Tusi ma Lesona
Mataupu 44: O Le Afio Mai Faalua o Iesu Keriso

Mataupu 44

O Le Afio Mai Faalua o Iesu Keriso

Ata
The resurrected Jesus Christ (wearing white robes with a magenta sash) standing above a large gathering of clouds. Christ has His arms partially extended. The wounds in the hands of Christ are visible.

Tulimatai i le Afio Mai Faalua o le Faaola

E Fasefulu aso talu Lona Toetu Mai, sa potopoto ai Iesu ma Ana Aposetolo i le Mauga o Olive. Ua oo mai le taimi mo Iesu e tuua ai le lalolagi. Ua maea galuega uma sa tatau ona Ia faia i lena taimi. Ua tatau ona toe afio atu o Ia i lo tatou Tama Faalelagi seia oo i le taimi o Lona Afio Mai Faalua.

Ina ua uma ona Ia faatonuina Ana Aposetolo, ona afio ae ai lea o Iesu i le lagi. Ao tutu le Au Aposetolo ma tepa ae i le lagi, sa o mai ni agelu se toalua ma tutu i o latou tafatafa ma faapea mai, “O outou tagata Kalilaia e, se a le mea tou te tutu ai ma vaavaai i le lagi? O Iesu lena, ua aveina ae nai ia te outou i le lagi, e faapea ona toe afio mai o Ia, pei o Lona afio atu i le lagi na outou vaavaai i ai” (Galuega 1:11).

Mai lena taimi seia oo mai i ona po nei, o loo tulimatai pea e soo o Iesu Keriso le Afio Mai Faalua.

O Le A Le Mea O Le A Faia E Iesu Pe A Toe Afio Mai?

Pe a toe afio mai Iesu Keriso i le lalolagi, o le a Ia faia mea nei:

  1. O le a Ia faamamaina le lalolagi. Pe a toe afio mai Iesu, o le a afio mai o Ia i le mana ma le mamalu tele. O le taimi lena o le a faaumatia ai ē amioleaga. O le a susunuina mea leaga uma, ma o le a faamamaina le lalolagi i le afi (tagai i le MFF 101:24–25).

  2. O le a Ia faamasinoina Lona nuu. Pe a toe afio mai Iesu, o le a Ia faamasino i atunuu ma vavae ese tagata amiotonu mai e amioleaga (tagai i le Mataio 25:31–46; tagai foi i le mataupu 46 i le tusi lenei). Sa tusia e Ioane le Tali Faaaliga e uiga i lena faamasinoga e faapea: “Na [ou] iloa foi nofoalii, ma latou (o e) tietie ai, ua tuuina atu foi le faamasinoga ia te i latou; na ou iloa foi agaga o e ua vavaeeseina o latou ulu ona o le mau ia Iesu ma le afioga a le Atua … ua latou ola foi ma ua fai ma tupu faatasi ma Keriso i tausaga e afe.” Sa ia vaaia foi o e amioleaga, “e le toe ola i latou seia atoa ia tausaga e afe” (Faaaliga 20:4–5; tagai foi i le MFF 88:95–98).

  3. O le a Ia tatalaina le Meleniuma. O le Meleniuma, o le afe tausaga lea o le a nofotupu ai Iesu i le lalolagi. O le a aveina ae ai e amiotonu e faafetaiai Iesu i Lona afio mai (tagai i le MFF 88:96). O Lona afio mai e amata ai le nofotupu faameleniuma. (Tagai i le mataupu 45 i le tusi lenei.)

    Na saunoa mai Peresitene Polika Iaga:

    “I le Meleniuma, pe a faatuina le Malo o le Atua i le lalolagi i le mana, mamalu ma le atoatoa, ma faatoilalo ai le pule o le amioleaga ua leva ona i ai, ma o le a maua ai e le Au Paia a le Atua le avanoa latou te fausia ai o latou malumalu, ma ulu atu i ai, ma avea le Au Paia e pei o ni poutu o malumalu o le Atua, [tagai i le Faaaliga 3:12], ma galulue mo o latou tagata ua maliliu. Ona tatou vaai atu ai lea ua o mai a tatou uo, ma nisi atonu sa tatou masani ai iinei. … Ma o le a tatou maua faaaliga e uiga i o tatou tuaa sei oo atu lava i le Tama o Atamu ma le Tina o Eva, ma o le a tatou ulu atu i malumalu o le Atua ma faia galuega mo i latou. Ona faamauina ai lea o [fanau] i [matua] sei oo ina atoatoa lava le filifili sei tau ia Atamu, ina ia atoatoa le filifili o le Perisitua mai ia Atamu e oo atu i le taimi mulimuli” (Aoaoga a Peresitene o le Ekalesia: Polika Iaga [1997], 333–34).

  4. O le a faamaeaina e Ia le Uluai Toetutu O i latou o e ua maua le avanoa e tulai mai ai i le toetutu o e amiotonu o le a tulai mai i o latou tuugamau. O le a aveina ae i latou e faafetaiai i le Faaola a o afio ifo o Ia mai le lagi. (Tagai i le MFF 88:97–98.)

    Ina ua toetu mai Iesu Keriso mai e ua oti, sa toetutu mai foi isi tagata amiotonu o e na oti. Sa vaaia i latou e tagata i Ierusalema faapea foi ma le konetineta o Amerika. (Tagai i le Mataio 27:52–53; 3 Nifae 23:9–10.) O le amataga lea o le Uluai Toetutu. E i ai nisi tagata ua toetutu mai talu mai le taimi lena. O i latou ua uma ona toetutu mai, ma i latou o le a toetutu mai i le taimi o Lona afio mai, o le a latou maua uma le mamalu o le malo selesitila (tagai i le MFF 76:50–70).

    A mavae le toetutu o i latou o e o le a mauaina le malo selesitila, o le a toetutu mai le isi vaega: o i latou o e o le a maua le mamalu terasitila. A uma ona toetutu mai nei tagata uma, ona maea ai lea o le Uluai Toetutu.

    O e amioleaga e ola i le taimi o le Afio Mai Faalua o le Alii, o le a faaumatia i le tino. O i latou, faatasi ma e amioleaga ua maliliu, o le a faatali seia oo i le toetutu mulimuli. O tagata maliliu uma o totoe o le a tulai mai e fetaiai ma le Atua. O le a latou mauaina le malo telesitila, po o le a tulia foi i fafo i le pouliuli faatasi ma Satani (tagai i le MFF 76:32–33, 81–112).

  5. O le a tulai o Ia i Lona tulaga moni o le Tupu o le lagi ma le lalolagi. A afio mai Iesu, o le a Ia faatuina Lona malo i le lalolagi. O le a avea le Ekalesia ma vaega o lena malo. O le a Ia pule i tagata uma o le lalolagi i le filemu, mo le 1,000 tausaga.

    Ina ua afio mai Iesu Keriso i le taimi muamua i le lalolagi, sa lei afio mai o Ia i le mamalu. Sa fanau mai o Ia i se fale o manu ma sa taoto i se faatanoa vao. Sa lei afio mai o Ia ma ni autau tetele e pei ona faamoemoe tagata Iutaia o le a faia e lo latou Faaola. Nai lo lena, na afio mai o Ia ma faapea mai, “Ia outou alolofa atu i e ua ita mai ia te outou, … ia outou agalelei atu i e ua inoino mai ia te outou, ia outou tatalo foi mo e ua tuuai fua mai ma faasaua mai ia te outou” (Mataio 5:44). Sa teena o Ia ma faasatauroina. Peitai o le a le mafai ona teena o Ia pe a toe Afio Mai Faalua, “aua o le a logo taliga uma, … ma tootuli tulivae uma, ma ta’uta’u atu e laulaufaiva uma” o Iesu o le Keriso lea (MFF 88:104). O le a faafeiloaia o Ia o le “Alii o alii ma le Tupu o tupu” (Faaaliga 17:14). O le a taua o Ia “O Le Silisiliese, O Le Faipule, O Le Atua malosi, O Le Tama o le faavavau, O Le Alii o le Filemu” (Isaia 9:6).

  • O a ou manatu ma lagona ao e manatunatu i taualumaga o le Afio Mai Faalua?

O Le A Faapefea Ona Tatou Iloa Le Taimi E Latalata Mai Ai Le Afio Mai O Le Faaola?

Ina ua soifua mai Iesu Keriso, e toaitiiti lava tagata na iloa ua afio mai le Faaola o le lalolagi. Pe a toe afio mai o Ia, o le a leai se masalosalo po o ai Ia. E leai se tasi na te iloa le taimi tonu o le a toe afio mai ai le Faaola. “O lea aso ma lea itu aso, e le iloa e se tasi, e le iloa lava e agelu i le lagi, ua na o lo’u Tama lava” (Mataio 24:36; tagai foi i le MFF 49:7).

Sa tuuina mai e le Alii se faataoto ia tatou malamalama ai i le taimi o Lona afio mai:

“Ia outou matau i le faataoto i le mati; A faatoa tutupu ona tatupu, ma matala mai ona lau, ona outou iloa lea ua latalata mai le tausaga vevela:

“E faapea foi outou, a [outou] iloa ia mea ua tutupu mai, ia outou iloa ua latalata mai ia, ua i faitotoa lava” (Mareko 13:28–29).

Ua tuuina mai e le Alii se faataoto ia tatou malamalama ai i le taimi o Lona afio mai. Ina ua uma ona faamatala mai o faailoga, na Ia lapatai mai:

“O lea, ia outou mataala ai: aua tou te le iloa po o le fea itu aso e sau ai lo outou Alii. …

“… O lea ia outou nofo saunia ai; aua o le itu aso tou te le manatunatu ai, e sau ai le Atalii o le tagata” (Mataio 24:42, 44).

Mo isi faamatalaga e uiga i auala tatou te iloa ai le latalata mai o le Afio Mai Faalua o Iesu, tagai i le mataupu e 43 i le tusi lenei.

E Faapefea Ona Tatou Saunia Pe A Afio Mai Le Faaola?

O le ala sili ona lelei tatou te saunia ai mo Lona afio mai, o le talia lea o aoaoga o le talalelei ma tatou ola ai. E tatau ona tatou ola i aso taitasi i le mea sili tatou te mafaia, e pei ona aoao mai Iesu ao soifua i le lalolagi. E mafai ona tatou vaavaai i le perofeta mo le taitaiga ma mulimuli i ana fautuaga. E mafai ona tatou ola agavaa ia maua le Agaga Paia e taitaiina i tatou. Ona tatou tulimatai atu ai lea ma le fiafia i le afio mai o le Faaola e aunoa ma le fefe. Ua fetalai mai le Alii, “Aua le matatau, le lafu mamoe itiiti e, e ia te [outou] le malo seia ou oo mai. Faauta, ou te vave oo mai. E faapea lava. Amene” (MFF 35:27).

  • Aisea e tatau ai ona tatou popole i lo tatou tulaga saunia nai lo lo tatou popole i le taimi tonu o le Afio Mai Faalua?

Mau Faaopoopo