Tusi ma Lesona
Mataupu 34: Atiina Ae a Tatou Taleni

Mataupu 34

Atiina Ae a Tatou Taleni

Ata
A male art student painting as he looks away at a model or object that he is painting.

Ua Tofu i Tatou Uma ma Taleni ma Tomai Eseese

Ua tofu i tatou ma taleni ma tomai faapitoa ua tuuina mai e lo tatou Tama Faalelagi ia i tatou. Ina ua tatou fananau mai, sa tatou aumaia ma i tatou ia meaalofa, taleni, ma mea tatou te gafatia (tagai i le mataupu 2 i le tusi lenei).

O le perofeta o Mose o se taitai maoae, peitai sa manaomia e ia Arona, lona uso, e fesoasoani ia te ia, e avea ma ana failauga (tagai i le Esoto 4:14–16). O nisi o i tatou o ni taitai e pei o Mose, po o ni failauga lelei e pei o Arona. O nisi o i tatou e mafai ona pepese pe taina se laau faimusika. O isi o i tatou e lelei i mea tau taaloga pe limalima foi. O isi taleni atonu ua ia i tatou o le malamalama lea i isi, onosai, mata fiafia, po o le atamai e aoaoina isi tagata.

  • Ua faapefea ona faamanuiaina oe mai taleni a isi?

E Tatau Ona Faaaoga ma Faalauteleina a Tatou Taleni

  • E mafai faapefea ona tatou atiina ae a tatou taleni?

Ua ia i tatou le tiutetauave e atiina ae ai taleni ua tuuina mai ia i tatou. O nisi taimi tatou te manatu ua le tele ni taleni ua tatou maua, pe manatu foi ua faamanuiaina isi i le tele o tomai nai lo i tatou. O nisi taimi tatou te le faaaoga ai a tatou taleni ona ua tatou fefefe ina nei le lelei ona tatou faatinoina pe faitioina ai i tatou e tagata. E le tatau ona natia a tatou taleni. E tatau ona tatou faaaogaina. Ona vaai ai lea o isi ia tatou galuega lelei ma latou viia ai lo tatou Tama Faalelagi (tagai i le Mataio 5:16).

E i ai ni mea faapitoa e ao ina tatou faia e atiina ae ai a tatou taleni. Muamua, e tatau ona tatou iloa po o a a tatou taleni. E ao ina tatou iloiloina i tatou lava e iloa ai mea ua tatou malolosi ma atamamai ai. E mafai ona fesoasoani mai o tatou aiga ma a tatou uo i lena mea. E tatau foi ona tatou ole atu i lo tatou Tama Faalelagi e fesoasoani mai ia i tatou ia tatou iloa a tatou taleni.

Lua, e ao ina tatou loto e faaaoga le taimi ma le malosi e atiina ae ai le taleni ua tatou fia mauaina.

Tolu, e ao ina tatou faatuatua o le a fesoasoani mai lo tatou Tama Faalelagi ia i tatou, ma e ao foi ina tatou faatuatua ia i tatou lava.

Fa, e ao ina tatou aoaoina tomai e tatau ai mo i tatou e atiina ae ai a tatou taleni. E mafai ona tatou faia lena mea i le auai i se vasega, aoaoina o i tatou e se uo, po o le faitauina o se tusi.

Lima, e tatau ona tatou aoao e faaaoga la tatou taleni. E manaomia e taleni taitasi le taumafai ma le galue malosi e atiina ae. O le lelei atoatoa o le taleni e tatau i ai le galue maelega.

Ono, e ao ina tatou faasoa atu a tatou taleni i isi. O le faaaoga o a tatou taleni e faateleina ai le lelei (tagai i le Mataio 25:29).

E faigofie nei laasaga uma pe afai tatou te tatalo ma saili atu mo le fesoasoani a le Alii. E finagalo o Ia ia tatou atiina ae a tatou taleni, ma o le a fesoasoani mai o Ia ia i tatou.

E Mafai Ona Atiina Ae A Tatou Taleni E Ui Lava i o Tatou Vaivaiga

  • E mafai faapefea ona atiina ae a tatou taleni e ui i o tatou vaivaiga?

Talu ai ona o i tatou o ni tagata faitino ma ua pau’ū, ua i ai o tatou vaivaiga. I le fesoasoani mai a le Alii, e mafai ai ona tatou faafoia o tatou vaivaiga ma lo tatou natura pau’ū (tagai i le Eteru 12:27, 37). Sa fatuina e Beethoven lana musika e sili ona tautaua, i le taimi o lona logonoa. Sa faafoia e Enoka le gese o lana tautala ae avea ai o se faiaoga mamana (tagai i le Mose 6:26–47).

E i ai nisi tagata tautaua i taaloga sa manumalo muamua i ni ma’i tugā sa feagai ma i latou a o lei faamanuiaina i latou i le atiina ae o a latou taleni. O Shelly Mann o se tasi lea o faataitaiga o lena mea. “O le lima o ona tausaga na maua ai i le ma’i pipili. … Sa ave o ia e ona matua i aso uma i le loto taele ma le faamoemoe o le a fesoasoani ai le vai ia te ia e taofi i luga ona lima ao taumafai e toe faaaoga. Ia ua mafai ona ia sii ae i luga ona lava lima i lona lava malosi mai le vai, sa alaga o ia i le fiafia. Ona ia faia lea o se sini e taumafai e aau i le lautele o le vai, ona sosoo ai lea ma le aau i le umi o le vai, ma isi uumi e tele. Sa ia taumafai pea, ma aau, ma onosai, i aso taitasi, seia oo ina manumalo i le [Olimipeka] i le pine auro i le tuugaaau o le butterfly—o se tasi o aau sili ona faigata” (Marvin J. Ashton, i le Conference Report, Aperila 1975, 127; po o le Ensign, Me 1975, 86).

Sa manumalo Heber J. Grant i le tele o ona vaivaiga ma sa ia liliuina e avea ma ana taleni. Sa ia faia e avea ma ana mautauave upu nei: “O le mea tatou te faia soo, e oo ina avea ma mea faigofie ia i tatou; e le faapea ona ua suia le natura o lea mea, ae ona ua faateleina lo tatou atamai e fai ai” (i le Aoaoga a Peresitene o le Ekalesia: Heber J. Grant [2002], 36).

E Faamanuiaina I Tatou E Le Alii Pe A Faaaoga Tatau A Tatou Taleni

Na saunoa mai Peresitene Iosefa F. Samita, “Ua maua e atalii ma afafine taitoatasi o le Atua se taleni, ma o le a faamasinoina i latou taitoatasi e tusa ma le mea sa faaaoga lelei i ai pe sa faaaoga sese ai” (Gospel Doctrine, lomiga 5 [1939], 370). O se taleni o se tasi lea o ituaiga o taitaiga (tiutetauave i le malo o le Atua). Ua ta’u mai ia i tatou i le faataoto i taleni, a lelei ona tatou faia o o tatou tiute, e tuuina mai ia i tatou isi tiute e sili atu. Afai tatou te le auauna lelei atu, e iu ina aveesea lo tatou tiute mai ia i tatou. (Tagai i le Mataio 25:14–30.)

Ua ta’u mai foi ia i tatou i tusitusiga paia, o le a faamasinoina i tatou e tusa ma a tatou galuega (tagai i le Mataio 16:27). Tatou te faia galuega lelei e ala i lo tatou atiina ae ma faaaogaina a tatou taleni mo isi tagata.

E fiafia le Alii pe a tatou faaaoga ma le faautauta a tatou taleni. O le a ia faamanuiaina i tatou pe afai tatou te faaaoga a tatou taleni mo le manuia o isi tagata, ma atiina ae lona malo i le lalolagi. O nisi o faamanuiaga tatou te maua o le olioli ma le alofa mai le auauna atu i o tatou uso ma tuafafine i le lalolagi. Tatou te aoaoina ai foi le loto pulea. O nei mea uma e tatau ona tatou maua pe afai tatou te fia agavaa e toe mau faatasi ma lo tatou Tama Faalelagi.

  • O a ni faataitaiga o ni tagata ua faalauteleina a latou taleni ona ua latou faaaogaina ma le faautauta? (Mafaufau i tagata e te iloa po o tagata i tusitusiga paia po o le talafaasolopito o le Ekalesia.)

Mau Faaopoopo