1 Ngkanne te Uea ae te Atua e karika te rongo bwa e na rikirake ni korakora n aban Ura, n te aro are ^aAran, ae tariu, e mate, ma ^bTera, ae tamau, e maeka n te aba ae Ura, ae abaia I-Kareria.

2 Ao e koro bukina bwa Ngai, Aberaam, I anaa ^aTarai bwa buu, ao ^bNaora ae tariu, e anaa Mireka bwa buuna, are natin Aran te aine.

3 Ngkai te Uea e tia n ^ataku nakoiu: Aberaam, kitana abam, ao mai irouia am koraki, ao man batan tamam, nakon te aba ae N na kaotia nakoim.

4 Ngaia are I kitana te aba ae ^aUra, ae abaia I-Kareria, bwa N na nakon te aba ae Kanaan; ao I kaira Rota, natin tariu te mwaane ao buuna, ao Tarai ae buu; ao ^btamau naba e rimwiai, nakon te aba are ti aranna bwa Aran.

5 Ao te rongo e kerikaaki; ao tamau e tiku i Aran ao e maeka ikekei, ibukina bwa a mwaiti nanai ni man i Aran; ao tamau e a manga okira arona n ^ataromauri bouananti, ngaia are e reitanako maekana i Aran.

6 Ma ngai, Aberaam, ao ^aRota, ae natin tariu te mwaane, ti tataro nakon te Uea, ao te Uea e ^bkaoti nakoiu, ao e taku nakoiu: Teirake, ao kaira Rota ma ngkoe; bwa iai bukina irou bwa N na kairiko nako mai Aran, ao ni karikiko bwa te minita ni kaota ^carau n te ^daba ae kaokoro are N na anganiia kanoam ake i mwim bwa aia bwai n aki totoki, ngkana a ongo nakon bwanaau.

7 Bwa boni Ngai te Uea ae Atuam; I maeka i karawa; te aonaba bon ^annen waeu; I arora baiu i aon marawa, ao e ongeaba ni bwanaau; I karaoa te ang ao te ai bwa a na riki bwa au ^bkaa ni buaka; I kangai nakon taian maunga—Naako mai ikai—ao nooria, a bon anaaki n te ukeuke n anti, n te tai naba arei, ae karina.

8 Arau bon ^aIehova, ao I ^bata tokina man te moan tai; ngaia are e na mena baiu i aom.

9 Ao N na karika mai iroum te botanaomata ae korakora, ao N na ^akakabwaiako n akea tiana, ao ni karika aram bwa e na korakora i buakoia botanaomata nako, ao ko na riki bwa te kakabwaia nakoia kanoam ake imwiim, bwa i nanon baia a na uota te mwakuri aei ao te ^bNakoanibonga nakoia botanaomata ni kabane.

10 Ao N na kakabwaiaia rinanon aram; bwa ni kabane ake a butimwaea te ^aEuangkerio aei a na ingoanaki n aram, ao a na warekaki bwa ^bkanoam, ao a na teirake ao ni kakabwaiako, bwa ^ctamaia.

11 Ao N na ^akakabwaiaia ake a kakabwaiako, ao ni kamaraiaia ake a kamaraiako; ao iroum (are, n am Nakoanibonga) ao irouia ^bkanoam (are, am Nakoanibonga), bwa I anganiko te berita bwa te ^cinaomata aei e na reitinako rinanom, ao ni kanoam ake imwiim (n aron taekana, bon kanoam raoi, ke ana kariki rabwatam) a na bane utun te aonaba ni kabwaia, ma taian kakabwaia n te Euangkerio, ake bon taian kakabwaia ni kamaiu, are te maiu ae akea tokina.

12 Ao, i mwin are e katoka ana kakarabakau te Uea nakoiu, ao ni katoka kaotina nakoiu, I taku inanou: Am tia mwakuri e a tia ni ^aukoukoriko ma nanona ni koaua; ngkai I a tia ni kuneko.

13 Ko a tia ni kanakoa am anera bwa e na ^akamaiuai mai irouia atuan Erekana, ao N na karaoa ae riai n ongo nakon bwanaam, ngaia are kariaia am tia mwakuri bwa e na teirake ao n nako ma te rau.

14 Ngaia are ngai, Aberaam, I nako n aron are e tuangai te Uea, ao Rota ma ngai; ao ngai, Aberaam, bon ^aonobwi ma uoua au ririki ngke I nako mai Aran.

15 Ao I kaira ^aTarai, are I anaia bwa buu ngke I mena i ^bUra, i Kareria, ao Rota, natin tariu te mwaane, ao ni kabane ara bwai ake ti tia ni boboti, ao aomata ake ti ^crairiia i Aran, ao ti waaki nako ni kawaira nakon te aba ae ^dKanaan, ao ni maeka n umwa n rianna ngke ti waaki ni kawaira.

16 Ngaia are, ae akea tokina bon kamanoara ao ara ^abwaa ao kamaiuara, ngke ti mwananga mai Aran rinanon Ietion, n nakon te aba ae Kanaan.

17 Ngkai ngai, Aberaam, I katea te ^abaonikarea n te aba ae Ietion, ao n anga te karea nakon te Uea, ao n tataro bwa e aonga te ^brongo ni katannakoaki man batan tamau, bwa aonga n aki mate.

18 Ao ngkanne ti kitana Ietion rinanon te aba nakon te tabo ae Tekem; e bon tei n te tabo ae aoraoi i More, ao ti a bon tia n roko n tian abaia ^akaain Kanaan, ao I anga te ^bkarea ikekei n te tabo ae aoraoi i More, ao ni wewetea te Uea ma nanora, ibukina bwa ti a tia n roko i nanon abaia te botanaomata aei ae a taromauri bouananti.

19 Ao te Uea e kaoti nakoiu ni kaekaan au tataro, ao e taku nakoiu: N na anga nakoia am kariki te ^aaba aei.

20 Ao Ngai, Aberaam, I teirake man te tabo are mena iai te baonikarea are I a tia ni kateia nakon te Uea, ao n nako mai ikekei nakon te maunga i mainikun ^aBetaera, ao ni katea umwau n rianna ikekei, Betaera mai maeao, ao ^bAi mai mainiku; ao ikekei I katea teuana riki te baonikarea nakon te Uea, ao ni manga ^cwewetea aran te Uea.

21 Ao Ngai, Aberaam, I mwananga, ni waaki nako ni kaineta maiaki; ao ikekei e bon reitinako te rongo n te aba; ao Ngai, Aberaam, I motikia bwa N na ruo rikaaki nako Aikubita, n tiku teutana ikekei, bwa te rongo e rikirake n rangi ni korakora.

22 Ao e koro bukina bwa ngke I a kaan rin i Aikubita, e kangai te Uea nakoiu: Nooria, ^aTarai, are buum, bon te aine ae tikiraoi taraana;

23 Ngaia are e na koro bukina, ngkana a nooria I-Aikubita, a na kangai—Neierei bon buuna; ao a na kamateko, ma a na kamaiua; ngaia are taraia bwa ko na karaoa aei:

24 Kariaia bwa e na kangai nakoia I-Aikubita, bwa bon mwaanem, ao ko na maiu.

25 Ao e koro bukina bwa ngai, Aberaam, I tuanga Tarai, are buu, bwaai ni kabane ake te Uea e tuangai—Ngaia are kangai nakoia, I butiko, bwa ngkoe mwaaneu, bwa e aonga n nako raoi irou ibukim, ao e na maiu tamneiu mai iroum.