Tusi ma Lesona
Mataupu 12: O Le Togiola

Mataupu 12

O Le Togiola

Ata
Jesus Christ depicted leaning on a rock in the Garden of Gethsemane. The image depicts the Atonement of Christ.

Ua Tatau Le Togiola Mo Lo Tatou Olataga

  • Aisea ua taua ai le Togiola mo lo tatou faaolataga?

O Iesu Keriso “na Ia maliu mai i le lalolagi…ina ia faasatauroina mo le lalolagi, ma tauave agasala a le lalolagi, ma faamamaina mai amioletonu uma; ina ia faaolaina ia te Ia i latou uma lava” (MFF 76:41–42). O le taulaga maoae na Ia faia e totogi ai a tatou agasala ma manumalo ai i le oti, ua ta’ua o le Togiola. O le mea aupito silisili lea ona taua na faia i le talafaasolopito o tagata: “Aua e ao ina faia le togiola; aua e tusa ma le finagalo o le Atua faavavau, e ao ina faia le togiola, a leai, e fano tagata uma; …ioe, ua pauu ma ua se tagata uma, ma e ao foi ina fano, sei vagana ai i le togiola” (Alema 34:9).

E lua ituaiga o oti na aumaia i le lalolagi ona o le Pa’ū o Atamu: o le oti faaletino ma le oti faaleagaga. O le oti faaletino o le tuueseeseina lea o le tino ma le agaga. O le oti faaleagaga o le vavaeeseina lea o le tagata mai luma o le Atua. Ana le faatoilaloina ia oti e lua i le Togiola a Iesu, e lua mea e tutupu mai: semanu e tuueseeseina o tatou tino ma o tatou agaga e faavavau, ma semanu e le mafai ona tatou toe nonofo faatasi ma lo tatou Tama Faalelagi (tagai i le 2 Nifae 9:7–9).

Peitai ua saunia e lo tatou Tama Faalelagi se fuafuaga ofoofogia ma le alofa mutimutivale, e laveai ai i tatou mai le oti faaletino ma le oti faaleagaga. Sa Ia fuafuaina se Faaola e sau i le lalolagi e laveai (togiola) i tatou mai ia tatou agasala ma le oti. Ona o a tatou agasala ma vaivaiga o o tatou tino faaletino, e le mafai ai ona tatou laveaia i tatou lava (tagai i le Alema 34:10–12). O lē o le a avea ma o tatou Faaola, e tatau ona aunoa ma se agasala, ma ia ia te Ia le mana e pule ai i le oti.

Na o Iesu Keriso E Mafai Ona Togiola mo a Tatou Agasala

  • Aisea ua na o Iesu Keriso ai e mafai ona togiola mo a tatou agasala?

E tele pogai ua na o Iesu Keriso ai e mafai ona avea ma o tatou Faaola. O le tasi pogai, o Ia lava na filifilia e le Tama Faalelagi e avea ma Faaola. O Ia o le Alo e Toatasi na Fanaua e le Atua ma o lea ua i ai ia te Ia le mana e pule ai i le oti. Na fetalai mai Iesu: “Ou te tuuina atu lo’u ola, ina ia ou toe aumai ai. E leai se tasi na te aveeseina ia te a’u, ae peitai a’u, ou te tuuina atu e a’u lava. O ia te a’u le pule e tuuina atu ai, o i ai foi le pule e toe aumai ai” (Ioane10:17–18).

Sa agavaa foi Iesu e avea ma o tatou Faaola, aua ua na o Ia lava le tagata na soifua i le lalolagi sa leai se agasala. O lea na avea ai o Ia ma taulaga agavaa e totogi ai mo agasala a isi tagata.

Sa Puapuagatia Ma Maliu Keriso e Togiola mo a Tatou Agasala

  • Ao e faitauina le vaega lenei, manatu faalemafaufau faapea o loo e i ai i le Faatoaga i Ketesemane po o i le satauro, o oe o se molimau vaai patino i le puapuagatia o Iesu Keriso.

Sa totogi e le Faaola a tatou agasala i Lona puapuaga i Ketesemane, ma le tuuina atu o Lona soifua i luga o le satauro. E le mafai ona tatou malamalama atoatoa i le mafatia na oo ia te Ia ona o a tatou agasala uma. Sa oo ifo i Ona luga i le Faatoaga o Ketesemane le mamafa o a tatou agasala, sa Ia lagona ai le tiga ma le loto momomo ma oo ai ina tafe ifo Lona toto mai pu laiti uma o le tino (tagai i le MFF 19:18–19). I se taimi mulimuli ane, ao faalavaau o Ia i le satauro, sa oo ia Iesu se maliu tiga ma le mafatia i se ala sili ona sauā ua iloa e tagata.

Faauta i le alofa tele o Iesu ia i tatou, ua Ia mafatia ai i ia tiga faaleagaga ma faaletino mo lo tatou manuia! Faauta i le alofa tele o le Tama Faalelagi, ua Ia auina mai ai Lona Alo e Toatasi na Fanaua, ia mafatia ma maliu mo Ana fanau uma. “Aua na faapea lava ona alofa mai o le Atua i le lalolagi, na Ia aumai ai Lona Atalii e toatasi, ina ia le fano se tasi e faatuatua ia te Ia, a ia maua e ia le ola e faavavau” (Ioane 3:16).

O Le Togiola Ma Le Toetu o Keriso Ua Toetutu Ai Tagata Uma

I le aso lona tolu ina ua mavae Lona Faasatauroga, na toe ulu ai le agaga o Keriso i Lona tino, ma ua avea ai o Ia ma tagata muamua ua toetu mai le oti. Ina ua o atu Ana uo e saili ia te ia, sa ta’u atu ia te i latou e agelu sa leoleoina le tuugamau, “E le o iinei o Ia: aua ua toetu mai o Ia, pei ona fetalai atu ai o Ia” (Mataio 28:6). Ua toe ulufale atu Lona agaga i Lona tino, e le toe tuueseeseina lava.

Sa faapea ona manumalo ai Keriso i le oti faaletino. Ona o Lana togiola o lea o le a toetutu mai ai tagata uma sa fananau mai i le lalolagi (tagai i le 1 Korinito 15:21–22). I le ala lava e tasi na toetu mai ai Iesu, o le a toe faatasia ai foi o tatou agaga ma o tatou tino, “ina ia le mafai ona toe oti … , e le toe vavaeeseina ai” (Alema 11:45). O lena tulaga, ua ta’ua o le tino ola pea. O tagata uma lava na ola i le lalolagi, o le a toetutu mai, “o e matutua ma e iti, o e noanoatia atoa ma e saoloto, o tane atoa ma fafine, o e amioleaga atoa ma e amiotonu” (Alema 11:44).

  • Ua faapefea ona fesoasoani lou malamalamaaga i le Toetu ia te oe?

O Le Togiola Ua Mafai Ai e i Latou O E Faatuatua Ia Keriso Ona Laveaiina Mai Ia Latou Agasala

  • Mafaufau pe faapefea ona fesoasoani le tala faatusa o loo i lenei vaega tatou te malamalama ai i le Togiola. O ai tagata i o tatou olaga o loo faatusa i ai tagata o i le tala faatusa?

O le Togiola a le Faaola ua mafai ai e i tatou ona manumalo i le oti faaleagaga. E ui o le a toetutu mai tagata, a e na o i latou o e talia le Togiola o le a faaolaina mai le oti faaleagaga (tagai i le Mataupu Faavae o le Faatuatua 1:3).

Tatou te talia le Togiola a Keriso i le tuu atu o lo tatou faatuatua ia te Ia. E ala i lenei faatuatua, tatou te salamo ai ia tatou agasala, papatisoina, ma maua le Agaga Paia, ma usiusitai i Ana poloaiga. E avea ai i tatou ma soo famaoni o Iesu Keriso. Ua faamagaloina ma faamamaina mai le agasala ma ua saunia e toe foi atu ma mau faatasi ma lo tatou Tama Faalelagi e faavavau.

Ua fetalai mai le Faaola ia i tatou, “Aua faauta, o a’u le Atua na puapuagatia i nei mea mo tagata uma, ina ia latou le puapuagatia … e pei o a’u” (MFF 19:16–17). Ua uma ona faia e Keriso Lana vaega e togiola ai a tatou agasala. Ina ia aoga atoatoa Lana Togiola i o tatou olaga, e ao ona tatou taumafai e usiusitai ia te Ia ma salamo ia tatou agasala.

Na tuuina mai e Peresitene Boyd K. Packer o le Aufono a le Toasefululua le tala faataitai lenei, e faaali mai ai le ala ua mafai ai e le Togiola a Keriso ona faaolaina i tatou mai le agasala pe afai tatou te faia la tatou vaega.

“Sei ou faamatala atu ia te outou se tala—o se tala faatusa.

“E i ai se alii sa i ai se mea sa manao tele i ai o ia. Sa sili atu ona taua lenei mea ia te ia nai lo soo se isi lava mea i lona olaga. Ina ia ona maua lenei mea sa ia manao i ai, sa alu atu lenei alii ma faia se aitalafu tele.

“Sa lapataiina o ia i lona aitalafuina o se tupe tele faapea, aemaise lava o le tagata na ia aitalafu mai ai. Peitai sa taua tele ia te ia ona ia faia le mea sa manao i ai, ma lona fia mauaina o le mea sa naunau i ai i le taimi nei lava. Sa ia manatu o le a mafai ona ia toe totogia i se taimi mulimuli lea aitalafu.

“O lea na ia saini ai loa se feagaiga. O le a ia totogia uma i se taimi. Sa le popole tele i ai, aua sa foliga mai sa mamao lava le aso e totogi uma ai le aitalafu. Ua ia maua nei le mea sa manao i ai, ma o le mea lena sa foliga mai sa sili atu ona taua.

“Sa ia manatua pea i lona mafaufau lē na ia aitalafu ai, ma sa ia avatu i lea taimi ma lea taimi ni totogi laiti e faamalie ai lē na aitalafu ai, ma le manatu e le oo mai vave le aso e tatau ona totogi uma ai lana aitalafu.

“Peitai, na oo mai lava le aso, ma sa tatau ona totogi atoa le aitalafu e tusa ma le feagaiga na faia. Ae e le i uma ona totogi le aitalafu. Sa oo ina sau lē na ia aitalafu ai ma fai mai e totogi atoa atu le aitalafu.

“O le taimi lena faatoa ia iloa ai, ua i ai i lē ua ia aitalafu ai le pule na te ave ai ana mea uma, faapea foi ma le pule e ave ai o ia i le falepuipui.

“‘E le mafai ona ou totogi atu oe, aua e leai sa’u tupe e totogi ai,’ o lana tali atu lea.

“‘Ona fai mai lea o lē na ia aitalafu ai, ‘O le a matou faataunuu le feagaiga na faia, o le a matou aveina au mea uma ma o le a tuuina atu oe i le falepuipui. O le mea lena na e ioe i ai. O lau lava filifiliga na e faia ai. Na e sainia le feagaiga, ma o le a faataunuu nei lena feagaiga.’

“‘E a pe a sei tuu mai sina taimi e totogi ai pe faamagalo foi?’ o le aioi mai lea a lē ua aitalafu. ‘Fai se fuafuaga ina ia tuu ai pea a’u mea ma ia le avea ai a’u i le falepuipui. E te talitonu moni lava i le alofa mutimutivale a? E te le alofa mutimutivale mai ea ia te a’u?

“Ua tali mai lē ua aitalafu ai, ‘O le alofa mutimutivale e itu tasi. Na o oe e manuia ai. A ou alofa mutimutivale atu ia te oe, o le a le totogia ai a’u mea. O le faamasino tonu ou te manao i ai. E te talitonu ea i le faamasinoga tonu?’

“‘Sa ou talitonu i le faamasinoga tonu i le taimi na ou saini ai le feagaiga,’ o le tali lea a lē ua aitalafu. ‘Sa ‘au ia te a’u le faamasinoga tonu i le taimi lena, aua sa ou manatu o le a puipuia ai a’u. Sa ou le manaomia le alofa mutimutivale i le taimi lena, ou te le i manatu foi ou te manaomia lena mea o le alofa mutimutivale. Sa ou manatu lava, o le faamasinoga tonu o le a puipuia tutusa i taua uma.’

“‘O le faamasinoga tonu lea ua manao mai ia e totogi le feagaiga, a leai, o le a faasalaina oe,’ o le tali lea a lē ua aitalafu ai le tagata. ‘O le tulafono lena. O le mea lena sa e ioe i ai, ma o le mea lena e tatau ona fai. E le mafai e le alofa mutimutivale ona faoa le faamasinoga tonu.’

“O le mea lena ua feagai nei ma ia alii: Ua manao le tasi i le faamasinoga tonu, ae ua aioi mai le isi ia alofa mutimutivale atu. E leai se tasi o i laua e manumalo vagana ua gauai atu le tasi i le isi.

“‘Afai e te le faamagaloina la’u aitalafu, o lona uiga ua leai se alofa mutimutivale,’ o le aioi mai lea a lē ua aitalafu.

Ae tali mai lē ua aitalafu ai, “‘A ou faamagaloina lau aitalafu, o lona uiga ua leai se faamasinoga tonu.’

“E foliga mai, ua le mafai ona faamalieina tulafono uma e lua. E lua mataupu o le faavavau e foliga mai ua feteenai le tasi ma le isi. Pe leai ea se auala e faamalie atoatoa ai le faamasinoga tonu, faapea foi le alofa mutimutivale?

“E i ai le auala! O le faamasinoga tonu e mafai ona faamalie atoatoa ma le alofa mutimutivale e mafai ona faaali atu i le atoatoa—peitai e manaomia ai se isi tagata. Ma sa faapea ona tupu lena mea i le taimi lea.

“Sa i ai se uo a lē ua aitalafu. Na sau o ia e fesoasoani. Sa Ia silafia lelei lē ua aitalafu. Sa ia silafia lona le mafaufau lelei. Sa manatu o ia ua valea le ua aitalafu i lona tuu o lenei mea e oo mai ia te ia. E ui i lea, sa ia manao e fesoasoani atu, aua ua ia alofa ia te ia. Ona ia tulai mai lea ua tu i le va o nei alii, ma liliu atu i lē na aitalafu ai le tagata, ma ofo atu e faapea.

“‘O le a ou totogia le aitalafu pe afai e te faamagalo lē ua aitalafu ia te oe mai lenei feagaiga, ina ia tuu pea ana mea, ma ia le avea o ia i le falepuipui.’’

“A o mafaufau lē ua aitalafu ai le tagata i le mea ua ofo mai, sa toe faapea mai le puluvaga, ‘Na e manao i le faamasinoga tonu. E ui ina le mafai ona ia totogia oe, ae o le a ou totogia lana aitalafu. O le a faapea ona faia ai le mea sa’o ia te oe e pei ona tatau ai, e aunoa ma se isi mea e te manao i ai. O le a le avea lena ma faamasinoga tonu.’

“Sa malie loa i ai lē ua aitalafu ai le tagata.

“Ona liliu atu lea o le puluvaga i lē ua aitalafu. ‘Afai ou te totogia lau aitalafu, e te talia ea a’u e avea ma lē ua e aitalafu ai?’

“‘Ioe, ioe,’ o le tali atu lea a lē ua aitalafu. ‘Ua e laveai a’u mai le falepuipui ma ua e alofa mutimutivale mai ia te a’u.’’

“‘Ua lelei,’ o le tali ane lea a lē ua fesoasoani, ‘o le a e totogi mai ia te a’u le aitalafu, ae o le a ou faia le feagaiga. O le a le faigofie foi, ae mafai lava ona e faia. O le a ou faia le auala. E le manaomia ona e alu i le falepuipui.’

“Sa faapea ona toe totogi atoatoa lē na aitalafu ai le tagata. Sa faia ia te ia le mea tonu. Sa le i solia foi se feagaiga.

“Sa faapea foi ona faaali atu i lē na aitalafu le alofa mutimutivale. Sa faataunuuina tulafono uma e lua. Talu ai ona sa i ai se puluvaga, o lea na faamalieina atoatoa ai le faamasinoga tonu, ma faamalieina atoatoa ai foi le alofa mutimutivale” (i le Conference Report, Aperila 1977, 79–80; poo le Ensign, Me 1977, 54–55).

O a tatou agasala o a tatou aitalafu ia faaleagaga. A aunoa ma Iesu Keriso, o lo tatou Faaola ma le Puluvaga, semanu e totogi e i tatou uma lava a tatou agasala e ala i le mafatia i le oti faaleagaga. Peitai ona o Ia, afai tatou te tausia tuutuuga o Ana feagaiga, lea e ala mai i le salamo ma le tausia o Ana poloaiga, e mafai ona tatou toe foi atu ma mau faatasi ma lo tatou Tama Faalelagi.

O se mea matagofie tele ona ua saunia e Keriso se auala e mafai ona faamaloloina ai i tatou mai i a tatou agasala. Na Ia fetalai mai:

“Faauta, ua ou sau i le lalolagi…e faaola le lalolagi ai le agasala.

“O lenei, ai se salamo, ma sau ia te a’u, e pei o se tamaitiiti, ou te talia o ia, aua e faapei o i latou o e o i le malo o le Atua. Faauta, o i latou faapena na ou tuu atu ai lo’u ola, ma toe ava’e, o le mea lea, ia outou salamo, ma o mai ia te a’u, o outou tuluiga o le lalolagi, ma ola ai” (3 Nifae 9:21–22).

  • Mafaufau loloto i auala e mafai ona e faaali atu ai le agaga faafetai mo le meaalofa o le Togiola.

Mau Faaopoopo