Tusi ma Lesona
Mataupu 20: Papatisoga

Mataupu 20

Papatisoga

Ata
A Hispanic missionary baptizing a Hispanic man in a large font or pool.

O Le Poloaiga Ina Ia Papatiso

  • Aisea ua tatau ai ona tatou papatiso?

O ona po nei, e pei o ona po o Iesu, ua i ai ni mataupu faavae ma sauniga faapitoa o le talalelei e ao ina tatou aoaoina ma usiusitai i ai. O se mataupu faavae o le talalelei o se talitonuga moni po o se aoaoga moni. O se sauniga o se tu po o se faiga faaletapuaiga. O uluai mataupu faavae e lua o le talalelei o le faatuatua i le Alii o Iesu Keriso ma le salamo. O le papatisoga o le sauniga muamua lea o le talalelei. O se tasi o poloaiga na tuuina mai e le Alii i Ona soo, “Ia outou o atu e fai nuu uma lava ma soo, ma papatiso atu ia te i latou i le suafa o le Tama, ma le Alo, ma le Agaga Paia: aoao atu ia te i latou ia tausi i mea uma ua ou fai atu ai ia te outou” (Mataio 28:19–20).

E Ao Ina Papatisoina i Tatou mo le Faamagaloina o a Tatou Agasala

Afai tatou te faatuatua ia Iesu Keriso, salamo, ma papatisoina, o le a faamagaloina a tatou agasala e ala i le Togiola a Iesu Keriso.

Ua tatou iloa mai tusitusiga paia sa “papatiso atu” Ioane le Papatiso “i le vao, ma talai atu le papatisoga o le salamo mo le faamagaloina o agasala” (Mareko 1:4). Sa aoao atu e le Aposetolo o Peteru, “Ina salamo ia, ma ia taitasi ma papatisoina outou uma i le suafa o Iesu Keriso, mo le faamagaloina o agasala” (Galuega 2:38). Ina ua liliu mai Paulo, sa fai atu Anania ia te ia, “Tulai ia, ma ia papatisoina oe, ma ia fufulueseina au agasala” (Galuega 22:16).

E Ao Ina Papatisoina I Tatou e Avea Ai Ma Tagata O Le Ekalesia A Iesu Keriso

“O i latou uma o e faamaulaloina i latou lava i luma o le Atua, ma mananao e papatiso … ma ua salamo faamaoni ia latou agasala uma… o le a taliaina i Lana Ekalesia, e ala i le papatisoga” (MFF 20:37).

E Ao Ina Tatou Papatiso a o lei Mauaina e i Tatou le Meaalofa o le Agaga Paia

Na fetalai mai le Alii, “Afai e te liliu mai ia te a’u, ma … salamo mai au solitulafono [agasala] uma, ma papatisoina i le vai i le suafa o lo’u Atalii e Toatasi na Fanaua, … o le a e maua le meaalofa o le Agaga Paia” (Mose 6:52).

E Ao Ina Papatisoina i Tatou e Faaali Atu Ai Le Usiusitai

Sa aunoa Iesu Keriso ma se agasala, peitai sa papatisoina lava o Ia. Sa Ia fetalai mai sa tatau ona papatisoina o Ia “e faataunuuina ai mea tonu uma” (Mataio 3:15). Ua faamatala mai e le perofeta o Nifae sa fetalai mai le Alii ia te ia, “Ina mulimuli mai ia ia te a’u, ma faia mea ua outou vaavaai mai ia te a’u ua ou faia…ma le loto atoa, ae le faia se mea pepelo, po o se faa’ole’olega i luma o le Atua, a o le loto faamaoni ua salamo ia outou agasala, ma molimau atu i le Tama, ua outou loto ina ave i o outou luga le suafa o Keriso i le papatisoga” (2 Nifae 31:12–13).

E Ao Ona Papatisoina i Tatou e Ulufale Atu Ai i le Malo Selesitila

Ua fetalai mai Iesu, “O i latou uma…o e talitonu mai ia te a’u, ma papatisoina,…o i latou ia e fai mo latou tofi le malo o le Atua. Ai se le talitonu mai ia te a’u, ma lē papatisoina, e faasalaina” (3 Nifae 11:33–34). O le papatisoga o le faitotoa lea tatou te ulu atu ai i le malo selesitila (tagai i le 2 Nifae 31:17–18).

O Le Ala Sa’o e Faia Ai Papatisoga

  • O le a le ala e tatau ona papatisoina ai i tatou?

Na o le tasi lava le ala sa’o e fai ai le papatisoga. Sa faaali mai e Iesu i le Perofeta o Iosefa Samita, e tatau i le tagata ua ia umia le pule tatau o le perisitua e fai ai le papatisoga, ona “o ifo i le vai faatasi ma le ua tuuina mai o ia e papatiso. … Ona ia faatofuina lea o ia i le vai, ma toe o mai nai le vai” (MFF 20:73–74). E tatau ona faatofuina. Sa aoao atu e le Aposetolo o Paulo, o le faatofuina i le vai ma le toetu a’e nai le vai, o le faatusa lena o le maliu ma le toetu mai [o le Faaola]. A uma ona papatisoina i tatou, ua tatou amataina se olaga fou. Fai mai Paulo:

“Tou te le iloa ea, o i tatou uma na papatisoina ia Keriso Iesu, na papatisoina i Lona maliu?

“O lenei, ua tatanu faatasi i tatou ma Ia i le papatisoga i Lona maliu; ina ia tatou savavali i le ola toefuataiina, pei ona toefuataiina mai Keriso nai e ua oti, i le mana o le Tama.

“Aua afai ua faatasia i tatou i le faatusa o Lona maliu, e faapea foi i tatou i Lona toetu mai” (Roma 6:3–5).

O le papatisoina i le faatofuina e se tasi ua i ai le pule tatau, ona pau lava lea o le ala sa’o ma ua talia e papatiso ai.

  • Aisea ua taua ai le pule e fai ai le papatisoga?

  • O a tulaga e tutusa ai le papatisoga i le faatofuina ma le Toetu o le Faaola?

Papatisoga i Tausaga Ua Malamalama Ai I Mea Uma

  • O ai e tatau ona papatiso?

O tagata uma ua valu tausaga le matutua ma ua malamalama i mea na latou faia (ua tali atu mo ia lava), e tatau ona papatiso. E i ai nisi lotu ua latou aoao e tatau ona papatisoina fanau laiti. Ua le tonu lena mea e tusa ma aoaoga a le Faaola. Ina ua fetalai Iesu e uiga i fanau laiti, sa Ia faapea mai, “E faapei o i latou nei o e o i le malo o le lagi” (Mataio 19:14).

Ua fai mai le perofeta o Mamona o lena mea o se ulaga i luma o le Atua le papatisoina o fanau laiti, aua e le mafai ona latou fai agasala. E faapena foi, e le manaomia le papatisoga e tagata e le malamalama o latou mafaufau i le sa’o ma le sese (tagai i le Moronae 8:9–22).

A o isi tagata uma, e tatau ona papatiso. E tatau ona tatou papatiso ma tumau faamaoni i le feagaiga tatou te osia i le taimi lena.

  • Faamata o le a sau tala e fai i sau uo e talitonu e tatau ona papatisoina pepe?

Tatou Te Osia Feagaiga Pe a Papatisoina I Tatou

E tele mau ua aoao mai e uiga i le papatisoga. I se tasi o ia mau ua aoao mai ai e le perofeta o Alema, o le faatuatua ma le salamo, o ni laasaga ia e saunia ai i tatou mo le papatisoga. Sa ia aoao mai, a papatisoina i tatou, ua tatou osia se feagaiga ma le Alii. Tatou te folafola atu o le a tatou faia ni mea patino, ae folafola mai e le Alii o le a Ia faamanuia i tatou pe a tatou faia ia mea.

Ua faamatala mai e Alema e ao ina tatou mananao e ta’ua i tatou o ni tagata o le Atua. E tatau ona tatou loto malilie e fesoasoani ma faamafanafana le tasi i le isi. E ao ina tatou tutu e avea ma molimau a le Atua i taimi uma, ma mea uma, ma nofoaga uma. Afai tatou te faia ia mea ma papatisoina i tatou, o le a faamagaloina e le Atua a tatou agasala. Sa ta’u atu e Alema i tagata o e sa talitonu i ana aoaoga e uiga i le talalelei:

“Faauta, o iinei le vai o Mamona. … O lenei foi, ua outou fia o mai i le lafu mamoe a le Atua, ma ia ta’ua o Lona nuu, … se a le mea e le papatisoina ai outou i le suafa o le Atua, e fai ma molimau i Ona luma ua outou osia le feagaiga ma Ia tou te auauna atu ia te Ia ma tausi i Ana poloaiga, ina ia liligi atili ai e Ia Lona Agaga i luga ia te outou?” (Mosaea 18:8, 10). Ona pati lea o lima o tagata i le olioli ma fai mai o le manao lea o o latou loto ia papatisoina i latou. Ona papatiso ai lea o i latou e Alema i le Vai o Mamona. (Tagai i le Mosaea 18:7–17.)

Sa aoao mai e Alema a papatisoina i tatou, ua tatou osia ni feagaiga ma le Alii e:

  1. O mai i le lafu a le Atua.

  2. Fesoasoani le tasi i le isi i le tauaveina o avega.

  3. Tutu e avea ma molimau a le Atua i taimi uma ma nofoaga uma.

  4. Auauna i le Atua ma tausi Ana poloaiga.

Pe a papatisoina i tatou ma tausi feagaiga o le papatisoga, ua folafola mai le Alii o le a Ia:

  1. Faamagaloina a tatou agasala (tagai i le Galuega 2:38; MFF 49:13).

  2. Liligi tele mai Lona Agaga i o tatou luga (tagai i le Mosaea 18:10).

  3. Tuu mai ia i tatou le taitaiga i aso taitasi ma le fesoasoani a le Agaga Paia (tagai i le Galuega 2:38; MFF 20:77).

  4. Ia tatou tulai mai i le Uluai Toetu (tagai i le Mosaea 18:9).

  5. Tuu mai ia i tatou le ola e faavavau (tagai i le Mosaea 18:9).

  • O le a le uiga o le tauave e le tasi o le avega a le isi po o le fesui i avega a isi? e tu e fai ma molimau a le Atua i taimi uma ma nofoaga uma?

O Le Papatisoga Tatou Te Maua Ai Se Amataga Fou

Tatou te amataina se olaga fou i le papatisoga. O le pogai lena ua tatou ta’ua ai le papatisoga o le toe fanauina. Ua fetalai mai Iesu a le toe fanauina i tatou i le vai ma le agaga, e le mafai ona tatou ulu atu i le malo o le Atua (tagai i le Ioane 3:3–5). Sa manino ona faamatala atu lenei mataupu ia Atamu:

“Talu ai ona ua outou fananau mai…i le vai, ma le toto, ma le agaga, i le lalolagi ua ou faia, ma ua faapea ona avea ai le efuefu o se tagata ola, e faapea foi ona tatau ona outou toe fananau atu i le malo o le lagi i le vai, ma le Agaga, ma faamamaina i le toto, o le toto lava lea o lo’u Atalii e Toatasi na Fanaua” (Mose 6:59).

Fai mai le Aposetolo o Paulo a uma ona papatisoina i tatou, e tatau ona tatou amata se olaga fou: “Ua tatanu faatasi i tatou ma Ia i le papatisoga; …ina ia tatou savavali i le ola toefuataiina” (Roma 6:4). O se tasi o faamanuiaga silisili o le papatisoga, o lo tatou maua ai lea o se amataga fou, a o tatou agai atu i la tatou sini e faavavau.

  • O a ni auala ua avea ai lou papatisoga ma se amataga fou?

Mau Faaopoopo