Tusi ma Lesona
Mataupu 31: Faamaoni

Mataupu 31

Faamaoni

Ata
Two men shaking hands

O Le Faamaoni O Se Mataupu Faavae O Le Faaolataga

  • O le a le ituaiga lalolagi o le a i ai pe afai e atoatoa ona faamaoni tagata uma?

Fai mai le mataupu faavae o le faatuatua e sefulutolu, “Matou te talitonu ia faamaoni.” Ua ta’u mai e le Tusi a Mamona ia i tatou e uiga i se vaega o tagata sa “faailogaina foi i latou ona o lo latou maelega i la le Atua atoa ma la [le] tagata. Aua ua faamaoni lava ma amiotonu i mea uma, ma ua tumau i latou i le faatuatua ia Keriso e oo lava i le iuga” (Alema 27:27). Ona o lo latou faamaoni, sa faamamaluina ai nei tagata e o latou uso a tagata faapea foi ma le Atua. E taua ona tatou iloa po o le a le faamaoni, pe faapefea ona faaosoosoina i tatou ia tatou le faamaoni, ma pe mafai faapefea ona tatou manumalo i lenei faaosoosoga.

E manaomia le faamaoni atoatoa mo lo tatou faaolataga. Ua saunoa mai Peresitene Polika Iaga, “Afai tatou te taliaina le faaolataga e tusa ai ma tuutuuga ua tuuina mai ia i tatou, e ao ona tatou faamaoni i soo se manatu, ia tatou feutagaiga, ma a tatou talotaloga, ia tatou fegalegaleaiga, ia tatou fesootaiga, ia tatou faamatalaga, ma soo se gaoioiga i o tatou olaga” (Aoaoga a Peresitene o le Ekalesia: Polika Iaga [1997], 298).

Ua faamaoni ma tonu le Atua i mea uma (tagai i le Alema 7:20). E tatau foi ona tatou faamaoni i mea uma ina ia avea i tatou e pei o Ia. Ua molimau mai le uso o Iareto, “Ioe, le Atua e, ou te iloa … o Oe o le Atua o le faamaoni, ma ua le mafai ona pepelo” (Eteru 3:12). I le faafeagai, o le tiapolo o se pepelo. O le mea moni, o ia o le tamā o pepelo (tagai i le 2 Nifae 9:9). “O i latou o e le faamaoni, ma pepelo, ma taufaasese, e avea ma ana pologa” (Mark E. Petersen, in Conference Report, Oketopa 1971, 65; po o le Ensign, Tesema 1971, 73).

O tagata faamaoni e fiafia i le upumoni ma le mea sa’o. E faamaoni i latou i a latou upu ma amioga. E le pepelo, pe gaoi, pe faa’ole’ole.

O Le Pepelo O Le Le Faamaoni

O le pepelo, o le taufaasese lea i isi ma le loto i ai. O le tuuina atu o se molimau pepelo o se tasi lea o ituaiga o pepelo. Sa tuuina atu e le Alii le poloaiga lenei i le fanauga a Isaraelu: “Aua e te molimau pepelo i le lua te tuaoi” (Esoto 20:16). Sa aoao atu foi e Iesu lenei mataupu i le taimi na soifua ai i le lalolagi (tagai i le Mataio 19:18). E tele auala e pepelo ai tagata. A tatou faia se upu ua le tonu, ua tausalaina i tatou i le pepelo. E mafai foi ona tatou taufaasese i isi ma le loto i ai e ala i se gaoioiga a o tatou tino po o le vaai a o tatou mata, i le lē faia o se upu, po o le na o le ta’u atu foi o se vaega o le mea tonu. Soo se mea tatou te faia e taitai ai tagata ia talitonu i se mea ua le tonu, ua tatou le faamaoni.

E le fiafia le Alii i le le faamaoni faapena, ma o le a tatou tali atu mo a tatou pepelo. E manao Satani ia tatou talitonu e leai se leaga o le pepelo. Ua fai mai ia, “Ioe, ia tala pepelo laitiiti, … e le afaina lava nei mea” (2 Nifae 28:8). E uunai i tatou e Satani ia tatou ta’uamiotonuina a tatou pepelo ia i tatou lava. O tagata faamaoni, e iloa faaosoosoga a Satani, ma tautatala i le mea sa’o, e tusa pe latou te le maua ai se mea.

O Le Gaoi O Le Le Faamaoni Lea

Sa aoao mai e Iesu, “Aua e te gaoi” (Mataio 19:18). O le gaoi, o le aveina lea o se mea e le a tatou. A tatou ave se mea e a se isi tagata, po o se faleoloa, po o le nuu, e aunoa ma se faatagaga, ua tatou gaoi. O le aveina o se oloa po o sapalai mai se fale faigaluega o le gaoi lava lea. O le kopiina o musika, tifaga, ata, po o tusi e aunoa ma se faatagaga mai le tagata ua taofia aia tatau o le le faamaoni lea ma o se ituaiga o le gaoi. O le talia o se sui o se tupe po o ni oloa e sili atu nai lo mea e tatau ona tatou maua, o le le faamaoni lava lea. O lo tatou ave o ni mea e sili atu nai lo mea e tatau ai mo i tatou, o le gaoi lava lea.

O Le Faaimamago Ma Lē Faia Le Mea Sa’o O Le Le Faamaoni Lea

A tatou totogi atu se aofai e itiiti ifo i le mea ua tatou nofo aitalafu ai, po o lo tatou mauaina o se mea e le tatau ona tatou mauaina, ua tatou faaimamago. O nisi tagata faigaluega e faaimamago i o latou pule o galuega i le le atoa o itula e tatau ona faigaluega ai; ae latou te talia le totogi mo le aso atoa. E i ai foi nisi pule o galuega ua le faamaoni ia latou tagata faigaluega; ua itiiti ifo totogi latou te totogi ai i latou nai lo le mea e tatau ona latou maua. Fai mai Satani, “Ia faaimamago foi i tagata ona o a latou upu, ia eli foi le lua ina ia paū ai le lua te tuaoi” (2 Nifae 28:8). O lo tatou faaaogaina lē tonu o se isi tagata o se ituaiga lea o le le faamaoni. O le auauna atu i se tulaga le lelei po o le tuuina atu o se oloa e le lelei, o le faaimamago lava lea.

E Le Tatau Ona Tatou Sisi’o I Lo Tatou Le Faamaoni

  • O le a le mea e tupu ia i tatou faaleagaga pe a tatou sisi’o i lo tatou le faamaoni?

Ua faia e tagata le tele o sisi’o e tuua’i i ai le le faamaoni. E pepelo tagata ina ia puipuia ai i latou lava, ma ua faia ia mea ia manatu lelei ai isi tagata ia i latou. E i ai nisi ua latou sisi’o e tuua’i i ai lo latou gaoi, faapea, ona ua latou manatu ua tatau ai lo latou avea o mea ua latou aveina, pe ua faamoemoe e toe faafoi mai ia mea, pe manatu foi e sili atu ona latou manaomia ia mea nai lo le e ana ia mea. E i ai foi nisi ua faaimamago ina ia latou maua ai ni togi lelei i le aoga, pe ona “o loo faia e tagata uma lena mea,” pe ina ia taui ma sui ai i se tasi.

O ia sisi’o uma ma le tele o isi ua faia e tagata e tuua’i i ai le le faamaoni. A o le Alii, Na te le talia nei pogai uma. A tatou tuua’i mea sese ua tatou faia i isi, ua tatou le faamaoni ia i tatou lava, ma e le toe mafuta ai le Agaga o le Atua ma i tatou. Ma faateleina ai lo tatou amioletonu.

E Mafai Ona Tatou Faamaoni Atoatoa

  • O le a le uiga o le matua faamaoni atoatoa?

Ina ia tatou faamaoni atoatoa, e tatau ona tatou vaai ma le faaeteete i o tatou olaga. Afai o i ai ni mea ua tatou le faamaoni ai e tusa po o le a le itiiti, e tatau ona tatou salamo loa i ia mea.

Pe a tatou faamaoni atoatoa, e le mafai ona faaleagaina i tatou. Tatou te faamaoni i mea uma ua faatuatuaina ai i tatou, o tatou tiute, tuutuuga, po o feagaiga, e tusa pe toesea ai a tatou tupe, uo, po o o tatou ola foi. Ona mafai lea ona tatou faafesaga’i ma le Alii, ma i tatou lava, ma isi foi e aunoa ma le maasiasi. Na fautua mai Peresitene Iosefa F. Samita, “Ia avea olaga o tagata taitoatasi i se tulaga o le a mafai ai ona tauleleia i se suesuega vailiili, ma ia mafai ona vaaia e pei o se tusi ua tatala, ina ia leai se mea tatou te meia pe maasiasi ai” (Gospel Doctrine, lomiga 5 [1939], 260).

  • O a auala e faaaafia ai e lo tatou faamaoni po o lo tatou le faamaoni o tatou lagona e uiga ia i tatou lava?

Mau Faaopoopo