ua amio leaga ai ana agasala uma na ia faia, ma tausi i a’u tulafono uma,… o ana solitulafono uma na ia faia, e le tautaua ia te ia” (Esekielu 18:21–22). Na o le faamagaloina e mafai ona maua ai le filemu.

Na saunoa mai Peresitene Kimball: “Ua i ai i faamagaloga taitasi se tuutuuga. … O le anapogi, o talosaga, ma le loto maualalo, e tatau ona tutusa lona tele, pe sili atu, nai lo le agasala. E tatau ona i ai le loto momomo ma le agaga salamo. … E tatau ona i ai loimata ma le suia faamaoni o le loto. E tatau ona i ai le mautinoa ua agasala, ma tuu ese mea leaga, ma le ta’u atu o le sese i taitai tatau ua tofia a le Alii” (O Le Vavega o le Faamagalo Atu [1969], 353).

I le toatele o tagata, o le mea sili ona faigata o le ta’u atu o le agasala, o se vaega o le salamo. E le gata ina tatau ona tatou faatoese atu i le Alii, ae faapea foi i le tagata ua tatou faia i ai le sese, e pei o le tane po o le ava, ma ta’ita’i tatau ai o le perisitua. O le taitai o le perisitua (epikopo po o le peristene o le siteki) na te faamasinoina lo tatou tulaga i le Ekalesia. Sa fetalai atu le Alii ia Alema, “Ai se agasala mai ia te a’u, … afai na te faaalia ana agasala i luma o oe ma a’u, ma ua salamo faamaoni lona loto, o ia lena e te faamagaloina, ou te faamagaloina foi o ia” (Mosaea 26:29).

Peitai ua lapatai mai Peresitene Kimball, “e ui ina tele ona folafola mai le faamagaloina, ua leai se folafolaga po o se faamaoniga o le faamagaloina o soo se agaga e le salamo atoatoa. … E le lava ona matou faamanatu malosi atu i tagata, e le mafai ona latou agasala ma faamagaloina, ona toe agasala foi lea ma saga agasala ma faamoemoe e toe faamagaloina” (O Le Vavega o le Faamagalo Atu, 353, 360). O i latou o e faamagaloina ae toe faia foi le agasala, o le a faamasinoina ia latou agasala na faia muamua (tagai i le MFF 82:7; Eteru 2:15).

E Faamanuiaina Tele i Latou O E Tausia Le Tulafono o le Legavia

  • O a faamanuiaga tatou te maua ao tatou tausia le tulafono o le legavia?

A tatou usiusitai i le tulafono o le legavia, e mafai ona tatou ola e aunoa ma le nofosala po o le maasiasi. E faamanuiaina o tatou olaga ma olaga o a tatou fanau pe a tatou tausia i tatou lava i le mamā ma le le ponā i luma o le Alii. E mafai e fanau ona vaai ia tatou faataitaiga ma mulimuli ai i o tatou tulagavae.

Mau Faaopoopo