1 Ao ngkanne te Uea e taku: Ti a ruo rikaaki. Ao a ruo rikaaki n te ^amoan tai, ao ngaiia, are tenaan Atua, a ^bbarongaa ao a karaoa karawa ao te aonaba.

2 Ao te aonaba, i mwin karaoana, bon akea kaaina ao e aki maekanaki, ibukina bwa akea te bwai ae a karaoia ma ti te aonaba; ao te rotongitong e tautaeka i aon marawa, ao Tamneia tenaan Atua a bon ^atararuai taian ran.

3 Ao ngaiia (tenaan Atua) a taku: Ke e reke te oota; ao e reke te oota.

4 Ao ngaiia (tenaan Atua) ata aron te oota, bwa e bon ota mwaaka; ao a kamaenakoa te oota, ke a karikia bwa e na maenako, man te rotongitong.

5 Ao tenaan Atua a arana te oota bwa te Ngaina, ao te rotongitong a aranna bwa te Tairiki. Ao e koro bukina bwa man te moan tairiki ni karokoa te ingabong aranna bwa te tairiki; ao man te ingabong ni karokoa te moan tairiki aranna bwa te ngaina; ao bon aei te moan, ke moana, are a aranna bwa te ngaina ao te tairiki.

6 Ao tenaan Atua a taku naba: E riai ni iai ^aannang i marenan raan, ao e na kamaenakoi raan man raan.

7 Ao tenaan Atua a tuanga annang, n te aro are e kaokoroi raan ake i aan annang man raan ake i etan annang; ao e bon riki, n aron are a tuatua.

8 Ao tenaan Atua arana annang bwa, ^aKarawa. Ao e koro bukina bwa bon man te moan tairiki ni karokoa te ingabong aranna bwa te tairiki; ao e koro bukina bwa bon man te ingabong ni karokoa te moan tairiki aranna bwa te ngaina; ao aio bon te kauoua n ^btai are a aranna bwa te tairiki ao te ngaina.

9 Ao tenaan Atua a tuatua, ni kangai: A riai ^araan i aan karawa ni uaia ni ikotaki nakon te tabo ^bteuana, ao e riai te aba ni waerake ni mwau; ao e bon riki n aron are a tuatua.

10 Ao tenaan Atua atonga bwa te aba ae mwau bwa, te Aonaba; ao ikotakiia raan, a atongnga bwa, Raan aika ^aKorakora; ao tenaan Atua a nooria bwa a ongotaeka irouia.

11 Ao tenaan Atua a taku: Ti riai ni katauraoa te aba bwa e na karika te ^auteute; te aroka ae iai koraana; kain uanikai aika kariki ua, n aron are bon aekana, are koraana i bon irouna e karika ae bon aekakina i aon te aonaba; ao e bon riki, n aron are a tua.

12 Ao tenaan Atua a baronga te aonaba bwa e na karika te uteute man oin koraana, ao te aroka bwa e na karika te aroka man oin koraana, ni karika te koraa ni katotongana; ao te aonaba e karika te aonaba man oin koraana, ni kariki ua, are koraana e ti kona ni karika ae bon aekakina, ni katotongana; ao tenaan Atua a nooria bwa a ongotaeka irouia.

13 Ao e koro bukina bwa a wareki boong; man te moan tairiki ni karokoa te moaningabong a aranna bwa te tairiki; ao e koro bukina, man te moaningabong ni karokoa te moan tairiki a aranna bwa te ngaina; ao ai bon te kateniua n tai.

14 Ao tenaan Atua a barongai taian ^aoota i annang i karawa, ao a karaoi bwa a na kaokoroa te ngaina man te tairiki; ao a barongaia bwa a na riki bwa taian kanikina ao ibukin taian tai, ao ibukin boong ao ibukin ririki;

15 Ao a barongai bwa a na riki bwa taian oota i annang i karawa bwa a na anga te oota i aon te aonaba; ao e bon riki.

16 Ao tenaan Atua a barongai uoua oota aika korakora, te oota are ^akorakora riki bwa e na tautaekana te ngaina, ao te oota are e karako riki bwa e na tautaekana te tairiki; ni ikotaki ma te oota are karako riki a katei itoi naba;

17 Ao tenaan Atua a bairei i annangin karawa, bwa a na anga te oota nakon te aonaba, ao n tautaeka i aon te ngaina ao i aon te tairiki, ao ni karikia bwa a na kaokoroa te oota man te roo.

18 Ao tenaan Atua a taratarai baikekei ake a tia n tua ni karokoa ae a ongeaba.

19 Ao e koro bukina bwa bon man te moan tairiki ni karokoa te moaningabong are bon te tairiki; ao e koro bukina bwa bon man te moaningabong ni karokoa te moantairiki are bon te ngaina; ao ai te kaaua n tai.

20 Ao tenaan Atua a taku: Ti riai ni katauraoi taian ran bwa a na kariki ni karawatai maan aika mwamwae aika a maiu; ao mannikiba, bwa aonga ni kibakiba i etan te aonaba i annang i karawa.

21 Ao taian Atua a katauraoi taian ran bwa aonga ni kariki taian ^akua aika bubura, ao maan ni kabane aika maiu aika mwamwae, ake raan a na kariki ni karawatai n aekaia nako; ao mannikiba ni kabane n aekaia nako. Ao tenaan Atua a nooria bwa a riai n ongeaba irouia, ao bwa aia babaire e bon raoiroi.

22 Ao tenaan Atua a taku: Ti na kakabwaiaia, ao ni karikiia bwa a na kariki ua ao ni kamwaitiia, ao ni kaoni taian ran i nanon marawa ke ^araan aika korakora; ao ni karika te mannikiba bwa e na kamwaitia n te aonaba.

23 Ao e koro bukina bwa bon man te moan tairiki ni karokoa te ingabong are aranna bwa te tairiki; ao e koro bukina bwa bon man te ingabong ni karokoa te moan tairiki aranna bwa te ngaina; ao aei bon te kanimaua n tai.

24 Ao tenaan ^aAtua a katauraoa te aonaba bwa e na karikiia taian man aika maiu ni bon aekana, maan aika manana ao bwaai aika kawakawa, ao maan aika totooa n te aba ni bon aekaia nako; ao e bon riki, n aron are a tia n taekinna.

25 Ao tenaan Atua a barongaa te aonaba bwa e na kariki maan aika totooa n aekaia nako, ao maan aika manana n aekaia nako, ao bwaai ni kabane aika kawakawa i aon tano n aekaia nako; ao tenaan Atua a nooria bwa a ongeaba.

26 Ao tenaan Atua a ^abowi i marenaia ao a taku: Ti riai n ruo ao ni karika te ^baomata n ^cai arora, ni katotongara, ao ti na anganiia te tautaeka i aoia ikan marawa, ao i aoia mannikiba i annang, ao i aoia maan aika manana, ao i aon te aonaba ni kabuta, ao i aon bwaai ni kabane aika kawakawa i aon te aba.

27 Ngaia are tenaan ^aAtua a ruo bwa a na karika te aomata ni katootongaia, a karikiia ni katootongaia tenaan Atua, a karika te mwaane ao te aine.

28 Ao tenaan Atua a taku: Ti na kakabwaiaia. Ao tenaan Atua a taku: Ti na karikiia bwa a na kabatiaia ao ni kamwaitiia, ao ni kaona te aonaba, ao ni kamwakura mwaakaia i aona, ao bwa a na tautaeka i aon te ika i marawa, ao i aon te mannikiba i annang, ao i aoia ni kabane bwaai aika maiu ake a mwamwae i aon te aonaba.

29 Ao tenaan Atua a taku: Nooria, ti na anganiia aroka ni kabane aika kariki koraia ake a na roko i aon te aonaba ni kabuta, ao ni kabane aroka ake a na iai te ua i aona; eng, ti na anganiia uaan te aroka ae karika te kora; e na riki bwa ^akanaia.

30 Ao nakoia ni kabane maan aika bubura n te aonaba, ao nakoia ni kabane mannikiba i annang, ao nakoia ni kabane bwaai aika kawakawa i aon te aonaba, nooria ti na anganiia te maiu, ao ti na anganiia naba ni kabane aroka aika mawaawa bwa kanaia, ao ni kabane bwaai aikai a na bon barongaaki n aron aei.

31 Ao tenaan Atua a taku: Ti na karaoi bwaai ni kabane ake ti tia n taekini, ao ni baireiia; ao nooria, a na rangi n ongetaeka. Ao e koro bukina bwa man te moan tairiki ni karokoa te ingabong aranna bwa te tairiki; ao e koro bukina bwa bon man te ingabong ni karokoa te moan tairiki aranna bwa te ngaina; ao a warekia bwa te ^akaonoua n tai.