Mwakoro 18

Iesu E Rineia Ana Abotoro

Iesu iaon te booti

N te taina ao Iesu e reireiniia aomata man te booti iaon Namani Kariraia. Bon ana booti te mwaane ae arana Betero.

Ruka 5:1–3

Iesu iaon te booti

Betero ao raoraona a akawa n te tairiki n akea konaia naba temanna. Imwiin banen ana angareirei Iesu, E tuanga Betero bwa e na karuoa te booti i marawa. Ao e tuanga Betero ma raoraona bwa a na karuoa aia karaun i taari.

Ruka 5:4–5

taan akawa a reke konaia ika

A reke konaia aika a mwaiti n te aro are a moanna n uruaki iai aia karaun.

Ruka 5:6

taan akawa iaon te booti

Betero e weteia raoraona ake n te booti are tewaana bwa a na roko ni buokiia. A onrake aia booti ake uoua n te ika n te aro are a moanna n inako iai.

Ruka 5:7

taan akawa iaon te booti

Betero ma raona a bon rangi ni miimi. A ataia bwa Iesu Kristo boni ngaia ae karika aio.

Ruka 5:8–9

E katoro bubua Betero imatan Iesu

E katoro bubua Betero i rangan te Tia Kamaiu. E taku bwa e aki tau bwa e na kaniia Iesu. Iesu e tuanga Betero bwa e na aki maaku.

Ruka 5:8–10

Iesu e reireiniia taan akawa

Uoman mai buakoia raon Betero, Iakobo ao Ioane, bon taari. Iesu e tuanga Betero, Iakobo ao Ioane bwa a na iriiria ao n riki bwa taan akawaia aomata.” Mwaane aikai a kitanii aia bwai ao n nako ma Iesu. Te Tia Kamaiu e tuangiia riki tabeman mwaane bwa a na Iriiria.

Mataio 4:18-22: 9:9; Ruka 5:10-11; Ioane 1:35–51

Iesu ao 12 Abotoro

Iesu e rineia tengaun ma uoman Abotoro bwa a na kaira te Ekaretia. E tataro ni kabanea te tairiki bwa e aonga n rineia mwaane aika a koaua. N te ingabong are imwiina e rineia ao n katabuia tengaun ma uoman mwaane, n anganiia te nakoanibonga ao te kariaiakaki n riki bwa Abotoro.

Mareko 3:14; Ruka 6:12–16; Ioane 15:16

A mwananga Abotoro

A mwananga Abotoro nakon kaawa aika mwaiti. A reireiniia te euangkerio ao a kamaiuia aomata. A okirikaaki n tuanga Iesu bwaai ake a tia ni karaoi.

Mareko 6:30; Ruka 9:1-6,10