Tusi ma Lesona
Mataupu 23: O Le Faamanatuga

Mataupu 23

O Le Faamanatuga

Ata
Jesus Christ depicted preparing the sacrament for the Last Supper.

Sa Amataina E Keriso le Faamanatuga

  • O le a le mea e aoao mai e faatusa o le faamanatuga e uiga i le Togiola a Iesu Keriso?

E finagalo lo tatou Faaola ia tatou manatua Lana taulaga togiola sili ma tausi i Ana poloaiga. Ina ia fesoasoani ia i tatou e faia lena mea, ua Ia poloaia i tatou ia potopoto soo ma aai ma feinu i le faamanatuga.

O le faamanatuga o se sauniga paia o le perisitua e fesoasoani e faamanatu mai ai ia i tatou le Togiola a le Faaola. I le taimi o le faamanatuga, tatou te taumamafa ai i le areto ma le vai. Tatou te faia lena mea e faamanatu ai Lona tino ma Lona toto sa Ia tuuina atu e fai ma taulaga mo i tatou. A tatou aai ma feinu i le faamanatuga, tatou te faafouina ai feagaiga paia sa tatou osia ma lo tatou Tama Faalelagi.

I se taimi ao lei Faasatauroina o Ia, na faapotopoto ai e Iesu Ana Aposetolo i se potu i le afeafe aupito a luga. Sa Ia silafia ua lata ona maliu o Ia i luga o le satauro. O le taimi mulimuli lea o le a faatasi ai o Ia ma nei alii sa pele ia te Ia ao lei maliu o Ia. Sa manao o Ia ia latou manatua pea o Ia ma ia tumau lo latou malosi ma le faatuatua.

Ina ia fesoasoani ia latou manatua pea, o lea na Ia faia ai mo i latou le faamanatuga. Sa Ia tofitofi le areto ma faamanuiaina. Ona Ia fetalai atu lea, “Ina tago ia, ina aai; o le faamanatuga lenei o lo’u tino ou te tuuina atu o se togiola mo outou” (Joseph Smith Translation, Matthew 26:22). Ona Ia avane lea o le ipu uaina, ma faamanuia, ma tuu atu i Ana Aposetolo latou te inu ai, ma fetalai mai, “O le faamanatuga lenei o lo’u toto … , ua faamaligiina mo le toatele o i latou uma e talitonu i lo’u igoa, mo le faamagaloina o a latou agasala” (Joseph Smith Translation, Matthew 26:24; tagai foi i le Mataio 26:26–28; Mareko 14:22–24; Luka 22:15–20).

Ina ua mavae Lona Toetu mai, sa afio atu Iesu i Amerika, ma sa Ia aoao atu ai i tagata sa Nifae lea lava sauniga e tasi (tagai i le 3 Nifae 18:1–11; 20:1–9). Ina ua toefuatai mai le Ekalesia i aso e gata ai, sa faapea foi ona toe poloaiina e Iesu Ona tagata ia latou aai ma feinu i le faamanatuga e faamanatu ai o Ia, ua faapea mai, “E tatau ona potopoto soo le Ekalesia e aai i le areto ma feinu i le uaina i le faamanatuga o le Alii o Iesu” (MFF 20:75).

O Le Ala e Fai Ai Le Faamanatuga

Ua ta’u mai e tusitusiga paia le ala tonu e fai ai le faamanatuga. E potopoto faatasi tagata o le Ekalesia i aso Sapati taitasi e tapuai ma taumamafa i le faamanatuga (tagai i le MFF 20:75). E faia le faamanatuga e i latou o e ua umia le pule tatau ai o le perisitua. E tofitofi e se ositaulaga po o se tasi e umia le Perisitua Mekisateko le areto, ona tootuli lea ma faamanuia (tagai i le MFF 20:76). Ona tufa atu lea o le areto o le faamanatuga e se tiakono po o isi e umia le perisitua i tagata o le Ekalesia. Ona faamanuia lea e le ositaulaga po o le toeaina le vai, ma faapea foi ona tufa atu i tagata o le Ekalesia. Sa tuuina atu e Iesu i Ona soo le uaina i le taimi na Ia faia ai le faamanatuga. Peitai, ua Ia fetalai mai i se faaaliga i aso e gata ai e le afaina po o le a le mea e aai ai pe feinu ai i le faamanatuga, pau lava o lea, ia tatou manatua pea o Ia (tagai i le MFF 27:2–3). I ona po nei, ua faaaoga e le Au Paia o Aso e Gata Ai le vai, ae le o le uaina.

Ua tuuina mai e Iesu upu tonu lava e tatau ona faia mo tatalo uma o le faamanuiaina o le areto ma le vai. E tatau ona tatou faalogologo lelei i ia tatalo matagofie ma taumafai e malamalama i mea ua tatou folafola atu, faapea ma mea ua folafola mai ia i tatou. O le tatalo lenei o le faamanuiaina o le areto:

“Le Atua e, le Tama Faavavau, matou te faatoga atu ia te Oe i le suafa o Lou Alo, o Iesu Keriso, ia e faamanuiaina ma faapaiaina lenei areto i agaga o i latou uma o e fetagofi i ai, ina ia latou taumamafa i le faamanatuina o le tino o lou Alo, ma molimau atu ia te Oe, le Atua e, le Tama Faavavau, latou te loto ina ave i o latou luga le suafa o Lou Alo, ma manatua pea o Ia ma tausi i Ana poloaiga ua Ia tuuina mai ia te i latou; ina ia latou maua pea Lona Agaga e faatasi ma i latou. Amene” (MFF 20:77).

O le tatalo lenei o le faamanuiaina o le vai:

“Le Atua e, le Tama Faavavau, matou te faatoga atu ia te Oe i le suafa o Lou Alo, o Iesu Keriso, ia e faamanuiaina ma faapaiaina lenei vai i agaga o i latou uma o e feinu ai, ina ia latou faia i le faamanatuina o le toto o Lou Alo, sa faamaligiina mo i latou; ina ia latou molimau atu ia te Oe Le Atua e, le Tama Faavavau, latou te manatua pea o Ia, ina ia latou maua Lona Agaga e faatasi ma i latou. Amene” (MFF 20:79).

E faia le sauniga o le faamanatuga i le ala faigofie ma le migao.

  • Toe iloilo ma le faaeteete tatalo o le faamanatuga. Mafaufau i uiga o fasi fuaiupu taitasi.

O Feagaiga Tatou Te Faafouina i Le Faamanatuga

  • O a feagaiga tatou te faafouina i le faamanatuga? O a faamanuiaga ua folafola mai ia i tatou e le Alii ao tatou tausia na feagaiga?

O taimi uma tatou te aai ai ma feinu i le faamanatuga, tatou te faafouina ai feagaiga na tatou osia ma le Alii. O se feagaiga o se folafolaga paia lea e faia i le va o le Alii ma Ana fanau. O feagaiga tatou te osia, ua manino ona ta’u mai i tatalo o le faamanatuga. E taua ona tatou iloa ia feagaiga, ma o latou uiga.

Ua tatou osi feagaiga tatou te ave i o tatou luga le suafa o Iesu Keriso. O le faia o lenei mea ua faaali atu ai lo tatou loto malilie e ta’ua faatasi ma Ia ma Lana Ekalesia. Tatou te tautino e auauna atu ia te Ia ma o tatou uso a tagata. Tatou te folafola atu o le a tatou le aumaia lava le maasiasi po o se faitioga i lena suafa.

Tatou te osi feagaiga o le a tatou manatua pea Iesu Keriso. O o tatou mafaufauga uma, ma lagona, ma amioga, o le a uunaia e Ia ma Lana misiona.

Tatou te folafola atu o le a tatou tausia Ana poloaiga.

Tatou te tauave ia tiute i o tatou luga pe a papatisoina i tatou (tagai i le MFF 20:37; Mosaea 18:6–10). O lona uiga, a tatou taumamafa i le faamanatuga, tatou te faafouina feagaiga sa tatou osia i le taimi na tatou papatiso ai. Sa tuuina mai e Iesu ia i tatou le mamanu mo le taumamafa i le faamanatuga (tagai i le 3 Nifae 18:1–12) ma fetalai mai, afai tatou te mulimuli i lenei mamanu, ma salamo i a tatou agasala ma talitonu i Lona suafa, o le a tatou maua le faamagaloga o a tatou agasala (tagai i le Joseph Smith Translation, Matthew 26:24).

Ua folafola mai e le Alii afai tatou te tausia a tatou feagaiga, o le a tatou maua Lona Agaga e mafuta pea ma i tatou. O le tagata e taitaia e le Agaga, o le a ia maua le poto, faatuatua, mana, ma le amiotonu na te maua ai le ola e faavavau.

  • O a ni mea e mafai ona tatou faia e manatua ai nei folafolaga ao faagasolo le vaiaso?

O o Tatou Uiga e Faaalia Pe a Tatou Aai ma Feinu i le Faamanatuga

  • E faapefea ona saunia i tatou lava e aai ma feinu i le faamanatuga? O a ni mea e mafai ona tatou manatunatu i ai i le taimi o le faamanatuga e fesoasoani ai ia i tatou e manatua le Togiola a le Faaola?

Ae tatou te le i aai ma feinu i le faamanatuga, e tatau ona tatou saunia lelei i tatou lava faaleagaga. Ua faamanino mai e le Alii e le tatau i se tasi ona ‘ai ma inu ma le faaletatau i le faamanatuga. O le uiga o lena mea, e ao ina tatou salamo ia tatou agasala ae tatou te lei fetagofi atu i le faamanatuga. Ua fai mai le mau, “Afai ua agasala se tasi, aua ne’i tago ia i le faamanatuga seia faia se faaleleiga” (MFF 46:4). Sa fetalai atu le Alii i Ona soo sa Nifae, “Aua tou te tuu atu ma le iloa i se tasi e tago ma le faaletatau i lo’u tino ma lo’u toto, pe a outou tufatufa ai; aua ai se ai ma inu i lo’u tino ma lo’u toto ma le faaletatau, ua ’ai ma inu i le faasala i lona agaga” (3 Nifae 18:28–29).

Ao fai le sauniga faamanatuga, e tatau ona tatou tuu ese mai o tatou mafaufau ni manatu faalelalolagi uma. E tatau ona tatou lagona le agaga tatalo ma le faaaloalo. E tatau ona tatou manatunatu i le Togiola a lo tatou Faaola ma faafetai mo le Togiola. E tatau ona tatou manatunatu i o tatou olaga ma vaai mo ala e faalelei atili ai. E tatau foi ona tatou faafouina lo tatou filiga e tausi poloaiga.

E le manaomia ona tatou atoatoa ona faatoa aai ai lea i le faamanatuga, ae tatau ona i ai le agaga o le salamo i o tatou loto. O uiga o ia i tatou i le taimi tatou te fetagofi ai i le faamanatuga e uunaia ai o tatou aafiaga e maua mai i le faamanatuga. Afai tatou te aai ma feinu i le faamanatuga ma le loto mama, tatou te mauaina faamanuiaga ua folafola mai e le Alii.

  • Aisea e te manatu ai e faateleina lo tatou malosi faaleagaga pe a aai ma feinu ma le tatau i le faamanatuga?

Mau Faaopoopo