Tusi ma Lesona
Mataupu 8: Tatalo Atu i Lo Tatou Tama Faalelagi

Mataupu 8

Tatalo Atu i Lo Tatou Tama Faalelagi

Ata
A woman sitting at a desk with the scriptures open in front of her. She has her hands clasped and eyes closed in prayer.

O Le a Le Tatalo?

Na aoao mai Iesu, “O le mea lea e tatau ai ona outou tatalo e le aunoa i le Tama i lo’u igoa” (3 Nifae 18:19).

O le tatalo o se tasi lea o faamanuiaga silisili ua tatou maua a o tatou i ai i lenei lalolagi. O le tatalo e mafai ai ona tatou fesootai ma lo tatou Tama Faalelagi ma saili Lana taitaiga i aso taitasi.

O le tatalo o se fesootaiga faamaoni lea o le loto ma lo tatou Tama Faalelagi. E tatau ona tatou tatalo atu i le Atua, ae le o se isi lava tagata. Tatou te le tatalo atu i se isi lava tagata po o se isi lava mea ua faia e le tagata po o le Atua (tagai i le Esoto 20:3–5).

Aisea Tatou Te Tatalo Ai?

O le tatalo o se vaega taua o le talalelei mai le amataga o le lalolagi. Sa poloaiina Atamu ma Eva e se agelu a le Alii ia salamo ma valaau atu i le Atua i le suafa o le Alo (tagai i le Mose 5:8). E le i aveesea lava lenei poloaiga. O le a fesoasoani le tatalo ia i tatou e faalatalata atili atu ai i le Atua. O o tatou mafaufauga uma, ma a tatou upu uma, ma mea uma tatou te faia, e uunaia e a tatou tatalo.

E tatau ona tatou tatalo mo le malosi e tetee atu ai i faaosoosoga a Satani ma ana ‘au (tagai i le 3 Nifae 18:15; MFF 10:5). E tatau ona tatou tatalo e ta’uta’u atu a tatou agasala i le Atua ma ole atu ia te Ia e faamagalo mai i tatou (tagai i le Alema 38:14).

E tatau ona tatou tatalo mo le taitaiga ma le fesoasoani a le Alii i o tatou olaga i aso taitasi. E tatau ona tatou tatalo mo o tatou aiga ma uo, o tatou tuaoi, mo a tatou faatoaga, a tatou lafumanu, a tatou galuega e fai i aso taitasi, ma isi a tatou gaoioiga. E tatau ona tatou tatalo mo le puipuiga mai o tatou fili. (Tagai i le Alema 34:17–27.)

E tatau ona tatou tatalo e faaali atu lo tatou alofa i lo tatou Tama Faalelagi ma lagona le latalata atu ia te Ia. E tatau ona tatou tatalo i lo tatou Tama e faafetai atu ia te Ia mo lo tatou manuia ma le ola lelei ma mo mea uma ua Ia tuuina mai ia i tatou i aso taitasi (tagai i le 1 Tesalonia 5:18). E manaomia ona tatou tatalo e ole atu i lo tatou Tama Faalelagi mo le malosi e ola ai i le talalelei.

E tatau ona tatou tatalo ina ia mafai ona tatou tumau i le ala sao ma le vaapiapi e tau i le ola e faavavau. E tatau ona tatou tatalo atu i le Atua, le mataisau o le amiotonu uma, ina ia mafai ona tatou tonu i o tatou mafaufauga, upu, ma amioga.

  • O faapefea ona fesoasoani le tatalo ia te oe e te latalata atu ai i le Tama Faalelagi?

O Le A Le Taimi E Tatau Ai Ona Tatou Tatalo?

E mafai ona tatou tatalo i soo se taimi e lagona ai le manaomia ona tatou talanoa ma lo tatou Tama Faalelagi, pe leo lemu pe leo tele. O nisi taimi e tatau ai ona tatou tatalo atu na o i tatou i se mea e mafai ona sasaa atu ai o tatou loto ia te Ia (tagai i le Mataio 6:6). E le gata i lea, e mafai foi ona tatou tatalo atu i taimi o a tatou gaoioiga i aso taitasi. E mafai foi ona tatou tatalo a o tatou i ai i sauniga lotu, i o tatou fale, ao tatou savavali i le auala, ao tatou galulue, ao saunia se meaai, po o soo se mea lava tatou te i ai po o soo se mea foi tatou te faia. E mafai ona tatou tatalo i soo se taimi o le ao po o le po. E mafai ona tatou tatalo pe a na o i tatou pe faatasi foi ma nisi tagata. E mafai ona tatou mafaufau i lo tatou Tama Faalelagi i taimi uma (tagai i le Alema 34:27). E mafai ona tatou “tatalo pea” (MFF 10:5).

E i ai nisi taimi tatou te le fia tatalo ai. Atonu o taimi ia e oo ai le ita po o le loto vaivai po o le le fiafia foi i o tatou loto. I taimi faapena, e tatau lava ona tatou faia ai se taumafaiga faapitoa e tatalo (tagai i le 2 Nifae 32:8–9).

E tatau ona tatou tatalo na o i tatou i po ma taeao uma. Ua tau mai i tusitusiga paia le tatalo i le taeao, aoauli, ma le afiafi (tagai i le Alema 34:21).

Ua poloaiina i tatou ia faia a tatou tatalo faaleaiga ina ia faamanuiaina ai o tatou aiga (tagai i le 3 Nifae 18:21). Ua fautuaina i tatou e o tatou taitai o le Ekalesia ia faia a tatou tatalo faaleaiga i taeao ma po taitasi.

Ua tatou maua foi le avanoa i tatalo e avatu ai le faafetai ma ole atu ai mo se faamanuiaga i meaai ae lei faia a tatou taumafataga taitasi.

E amata ma faaiu a tatou sauniga lotu o le Ekalesia i le tatalo. Tatou te faafetai atu i le Alii mo Ana faamanuiaga ma ole atu mo Lana fesoasoani ina ia mafai ona tatou tapuai i le ala e finagalo ai o Ia.

O Le A Le Ala E Tatau Ona Tatou Tatalo Ai?

So o se mea tatou te i ai, pe tatou te tutu pe tootutuli, pe tatou te tatalo leo tele pe tatalo lemu, pe tatou te tatalo mo i tatou lava pe mo nisi tagata, e tatau ona tatou tatalo atu pea ma le faatuatua, “ma le loto faamaoni, ma le manatu tonu i ai” (Moronae 10:4).

A tatou tatalo atu i lo tatou Tama Faalelagi, e tatau ona tatou tau atu ia te Ia mea moni o tatou lagonaina i o tatou loto, ma ta’u atu ia te Ia, ma ole atu ia te Ia e faamagalo mai, aioi atu ia te Ia, faafetai atu ia te Ia, ma ta’u atu ia te Ia lo tatou alofa ia te Ia. E le tatau ona tatou ta’u soo upu e leai se aoga (tagai i le Mataio 6:7–8). E tatau ona tatou ole atu pea ia faia Lona finagalo, ia manatua, o mea tatou te mananao i ai, atonu e le o mea sili ia ona lelei mo i tatou (tagai i le 3 Nifae 18:20). I le faaiuga o a tatou tatalo, tatou te faaiuina i le suafa o Iesu Keriso (tagai i le 3 Nifae 18:19).

E Faapefea Ona Tali Mai Tatalo?

  • Aisea e te manatu e le vave aliali mai ai tali o a tatou tatalo i taimi uma? Aisea e te manatu e le oo mai ai tali o a tatou tatalo i le taimi tatou te mananao ai pe i le auala foi tatou te mananao ai?

E tali mai i taimi uma lava a tatou tatalo faamaoni. O nisi taimi atonu o le tali e tuuina mai o le leai, ona o le mea ua tatou ole atu ai, atonu e le o le mea lea ua sili ona lelei mo i tatou. O nisi taimi o le tali e tuuina mai o le ioe, ma tatou te faalogoina ai se lagona mafanafana e uiga i le mea e tatau ona tatou faia (tagai i le MFF 9:8–9). O nisi taimi o le tali e tuuina mai o le “faatali laitiiti.” E tali mai a tatou tatalo i taimi uma, i le taimi ma le ala ua silafia e le Alii o le a sili ona fesoasoani ia i tatou.

O nisi taimi e tali mai le Alii i a tatou talosaga e ala mai i isi tagata. Atonu e musuia se uo lelei, se tane po o se ava, se matua, po o isi tagata o le aiga, se taitai o le Ekalesia, po o se faifeautalai—soo se tasi o ia tagata latou te faia se mea o le a talia ai a tatou talosaga. O se faataitaiga o lenei mea, o se tina talavou lea sa lavea lana pepe i se faalavelave na tupu i lo latou fale. Sa leai se auala na ia maua e ave ai le pepe i le fomai. Sa fou o ia i le nuu ma sa le masani i se tasi o ona tuaoi. Sa tatalo lenei tina talavou mo se fesoasoani. E lei mavae ni minute se tele, ae sau se fafine sa la tuaoi i le faitotoa ma faapea mai, “Sa oo mai ia te au le lagona ou te sau e vaai pe e te manaomia se fesoasoani.” Sa fesoasoani le tuaoi i lenei tina talavou e ave le pepe i se fomai.

O le tele o taimi e tuuina mai e le Atua ia i tatou le mana e fesoasoani ai e tali a tatou lava talosaga. Ao tatou tatalo mo se fesoasoani, e tatau ona tatou faia mea uma e mafai ona tatou faia, e faataunuu ai mea ua tatou manaomia.

A tatou ola i le talalelei a Iesu Keriso ma tatalo e le aunoa, o le a tatou maua le olioli ma le fiafia tele. “Ia e loto maulalo; ona taitaiina ai lea o oe e le Alii lou Atua, ma tali atu i au talosaga” (MFF 112:10).

  • O a ni auala ua tali mai ai e le Tama Faalelagi au tatalo?

Mau Faaopoopo ma Isi Tusi