Kabwarabwaraana

Ana Baire te Tama are i Karawa

ataei i karawa ma te Tama are i Karawa

Ti maeka i karawa ma Tamara are i Karawa imwain rokora n te aonaaba. Ngaira bon Natina n tamnei ao iai rabwatara n tamnei. Ti Tangiria, ao Ngaia E tangiriira.

Ana Reirei te Burabeti Iotebwa Timiti, 354

aomata i karawa ma te Tama are i Karawa

E reireiniira te Tama ibukin Ana baire ibukira. E aranaki bwa te baaire ni kamaiu. Ngkana ti ira Ana baaire, ti kona n riki n ai aron te Tama are i Karawa. Te baaire bon ibukira bwa ti na nakon te aonaaba ao ni karekei rabwatara ae te iriko ao n te raaraa. Ti na kataaki n nooria ngkana ti rineia n ongotaeka nakon ana tua te Atua.

Aberaam 3:24–25

Te Tama are i Karawa ngke e taetae nakon Iesu ao Tatan

Te baaire ni kamaiu e katauraoa te kawai ibukira bwa ti na manga maeka ma te Tama are i Karawa. Ti kainnanoia ni kawakin tuua. Ma ti na kainnanoa naba te ibuobuoki. Ti na kainnanoia bwa a na anaaki ara bure, ao ti kainnanoi rabwata aika mangauti. Bukina bwa tiaki kona ni kabwarai ara bure ke ni kauti oin rabwatara, ti kainnanoa te Tia Kamaiu bwa E na karaoa aei ibukira.

2 Nibwaai 2:5–9

Te Tama are i Karawa e taetae nakon Iesu

Tamara are i Karawa e rinea Iesu Kristo bwa e na riki bwa ara Tia Kamaiu. Iesu E tangira te Tama are i Karawa. Iesu e tangiriira naba. E kariaia bwa E na ruo nako aon te aba ni kaotia nakoira bwa ti na kanga n raoiroi. E na katauraoa te kawai ibukira ni kabane bwa ti na kamaiuaki. E kukurei bwa E na karawawataaki ibukin ara bure. E na mate naba ao ni kamaiuaki bwa ti aonga ni kamaiuaki naba.

2 Nibwaai 2:8–9; Mote 4:1–2

Tatan

E tangiria naba Tatan bwa e na riki bwa ara Tia Kamaiu. Ma e aki tangira te Tama are i Karawa. E aki tangiriira. E tangiria ni bita ana baire te Tama are i Karawa bwa e aonga ni karekea mwakan ao mimitongin te Tama are i Karawa.

Mote 4:1–2

Tatan ao taan iriiria a kitana karawa

Tabeman natin te Tama are i Karawa n tamnei a rineia bwa a na ira Tatan. Te bwai aei e karika te Tama are i Karawa bwa e na rangi n nanokawaki. E karika Tatan ao taan iriiria bwa a na kitana karawa. Tatan bon te aomata ae buakaka. Ngaia ao tamnei ake a iria a tangiriira bwa ti na bure.

Mote 4:3–4

Iesu e karika te aonaaba

Te Tama are i Karawa E tuanga Iesu bwa E na karaoa te aonaaba ibukira. E karaoia Iesu. E karaoa taai, namwakaina, ao itoi. E katikui aroka ao maan iaon te aba. Ngkai e a reke te aonaaba are ti na kona iai ni karekei rabwatara ae te iriko ao n te raaraa.

Ebera 1:2; Motiaea 3:8; Aberaam 4

burabeti n taai ake ngkoa a reireiniia aomata

A mwaiti aomata aika roko ni maeka iaon te aba. Tabeman a rineia bwa a na ongotaeka nakon ana tua te Atua; tabeman aki. Burabeti n taai ake rimoa a reireiniia aomata taekan ana baire te Tama are i Karawa ao Iesu Kristo.

2 Nibwaai 2:19–21; Iakoba 7:10–11; Mote 5:13–15

te burabeti e korea taekan bungiakin Iesu

A taekinna burabeti bwa e na riki taman Iesu bwa te Tama are i Karawa. Tinana e na riki bwa te aine ae moan te raoiroi ae arana Maria. E na bungiaki i Betereem.

Itaia 7:14; Mika 5:2; 1 Nibwaai 11:18–21; Aramwa 7:10

e reirei te burabeti taekan Iesu

A taekinna burabeti bwa a mwaiti aomata aika a na aki kakoaua Iesu bwa te Tia Kamaiu. E na riki n aroia aomata ake tabeman ao tiaki n ae kaubwai. A mwaiti aomata aika a na Ribaia.

Itaia 53:2–3

ana reirei te burabeti ibukin Ioane te Tia Bwabetito

Burabeti naba a tuangaki taekan Ioane te Tia Bwabetito. E na roko imwain Iesu bwa e na tuangiia aomata Taekana. Ioane e na bwabetitoa Iesu.

Itaia 40:3; Mataio 3:1–3; 1 Nibwaai 10:7–10; 11:27

te burabeti e reirei taekan Iesu

A taekinna burabeti bwa Iesu e na akoi ao ni karaoi kakai aika mwaiti. Imwain matena, Iesu e na karawawataaki ibukin aia bure aomata ni kabane bwa aonga n aki karawawataaki ngkana a rairi nanoia.

Motiaea 3:5–8; Reirei ao Berita aika Tabu 19:16–18

aomata a reirei taekan maten Iesu

A mwaiti aomata aika a ataa taekan Iesu Kristo, ara Tia Kamaiu, ae e na tauraki iaon te kaibangaki. E na bobitiaki n te neera iaon te kaibangaki ae te kai ao n anga Maiuna ibukira.

Ioane 3:14–15; Motiaea 15:7–9

te burabeti e reirei taekan te Mangauti

Imwiin teniua te bong, E na manga kautaki. E na oki Tamneina nakon Rabwatana. Bukina bwa e mate Iesu ao ni mangauti, ti na bane ni mangauti naba.

Itaia 25:8; 1 I-Korinto 15:22; 2 Nibwaai 2:8; Aramwa 33:21–22

aomata inanon te Nu Tetemanti

Te Nu Tetemanti e kaotia bwa aia taeka burabeti a koaua. Bon karakinan Iesu Kristo ao Ana Abotoro. A maeka n te Aba ae Tabu. Aomata aika mwaiti aika maeka ikekei a atongaki bwa Iutaia. A tia kaain Rom n tokanikai iaon te Aba ae Tabu, ao a tautaeka iaoia tenaan Iutaia.