Mwakoro 50

Reirei Tabeua n te Kabanea ni Katairiki

Imwiin are a amwarake, Iesu e tuangiia Ana Abotoro bwa a na tangiriia imarenaia n ai arona ngke E tangiriia. Ngkana a karaoa aei, a na ataia aomata bwa bon Ana reirei ngaiia.

Ioane 13:34–35

E taku bwa ngkana Abotoro a tangiria, a na kaawakin Ana tua nako. E berita nakoia ana bwaintituaraoi te Tamnei ae Raoiroi. Te Tamnei ae Raoiroi e na reireiniia bwaai ni kabane ake a riai n atai. Te Tamnei ae Raoiroi e na buokiia Abotoro n uring baike e reireiniia Iesu.

Ioane 14:15–18, 26

E taku Iesu bwa Ngaia bon te kai ae te kureebe. Ana reirei kanga mwaangan te kai te kureebe. Ti te mwaanga are e nim ni matoa nakon te kai te kureebe ae e kona ni karikii uaa aika raraoi.

Ioane 15:1–2, 5

E berita Iesu nakoia Ana Abotoro bwa ngkana a maiuakina te euangkerio, a na raraoi uaaia (aika mwakuri). Ngkana a aki Iriiria, a na riki bwa kanga mwaanga ake a koreaki ni kanakoaki man te aroka ao a aki kariki uaa.

Ioane 15:3–8

E tataro Iesu Kristo bwa a na katiteuanaaki Ana Abotoro. E tangiria bwa a na reireiniia aomata bwa a na kakoauaa ao n ataia bwa e tangiriia Tamara are i Karawa.

Ioane 17:1–4, 6, 11, 20–23

Ngkanne Iesu ao Abotoro a anene ni kunan te taromauri ao a kitana te ruu.

Mataio 26:30