Mataupu 9

O Perofeta a le Atua

O Perofeta O Sui Vaaia O Le Atua i le Lalolagi

O a mana ma meaalofa ua i ai i le perofeta?

“E le faia lava se mea e le Alii o Ieova, ae faaalia Lona finagalo i Ana auauna o perofeta” (Amosa 3:7).

E toatele tagata o loo nonofo i le pogisa, latou te le o mautinoa le finagalo o le Atua. Ua latou talitonu ua tapunia le lagi ma ua tatau ona faafeagai tagata ma puapuaga o le olaga na o i latou lava. E maoae le manuia o le Au Paia o Aso e Gata Ai! Ua tatou iloa e fesootai le Atua ma Lana Ekalesia e ala mai i Lana perofeta. Ua pepese le Au Paia i le lalolagi atoa ma le loto faafetai, “Ia Viia Oe, Le Atua, mo le perofeta lelei ua taitaiina e ia o i matou i ona po nei” (Viiga, nu. 10).

O le perofeta o se tagata ua valaaulia e le Atua e fai ma Ona sui i le lalolagi. A saunoa se perofeta mo le Atua, ua pei lava o le Atua lea ua fetalai mai (tagai i le MFF 1:38). O se perofeta, o ia foi o se molimau faapitoa mo Keriso, na te molimauina Lona paia ma aoao atu Lana talalelei. O se perofeta e aoaoina atu upumoni ma faamatalaina le afioga a le Atua. Na te valaau atu i e amioletonu ia salamo. Na te maua faaaliga ma taitaiga mai le Alii mo lo tatou manuia. E mafai ona ia vaai i le lumanai ma valoia mea o le a oo mai, ina ia lapataia le lalolagi.

O se perofeta, e mafai ona sau mai soo se tulaga o le olaga. E mafai ona talavou pe matuā aoaoina pe le aoaoina foi. E mafai o se tagata fai faatoaga, se loia, po o se faiaoga. O perofeta anamua, sa laei i ofutalaloa ma faaaoga tootoo. O perofeta i ona po nei, ua laei i suti ma latou te aveina ni ato taitai laiti. E faapefea la ona iloa le perofeta moni? O se perofeta moni, e filifilia i taimi uma e le Atua ma valaauina e ala i le faasologa sao o le pule o le perisitua (tagai i le Mataupu Faavae o le Faatuatua 1:5).

Ua lagolagoina e le Au Paia o Aso e Gata Ai le Au Peresitene Sili ma le Au Aposetolo e Toasefululua o ni perofeta. Peitai, pe a tatou tautala i “le perofeta o le Ekalesia,” o lona uiga o loo tatou tautala e uiga i le Peresitene o le Ekalesia, o ia lea o le Peresitene o le perisitua maualuga.

Sa Valaauina E Le Atua Perofeta E Taitaia Tagata i Lea Tupulaga ma Lea Tupulaga

O a auala na taitaia ai e perofeta fanau a le Atua i aso ua mavae?

Sa i ai perofeta i le lalolagi talu mai ona po o Atamu. O mea na oo i ai tagata ta’uta’ua, tatou te maofa ma musuia ai. O Mose, o se perofeta o le Feagaiga Tuai, sa ia taitai ese le afe ma afe o ona tagata mai Aikupito ma le pologa, i le nuu folafolaina. Sa ia tusia tusi muamua e lima o le Feagaiga Tuai ma tusi faamaumau Tulafono e Sefulu. O Nifae, o se perofeta o le Tusi a Mamona, sa folau atu mai Ierusalema i le konetineta o Amerika i le tusa ma le onoselau tausaga a o le i fanau mai Keriso. Ua tuuina mai e lenei taitai ma tagata faato’a nuu maoae le tele o tusitusiga taua i le Tusi a Mamona. O Ioane le Papatiso na filifilia e saunia le lalolagi mo le afio mai o le Alii o Iesu Keriso. E ala mai ia Iosefa Samita, o se perofeta o ona po nei, na toefuataiina mai ai e le Alii le Ekalesia. Sa faaliliuina foi e Iosefa Samita le Tusi a Mamona ao taulealea lava o ia.

O a ni mea ua e aoaoina mai i soifuaga ma aoaoga a perofeta?

Ua Ia I Tatou Se Perofeta Soifua I Ona Po Nei

Aisea tatou te manaomia ai se perofeta soifua i ona po nei?

Ua i ai so perofeta soifua i le lalolagi i ona po nei. O lenei perofeta o le Peresitene O Le Ekalesia a Iesu Keriso o le Au Paia o Aso e Gata Ai. Ua ia te ia le aia tatau e maua ai faaaliga mo le Ekalesia atoa. Ua ia umia “ki o le malo,” o lona uiga ua ia te ia le pule e taitaia ai le Ekalesia atoa ma le malo o le Atua i le lalolagi, e aofia ai le faatinoina o sauniga faaleperisitua (tagai i le Mataio 16:19). E leai se tasi e mafai ona faaali i ai le finagalo o le Atua mo tagata uma o le Ekalesia, na o le perofeta ma le Peresitene [o le Ekalesia]. Ua fetalai le Alii, “E na o le toatasi foi i le lalolagi i tupulaga taitasi ua faaee atu i ai le mana ma ki o le perisitua” (MFF 132:7). Ua lagolagoina le Peresitene o le Ekalesia e ona fesoasoani i le Au Peresitene Sili faapea foi ma sui o le Korama a le Toasefululua, o i latou foi o perofeta, tagatavaai, ma talifaaaliga.

E tatau ona tatou faia mea ua ta’u mai e perofeta ia i tatou e faia. Fai mai Peresitene Wilford Woodruff, e le mafai ona faatagaina se perofeta na te taitai sese le Ekalesia:

“E le faatagaina lava e le Alii a’u po o soo se tasi tagata e tu e avea ma peresitene o le Ekalesia lenei, ina ia taitai sese outou. Ua le i ai lena mea i le polokalama [a le Alii]. Ua le i ai lena mea i le finagalo o le Atua. Afai ou te taumafai e fai lena mea, o le a aveesea a’u e le Alii mai lo’u tulaga” (Aoaoga a Peresitene o le Ekalesia: Wilford Woodruff [2004], 199).

O a ni auala ua uunaia ai e le perofeta soifua le Ekalesia?

E Tatau Ona Tatou Lagolagoina Le Perofeta a le Alii

O a ni mea e ao ona tatou faia e mulimuli ai ma lagolagoina le perofeta?

E toatele tagata e faigofie ona latou talitonu i perofeta o ona po ua mavae atu. Peitai ua sili atu le taua o le talitonu ma le mulimuli i le perofeta soifua. E sii o tatou lima e lagolagoina le Peresitene o le Ekalesia o se perofeta, tagatavaai, ma se talifaaaliga.

E faapefea ona tatou lagolagoina le perofeta? E tatau ona tatou tatalo mo ia. E mamafa tiute ua ia te ia, ma ua manaomia ona faamalosia o ia i talosaga a le Au Paia.

E tatau ona tatou aoao i ana upu. E mafai ona tatou faalogologo i ana saunoaga o konafesi aoao. E mafai ona tatou faatauina le Ensign po o le Liahona ina ia mafai ona tatou faitau ai i ana saunoaga o konafesi ma isi savali na te tuuina mai.

E tatau ona tatou mulimulitu’i i ana aoaoga musuia. E le tatau ona tatou usiusitai na o se vaega o ana lapataiga musuia ae lafoai mea tatou te le fiafia i ai po o mea faigata. Ua poloaiina i tatou e le Alii ia tatou usiusitai i aoaoga musuia a Lana perofeta:

“Ia outou gauai i ana [le perofeta] upu uma ma poloaiga o le a tuuina atu e ia ia te outou e pei ona ia maua, ma savavali i o’u luma i le paia atoatoa;

“Aua o lana upu o le a outou maua, e pei ua alu atu mai lo’u lava gutu, i le onosai ma le faatuatua atoa” (MFF 21:4–5).

E le faatagaina lava e le Alii le Peresitene o le Ekalesia e taitaiina i tatou i le ala sese.

O le a se aoaoga ua aoaoina pe faamamafaina mai i le taimi lenei e le Peresitene o le Ekalesia?

E Maua Faamanuiaga Sili I Le Usiusitai I Le Perofeta

Afai tatou te usiusitai, ua folafola mai e le Alii, “O le a le manumalo faitotoa o seoli ia te outou; ioe, ae tafieseina e le Alii le Atua le malosi o le pogisa mai o outou luma, ma luluina le lagi mo lo outou lelei, atoa ma le mamalu o Lona suafa” (MFF 21:6). A tatou faia e pei ona faatonu mai lo tatou perofeta, o le a liligi mai faamanuiaga mai le lagi.

Ina ia tumau, e tatau i le Ekalesia ona “atiina ae i luga o le faavae o le au aposetolo, atoa ma le au perofeta, o le maa tulimanu o Iesu Keriso lava lea” (Efeso 2:20). Ua faamanuiaina lava i tatou i lenei lalolagi lē mautonu, i lo tatou maua o se perofeta e faaali mai i ai e le Alii Lona finagalo.

O a ni aafiaga i lou olaga ina ua e usiusitai i timaiga a le perofeta?

Mau Faaopoopo

Numera 12:6 (e fetalai mai le Atua e ala mai i perofeta)
1 Samuelu 9:9 (e ta’ua le perofeta o se tagatavaai)
Amosa 3:7 (e faaalia e le Atua Lona finagalo lilo i perofeta)
Mosaea 8:16–18 (e mafai ona iloa e se tagatavaai mea ua tuanai ma mea o le a oo mai)
Luka 1:70 (e fetalai mai le Atua e ala i perofeta)
MFF 45:10, 15 (ua fetalai mai le Atua i ona po nei e pei o ona po anamua)
1 Nifae 22:2 (e faaali mai e le Agaga mea i perofeta)
MFF 68:3–5 (a fetalai auauna a le Alii e tusa ma uunaiga a le Agaga Paia, o le mafaufau, ma le finagalo, ma le siufofoga lava lea o le Alii)
MFF 107:65–67, 91–92 (tiute o le Peresitene o le Ekalesia)
MFF 43:1–7 (na o le perofeta ua i ai le pule e maua ai faaaliga mo le Ekalesia atoa)