Koroboki Aika Tabu
Kabwarabwarana


Kabwarabwarana

Te Bwaeao ae Bati Bona bon koroboki aika moan te kakawaki ake a rineaki i aon itera aika kakawaki n te onimaki ao reirei n Ana Ekaretia Iesu Kristo ibukiia Aika Itiaki ni Boong Aika Kaitira. Bwaai aikai a bon rairaki ao a katauraoaki iroun te Burabeti Iotebwa Timiti, ao a boretiaki n ana beeba ni kaongora te Ekaretia n ana tai ni maiu.

Te moan ikota ni koroboki ake a atunaki n Te Bwaeao ae Bati Bona e karaoki n 1851 iroun Unimwaane Franklin D. Richards, are kaain te Kauntira n te Tengaun ma Uoman ao te beretitenti n te British Mition. Te kantaninga iai bwa e na tauraoi ni kona ni karekeaki rongorongo aika kakawaki ake e aki tau mwaitina ni kabutaki n ana tai Iotebwa Timiti. Ngkai e a rikirake kaainakin te Ekaretia ni kabuta Europe ao America, bon iai kainnanoana bwa a na karaoaki bwai aikai bwa a na tauraoi ni karekeaki. Te Bwaeao ae Bati Bona e tabangaki kabonganana ao n tokina e a riki bwa te boki ae tabu n te Ekaretia man aia mwakuri Te Moan Beretitentii ao te maungatabu ni kabuta i Salt Lake City n Okitobwa 10, 1880.

A mwaiti manga rinanoan kanoana ae a tia ni karaoaki n aron kainnanoana n te Ekaretia. N te 1878 taian mwakoro n Ana Boki Mote ake aki karinaki n te moan boki are boretiaki a karinaki. N te 1902 mwakoro tabeua n te Bwaeao ae Bati Bona ake titebo ma koroboki ake a boretiaki n Reirei ao Berita aika Tabu a katukaki. Baireana nakon taian mwakoro ao kiibu, ma taekana ao bwaai aika a na taraaki inano n te iteraniba, a bon karaoaki n te 1902. Moan boretiakina ae uaitera korobokiana i aon te iteraniba, ma karinanin aara, botoniango ma nneia a kaotaki mai buki n te boki, e karaoaki n 1921. Akea riki bitaki aika karaoaki ni karokoa Eberi 1976, ngke a karinaki uoua kaotioti. N te 1979 bwaai aika uoua aikai a kanakoaki man te Bwaeao ae Bati Bona ao a karinaki n Reirei ao Berita aika Tabu, ike a oti iai bwa mwakoro 137 ao 138. Ni bokina ae ngkai tabeua bitaki a tia ni karaoaki bwa a na katiteboaki ma rongorongo ake a koreaki ni beeba ake mai mwaina.

E kaotaki ikai kabwarabwarana ae kimototo ibukin kanoana ae ngkai:

  1. Rinerine man Ana Boki Mote. Te rongorongo ae rineaki man ana rairairi Iotebwa Timiti i aon Karikani Bwai n te Baibara, are e moana karaoana n Tuun 1830.

  2. Ana Boki Aberaam. Te rairairi man ana kairiri te Tamnei i aon ana koroboki Aberaam. Iotebwa Timiti e moana ana rairairi n te 1835 i mwin reken tabeua kunnikai aika koreaki itabeua te taetae n Aikubita aika koreaki i aon kunikai ae karaoki man te uteute ae te papyrus ae reke i nanon bain Iotebwa Timiti n te 1835, are kanoana bon ana koroboki te tamanuea ae Aberaam. Te rairairi ae rereitaki boretiakina n te Times and Seasons e moa man 1 Maati 1842, i Nauvoo, Illinois.

  3. Iotebwa Timiti—Mataio. Koroboki aika anaaki man ana koaua Mataio n ana rairairi Iotebwa Timiti n te Baibara (Tara Reirei ao Berita aika Tabu 45:60–61 ibukin te kaetieti mai iroun te Atua bwa e na moanaki rairan te Nu Tetemanti).

  4. Iotebwa Timiti—Rongorongo. Koroboki aika anaaki man ana koaua ao rongorongon Iotebwa Timiti, ake e katauraoi ma ana taan koroboki n te 1838–1839 ao ake a rereitaki ni boretiaki n te Times and Seasons i Nauvoo, Illinois, ni moa man Maati 15, 1842.

  5. Taekan te Onimaki n Ana Ekaretia Iesu Kristo ibukiia Aika Itiaki ni Boong aika Kaitira. Taeka aika taekinaki iroun Iotebwa Timiti ae a boretiaki n te Times and Seasons ni Maati 1, 1842, n raonaki ma rongorongon te Ekaretia ae kimototo are e rang n ataaki bwa te Wentworth Reta.