Mwakoro 54
E a Mangauti Iesu
E mena rabwatan te Tia Kamaiu inanon te nne ni mate ni karokoa moaningabongin te Tabati. Ngkanne uoman anera a roko man karabinoa nako te atibu man te nne ni mate.
Mataio 28:1–2 (tarai bwaai aika a na taraaki inano 2a); Ruka 24:1–4
Te aine are e a tia ni kamarurungaki iroun Iesu ae arana Maria are te I-Maketara e nakon te nne ni mate. E miimi ngke e nooria bwa e a tia n rabinonako te atibu. Ai Akea rabwatan Iesu inanon te nne ni mate.
E biri nako n tuanga Betero ao Ioane bwa iai temanna ae uotanako rabwatan te Tia Kamaiu. E aki ataia bwa e uotaki nakea.
Betero ao Ioane a biribiri nakon te nne ni mate. A kunea te kunnikai are e taunaki mangaia Iesu, ma ai akea rabwatan Iesu ikekei. Betero ao Ioane a aki ataia bwa tera ae a nang karaoia. A oki nakon mweengaia.
Maria are te I-Maketara. e tiku n te nne ni mate, n tang. Ngke e taraa riki nanon te nne ni mate, e nooriia uoman anera.
A titirakina Maria are te I-Maketara bwa bukin tera ngkai e tang. E taku bwa iai ae e uotanako rabwatan Iesu. E aki ataia bwa e uotaki nakea.
E rairaki ao e noora te aomata temanna. E taku bwa te tia ununiki. E titirakinaki iroun te tia ununiki bwa bukin tera e tang. E titiraki nakon te tia ununiki ngkana e ataia bwa e mena ia rabwatan Iesu.
Ngkanne e taku te mwaane arei, “Maria,” ao e a ataia bwa Iesu. E tuangnga bwa e na tuangiia Abotoro bwa E a mangauti.
Maria are te I-Maketara ao tabeman aine a tuangiia Abotoro bwa e a mangautii Iesu. N te moan tai ao Abotoro a aki kakoauaia.
Imwina, ngke a tabe n taetae imarenaia Abotoro, e roko Iesu inanon te ruu. A maaku Abotoro. A taku bwa E bon mate naba ngkai.
Te Tia Kamaiu e tuangiia bwa a na riinga Baina ma waena. E a mangauti—Rabwatana ao Tamneina a manga ikotaki.
Abotoro a rangi ni kukurei n Nooria. E bubutiia te amwarake. A anganna te ika ao aia karewe manibeeru. E kanna.
Iesu Kristo bon te moan aomata ni mangauti. A mwaiti riki aomata ake a mangauti ao n nooraki irouia aomata ake a maeka i Ierutarem. E a tia n taku Iesu, “Boni Ngai te mangauti, ao te maiu.” Ibukina bwa E tokanikai iaon te mate, ti na bane ni mangauti n te bong teuana.