Tusi ma Lesona
Mataupu 43: Faailoga o le Afio Mai Faalua

Mataupu 43

Faailoga o le Afio Mai Faalua

Ata
The resurrected Jesus Christ (wearing white robes with a magenta sash) standing above a large gathering of clouds. Christ has His arms partially extended. The wounds in the hands of Christ are visible. Numerous angels (each blowing a trumpet) are gathered on both sides of Christ. A desert landscape is visible below the clouds. The painting depicts the Second coming of Christ. (Acts 1:11)

O Le A Toe Afio Mai Iesu Keriso i le Lalolagi

  • O a nisi o faailoga o le Toe Afio Mai?

Sa fetalai atu le Faaola ia Iosefa Samita, “O le a ou faaalia o a’u lava mai le lagi i le mana ma le mamalu tele … ma e nofo i le amiotonu faatasi ma tagata i le lalolagi i le afe o tausaga, ma e amioleaga latou te le tumau ai lava” (MFF 29:11; tagai foi i mataupu 44 ma le 45 i le tusi lenei). Ua fetalai mai Iesu ia i tatou o le a i ai faailoga patino ma mea patino e tutupu e lapataia ai tatou pe a latalata mai le taimi o Lona Toe Afio Mai Faalua.

Mo le afe ma afe o tausaga, o loo tulimatai pea e soo o Iesu Keriso le Toe Afio Mai Faalua o se taimi o le filemu ma le olioli. Peitai, a o lei afio mai le Faaola, o le a feagai tagata o le lalolagi ma le tele o lu’i ma mala. Ua finagalo lo tatou Tama Faalelagi ia tatou saunia mo nei faalavelave. O loo faamoemoe foi o Ia o le a tatou saunia faaleagaga pe a afio mai le Faaola i Lona mamalu. O le mea lea ua Ia tuuina mai ai ia i tatou faailoga, ia e faailoa mai ai ia i tatou ua latalata mai le Toe Afio Mai Faalua o le Faaola. I tupulaga uma lava ua faaalia mai e le Atua nei faailoga i Ana perofeta. Ua Ia fetalai mai o le a iloa e soo faamaoni uma lava o Keriso ia faailoga ma o le a latou vaavaai atu mo i latou (tagai i le MFF 45:39). Afai tatou te usiusitai ma faamaoni, o le a tatou suesue i tusitusiga paia ma iloa ai faailoga ia.

O nisi o faailoga o loo faailoilo mai ai le Toe Afio Mai Faalua o Iesu Keriso ua maea ma o loo faataunuuina nei. O nisi o le a faataunuuina i le lumanai.

Amioleaga, Taua, ma le Fememea’i

O le tele o faailoga e taufaamata’u ma matautia. Ua lapatai mai perofeta o le a oo i le lalolagi le matua fenumiai tele, le amioleaga, o taua, ma le puapuaga tele. Na saunoa mai le perofeta o Tanielu faapea o le taimi i luma atu o le Toe Afio Mai o le a avea ma taimi o faalavelave e lei oo lava i ai le iloa o le lalolagi (tagai i le Tanielu 12:1). Ua fetalai mai le Alii, “O le a tauau ina maalili foi le alofa o tagata, ma e faateleina le amioleaga” (MFF 45:27). “O le a faanunununu foi mea uma; ma … o le a meia loto o tagata; aua o le a oo le fefe i tagata uma” (MFF 88:91). E mafai ona tatou iloa o le a i ai mafuie, faama’i, oge, afā matautia, uila, ma faititili (tagai i le Mataio 24:7; MFF 88:90). O le a faaleagaina e le uato’a fua o le laueleele (tagai i le MFF 29:16).

Sa fetalai atu Iesu i Ona soo o le a faatumuina le lalolagi i taua: “E faalogo outou i taua ma tala i taua. … Aua e sii le taua e le tasi nuu i le tasi nuu, ma le tasi malo i le tasi malo” (Mataio 24:6–7). Sa saunoa mai le Perofeta o Iosefa Samita, “Aua tou te faavaivai pe a matou tau atu ia te outou taimi faigata, aua e le pine ona oo mai lea, aua o le pelu, oge, ma faamai ua latalata mai. O le a i ai le faaumatiaga tele i luga o lenei laueleele, aua tou te le manatu o se iota po o se mataitusi itiiti o folafolaga uma a perofeta paia o le a le faataunuuina, ma o loo tele pea o loo totoe e lei faataunuuina” (Aoaoga a Peresitene o le Ekalesia: Iosefa Samita [2007], 268).

O le tele o nei faailoga o le a faataunuuina. Ua i nofoaga uma le agasala. O loo tau pea atunuu i taimi uma. O loo tutupu mafuie ma isi mala. E toatele tagata o loo puapuagatia ona o afa, mūgalā, fia aai, ma faamai faatamaia. Ia tatou mautinoa o nei malaia o le a faasolo ina faateteleina le leaga ao lei afio mai le Alii.

Peitai, e le faapea o mea uma o le a tutupu i luma mai o le Toe Afio Mai Faalua, e matautia le leaga. O le tele o na mea o le a aumaia le olioli i le lalolagi.

O Le Toefuataiga o le Talalelei

Ua fetalai mai le Alii, “O le a susulu atu le malamalama ia te i latou o e nonofo i le pouliuli, o le atoatoa lea o la’u talalelei” (MFF 45:28). Sa valoia e perofeta anamua le Toefuataiga o le talalelei. Sa vaai atu le Aposetolo o Ioane o le a toefuataiina le talalelei e se agelu (tagai i le Faaaliga 14:6–7). I le faataunuuina o lenei valoaga, sa aumaia ai e Moronae ma isi avefeau mai le lagi le talalelei a Iesu Keriso ia Iosefa Samita.

O Le Oo Mai o le Tusi a Mamona

Sa fetalai atu le Alii i sa Nifae e uiga i se isi faailoga: o le a oo mai le Tusi a Mamona ia latou fanau (tagai i le 3 Nifae 21). I taimi o le Feagaiga Tuai sa muai vaai perofeta o Isaia ma Esekielu i le oo mai o le Tusi a Mamona (tagai i le Isaia 29:4–18; Esekielu 37:16–20). Ua faataunuuina nei ia valoaga. Ua aumaia le Tusi a Mamona ma ua auina atu i le lalolagi uma.

Ia Folafola Atu Le Talalelei i le Lalolagi Uma

O le isi faailoga o aso gataaga e faapea o le a “talaiina atu foi lenei talalelei o le malo i le atulaulau uma, e fai ma molimau i nuu uma” (Mataio 24:14; tagai foi i le Joseph Smith—Matthew 1:31). O le a faalogo tagata uma i le atoatoaga o le talalelei ia latou lava gagana (tagai i le MFF 90:11). Talu mai le Toefuataiga o le Talalelei, o loo ua talaiina atu le talalelei e faifeautalai. Ua faateleina taumafaiga faafaifeautalai e oo mai lava i le taimi lenei ua tai sefulu afe ma afe faifeautalai o loo talai i le tele o atunuu i le lalolagi i le tele o gagana. I le taimi ao lei oo mai le Toe Afio Mai Faalua ma le taimi o le Meleniuma, o le a saunia e le Alii auala e auina atu ai le talalelei i nuu uma.

O Le Oo Mai o Elia

Sa valoia e le perofeta o Malaki o le a auina mai le perofeta o Elia ao lei oo i le Toe Afio Mai Faalua o le Faaola. O le a toefuatai mai e Elia mana o le faamauga ina ia mafai ai ona faamauina faatasi aiga. O le a musuia foi e ia tagata ina ia popole mo o latou tuaa ma a latou fanau. (Tagai i le Malaki 4:5–6; MFF 2.) Sa oo mai le perofeta o Elia ia Iosefa Samita ia Aperila 1836. Talu mai lena taimi, ua tupu pea le naunau o tagata i le faia o gafa ma talafaasolopito o aiga. Ua mafai foi ona tatou faataunuuina sauniga o faamauga i le malumalu mo e o loo soifua faapea e ua maliliu.

O Le a Avea Fanau a Liae Ma Nuu Maoae

Na fetalai mai le Alii a oo mai le taimi e latalata mai ai Lona afio mai, o le a avea Sa Lamana na nuu amiotonu ma faaaloalogia. Sa fetalai mai o ia, “A o lei oo mai le aso sili o le Alii, o le a faatupuolaina Iakopo i le vaomatua, ma o le a fuga mai Sa Lamana e pei o le rosa” (MFF 49:24). E maoae se aofaiga o fanau a Liae ua mauaina nei faamanuiaga o le talalelei.

Fausiaina o le Ierusalema Fou

I le taimi e latalata i le afio mai o Iesu Keriso, o le a fausiaina e le Au Paia faamaoni se aai amiotonu, se aai o le Atua., e taua o le Ierusalema Fou. O le a pule ai iina Iesu Keriso Lava Ia. (Tagai i le 3 Nifae 21:23–25; Mose 7:62–64; Mataupu Faavae o le Faatuatua 1:10.) Na fetalai mai le Alii o le aai o le a fausia lea i le setete o Misuri i le Iunaite Setete (tagai i le MFF 84:2–3).

Ua na o ni nai vaega iti ia o faailoga ua tuuina mai e le Alii ia i tatou. Ua faamatala mai e tusitusiga paia le tele o isi faailoga.

  • O a ni faamaoniga ua e vaai i ai i le faataunuuina o faailoga?

O Le Iloa o Faailoga o Taimi E Mafai Ona Fesoasoani Ia I Tatou

  • E faapefea ona tatou tumau i le to’amalie ma le filemu pe a taufaamata’u ma matautia le leaga o nisi o faailoga?

E faatatau i Lona Toe Afio Mai Faalua, na fetalai le Alii, “O le ituaso ma le aso e le iloa lava e se tasi, po o agelu foi i le lagi” (MFF 49:7). Sa Ia aoaoina mai lenei tulaga i le faataoto i le laau o le mati. Sa fetalai mai o Ia afai tatou te vaai atu ua totogo mai lau o le mati, e mafai ona tatou iloa ai ua latalata mai le taumafanafana. E faapena foi pe a tatou vaai atu i faailoga o loo faamatala mai i tusitusiga paia, e mafai ona tatou iloa ai ua latalata mai Lona afio mai. (Tagai i le Mataio 24:32–33.)

Ua tuuina mai e le Alii nei faailoga e fesoasoani ia i tatou. E mafai ona tatou faatulagaina lelei o tatou olaga ma saunia i tatou lava ma o tatou aiga mo na mea o le a oo mai.

Ua lapataia i tatou e faatatau i mala ma ua faatonuina i tatou e saunia mo na mea, ae e mafai foi ona tatou tulimatai i le afio mai o le Faaola ma fiafia ai. Na fetalai mai le Alii, “Aua le atuatuvale, aua pe a oo mai nei mea uma lava, tou te iloa ai ua faataunuuina folafolaga na faia ia te outou” (MFF 45:35). Na Ia fetalai mai o i latou o e amiotonu i le taimi e afio mai ai o Ia o le a le faaumatiaina “ae tumau pea i latou i lea aso. E tuuina atu foi le lalolagi e fai mo latou tofi; …ma a latou fanau e ola ae i le faaolataga e aunoa ma le agasala. … Aua o le a faatasi le Alii ma i latou, e i o latou luga foi lona mamalu, e fai foi o ia mo latou tupu ma o latou faitulafono” (MFF 45:57–59)

Mau Faaopoopo