Te Kateniua n Taetae ni Kaikonaki
Te Nati ae Bua
Temanna te mwaane iai uoman natina mwaane. E berita te mwaane aei bwa e na anga ana mwane nakoia ngkana e mate. Te nati are e uarereke e aki kan tataninga. E tuanga tamana tibwana man te mwane. E anganaki tibwana iroun tamana.
E anaa te mwane te nati te mwaane ao e kitana mwengana. E nako nakon te aba teuana. E karaoa te bure n ae okioki. E kabanea ni kabane ana mwane.
Ngkanne ai akea nikiran ana mwane ibukin boon kanana. E bon rangi ni baki. E butia te mwaane temanna bwa e na buokia. E kamwakuraki iroun te mwaane arei bwa e na kamwarake beeki.
E bon rangi ni baki te nati te mwaane aei n te aro are e tangiria ni kana kanaia beeki. E ataia bwa tooro ake n ana auti tamana iai kanaia ae raoiroi riki nakoina.
E motikia bwa e na raira nanona ao ni bubuti bwa e na riki bwa te toro n ana auti tamana. Ngke e okira mwengana te nati te mwaane, e nooraki iroun tamana ni kaoti.
E biri te tama bwa e na kaitibo ma natina. E inga nakoia ao e kaboria ma ngaia.
Te nati e tuanga tamana bwa e a tia ni bure. E namakinna bwa e aki tau n aranaki bwa te nati ngaia iroun tamana.
E tua te Tama nakon te toro bwa e na uota te kunnikai ae te kabanea n raoiroi ao n onea iai natina. Te toro e karin kaau ni waen te nati ao te mwamwa n tabonibaina.
E tua te Tama nakon te toro bwa e na katauraoa te baka n amwarake. E tangiria bwa a na kukurei aomata ni kabane. Te nati are e a tia ni bure e a tia n raira nanona ao n okira mwengana.
Te nati are e ikawai e mwakuri n te tawana. Ngke e okira te mwenga, e ongo te katangitang ao te mwaie. E tuangaki iroun te toro bwa tarina are uarereke e a okira mwengaia. Tamana e tangiria bwa a na kukurei aomata ni kabane.
Te nati are ikawai e un ao e aki kan rin inanon te auti. E otinako tamana bwa e na maroro ma ngaia.
E karabwarabwa te karo bwa e a tia n tiku irarikina natina are e ikawai. Ni kabane ana bwai tamana a na riki bwa a na bwai. E taekinna naba te karo bwa e bon riai bwa a na kukurei. E kukurei ngkai e a tia natina are uarereke n raira nanona ao n okira mwengaia.
Iesu e tuangiia Bwaritaio teniua taetae ni kaikonaki ibukina bwa E tangiriia bwa a na ataa ana tangira ae bati Tamara are i Karawa ibukia aomata ni kabane. E tangiria aomata ake a ongotaeka Irouna. E tangiria naba taan bure, ma Tamara are i Karawa e aki kona ni kakabwaiaia ni karokoa te tai are a rairi nanoia iai. E tangiria taan bure bwa a na rairi nanoia ao n oki nakoina. Ao e tangirira bwa ti na buokia ni karaoa anne ao ni karekea te kukurei n te tai are a oki iai.