Mwakoro 35
Te I-Tamaria ae Raoiroi
Iesu e taekinii karaki aika mwaiti, ke taetae ni kaikonaki, ni buokia aomata n reiakina te koaua.
N te bong teuana ao mataniwiia Iutaia e titirakina Iesu bwa tera ae e riai ni karaoia ni karekea te maiu ae akea tokina. Te Tia Kamaiu e tuangnga bwa teraa ae e taekinaki ni koroboki aika tabu. E taekinna te mataniwi bwa e riai te aomata n tangira te Atua ao n tangiriia kaain rarikina. Iesu e taekinna bwa e bon eti. E titiraki te mataniwi, Antai kaain rarikiu?”
Iesu e kaeka man karaki nakon te mwaane. N te bong teuana ao te mwaane mai Iutaia e nakonako n te kawai nakon te kaawa are Ieriko. Taan kimoa a kimoai ana bwai ao n tiribooia. A kiitana te mwaane arei n te kawai, e a kaan mate.
E aki maan temanna te ibonga mai Iutaia e roko ao e noora te mwaane aio. Te Ibonga e nakonako rarikin te kawai are te iterana. E aki buoka te mwaane aio.
E roko temanna naba te mwaane ae te Iutaia ae e mwakuri n te tembora. E noora te mwaane ae ikoaki aio. Ma e aki naba buoka te mwaane aio ao n nakonako n iteran te kawai are te iterana.
Ngkanne e roko te mwaane ae te I-Tamaria. Iutaia ao I-Tamaria aki iraorao imarenaia. Ma ngke te I-Tamaria e noora te mwaane arei, e nanokawaki ibukina. E kaitiaka ikoakin te mwaane arei ao ni karina oneana.
Ruka 10:33–34; Ioane 4:9; Rikitinare n te Baibara, “Te I-Tamaria,” 768
Te I-Tamaria e kaira te mwaane nakon te auti ni iruwa ao man kawakinna nakon te bong are imwiina. Ngke te I-Tamaria e nang nako, e anga te mwane nakon te tia mwakuri n te auti ni iruwa ao n tuanga bwa e na tararua te mwaane arei.
Ngke e a tia n karaki Iesu, E titirakina te mataniwi mai Iutaia bwa antai mai ibuakoia ake teniman ae bon raoraon te mwaane ae e ikoaki aio.
E taekinna te mataniwi bwa bon te I-Tamaria ibukina bwa e buoka te mwaane arei. Iesu e tuanga mataniwiia Iutaia bwa a na katotonga te I-Tamaria.