Tusi ma Lesona
Mataupu 19: Salamo

Mataupu 19

Salamo

Ata
An Hispanic young woman crying. She is holding a handkerchief. Tears are rolling down her face.

E Manaomia e i Tatou Uma Le Salamo

  • O le a le agasala? O a aafiaga e oo ia i tatou ona o a tatou agasala?

O le faatuatua ia Iesu Keriso e taitaiina atu ai i le salamo. Sa manaomia lava i le lalolagi le salamo, e amata mai lava i le taimi o Atamu seia oo mai i ona po nei. Sa faatonuina Atamu e le Alii, “O lea, ia e aoao atu i lau fanau e ao ina salamo tagata uma lava, a le o lea, e le mafai ona latou maua le malo o le Atua, aua e le mafai ona i ai se mea e le mama iina, po o Ona luma” (Mose 6:57).

Ua tatou o mai i le lalolagi mo le faamoemoe ia tatou tuputupu ae ma alualu i luma. O lenei mea tatou te faia i le olaga atoa. I lenei olaga, tatou te agasala uma lava (tagai i le Roma 3:23). E manaomia e i tatou uma lava ona salamo. O nisi taimi tatou te agasala ona o le valea, o nisi taimi, ona o o tatou vaivaiga; ae o nisi taimi ona o le le usiusitai ma le loto i ai. Ua tatou faitau i le Tusi Paia e faapea, “E leai lava se tagata amiotonu i le lalolagi, o le na te fai amiolelei, ma le le agasala” (Failauga 7:20) ma, “afai tatou te faapea, e leai sa tatou agasala, ua sese ai i tatou ia i tatou lava, ma e le o i totonu ia te i tatou le upu moni” (1 Ioane 1:8).

O le a le agasala? Na fai mai Iakopo, “O le ua iloa e fai le mea lelei, ae le faia, o le agasala lea ia te ia” (Iakopo 4:17). Sa faamatala mai e Ioane, o le agasala “o amioletonu uma lava” (1 Ioane 5:17) ma “soli foi le tulafono” (1 Ioane 3:4).

O le pogai lena ua fetalai mai ai le Alii, “I tagata uma lava i soo se mea, e tatau ona salamo” (Mose 6:57). Ua agasala tagata uma lava sa ola i le lalolagi, sei vagana ai Iesu Keriso, o le na soifua i se olaga atoatoa. Ua saunia e lo tatou Tama Faalelagi i Lona alofa tele lenei avanoa mo i tatou e salamo ai ia tatou agasala.

O Le Saoloto Mai a Tatou Agasala e ala i le Salamo

  • O le a le salamo?

O le salamo, o le ala lea ua saunia mo i tatou, tatou te sao ai mai ia tatou agasala ma maua ai le faamagaloga mo agasala. O agasala e faatelegese ai lo tatou alualu i luma faaleagaga, ma taofia ai lo tatou alualu i luma. O le salamo e mafai ai ona tatou toe tuputupu ae ma alualu i luma faaleagaga.

O le avanoa e salamo ai, ua maua e ala i le Togiola a Iesu Keriso. Sa totogi e Iesu Keriso a tatou agasala, i se ala tatou te le malamalama atoatoa i ai. Na saunoa mai Peresitene Iosefa Filitia Samita e faatatau i lena mea:

“Ua oo ia te a’u le tiga, ua oo foi ia te outou le tiga, ma o nisi taimi sa matua tetele lava; ae le mafai ona ou malamalama i le tiga…na tafe mai ai le toto, e pei o le afu, mai pūpū o le tino. O se mea matautia tele, o se mea ofoofogia lava. …

“…E leai se tagata na fanau mai i le lalolagi lenei e mafai ona ia onosaia le mamafa o le avega sa i luga o le Alo o le Atua, i le taimi na Ia amoina ai a’u agasala ma a outou agasala ma sa Ia faia ia mafai ai ona tatou sao mai a tatou agasala” (Doctrines of Salvation, sel. Bruce R. McConkie, 3 voluma. [1954–56], 1:130–31; faatusilima o loo i le uluai kopi).

O le salamo e manaomia tele ai i nisi taimi le lototele, le malosi e sili atu, loimata e tele, tatalo e le aunoa, ma taumafaiga e le faavaivai e ola i poloaiga a le Alii.

Mataupu Faavae o le Salamo

  • O a mataupu faavae o le salamo?

Ua folafola mai e Peresitene Spencer W. Kimball: “E leai se auala faa-tupu i le salamo, leai se auala faatamalii i le faamagaloga. E tatau i tagata uma ona mulimuli i le ala e tasi pe mauoa pe mativa, po o se tagata aoaoina pe leai, pe umi pe puupuu, po o se aloalii po o se tufanua, po o se tupu po o se tagatanuu” (Aoaoga a Peresitene o le Ekalesia; : Spencer W. Kimball [2006], 44; faatusilima o loo i le uluai kopi).

E Ao Ona Tatou Iloa A Tatou Agasala

Ina ia salamo, e tatau ona tatou tautino ifo ia i tatou lava ua tatou agasala. Afai tatou te le tautino ifo lenei mea, e le mafai ona tatou salamo.

Sa lapatai atu Alema i lona atalii o Korianetona, sa le faamaoni i lona valaaulia faafaifeautalai ma sa ia faia se agasala mamafa: “Ia na o au agasala e te ātu ai, i lena atuatuvale e mafai ona faamaulaloina ai oe e oo i le salamo. … Aua e te taumafai e tauamiotonuina oe i se mea aupito faatauvaa” (Alema 42:29–30). Ua fai mai foi tusitusiga paia, aua tatou te tauamiotonuina mea leaga tatou te faia (tagai i le Luka 16:15–16).

E le mafai ona tatou natia mai ia i tatou lava po o le Alii, so o se mea e faia i o tatou olaga

E Ao Ona Tatou Lagona Le Faanoanoa mo a Tatou Agasala

E le gata ina tatau ona tatou iloa a tatou agasala, ae tatau foi ona tatou lagona le faanoanoa moni mo mea sese ua tatou faia E ao ina tatou lagona le inosia o a tatou agasala. E ao ina tatou mananao e tuu ese ma lafoaia a tatou agasala. Ua ta’u mai e tusitusiga paia ia i tatou, “O e faamaulalo i latou lava i luma o le Atua, ma mananao ia papatisoina, ma o mai ma le loto momomo ma le agaga salamo, ma … salamo faamaoni lava ia latou agasala uma … o le a talia i latou e le Ekalesia i le papatisoga” (MFF 20:37).

E Ao Ona Tatou Lafoai A Tatou Agasala

E tatau ona taitai atu i tatou e lo tatou faanoanoa faamaoni, ia tatou lafoai ai a tatou agasala. Afai sa tatou gaoia se mea, o le a tatou le toe gaoi. Afai sa tatou pepelo, o le a tatou le toe pepelo. Afai sa tatou mulilua, o le a tuu. Sa faaali mai e le Alii i le Perofeta o Iosefa Samita, “Tou te iloa faapea se ua salamo i ana agasala—faauta, na te ta’uta’u atu ma lafoaia” (MFF 58:43).

E Ao Ina Ta’uta’u Atu A Tatou Agasala

O le ta’uta’u atu o a tatou agasala, o se mea taua tele. Ua poloaiina i tatou e le Alii ia ta’uta’u atu a tatou agasala. O le ta’uta’u atu o agasala e aveesea ai se avega mamafa mai le ua agasala. Ua folafola mai e le Alii, “O a’u, le Alii, e faamagaloina agasala, ma alofa mutimutivale i e ta’uta’u atu a latou agasala ma le loto maualalo” (MFF 61:2).

E tatau ona ta’uta’u atu a tatou agasala uma lava i le Alii. E le gata i lea, e ao ona ta’uta’u atu a tatou agasala mamafa — e pei o le mulilua, faitaaga, sootaga faatauatane ma faatauafafine, sauaina o tane po o ava po o fanau, ma le faatau atu po o le faaaoga o fualaau faasaina—o mea ia e mafai ona aafia ai lo tatou tulaga i le Ekalesia, i ta’ita’i e tatau ai o le perisitua. Afai ua tatou agasala i se tasi tagata, e tatau ona tatou faatoese atu i le tagata ua tatou faia i ai le sese. O nisi agasala māmā e le aofia ai se tasi ae na o i tatou lava ma le Alii. E mafai ona tatou ta’u faalilolilo atu ia agasala i le Alii.

E Ao Ona Tatou Toe Totogi Pe Faaleleia Mea Ua Faaleagaina

O le toe totogi po o le faaleleia o mea sa faaleagaina ona o i tatou, o se vaega lea o le salamo. O lona uiga, e tatau ona tatou faia mea uma e mafai ona tatou faia, e faasa’o ai so o se mea sese sa tatou faia. Mo se faataitaiga, e tatau i le na gaoi ona toe faafoi atu le mea sa ia gaoia. E tatau i le na pepelo ona ta’u atu le mea sa’o. E tatau i le na ia faia tala na ta’u leaga ai le igoa po o le amio a se tasi, ona ia galue e toe faafoi mai le tauleleia ma le mamalu o le igoa o le na ia faaleagaina. Afai tatou te faia ia mea, a oo ina faamasinoina i tatou e le Atua, o le a le toe ta’ua mai ia i tatou a tatou agasala (tagai i le Esekielu 33:15–16).

E Tatau Ona Tatou Faamagalo Atu i Isi Tagata

O se vaega taua o le salamo le faamagalo atu ia i latou o e na agasala mai ia i tatou. E le faamagaloina i tatou e le Alii sei vagana ua faamamaina atoatoa o tatou loto mai le inoino, ita, ma lagona leaga uma e tetee atu i isi tagata (tagai i le 3 Nifae 13:14–15). “O lea, ou te fai atu ia te outou, e tatau ona outou faamagalo le tasi i le tasi; aua o lē e le faamagalo atu i lona uso i ana solitulafono, ua ta’usalaina i luma o le Alii, aua o le a i ai pea ia te ia le agasala sili ona mamafa” (MFF 64:9).

E Ao Ina Tatou Tausia Poloaiga a le Atua

Ina ia atoatoa lo tatou salamo, e ao ina tatou tausia poloaiga a le Alii (tagai i le MFF 1:32). Ua le atoatoa lo tatou salamo pe afai e le totogia a tatou sefuluai, pe le tausia le Sapati ia paia, pe le usiusitai i le Upu o le Poto. Ua le moni lo tatou salamo pe afai tatou te le lagolagoina taitai o le Ekalesia ma lē alofa atu i le Alii ma o tatou uso a tagata. Afai tatou te le tatalo ma tatou lē agalelei atu i isi tagata, o le mea moni tatou te le o salamo. Pe a tatou salamo, e suia o tatou olaga.

Ua saunoa mai Peresitene Kimball: Muamua, e tatau i le tagata ona salamo. O le mauaina o lea tulaga e tatau ai ona ola o ia i poloaiga a le Alii, ina ia maua ai le tulaga e tatau ona i ai. O se mea matua tatau lea ina ia maua ai le faamagaloga atoatoa” (Aoaoga a Peresitene o le Ekalesia: Spencer W. Kimball, 50).

  • E ese faapefea aoaoga i lenei vaega mai manatu sese faapea o le salamo o le faatinoina lea o sina lisi o ni laasaga po o ni faiga masani faigofie?

O Le Ala E Fesoasoani Ai Le Salamo Ia I Tatou

  • Mafaufau i ni auala e mafai ona fesoasoani ai le salamo ia i tatou.

Pe a tatou salamo, ona aoga atoatoa ai lea o le Togiola a Iesu Keriso i o tatou olaga, ma faamagaloina a tatou agasala e le Alii. Ona tatou sao ai lea mai le pologa ia tatou agasala, ma tatou maua ai le olioli.

Ua ta’u mai e Alema lona salamo mai ana agasala i taimi ua mavae.

“Sa matua sili ona tele le atuatuvale o lo’u agaga, ua tigaina foi a’u i a’u agasala uma lava.

“Ioe, sa ou manatua a’u agasala uma ma a’u amioletonu, e i ai ona tigaina a’u i puapuaga o seoli; ioe, sa ou iloa na ou fouvale i lo’u Atua, sa ou le tausia foi ana poloaiga paia.

“… Sa faapea ona tele la’u amioletonu, o loo manatu o le a alu atu a’u i luma o lo’u Atua, ua tigaina ai lo’u agaga i le mata’u tele e le mafaamatalaina..

“… Ua oo foi ina o … atuatuvale a’u i le manatu i a’u agasala e tele, faauta, sa ou manatua, na ou faalogo i lo’u tama ua vavalo … e uiga i le afio mai o le toatasi, o Iesu Keriso, o le Alo o le Atua, e togiola agasala a le lalolagi.

“Ina o taofi atu e lo’u loto i lenei manatu, sa ou tagi ifo i lo’u loto, Iesu e, le Alo o le Atua, ia e alofa mai ia te au. …

“O lenei foi, faauta, ina o o’u manatu i lenei mea, ua le toe mafai ona manatua o’u tiga. …

“Ma sa maeu lava le olioli, ma le malamalama ofoofogia na a’u vaaia; ioe, sa faatumuina lo’u agaga i le olioli matua tele, e tusa ma le tele o lo’u tiga!

“… E le mafai ona silisili ma malie se tasi mea e tusa ma lo’u olioli” (Alema 36:12–14, 17–21).

  • Na mafai faapefea e le salamo ma le faamagaloga ona aumaia le olioli ia Alema?

O Tulaga e Matautia Ai Le Tolopo o Lo Tatou Salamo

  • O a ni taunuuga e ono tulai mai pe a tolopo lo tatou salamo?

Ua fetalai mai perofeta “o le olaga lenei o le taimi lea mo tagata e saunia ai e fetaiai ma le Atua” (Alema 34:32). E tatau ona tatou salamo nei, i aso uma lava. A tatou ala mai i le taeao, e tatau ona tatou mafaufau ifo ia i tatou lava pe o faatasi mai le Agaga o le Atua ma i tatou. I le po ae tatou te lei momoe, e tatau ona tatou mafaufau i mea ma upu sa tatou faia i le aso, ma ole atu i le Alii e faaali mai ia i tatou mea e tatau ona tatou salamo ai. O lo tatou salamo i aso taitasi ma ole atu mo le faamagaloga a le Alii ia tatou agasala, tatou te maua ai i aso taitasi le ala e faaatoatoaina ai i tatou. E pei o Alema, e mafai ona suamalie ma maoae lo tatou fiafia ma le olioli.

Mau Faaopoopo