Tusi ma Lesona
Mataupu 4: Saolotoga E Filifili Ai

Mataupu 4

Saolotoga E Filifili Ai

Ata
Man standing at crossroads

O Le Faitalia o Se Mataupu O Le Faavavau

  • Afai e fesili atu se tasi ia te oe pe aisea e taua ai le i ai o le faitalia, o le a sau tali?

“Ia faitalia oe ma lau filifiliga i ai, aua ua tuuina atu ia te oe” (Mose 3:17).

Ua ta’u mai e le Atua ia i tatou e ala i Ana perofeta ua tatou saoloto e filifili i le va o le lelei ma le leaga. E mafai ona tatou filifili le saolotoga ma le ola e faavavau e ala i le mulimuli ia Iesu Keriso. Ua tatou saoloto foi e filifili le pologa ma le oti, e ala i le mulimuli ia Satani. (Tagai i le 2 Nifae 2:27.) O le aia tatau e filifili ai i le va o le lelei ma le leaga ma faatino ai mea uma mo i tatou lava ua ta’ua o le faitalia.

I le muai olaga, sa i ai la tatou faitalia saoloto. O se tasi o faamoemoega o lo tatou olaga i le lalolagi o le vaai lea po o a filifiliga tatou te faia (tagai i le 2 Nifae 2:15–16). Afai e faamalosia i tatou e filifili le mea sa’o, o le a le mafai ona faaali atu po o a mea o le a tatou filifilia mo i tatou lava. E le gata i lea, e sili atu lo tatou fiafia e fai se mea, pe a faia a tatou lava filifiliga.

O le faitalia o se tasi lea o mataupu muamua sa tulai mai i le Fono na faia i le Lagi. O se tasi lea o mafuaaga autu o le taua i le va o e na mulimuli ia Keriso ma e na mulimuli ia Satani. Sa faapea atu Satani, “Faauta, o au lenei, auina atu au, ia avea au mou atalii, ma o le a ou togiolaina le fanauga uma a tagata ina ia le se ese se agaga e toatasi, ma e moni o le a faapea lava ona ou faia; o le mea lea, ia tuu mai ia te au lou mamalu” (Mose 4:1). I le faia ai o lea faamatalaga, sa ia “fouvale ai [i le Atua], ma saili e faaumatia le saolotoga o le tagata” (Mose 4:3). Sa teena lana ofo, ma sa tuliesea ai mai le lagi faatasi ai ma e na mulimuli ia te ia (tagai i le MFF 29:36–37).

O Le Faitalia o se Vaega Tatau o le Ata o le Faaolataga

O le faitalia ua avea ai lo tatou olaga i le lalolagi ma se vaitaimi o le tofotofoga. A o fuafuaina le faia o le tagata i lona tulaga faaletino, sa fetalai mai le Atua, “O le a tatou faata’ita’i [tofotofoina] ai i latou, ia iloa ai, pe latou te faia mea uma e poloaiina ai i latou e le Alii lo latou Atua” (Aperaamo 3:25). A na leai le meaalofa o le faitalia, semanu e le mafai ona faaali atu i lo tatou Tama Faalelagi pe tatou te faia mea uma na Ia poloaiina ai i tatou. Talu ai ua mafai ona tatou filifili, o lea ua pa’ū ai i o tatou lava luga mea tatou te faia (tagai i le Helamana 14:30–31).

Pe a tatou filifili e ola e tusa ma le fuafuaga a le Atua mo i tatou, o le a faamalosia ai la tatou faitalia. O filifiliga sa’o e faateleina ai lo tatou mana e fai atili ai filifiliga sa’o.

A tatou usiusitai i poloaiga taitasi a lo tatou Tama, o le a faateleina lo tatou poto ma le malosi e fai ai le mea sa’o. O le a faateleina lo tatou faatuatua. O le a faigofie ona tatou faia filifiliga sa’o.

Na amata ona tatou faia filifiliga o ni fanau agaga i luma o lo tatou Tama Faalelagi. O filifiliga na tatou faia iina, ua tatou agavaa ai e o mai i le lalolagi. E finagalo lo tatou Tama Faalelagi ia faatupuina lo tatou faatuatua, mana, malamalama, poto, ma isi uiga lelei uma. Afai tatou te tausia Ana poloaiga ma fai filifiliga sa’o, o le a tatou iloa ma malamalama ai. Ona avea ai lea o i tatou e pei o Ia. (Tagai i le MFF 93:28.)

  • E faapefea e lo tatou faia o filifiliga sa’o ona fesoasoani tatou te faia ai pea filifiliga sa’o.

E Manaomia e le Faitalia Le i ai o se Filifiliga

  • Aisea ua tatau ai ona i ai se faafeagai o mea uma?

E le mafai ona tatou filifili le amiotonu sei vagana ua tuu mai i o tatou luma le faafeagai o le lelei ma le leaga. Sa ta’u atu e Liae, se perofeta maoae o le Tusi a Mamona, i lona atalii o Iakopo faapea ina ia mafai ona faataunuuina faamoemoega e faavavau o le Atua, e ao ina i ai “se faafeagai o mea uma. A leai, … e le mafai ona faataunuuina le amiotonu, po o le amioleaga, po o le mea pa’ia, po o le malaia, po o le lelei, po o le leaga” (2 Nifae 2:11).

Ua faatagaina Satani e le Atua e tetee i le lelei. Sa fetalai mai le Atua e uiga ia Satani:

“O lea na ou faia ai…ia tuli ese atu o ia i lalo;

“Ona avea ai lea o ia ma Satani, ioe, o le tiapolo lava lea, o le tamā o pepelo uma lava, e faasese ma faatauaso mafaufau o tagata, ma ta’ita’i faatagataotaua mafaufau o tagata, ma ta’ita’i faatagataotaua i latou i le mea na te loto i ai, i latou uma ia o e e le faalogo i lo’u leo” (Mose 4:3–4).

Ua faia e Satani mea uma e mafai ona ia faia e faaumatia ai le galuega a le Atua. Ua ia saili “ia malaia tagata uma. …Na te saili ina ia malaia tagata uma e pei o ia” (2 Nifae 2:18, 27). E le alofa o ia ia i tatou. E le manao o ia ia tatou maua se mea lelei (tagai i le Moronae 7:17). E le manao o ia ia tatou maua le fiafia. Ae manao ia fai i tatou ma ana pologa. Na te faaaoga le tele o ala taufaasese e saisaitia ai i tatou.

A tatou mulimuli i faaosoosoga a Satani, ua tatou faatapulaaina a tatou filifiliga. Ua faaali mai lena mea i le faataitaiga lenei. Faapea ua e vaai atu i se faasilasilaga ua tusia i le matafaga e faapea lona faitauga: “Vili—Matautia” Ua sā le taele iinei.” Atonu tatou te manatu ifo, o lenei faaaliga, o se mea ua faia e taofia ai la tatou filifiliga. Ae pe tonu ea lena manatu? E tele isi filifiliga e mafai ona tatou faia. Ua tatou saoloto e taeele i se isi mea. Ua tatou saoloto e savalivali i le matafaga ma tae atigi figota. Ua tatou saoloto e nofonofo ma matamata i le goto ifo o le la. Ua tatou saoloto e toe foi atu i o tatou aiga. Ua tatou saoloto foi e le amana’ia le faasilasilaga ma taeele i le mea ua faasaina. Ae a maua loa i tatou i le vili ma toso ifo ai i tatou i lalo, e itiiti lava ni filifiliga e mafai ona tatou faia. E mafai ona tatou taumafai e aau ese, pe valaau mo se fesoasoani, peitai, atonu foi tatou te malelemo ai.

E ui ina tatou saoloto e filifili le mea tatou te faia, ae tatou te le saoloto e filifili le taunuuga o mea tatou te faia. O taunuuga, pe lelei pe leaga, o ni taunuuga le ma’alofia ia o soo se filifiliga tatou te faia (tagai Kalatia 6:7; Faaaliga 22:12).

Ua uma ona ta’u mai e le Tama Faalelagi ia i tatou le ala e sosola ese ai mai le saisaitiaga a Satani. E tatau ona tatou mataala ma tatalo e le aunoa, ma ole atu i le Atua e fesoasoani mai ia i tatou e tetee atu i faaosoosoga a Satani (tagai i le 3 Nifae 18:15). E le tuuina i tatou e le Tama Faalelagi ia tofotofoina e sili atu nai lo tatou malosi e tetee atu ai (tagai i le 1 Korinito 10:13; Alema 13:28).

O poloaiga a le Atua e taitai ese ai i tatou mai le malaia, ae taitai atu i le ola e faavavau. O le filifili ma le poto, tatou te maua ai le faaeaga, alualu i luma e faavavau, ma maua ai le fiafia atoatoa (tagai i le 2 Nifae 2:27–28).

  • O a ni faataitaiga o ni amioga e faatapulaaina a tatou filifiliga? O a ni faataitaiga o ni amioga e faateleina ai lo tatou saolotoga?

Mau Faaopoopo