Mataupu 26

Taulaga

Ata

Jesus Christ depicted in red and black robes. Christ is talking to a rich young man. Christ has His arms extended as He gestures toward a poorly dressed man and woman. The painting depicts the event wherein Christ was approached by a young man who inquired of Christ what he should do to gain eternal life. Christ instructed him to obey the commandments and to give his wealth to the poor and follow Him. The young man was unable to part with his wealth and went away sorrowfully. (Matthew 19:16-26) (Mark 10:17-27) (Luke 18:18-27)

O Le Uiga o le Taulaga

O le uiga o le taulaga o le tuuina atu i le Alii o soo se mea Na te finagalo ai i o tatou taimi, oa o le lalolagi ua tatou maua, ma lo tatou malosi mo le faalauteleina o Lana galuega. Ua poloai mai le Alii, “A ia outou muai saili le malo o le Atua ma Lana amiotonu” (Mataio 6:33). O lo tatou naunau e osi taulaga o se faailoga lea o lo tatou alofa faamaoni i le Atua. O loo tofotofoina ma suesueina lava i taimi uma tagata ina ia iloa ai pe latou te faamuamua mea a le Atua i o latou olaga.

Aisea e taua ai le osi taulaga pe a poloai mai le Alii, e aunoa ma le faamoemoe mo se taui?

Sa Tausisia Anamua Le Tulafono o le Taulaga

O le a le taua o taulaga sa tausisia e le nuu o le feagaiga a le Alii anamua?

Mai le taimi o Atamu ma Eva e oo mai i le taimi o Iesu Keriso, sa tausisia lava e le nuu o le Alii le tulafono o le taulaga. Sa poloaiina i latou e osi atu taulaga i ulumatua o a latou lafu. O nei manu e tatau ona atoatoa, ia lē pona. Sa tuuina mai lea sauniga e faamanatu ai i tagata o le a afio mai Iesu Keriso i le lalolagi, le Ulumatua a le Tama. O le a atoatoa o Ia i tulaga uma, ma o le a Ia tuuina atu o Ia Lava o se taulaga mo a tatou agasala. (Tagai i le Mose 5:5–8.)

Sa afio mai Iesu ma tuuina atu o Ia e fai ma taulaga, e pei ona aoaoina ai tagata o le a Ia faia. Ona o Lana taulaga, o le a laveaiina ai tagata uma mai le oti faaletino e ala i le toetutu mai, ma laveaiina i latou uma mai ia latou agasala, e ala i le faatuatua ia Iesu Keriso (tagai i le mataupu 12 o loo i le tusi lenei).

O le taulaga togiola a Keriso na faailoga ai le faamutaina o taulaga i le faamasaaina o le toto. Ua suia taulaga e fai i le toto i le sauniga o le faamanatuga. Ua tuuina mai foi le sauniga o le faamanatuga e faamanatu mai ai ia i tatou le taulaga maoae a le Faaola. E tatau ona tatou taumamafa soo i le faamanatuga. O le faatusa o le areto ma le vai ua faamanatu mai ai ia te i tatou le tino na faamanuaina o le Faaola ma Lona toto sa Ia faamaligi mo i tatou (tagai i le mataupu 23 i le tusi lenei).

Aisea ua avea ai le Togiola ma taulaga sili mulimuli?

Ua Tatau Ona Tatou Faia Pea Taulaga

O faapefea ona tatou tausia le tulafono o le taulaga i ona po nei?

E ui ina ua faamutaina le osia o taulaga i le toto, a ua fetalai mai le Alii ia tatou faia pea taulaga. Peitai ua Ia poloaiina i le taimi nei se isi ituaiga o taulaga. Ua Ia fetalai mai, “Tou te le toe osia mai ia te a’u le taulaga o le faamaligiina o le toto, … ma ua mavae atu a outou taulaga mu. … Ia outou fai ma taulaga ia te a’u le loto momomo ma le agaga salamo” (3 Nifae 9:19–20). O le “loto momomo ma le agaga salamo” o lona uiga, o lo tatou faaali atu lea o le faanoanoa tele mo a tatou agasala, a o faaalia lo tatou faamaualalo ma le salamo ia tatou agasala.

E Ao Ina Tatou Loto Malilie e Osi Taulagaina Mea Uma Ua Tatou Maua mo le Alii

Aisea ua naunau ai tagata e osi taulaga?

Ua tusia e le Aposetolo o Paulo e tatau ona avea i tatou ma taulaga ola, ma paia ma agavaa mo le Atua (tagai i le Roma 12:1).

Afai e avea i tatou ma taulaga ola, e tatau, pe a talosagaina ai i tatou, ona tatou loto malilie e tuuina atu a tatou mea uma mo le Ekalesia a Iesu Keriso o le Au Paia o Aso e Gata Ai—e fausia ai le malo o le Atua i le lalolagi ma galueaiina ai le aumaia o Siona (tagai i le 1 Nifae 13:37).

Sa fesili se faipule talavou ma le mauoa i le Faaola, “Se a se mea ou te faia ina ia ou maua ai le ola e faavavau?” Sa tali atu Iesu, “Ua e iloa poloaiga, Aua e te mulilua, Aua e te gaoi, Aua e te molimau pepelo, Ia e ava i lou tamā ma lou tina.” Ona fai atu lea o le alii mauoa, “Ua ou tausia ia mea uma talu lava ina ou itiiti.” Ina ua faafofoga atu Iesu i ia upu, ona Ia fetalai atu lea, “Ua toe o le mea e tasi e te le i faia: ia e faatau atu i au mea uma, ma ia e tufatufaina i e matitiva, ona ia te oe lea o faulaiga oloa i le lagi: ma e sau ma mulimuli mai ia te a’u.” Ina ua faalogo atu le taulealea i nei upu, ona faanoanoa ai lea o ia. Aua sa tele ana oa, ma sa i ai lona loto atoa i ana oa. (Tagai i le Luka 18:18–23; tagai foi i le ata o loo i le mataupu lenei.)

O lenei taulealea mauoa o se tagata lelei. Ae ina ua tofotofoina o ia, sa musu o ia e foai atu ana ‘oa o le lalolagi. Ao le isi itu, sa naunau ia soo o le Alii, o Peteru ma Aneterea, e ositaulagaina a laua mea uma mo le malo o le Atua. Ina ua fetalai atu Iesu ia i laua, “Ina mulimuli mai ia te a’u, … sa la tuua o laua upega, ae mulimuli atu ia te Ia” (Mataio 4:19–20).

E pei o soo [o Iesu], e mafai foi ona ofoina atu a tatou gaoioiga i aso taitasi e fai ma taulaga i le Alii. E mafai ona tatou faapea atu, “Ia faia Lou finagalo.” Sa faia e Aperaamo lena mea. Sa ola o ia i le lalolagi ae lei afio mai Keriso, i ona po sa faia ai taulaga i le toto ma taulaga mu. Ina ia tofotofoina le faatuatua o Aperaamo, sa poloaiina o ia e le Alii e tuuina atu lona atalii o Isaako e osi ai le taulaga. O Isaako o le atalii e toatasi lava o Aperaamo ma Sara. Sa faigata ma tiga tele ia Aperaamo le tuuina atu o ia e osi ai le taulaga.

E ui i lea, sa malaga atu o ia ma Isaako i le Mauga o Moria, i le mea sa tuu e osi ai le taulaga. E tolu aso o malaga atu i laua. Sei manatunatu ane i mafaufauga sa oo ia Aperaamo ma le tiga o lona loto. Sa poloaiina o ia e ave lona atalii e osi ai le taulaga i le Alii. Ina ua taunuu i laua i le Mauga o Moria, sa ave e Isaako fafie, a e ave e Aperaamo le afi ma le polo i le mea o le a laua faia ai se fata faitaulaga. Sa fesili Isaako, “Lo’u tama e, … faauta i le afi ma fafie: ae o fea se tamai mamoe e fai ai le taulaga?” Sa tali atu Aperaamo, “Lo’u atalii e, e aumai e le Atua se tamai mamoe māna e osi ai le taulaga.” Ona faia lea e Aperaamo o se fata faitaulaga ma ua fatufatu i ai fafie. Ona ia fusifusia lea o Isaako ma faataatia o ia i luga o fafie. Ona ia tago lea i le polo e fasioti ai Isaako. O le taimi lava lena na taofi ai o ia e se agelu a le Alii, ma fetalai mai, “Aperaamo, … soia le oo lou lima i le tama, aua foi e te faia se mea e tasi ia te ia, aua ua ou iloa nei ua e mata’u i le Atua, ina ua e le taofia lou atalii, o lou atalii e toatasi mai ia te a’u.” (Tagai i le Kenese 22:1–14.)

Atonu sa lofituina Aperaamo i le olioli ina ua le manaomia ona taulagaina lona atalii. Peitai sa ia alofa tele i le Alii, sa ia naunau ai e faia soo se mea e poloaiina ai o ia e le Alii.

O a ni faataitaiga o osigataulaga ua e matauina i soifuaga o tagata e te iloa? O a faataitaiga o osigataulaga ua e vaai i ai i soifuaga o ou tuaa? I soifuaga o uluai tagata o le Ekalesia? I soifuaga o tagata i tusitusiga paia? O a ni mea ua e aoaoina mai i nei faataitaiga?

E Fesoasoani Taulaga Ia I Tatou e Saunia Ai e Mau i le Afioaga o Le Atua

Na o taulaga lava e mafai ai ona agavaa i tatou e mau i le afioaga o le Atua. E na o taulaga lava e mafai ai ona tatou maua le ola e faavavau. E toatele tagata sa soifua muamua ia i tatou, sa latou ositaulagaina a latou mea uma. E ao ina tatou naunau e faia foi lena mea e tasi, pe afai tatou te fia maua le taui silisili ua latou maua.

Atonu e le o talosagaina i tatou e ositaulagaina a tatou mea uma. Peitai, e pei o Aperaamo, e tatau ona tatou naunau e ositaulagaina a tatou mea uma, ina ia tatou agavaa ai e mau i le afioaga o le Alii.

Sa faia e le nuu o le Atua taulaga e tele, ma i ala eseese. E i ai nisi sa mafatia i faigata ma le tauemuina ona o le talalelei. E i ai nisi uso fou ua liliu mai i le Ekalesia sa faate’a mai o latou aiga ona ua latou auai i le Ekalesia. O nisi ua motusia a latou mafutaga ma paaga o o latou soifuaga atoa. O nisi tagata o le ekalesia ua tulia mai ia latou galuega; o nisi foi ua maliliu ai lava. Peitai, e silafia e le Alii a tatou taulaga; na Ia folafola mai, “Ai se tasi ua tuua o fale, po o uso, po o tuafafine, po o fanua ona o lo’u igoa, e maua e ia e taisautuaselau, e fai foi ma ona tofi le ola e faavavau” (Mataio 19:29).

A faateleina le malolosi o a tatou molimau o le talalelei, o le a mafai ona tatou faia taulaga e sili atu mo le Alii. Matau ia taulaga na faia i faataitaiga moni nei:

E tele tausaga o teu e se uso o le Ekalesia i Siamani i Sasae lana sefuluai, seia oo ina alu atu se tasi ua i ai le pule o le perisitua na te aveina lana sefuluai.

E i ai se tuafafine o se Aualofa e 30 tausaga o avea ma faiaoga asiasi ae le i misi sana asiasiga.

E i ai ni tagata o le Au Paia i Aferika i Saute e tolu aso o malaga tutū i luga o se taavale ina ia mafai ona latou faalogologo ma vaai i le perofeta a le Alii.

I se konafesi a se eria sa faia i Mekisiko, sa momoe tagata o le Ekalesia i luga o le palapala ma anapopogi i aso o le konafesi. Sa faaaoga uma a latou tupe e malaga mai ai i le konafesi, sa leai se mea na totoe mo ni meaai ma ni fale e nonofo ai.

Sa faatau atu e se tasi aiga la latou taavale, ina ia maua se tupe sa latou manaomia e fesoasoani ai i le fausia o le malumalu.

Sa faatau atu e le tasi aiga lo latou fale ina ia maua ai se tupe e malaga ai i le malumalu.

E toatele tagata faamaoni o le Au Paia o Aso e Gata Ai, e itiiti lava mea ua latou maua, ae ua latou totogi faamaoni le sefuluai ma taulaga.

E i ai se tasi uso sa ia tuu lana galuega ona o lona musu e faigaluega i le Aso Sa.

I se tasi paranesi, sa naunau ai le autalavou e o atu e tausi fanau laiti a tagata e aunoa ma se totogi, ae o o latou matua e fesoasoani i le fausiaina o le falelotu.

E i ai tama ma teine talavou ua latou tuua avanoa mo galuega totogi maualuluga, ae o e fai misiona.

E tele faataitaiga e mafai ona tuuina atu e uiga i e na ositaulaga mo le Alii. Peitai, soo se nofoaga i le malo o lo tatou Tama Faalelagi, ua matua aoga i ai soo se taulaga tatou te faia i o tatou taimi, taleni, le malosi, tupe, ma o tatou ola. O taulaga e mafai ai ona tatou maua le malamalama mai le Alii ua Ia taliaina i tatou (tagai i le MFF 97:8).

Aisea e te manatu ai e i ai le sootaga a lo tatou naunautai e ositaulaga ma lo tatou saunia e ola i le afioaga o le Atua?

Mau Faaopoopo

Luka 12:16–34 (o le mea e i ai le oa, e i ai foi le loto)
Luka 9:57–62 (taulaga e tatau mo le malo [o le Atua])
MFF 64:23; 97:12 (o aso nei o aso o le taulaga)
MFF 98:13–15 (o e eveesea o latou ola ona o le Alii, latou te toe mauaina)
Alema 24 (sa ositaulaga e le nuu o Amona o latou ola nai lo le solia o la latou tautoga i le Alii)