Koj Ua Tau Tam Sim No!
Los ntawm Thawj Tswj Hwm Dieter F. Uchtdorf
Tus Pab Cuam thib Ob hauv Thawj Pawg Thawj Tswj Hwm
Yog peb kam sawv thiab taug kev ntxiv mus, ... peb yuav kawm los ntawm peb txoj kev poob thiab muaj kev zoo siab thiab ua zoo dua li qub.
Thaum kuv tseem hluas, yooj yim rau kuv sawv tom qab kuv poob lawm. Tiam sis sij hawm dhau mus es, kuv twb txiav txim siab hais tias nws tsis yooj yim zoo li yav tas los lawm.
Tsis ntev tas los kuv mus caij ski nrog kuv tus tub xeeb ntxwv uas muaj 12 xyoos. Wb zoo siab siv sij hawm ua ke ces kuv txawm mus tsoo ib qho uas muaj dej khov heev thiab poob mus rau ib qho ntxhab me ntsis.
Kuv twb sim ua txhua yam kuv ua tau tiam sis kuv sawv tsis tau---kuv twb poob, thiab kuv sawv tsis taus.
Kuv sab cev nqaij daim tawv tsis ua li cas, tiam sis kuv xav hais tias kuv raug sab me ntsis. Kuv ua tib zoo kho kuv lub kaus mom thiab tsom iav vim kuv tsis xav cia lwm tus uas caij ski paub kuv yog leej twg. Ua rau kuv xav tias kuv yuav zaum ua tib pob thiab lawv yuav caij ski hla kuv kev, zoo siab hais tias, “Nyob zoo, Thawj Tswj Hwm Uchtdorf!”
Kuv pib xav paub tias yuav tsum ua li cas kom cawm tau kuv. Ces thaum ntawd kuv tus tub xeeb ntxwv los rau ntawm kuv ib sab. Kuv qhia nws tias tau muaj xwm txheej dab tsi, tiam sis zoo li nws tsis tshua xav paub yog vim li cas kuv sawv tsis taus. Nws ntsia ntsoov kuv, ncav tes, tuav kuv tes, thiab hais lus ceev nrooj hais tias, “Opa, koj ua tau tam sim no!”
Kuv sawv kiag.
Kuv tseem tsis paub ua li cas ho zoo li no. Kuv twb ua ib qho uas kuv xav tias kuv ua tsis tau ib me pliag dhau los, vim hais tias ib tug me nyuam tub uas muaj 12 xyoos ncav tes pab kuv thiab hais tias, “Koj ua tau tam sim no!” Ua rau kuv ntseeg kuv tus kheej thiab muaj dag muaj zog.
Tej lub sij hawm hauv peb lub neej peb yuav xav tias peb tsis muaj peev xwm sawv thiab mus tau ntxiv. Kuv twb kawm ib qho tseem ceeb nyob pem roob uas los daus ntawd. Txawm peb xav tias peb sawv tsis taus, tseem muaj kev cia siab. Thiab tej lub sij hawm peb xav kom muaj ib tug ntsia peb, tuav peb tes, thiab hais tias, “Koj ua tau tam sim no!”
Kev Ntseeg Ua Yuam Kev tias Yus Tawv Heev
Tej zaum peb xav tias poj niam haj yam xav tias lawv zoo tsis txaus thiab lawv ua tsis tau dab tsi---peb xav tias tej kev xav li ntawd tab kaum lawv tshaj peb. Xyov tej kev xav li ntawd puas muaj tseeb. Cov txiv neej kuj muaj txim, kev nyuaj siab thiab kev poob siab. Tej zaum peb ua txuj hais tias tej kev xav li no tsis thab peb, tiam sis tiag tiag tej no ua rau peb nyuaj siab. Tej lub sij hawm qhov uas peb swb thiab tej yam peb ua tsis tau yog tej nra hnyav heev ua rau peb xav tias peb yeej sawv tsis taus. Tej zaum peb yuav xav tias yog vim peb twb poob ntau zaus lawm, peb yeej yuav poob tas mus li. Ib yam li ib tug kws sau ntawv hais tias, “Peb caij nkoj tawm tsam dej nphau nphwv, uas pheej nplawm peb rov qab mus rau yav tas los.”1
Kuv tau saib cov txiv neej uas muaj peev xwm thiab txuj ci heev tsum tsis ua txoj hauj lwm txhim tsa Vajtswv lub nceeg vaj vim lawv twb swb ob peb zaug. Lawv yog cov txiv neej uas txawj ua ntau yam ntshe lawv yuav ua cov uas tuav lub pov thawj hwj thiab ua Vajtswv cov tub qhe zoo heev. Tiam sis vim lawv poob siab lawm, lawv tsis ua raws li lawv tej lub luag hauj lwm pov thawj hwj. Lawv ua tej yam uas tsis tshua muaj nqi xwb.
Yog li ntawd, lawv mus ua neej dog dig xwb, lawv tsis sawv ua li lawv muaj peev xwm ua raws li lawv tej teej tug. Raws li tus kws sau paj lug hais tias, cov no yog cov neeg uas “tuag thaum [tseem] muaj lawv suab paj nruas nyob hauv lub siab xwb.”2
Tsis muaj leej twg uas nyiam swb. Thiab peb tsis nyiam thaum lwm tus---qhov tseem ceeb yog cov uas peb hlub---pom peb swb. Peb sawv daws xav kom lwm tus saib taus thiab qhuas peb. Peb xav ua tus yeej. Tiam sis peb cov neeg ntiaj teb tsis muaj yeej yog peb tsis sib zog thiab rau siab kawm los yog peb tsis ua yuam kev.
Cov kwv tij, peb txoj hmoov tsis nyob ntawm seb peb ntog pes tsawg zaus tiam sis nyob ntawm seb pes tsawg zaus peb sawv thiab mus tom ntej.
Vajtswv txoj Kev Tu Siab
Peb paub tias lub neej hauv ntiaj teb no yog ib txoj kev sim siab. Tiam sis vim peb Leej Txiv Saum Ntuj Ceeb Tsheej hlub peb tag nrho, Nws qhia peb paub mus qhov twg nrhiav tau lus teb. Nws twb muab peb txhua tus ib daim qhia kev uas cia peb paub taug kev hauv pej kum tej teb chaws uas peb tsis paub thiab kov yeej tej kev cov nyom uas peb raug. Cov yaj saub tej lus yog ib feem ntawm daim qhia kev ntawd.
Thaum peb ua yuam kev---thaum peb poob los yog tawm ntawm peb Leej Txiv txoj kev---cov yaj saub tej lus qhia peb kom sawv thiab taug txoj kev dua.
Los ntawm tag nrho tej ntsiab cai uas cov yaj saub qhia ib tiam dhau ib tiam, ib lub ntsiab cai uas lawv rov qab qhia tas li yog tsab xov uas ua rau peb cia siab hais tias tib neeg muaj peev xwm hloov siab lees txim thiab rov taug txoj kev ua ib tug thwj tim tiag tiag.
Qhov no tsis txhais hais tias peb yuav tsum txaus siab yog peb ua yuam kev, peb qaug zog, los yog muaj kev txhaum. Tiam sis qhov kev tu siab uas ua rau yus hloov siab lees txim thiab kev tu siab uas ua rau yus poob siab yeej sib txawv.
Tus Thwj Tim Povlauj qhia hais tias rau qhov kev tu siab tiag tiag ua rau nej tso nej tej kev txhaum tseg kom nej tau txoj kev cawm dim ... tiam sis kev tu siab ntawm neeg ntiaj teb ua rau raug kev ploj kev tuag xwb.”3 Qhov kev tu siab tiag tiag tshoov peb kom peb hloov siab thiab cia siab dhau los ntawm txoj Kev Theej Txhoj. Kev tu siab ntawm neeg ntiaj teb kom peb poob mus, tsis muaj kev cia siab, thiab yaum kom peb ua raws li tej kev ntxias ntxiv.
Kev tu siab tiag tiag ua rau peb hloov siab los ntseeg4 thiab hloov siab.5 Kev tu siab nrho ua rau peb ntxub kev txhaum thiab nyiam ua zoo.6 Nws ua rau peb sawv thiab taug kev nyob hauv qhov kaj ntawm Khetos txoj kev hlub. Kev hloov siab lees txim yog kev hloov tiag tiag, tsis yog kev tsim txom. Muaj tseeb tiag, kev tu siab tiag tiag vim tsis tau mloog lus feem ntau mob mob heev thiab yog ib qho tseem ceeb kom hloov siab lees txim tau. Tiam sis thaum twg kev muaj txim ua rau peb ntxub peb tus kheej los yog ua rau peb tsis xav sawv ces qhov ntawd tab kaum thiab tsis txhawb nqa peb txoj kev hloov siab lees txim.
Cov kwv tij, muaj ib txoj kev zoo dua. Cia peb sawv thiab ua li cov txiv neej ntawm Vajtswv. Peb muaj ib tug Cawm Seej, uas twb taug kev dhau lub hav tuag kom pab peb. Nws muab Nws tus kheej them tus nqi txhiv peb dim. Tsis muaj leej twg uas muaj txoj kev hlub ntau tshaj---Yexus Khetos, tus Me Nyuam yaj uas tsis muaj qhov ceb, txaus siab muab Nws tus kheej txi thiab them tus nqi ntawm peb tej kev txhaum “tag nrho huv tib si.” 7 Nws ris peb tej kev txom nyem. Nws ris peb tej nra, peb lub txim. Kuv cov phooj ywg zoo, thaum peb txiav txim siab los cuag Nws, thaum peb ris Nws lub npe rau peb tus kheej thiab taug txoj kev ua Nws cov thwj tim, ces dhau los ntawm txoj Kev Theej Txhoj peb txais kev cog lus tias yuav muaj kev zoo siab thiab “kev kaj siab lug hauv lub neej no” thiab “txoj sia nyob mus ib txhis nyob hauv lub neej tom ntej.”8
Thaum peb ua yuam kev, thaum peb ua txhaum thiab poob, cia peb xav txog kev hloov siab lees txim tiag tiag txhais li cas. Kev hloov siab lees txim txhais hais tias peb hloov siab thiab ua raws li Vajtswv lub siab nyiam thiab tso kev txhaum tseg. Kev hloov siab lees txim tiag tiag ua rau peb txais kev txhawb nqa hais tias peb “ua tau tam sim no.”
Nej Yog Leej Twg?
Tus yeeb ncuab ib tug txheej txheem thaiv peb kom txhob vam meej yog kev kom peb ua xyem xyav tsis paub peb yog leej twg thiab peb xav tau dab tsi tiag tiag.
Peb xav siv sij hawm nrog peb cov me nyuam, tiam sis peb kuj xav siv sij hawm ua tej yam uas peb cov txiv neej nyiam. Peb xav poob phaus, tiam sis peb kuj xav noj cov mov uas peb nyiam. Peb xav ua neeg zoo li Khetos, tiam sis peb kuj xav hais rau tus uas tsav tsheb txeeb peb ntej tias peb xav li cas.
Dab Ntxwg Nyoog lub hom phiaj yog ntxias peb kom peb muab tej hlaws uas muaj nqi tshaj plaws ntawm kev zoo siab thiab tej ntsiab cai nyob mus ib txhis pauv kom txais ib qho khoom roj hmab uas tsis yog tiag thiab tsis yog kev zoo siab thiab kev xyiv fab tiag.
Ib tus txheej txheem ntxiv uas tus yeeb ncuab siv kom peb poob siab yog qhov uas nws ua rau peb xav tias cov lus txib yog tej yam uas lwm tus yuam peb ua. Kuv xav tias tib neeg yeej tsis nyiam tej yam uas peb xav tias tsis yog peb lub tswv yim thaum xub thawj.
Yog peb xav tias kev noj qab haus huv thiab kev siv lub cev yog ib qho uas tus kws kho mob xav kom peb ua xwb, nyaj peb yuav swb. Yog tias peb xav tias tej kev xaiv ua li no yog vim peb xav ua ib tug neeg zoo li ntawd, ces peb haj yam muaj peev xwm ua raws li tej kev ntawd thiab yuav vam meej.
Yog tias peb xav tias kev mus qhia tom tsev yog ceg txheem ntseeg tus thawj tswj hwm lub hom phiaj xwb, tej zaum peb yuav saib qhov ntawd tsis tshua rau nqi. Yog tias peb xav tias yog peb lub hom phiaj---ib qho uas peb xav ua kom peb yuav ua neeg zoo li Khetos thiab txhawb pab lwm tus---ces peb yuav ua raws li peb tau cog lus thiab foom koob hmoov rau tej tsev neeg uas peb mus xyuas thiab peb tsev neeg huv tib si.
Feem ntau, peb cov phooj ywg los yog tsev neeg yog cov uas pab peb sawv. Tiam sis yog peb ntsia ntsoov thiab muaj siab hlub, peb yuav pom tej lub cib fim uas tus Tswv muab rau peb pab lwm tus sawv thiab ua li lawv muaj peev xwm ua. Cov vaj lug kub qhia hais tias, “Txhua yam uas nej ua, nej yuav tsum rau siab ntso ua ib yam li nej ua rau Vajtswv, tsis yog nej ua rau neeg.”9
Peb muaj hwj chim ntawm sab ntsuj plig thaum peb ua neej ncaj ncees thiab tsom ntsoov rau qhov chaw uas peb xav nyob mus ib txhis. Txawm yog peb ntsia qhov chaw no nrog peb qhov muag ntawm kev ntseeg xwb los, qhov no yuav pab peb tsis txhob ncaim txoj kev.
Thaum peb tsom ntsoov rau tej yam uas peb vam meej los yog swb niaj hnub, tej zaum peb yuav mus ua yuam kev, ua loj leeb, thiab poob. Yog peb tsom ntsoov rau tej lub hom phiaj siab dua, peb yuav ua tub, kwv tij, leej txiv, thiab txiv tsev uas zoo dua thiab siab zoo dua.
Txawm yog cov uas tso siab rau tej hom phiaj zoo los lawv tseem muaj tej lub sij hawm thaum lawv yuav ntog, tiam sis lawv yuav tsis swb. Lawv tso siab thiab cia siab rau Vajtswv cov lus cog tseg. Lawv yuav rov qab sawv dua nrog kev cia siab rau Vajtswv uas ncaj ncees thiab lub zeem muag txog yav tom ntej uas muaj yeeb koob. Lawv paub tias lawv ua tau tam sim no.
Koj Ua Tau Tam Sim No
Txhua tus neeg tau poob lawm, tsis hais cov hluas thiab cov laus los yog. Peb cov neeg ntiaj teb pheej poob. Tiam sis yog peb kam sawv thiab taug kev ntxiv mus ua raws li peb tej lub hom phiaj ntawm sab ntsuj plig uas Vajtswv tau muab rau peb, peb yuav kawm los ntawm peb txoj kev poob thiab muaj kev zoo siab thiab ua zoo dua li qub.
Kuv cov kwv tij, kuv cov phooj ywg zoo, yuav muaj tej lub sij hawm thaum nej xav tias nej sawv tsis tau los yog nej mus tsis tau tom ntej. Tso siab rau tus Cawm Seej thiab Nws txoj kev hlub. Nrog kev ntseeg tus Tswv Yexus Khetos thiab lub hwj chim thiab kev cia siab ntawm txoj moo zoo, nej yeej muaj peev xwm sawv thiab taug kev mus ntxiv.
Cov kwv tij, peb hlub nej. Peb thov Vajtswv pab nej. Kuv xav kom nej hnov Thawj Tswj Hwm Monson thov Vajtswv pab nej. Txawm nej yog ib tug txiv tsev hluas, ib tug neeg laus uas tuav lub pov thawj hwj, los yog ib tug dikas tshiab, peb xav ntsoov txog nej. Tus Tswv yeej xav txog nej!
Peb lees hais tias tej lub sij hawm nej txoj kev yuav nyuaj heev. Tiam sis kuv cog lus rau nej li no los ntawm tus Tswv lub npe: yog nej sawv thiab ua raws li peb tus Txhiv Dim thaib tus Cawm Seej tus yam ntxwv, yuav muaj ib hnub uas nej yuav xav txog yav tas los thiab ris Vajtswv txiaj vim nej tau tso siab rau txoj Kev Theej Txhoj lub hwj chim kom txhawb nqa nej thiab ntxiv dag zog rau nej.
Kuv cov phooj ywg thiab cov kwv tij, txawm nej tau ua yuam kev los yog poob npaum li cas, cia li sawv! Nej txoj hmoov muaj yeeb koob tiag! Cia li sawv thiab taug kev hauv qhov kaj ntawm Yexus Khetos txoj moo zoo! Nej muaj zog tshaj nej xav. Nej muaj peev xwm tshaj nej xav. Nej ua tau tam sim no! Kuv ua tim khawv txog qhov no los ntawm peb tus Xib Hwb thiab tus Txhiv Dim, Yexus Khetos lub npe dawb ceev, amees.