Mwakoro 38
Te Bwaritaio ao te tia Ikoikoti ana Mwane te Uea
N te bong teuana e taetae te Tia Kamaiu nakoia tabeman aomata ake a taku bwa a kororaoi riki nakoia tabeman aomata. Iesu e karakina teuana te karaki.
Uoman mwaane a nakon te tembora bwa a na tataro. Temanna bon te Bwaritaio. Are temanna bon te tia ikoikoti ana mwane te uea, are bon te tia rikoa roon te rabwata. Aomata a riribaia taan rikoa roon te rabwata. A taku bwa taan rikoa roon te rabwata a bon aki kokoaua.
Te Bwaritaio e tei imataia aomata tabeman n tataro. E karabwa te Atua ngkai e raoiroi riki nakoia aomata ake tabeman. E taku bwa e aki mamatam uoua te tai ni katoa wiiki ao e kakabwakaa ana kabwianibwai. Ana tia ikoikoti ana mwane te uea e tei n ti ngaia, e kabobaraaka atuuna, man tataro, “Te Atua Ko na nanoangaai.”
E taku te Bwaritaio bwa e kororaoi ao e aki kainnanoa ana ibuobuoki te Atua. Ma ana tia ikoikoti ana mwane te uea e ataia bwa e aki kororaoi ao e kainnanoa ana ibuobuoki te Atua. E nanorinano ao e bubutia te Atua bwa e na kabwaraa ana bure.
E taku Iesu bwa a riai aomata ni katotoonga te tia ikoikoti ana mwane te uea. A riai n aki iangoia bwa a raoiroi riki nakoia tabeman aomata. A riai n raira nanoia man aia bure ao ni bubutia te Atua bwa e na kabwaraa aia bure.