Imwin te Nu Tetemanti

Taian Abotoro

Taan kairiiri n te Ekaretia a mwakuri korakora n reireniia aomata taekan Iesu Kristo. A kawariia Kaain te Aro ao a kororeta nakoia. E mwaiti Aomata ake a kaaina te Aro n taabo aika mwaiti. Aomata aika a buakaka a aki tangiriia aomata bwa a na kakoauaa Iesu Kristo.

Mwakuri 6:2–4, 7; 11:19–21

kurubu n aomata aika a marooro

Aomata aika buakaka a tangiria ni bitii tuua. Tabeman kaain te Aro a ongo irouia. E mwaiti ae e toki man kakoauaan Iesu ao n aki kaawakin ana tua nako.

I-Karatia 1:6–8; Tito 1:10–11; 1 Ioane 2:18–19

tautia a buakaniia aomata

Abotoro ao Kaain te Aro aika mwaiti a tiringaki. Akea ae e maiu bwa e na kaira te Ekaretia. Kingin te nakoanibonga a anaaki man te aonaaba. Akea burabeti ibuakoia aomata ake a na kairiia. Ana Ekaretia Iesu Kristo ai akea man te aonaaba. Abotoro aika Betero ao Bauro a taekinna bwa e na bon riki aei.

Mataio 23:34; 24:8–10; I-Rom 8:36; 1 I-Korinto 4:9–13; 1 Betero 4:12; Iesu te Kristo, 745–46

kateitei n te kaawa

E a nako tebubua te ririki. E a rangi ni mwaiti aekakin Ekaretia. Akea mai buakoia ae iai irouia Abotoro ke ana nakoanibonga te Atua. Akea mai buakoia ae ana Ekaretia Iesu Kristo. Ma a tia n taekinna burabeti bwa imwiin ririki aika mwaiti ana Ekaretia Iesu Kristo e na manga oki kaua nakon te aonaaba.

Mwakuri 3:19–26; 2 I-Tetaronike 2:1–4; 2 Timoteo 4:3–4

E tataro Iotebwa Timiti n te buakonikai

N 1820 te ataeinimwaane ae arana Iotebwa Timiti e tangiria n ataia bwa e ngaa ana Ekaretia Iesu Kristo. E nako n te buakonikai are e kaan ma mwengana ao n tataro. E bubutia te Atua bwa e na tuanga bwa e ngaa te Ekaretia ae koaua.

Iotebwa Timiti—Rongorongo 1:3, 5, 10, 14–15

Tamara are i Karawa ma Iesu Kristo a kaoti nakon Iotebwa Timiti

Tamara are i Karawa ma Iesu Kristo a kaoti nakon Iotebwa Timiti. Te Tia Kamaiu e tuanga Iotebwa bwa akea te Ekaretia ae e na kaainna bwa akea mai buakoia ae Ana Ekaretia.

Iotebwa Timiti—Rongorongo 1:17–19

Iotebwa Timiti e wareki bwaatua koora

Te Atua E rineia bwa e na kaoka ana Ekaretia Iesu Kristo nakon te aonaaba rinanon Iotebwa Timiti. Te Atua e kanakoia anera bwa a na angan Iotebwa Timiti te nakoanibonga. E buoka Iotebwa n raira ana Boki Moomon. N Eberi 6, 1830, ana Ekaretia Iesu Kristo e a manga barongaaki kaua iaon te aonaaba.

Iotebwa Timiti—Rongorongo 1:33, 66–75

Iotebwa Timiti E katabuia Abotoro

N ai aron Iesu are e rineia Tengaun ma Uoman Abotoro ngke E mena i aonteaba, E buokaki Iotebwa Timiti iroun te Atua n rineia Tengaun ma Uoman Abotoro ni kaira ana Ekaretia. A anganaki mwaane aikai te mwaaka n tataekina te euangkerio ao ni karaoi kakai.

Reirei ao Berita aika Tabu 102:3; 107:22–23, 35

a anga reirei mitinare nakon te utu

Iesu e tangiriia aomata ni kabane bwa a na ataa rongrongon Ana Ekaretia. E tuanga Iotebwa Timiti bwa e na kanakoia mitinare bwa a na reireiniia aomata nako rongorongon Ana Ekaretia Iesu Kristo ibukiia Aika Itiaki ni Boong aika Kaitira.

Reirei ao Berita aika Tabu 1:18, 30

Te Tia Kamaiu i matan te tembora

Ana Ekaretia Iesu Kristo Ibukiia Aika Itiaki ni Boong aika Kaitira bon titebo ma te Ekaretia are E barongaia Iesu ngke E maeka n te aonaaba.

Reirei ao Berita aika Tabu 115:4