Mwakoro 22
Te Aomata ma te Tamnei ae Buakaka Irouna
Te mwaane ae e maeka n aia tabo maate irarikin Namani Kariraia iai irouna te tamnei ae buakaka are e a karikia bwa e na moanti. Aomata a kabaea n taian tiein ni kamanana, ma e urui tiein aikai.
Te mwaane aei e mena n te maunga ao n taian nangananga ni bwaa n te bong ao te ngaina. E tang ni katoa tai ao e korekoreia ibon irouna n taian atibu.
N te bong teuana ao Iesu ma Ana reirei a toua Namani Kariraia n te booti. Ngke e kitana te booti te Tia Kamaiu, e biri nakoina te mwaane aei.
Iesu e tuanga te tamnei ae buakaka bwa e na otinako mai iroun te mwaane. E ataia te taimonio bwa Iesu bon Natin te Atua. E butia Iesu bwa e na aki kammarakia.
Ngke e titiraki te Tia Kamaiu nakon te taimonio bwa antai arana, e taku, “Arau bon Rekeon,” bwa ti bati. A mwaiti taimonia ake iroun te mwaane aei. A butia Iesu bwa e na kariaia bwa a na rin n rabwataia tabeman beeki ake a uakaan.
E kariaia Iesu. Tenaan taimonia a kitana te mwaane arei ao a nakon rabwataia beeki aika 2,000 mwaitia. A biri beeki n te kabwatete nako taari ao a bwabwa.
Mwaane ake a tararuaia beeki a biri nakon te kaawa ao n tuangia aomata te bwai are e riki. A roko aomata n noora Iesu ao te mwaane are e moanti. Ma e a manana ngkai te mwaane arei.
Aio are e karika maakuia iai aomata iroun Iesu. A tuanga bwa E na nako. E oki rikaki nakon te booti.
Te mwaane are e kamaiuaki e tangiria n ira Iesu. E tuangaki iroun te Tia Kamaiu bwa e na oki nakon mwengana man tuangia raoraona te bwai are e riki irouna.
Te mwaane e tuangia raoraona, ao a rang miimi ni mwaakan Iesu ae korakora.