Peb Puas Paub Hais Tias Peb Muaj Dab Tsi?

Los ntawm Carole M. Stephens

Tus Pab Cuam Thib Ib ntawm lub Koom Haum Niam Tsev

Daim Duab

Tej kab ke pov thawj hwj thiab kev khi lus yuav ua rau peb txais tau tej koob hmoov uas Vajtswv cog lus tseg rau peb lawm, uas muaj los ntawm tus Cawm Seej txoj Kev Theej Txhoj.

Nyob hauv “Tsev Neej: Ib zaj Lus Tshaj Tawm rau lub Ntiaj Teb,“ Thawj Pawg Thawj Tswm Hwj thiab Pawg Kaum Ob tug Thwj Tim hais tias: “Txhua txhia tus tib neeg--txiv neej thiab poj niam--raug tsim muaj yam ntxwv zoo li Vajtswv. Txhua txhia tus yog ib tug tub los sis ntxhais ntsuj pliag ntawm ib nkawm niam txiv saum ntuaj ceeb tsheej, vim li ntawd, ces txhua txhia tus muaj ib tug cwj pwm thiab txoj hmoov los saum ntuj los.”¹ Kom thiaj li ncav tau tus cwj pwm no, Vajtswv txhua txhia tus tub thiab tus ntxhais yuav tsum muaj tej kab ke thiab kev khi lus ntawm lub pov thawj hwj.

Peb yuav tsum muaj kev ua kev cai daus dej. Thaum peb ua kev cai raus dej, peb khi lus hais tias peb txais Khetos lub npe, yuav nco ntsoov Nws, ceev Nws tej lus txib, thiab ua Nws txoj hauj lwm mus txog thaum kawg, kom peb thiaj li muaj Nws tus Ntsuj Plig nrog nraim peb.²

Peb yuav tsum muaj lub txiaj ntsim ntawm tus Vaj Ntsuj Plig Dawb Huv. Los ntawm txoj kab ke ntawd, peb thiaj li yuav muaj tus Ntsuj Plig nrog nraim peb. Thawj Tswj Hwm Wilford Woodruff tau qhia hais tias: “Txhua tus txiv neej los sis poj niam uas tau los rau hauv Vajtswv lub koom txoos thiab tau ua kev cai raus dej rau tej kev rau tej kev txhaum yeej muaj cai muaj kev tshwm sim, muaj cai muaj Vajtswv tus Ntsuj Plig, los pab lawv ua lawv tej hauj lwm, ntawm kev pab lawm tej me nyuam, ntawm kev qhuab qhia lawv tej me nyuam thiab cov neeg uas lawv yuav tsum saib xyuas . Tus Vaj Ntsuj Plig Dawb Huv tsis yog rau cov txiv neej, los sis cov thwj tim los sis cov yaj saub xwb; nws yog rau txhua tus txiv neej thiab poj niam ua muaj siab ntseeg, thiab rau txhua tus me nyuam uas muaj hnub nyoog txaus los txais Khetos txoj moo zoo.”³

Peb yuav tsum txais lub vaj txiaj ntsim hauv lub tuam tsev. Txwj Laug M. Russell Ballard tau hais tias: “Thaum txiv neej thiab poj niam mus hauv lub tuam tsev, nkawd ob leej txais tau lub hwj chim ntawm lub vaj txiaj ntsim, uas txhais tau hais tias yog lub hwj chim ntawm lub pov thawj hwj. … Lub vaj txiaj ntsim twb yog qhov khoom plig ntawm lub hwj chim.”⁴

Peb yuav tsum muaj kab ke sib khi ua ke, uas coj tau mus rau txoj sia nyob mus ib txhis, uas yog Vajtswv qhov khoom plig zoo tshaj plaws.⁵ Ib tug txiv neej thiab ib tug poj niam ua ke thiaj li yuav txais tau txoj kab ke ntawm lub pov thawj hwj no xwb. Txwj Laug Russell M. Nelson tau qhia hais tias, “Lub pov thawj hwj tau txum tim rov qab los kom tsev neeg thiaj li sib khi tau ua ke nyob mus ib txhis.”⁶

Peb yuav tsum muaj lub cib fim rov qab khi lus dua txhua lub vas thiv thaum peb noj lub cim nco txog. Cov yaj saub thiab thwj tim hauv hnub nyoog kawg tau qhia hais tias thaum noj lub cim nco txog raws li txoj kev tsim nyog, ces tsis yog peb rov qab khi lus li thaum peb ua kev cai raus dej xwb tab sis “txhua yam kev khi lus uas peb tau khi nrog tus Tswv tib si.”⁷

Tej kab ke pov thawj hwj thiab kev khi lus yuav ua rau peb txais tau tej koob hmoov uas Vajtswv cog lus tseg rau peb lawm, uas muaj los ntawm tus Cawm Seej txoj Kev Theej Txhoj. Tej kab ke pov thawj hwj no pab Vajtswv cov tub thiab cov ntxhais kom muaj Vajtswv lub hwj chim,⁸ thiab yuav muab cib fim rau peb los txais tau txoj sia nyob mus ib txhis thiab nrog Nws nyob hauv Nws tsev neeg mus ib txhis.

Tsis ntev tas los no kuv nrog ib co thawj coj pov thawj hwj mus xyuas plaub tug poj niam hauv lawv tej tsev uas nyob hauv Honduras. Cov viv ncaus no thiab lawv tsev neeg xav tau tej yawm sij ntawm lub pov thawj hwj thiab lub hwj chim, tej kab ke ntawm lub pov thawj hwj thiab kev khi lus, thiab tej hwj chim ntawm lub pov thawj hwj thiab tej khoob hmoov.

Peb mus xyuas ib tug viv ncaus uas yuav txiv lawm thiab muaj ob tug me nyuam zoo nkauj heev. Nws muaj siab ntseeg thiab rau siab mus koom lub Koom Txoos, thiab nws qhia kom nws cov me nyuam xaiv qhov yog. Nws tus txiv yeej txhawb nqa nws tej kev ua hauj lwm hauv lub Koom Txoos, tab sis nws tus txiv tsis yog ib tug mej zeej. Lawv tsev neeg yeej muaj zog lawm thiab, tab sis kom muaj zog dua, lawv yuav tsum tau tej koob hmoov ntawd lub pov thawj hwj ntxiv thiab. Lawv txiv yuav tsum txais tej kab ke ntawm kev ua kev cai raus dej thiab lub vaj txiaj ntsim ntawm tus Vaj Ntsuj Plig Dawb Huv thiab muab lub pov thawj hwj rau nws. Lawv xav tau lub hwj chim ntawm lub pov thawj hwj uas los ntawm lub vaj txiaj ntsim thiab kev sib khi ua ke.

Lub tsev thib ob yog ob tug viv ncaus uas muaj siab ntseeg loj heev uas tsis muaj txiv. Ib tug viv ncaus muaj ib tug tub tab tom npaj yuav mus ua tub txib. Tus viv ncaus thib ob tseem raug kho vim nws muaj mob cancer. Thaum muaj kev poob siab thiab nyuab siab, nkawd nco txog tus Cawm Seej txoj kev Theej Txhoj ces ua rau nkawd muaj kev ntseeg thiab kev cia siab. Nkawd ob leej yeej tseem xav tau tej koob hmoov thiab hwj chim uas los ntawm tej kab ke hauv lub tuam tsev los thiab. Peb yaum kom nkawd nrog tus tub uas tab tom yuav mus ua tub txib hauv nkawd lub tsev pab los txais tej kab ke ntawd.

Lub tsev kawg uas peb muaj xyuas yog ib tug viv ncaus uas nws tus txiv nyuam qhuav tuag lawm vim ib qho teeb meem. Nws yog ib tug neeg hloov siab los ntseeg ntshiab, ces nws twb tsis to taub hais tias nws yeej txais tau lub vaj txiaj ntsim thiab sib khi tau nrog nws tus txiv no. Thaum peb qhia rau nws hais tias yeej muaj tej koob hmoov rau nws thiab nws tus txiv uas nyuam qhuav tuag lawm, ua rau nws muaj kev cia siab. Thaum nws paub hais tej kab ke thiab kev khi lus yuav muab nws tsev neeg sib khi tau ua ke, no ces nws muaj kev ntseeg thiab siab loj taug txoj kev nyuaj siab mus yam tom ntej lawm.

Tus poj ntsuam no tus tub tab tom npaj yuav los txais lub Pov Thawj Hwj Aloos. Tus tub no txoj kev txais lub pov thawj hwj yuav foom koob rau nws thiab nws tsev neeg. Lawv yuav muaj ib tug uas tuav lub pov thawj hwj hauv lawv tsev lawm.

Thaum kuv ntsib cov poj niam muaj siab ntseeg heev no hauv Honduras, kuv yeej pom tau tias lawv yeej rau siab pab lawv tsev neeg kom rau siab ntseeg txoj moo zoo. Lawv ua tsaug rau cov mej zeej hauv pawg ntseeg uas tau ua tib zoo saib xyuas thiab pab txhawb nqa lawv ntawm lub cev thiab ntawm sab ntsuj plig. Txawm li ntawd los, txhua tus viv ncaus tseem muaj kev xav tau uas tseem ncav tsis tau tau thiab.

Txhua lub tsev uas peb mus xyuas, tus thawj coj pov thawj hwj yeej nug hais tias seb cov viv ncaus puas tau txais txoj koob hmoov ntawm lub pov thawj hwj. Txhua lub sij hawm yeej teb hais tias tsis tau li. Txhua tus viv ncaus thov thiab tau txais txoj koob hmoov ntawm lub pov thawj hwj hnub ntawd. Txhua tus viv ncaus los kua muag thaum lawv ua tsaug rau txoj kev nplij siab, kev coj, kev yaum, thiab kev tshoov siab uas los ntawm Leej Txiv Saum Ntuj Ceeb Tsheej los uas ib tug tsim nyog tuav lub pov thawj hwj tau muab rau lawv.

Cov viv ncaus no ua rau kuv haj yam xav rau siab heev. Lawv hawm Vajtswv thiab Nws lub hwj chim thiab txoj kev cai. Kuv zoo siab heev rau cov thawj coj pov thawj hwj uas tau nrog kuv mus xyuas cov tsev no. Thaum peb tawm hauv txhua lub tsev no los lawm peb sib tham seb yuav pab tau tej tsev neeg no li cas kom lawv thiaj li txais tau tej kab ke uas lawv xav tau kom thiaj li taug tau txoj kev ntawm kev khi lus thiab ntxiv tau dag zog rau lawv tsev neeg.

Niaj hnub nim no cov txiv neeg thiab poj niam ib leeg yuav tsum saib ib leeg rau nqi hais tias lawv yog Vajtswv cov tub thiab cov ntxhais thiab hawm peb Leej Txiv Saum Ntuj Ceeb Tsheej thiab Nws lub pov thawj hwj---Nws lub hwj chim thiab txoj kev cai.

Nws muaj ib txog hau kev rau peb, thiab thaum peb muaj kev ntseeg thiab tso siab rau Nws txoj hau kev, ces peb txoj kev hawm Nws thiab Nws lub hwj chim ntawm lub pov thawj hwj thiab txoj kev cai yuav muaj zog tuaj.

Nyob hauv txoj kev cob qhia cov thawj coj thoob plaws lub ntiaj teb uas hais txog Kev Ntxiv Dag Zog rau Tsev Neeg thiab lub Koom Txoos los ntawm lub Pov Thawj Hwj, qhia rau peb hais tias: “Cov viv ncaus uas tsis muaj lub pov thawj hwj hauv tsev … tsis txhob xav hais tias muaj lawv ib leeg xwb. Lawv yeej tau koob hmoov thiab kev ntxiv dag zog los ntawm tej kab ke thiab kev khi lus uas lawv twb muaj lawm. Tsis txhob ua siab qeeb thaum muaj neeg xav tau kev pab. Txwj Laug M. Russell Ballard tau qhia hais tais xhua tus poj niam hauv lub Koom Txoos yuav tsum paub hais tias lawv muaj ib tug npiv sov, ib tug thawj tswj hwm ntawm pawg txwj laug, ib tug mus qhia tom tsev, los sis lwm tus uas tsim nyog tuav lub pov thawj hwj uas nws yuav hu tau kom tuaj rau hauv nws lub tsev thiab tuaj pab nws … thiab ua li Viv Ncaus Rosemary M. Wixom tau hais ntxiv, tuaj “foom koob hmoov.”⁹

Txwj laug Ballard tau qhia ntxiv hais tias: “Peb Leej Txiv Saum Ntuj Ceeb Tsheej yeej ua siab loj muab Nws lub hwj chim. Tag nrho cov txiv neej thiab poj niam yeej siv tau lub hwj chim no los pab hauv peb lub neej. Txhua tus uas tau khi tej lus dawb ceeb nrog tus Tswv, thiab cov uas hawm tej kev khi lus ntawd, yeej tsim nyog los txais tau kev tshwm sim rau nws tus kheej, tau koob hmoov uas yog kev pab ntawm cov tim tswv, thiab nrog tau Vajtswv sib tham.“¹⁰

Peb ib leej yeej xav tau ib leeg kev pab. Vajtswv cov tub yeej xav tau kev pab ntawm Vajtswv cov ntxhais, thiab Vajtswv cov ntxhais yeej xav tau kev pab ntawm Vajtswv cov tub.

Peb nyias muaj nyias txuj ci thiab nyias muaj nyias dag zog. 1 Kauleethaus tshooj 12 qhia txog tej yam uas Vajtswv cov tub thiab cov ntxhais yuav tsum ua, peb txhua tus, yuav tsum ua peb txoj hauj lwm thiab muaj kev lav ris raws li tus Tswv txoj hau kev kom sawv daws thiaj li zoo.¹¹

Vajtswv cov tub, nej puas paub hais tias nej yog leej twg? Nej puas paub hais tias nej muaj dab tsi? Nej puas tsim nyog tuav lub pov thawj hwj thiab txais lub hwj chim ntawm lub pov thawj hwj thiab txais tej koob hmoov ntawm lub pov thawj hwj? Nej puas zoo siab hlo ua tej hauj lwm thiab txais tej kev lav ris kom los ntxiv dag zog rau lub tsev ua ib leej txiv, yawg los sis yawm txiv, ib tug tub, ib tug kwv tij, thiab ib tug txiv ntxawm, txiv hlob los sis dab laug? Nej puas saib cov poj niam thiab cov niam tsev rau nqi?

Vajtswv cov ntxhais, peb puas paub hais tias peb yog leej twg? Peb puas paub hais tias peb muaj dab tsi? Peb puas yuav tsim nyog los txais lub hwj chim thiab tej koob hmoov ntawm lub pov thawj hwj? Peb puas ua tsuag, ua tib zoo, thiab coj zoo los txais tej txuj ci uas tau muab rau peb lawm? Peb puas zoo siab hlo los ua nej tej hauj lwm thiab txais tej kev lav ris kom los ntxiv dag zog rau lub tsev ua ib leej niam, pog los sis niam tais, ib tug ntxhais, tus viv ncaus, thiab niam hlob niam txawm los sis phauj? Peb puas saib cov txiv neej thiab cov txiv tsev rau nqi?

Ua ib tug tub thiab ib tug ntxhais khi lus, peb puas muaj kev ntseeg rau peb Leej Txiv Saum Ntuj Ceeb Tsheej thiab Nws txoj hau kev nyob mus ib txhis rau peb? Peb puas muaj kev ntseeg rau Yexus Khetos thiab Nws txoj kev Theej Txhoj? Peb puas muaj kev ntseeg hais tias peb muaj cwj pwm thiab muaj txoj hmoov uas yog los saum ntuj los? Thiab thaum peb rau siab ua raws li txoj hau kev thiab txais tag nrho tej uas Leej Txiv muaj,¹² peb puas rau siab ceev, ua raws li tej kev khi lus, thiab rov qab khi lus dua?

Peb txhua txhia tus yog nkawm niam txiv saum ntuj ceeb tsheej ib tug tub ntsuj plig thiab ib tug ntxhais ntsuj plig uas nkawd hlub thiab muaj ib tug cwj pwm thiab txoj hmoov uas yog los saum ntuj los. Peb tus Cawm Seej, Yexus Khetos, hlub peb kawg Nws thiaj txo Nws sia rau peb. Nws txoj kev Theej Txhoj yog qhov uas yuav pab peb mus kom txog peb lub tsev saum ntuj ceeb tsheej, los ntawm tej kab ke pov thawj hwj dawb ceev thiab kev khi lus.

Tej kab ke pov thawj hwj thiab kev khi lus no twb txum tim rov qab los rau hauv lub ntiaj teb no los ntawm tus Yaj Saub Yauxej Xamiv, thiab hnub no Thawj Tswj Hwm Thomas S. Monson tuav tag nrho cov yawm sij ntawm lub pov thawj hwj hauv ntiaj teb no.

Txwj Laug D. Todd Christofferson tau qhia hais tias: “Hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg yeej muaj txoj kev cai ntawm lub pov thawj hwj los ua tej kab ke uas cia peb khi lus nrog peb Leej Txiv Saum Ntuj Ceeb Tsheej los ntawm Leej Tub Dawb Huv lub npe. … Vajtswv yeej yuav ua raws li Nws tej lus cog tseg rau nej yog nej ua raws li nej tej kev khi lus nrog Nws.”¹³

Kuv ua tim khawv txog tej no, los ntawm Yexus Khetos lub npe, amees.