Cia Li Txo Hwj Chim thiab Muaj Siab Mos Siab Muag
Los ntawm Txwj Laug Ulisses Soares
Ntawm Cov Xya Caum Pawg Thawj Tswj Hwm
Kev txo hwj chim tsis yog kev qaug zog, tiam sis kev txo hwj chim yog kev muaj siab dawb siab zoo.
Maumoos qhia hais tias ib tug neeg “tsis muaj peev xwm muaj tau txoj kev ntseeg thiab kev cia siab, tsuas yog nws yuav txo hwj chim thiab muaj siab mos siab muag xwb.”1 Nws hais ntxiv hais tias yog peb tsis muaj tej cwj pwm li no ces “ txoj kev ntseeg thiab txoj kev cia siab tsis muaj nuj nqis dab tsi, vim tsis muaj ib tug uas raug txais yuav nyob ntawm Vajtswv, tsuas yog cov neeg txo hwj chim thiab muaj siab mos siab muag xwb.”2
Kev txo hwj chim yog tus cwj pwm ntawm cov uas “Hwm Vajtswv, ncaj ncees, txo hwj chim, muaj siab qhia tau, thiab ua siab ntev.”3 Cov neeg zoo li no txaus siab ua raws li Yexus Khetos tej lus qhia thiab lawv coj tus cwj pwm zoo, mloog lus, muaj siab dawb thiab nyob tus.
Tus Thwj Tim Povlauj qhia hais tias qhov kev muaj siab mos siab muag yog ib lub txiv los ntawm tus Ntsuj Plig.4 Yog li ntawd, yooj yim rau peb ua li no yog peb “ua neej raws li tus Ntsuj Plig.”5 Thiab xwv kom ua neej raws li tus Ntsuj Plig qhia, peb lub neej yuav tsum qhia tias peb ua ncaj ncees rau tus Tswv.
Thaum peb ris Yexus Khetos lub npe, ces Nws xav kom peb rau siab coj Nws tus yam ntxwv thiab hloov peb tej cwj pwm kom ua zoo li Nws txhua hnub. Tus Cawm Seej ntuas Nws cov thwj tim hais tias, “Yog li ntawd, nej yuav tsum ua zoo tag nrho, ib yam li nej Leej Txiv tus uas nyob saum ntuj ceeb tsheej, nws yog tus zoo tag nrho.”6 Yog peb “los cuag Khetos, ... tswj peb tej siab kom tawm ntawm txhua yam uas tsis zoo; ... thiab hlub Vajtswv,” ces los ntawm Khetos txoj kev tshav ntuj yuav muaj ib hnub thaum peb yuav rais los ua neeg zoo tag nrho.7
“Khetos tej cwj pwm yog tej txiaj ntsim los ntawm Vajtswv. [Peb] muaj [tej cwj pwm no] thaum [peb] siv [peb] txoj kev ywj siab ua ncaj ncees. ...Peb yuav tsum xav ua rau Vajtswv zoo siab, [peb yuav tsum] paub [peb] tej kev qaug zog thiab rau siab ua neeg zoo dua ntais.”8
Peb yuav tsum txo hwj chim kom peb yuav rais los ua neeg zoo li Yexus Khetos. Yog peb tsis txo hwj chim ces peb yeej yuav tsis muaj peev xwm coj lwm tus cwj pwm zoo. Kev txo hwj chim tsis yog kev qaug zog, tiam sis kev txo hwj chim yog kev muaj siab dawb siab zoo, kev muaj zog, kev nyob tus, kev paub yus muaj nqis, thiab kev tswj hwm yus tus kheej.
Kev txo hwj chim yog ib qho uas tus Cawm Seej muaj ntau nyob hauv Nws lub neej. Nws qhia Nws cov thwj tim hais tias, “Kawm txog kuv; vim kuv txo hwj chim thiab muaj siab mos siab muag.”9
Peb tau koob hmoov vim thaum peb yug los peb muaj lub noob ntawm kev txo hwj chim nyob hauv peb lub siab. Peb yuav tsum to taub hais tias peb tsis muaj peev xwm ua rau lub noob ntawd loj hlob tuaj tom qab ntsais muag tib zaug xwb tiam sis peb yuav tsum siv sij hawm ntev. Khetos hais kom peb “niaj hnub kwv [peb] tus ntoo khaub lig”10 uas txhais hais tias peb yuav tsum tsom ntsoov xav tau qhov no.
Thawj Tswj Hwm Lorenzo Snow, tus yaj saub thib tsib ntawm peb lub caij nyoog qhia hais tias, “Peb lub luag hauj lwm yog kev ua neeg zoo tag nrho, ... ua zoo dua txhua hnub, thiab saib peb tau ua li cas lub lim tiam tas los thiab ua zoo dua lub lim tiam no; hnub no cia li ua zoo dua peb tau ua nag hmo.”11 Yog li ntawd, hnub dhau hnub, peb yuav tsum siv zog ua zoo dua ntais. Txhua hnub peb yuav tsum siv zog ua zoo dua li peb tau ua dhau los thaum peb ua raws li tus txheej txheem no.
Thawj Tswj Hwm Snow hais tias:
“Peb yuam kev me ntsis thiab muaj tej kev qaug zog; peb yuav tsum siv zog kov yeej tej ntawd sai li sai tau, thiab yuav tsum [tshoov] peb cov me nyuam tej siab kom xav ua li no ... lawv thiaj yuav paub [coj] zoo txhua lub sij hawm.”
“Yog tias ib leej txiv txawj ua neej nrog nws tus poj niam tau ib hnub thiab tsis sib cav sib ceg los yog tsis ua phem rau lwm tus los yog tsis ua rau Vajtswv tus Ntsuj Plig tu siab ... ; ces hnub ntawd nws tau ua zoo tag nrho. Cia kom nws sim ua zoo ib yam li ntawd thaum hnub tom qab ntawd. Tiam sis txawm yog nws tsis tau ua li ntawd thaum nws sim ua hnub tom qab ntawd ces nws tseem yuav tsum siv zog ua li ntawd thaum hnub peb.”12
Tus Tswv yuav pom peb txoj kev mob siab thiab kev rau siab, ces Nws yuav pub peb ua qhov uas peb uas tsis tau vim peb tej kev tsis zoo tag nrho thiab tej kev qaug zog.
Ib qho tseem ceeb ntxiv uas pab yus txo hwj chim yog kev kawm paub tswj hwm peb txoj kev npau taws. Vim hais tias muaj neeg ntiaj teb nyob hauv peb txhua leej txhua tus thiab vim peb nyob hauv ib lub ntiaj teb uas muaj neeg xav yuam peb, Ib qho uas nyuaj nyuaj rau peb yog kev tswj hwm peb txoj kev npau taws. Cia li xav me ntsis seb nej ua dab tsi thaum ib tug neeg tsis ua raws li nej xav kom nws ua tam sim ntawd. Thaum tib neeg tsis pom zoo rau nej lub tswv yim, txawm yog koj paub tias koj twb tawm tswv yim uas kho tau ib qho teeb meem los, koj ua dab tsi? Koj hais li cas thaum ib tug neeg ua rau nej tu siab, tawm suab txog tej yam nej ua, los yog ua tsis zoo rau nej vim nws tsis zoo siab? Thaum tej lub sij hawm li no thiab lwm zaus uas muaj teeb meem li no, peb yuav tsum kawm tswj hwm peb txoj kev npau taws thiab ua siab ntev thiab ua siab dawb siab zoo. Qhov no yeej tseem ceeb nyob hauv peb tsev neeg thiab rau peb txoj kev sib raug zoo nrog peb tej khub nyob mus ib txhis. Thaum 31 xyoos uas kuv yuav tus kuv hlub, nws tau qhia kuv ntau zaus kom kuv nco qab txog qhov no thaum wb kov yeej tej kev nyuaj hauv wb lub neej.
Tus Thwj Tim Povlauj qhia li no nyob hauv Tsab Ntawv Ob rau Timautes hais tias:
“Vajtswv tus tub qhe yuav tsum tsis txhob nrog luag sib cav sib ceg; nws yuav tsum hlub txhua tus, muab siab rau qhia, ua siab ntev,
“Txo hwj chim ntuas cov uas thuam nws; yog nws ua li ntawd, tej zaum Vajtswv yuav pub kom cov neeg ntawd muaj sij hawm hloov siab lees txim thiab lees txais qhov tseeb;
“Thiab lawv yuav khiav dim.”13
Thaum peb tswj hwm peb tej kev xav, thaum peb nyob tus thiab ntsiag to, thiab tsis sib cav sib ceg, ces peb yuav pib tsim nyog txais lub txiaj ntsim kev txo hwj chim. Thawj Tswj Hwm Henry B. Eyring hais tias, “Thaum peb muaj kev ntseeg tswj peb txoj kev chim siab thiab txo hwj chim, tus Vaj Ntsuj Plig Dawb Huv pom zoo thiab yeej yuav muaj raws li tau cog lus thiab khi lus tseg rau peb.”14
Peb kuj yuav tsum muaj siab mos siab muag kom txais tau kev txo hwj chim. Tus Tswv qhia Thomas B. Marsh dhau los ntawm tus Yaj Saub Yauxej Xamiv, kom nws cia li muaj siab mos siab muag; thiab tus Tswv yuav tuav nws tes coj nws mus, thiab teb nws tej lus thov.15
Kuv cov kwv tij thiab cov muam, kuv ntseeg tias tsuas yog cov uas muaj siab mos siab muag xwb txawj to taub tus Tswv tej lus teb rau lawv tej lus thov Vajtswv. Cov uas muaj siab mos siab muag nyiam kawm, paub tias lawv cia siab rau Vajtswv heev thiab xav ua raws li Nws lub siab nyiam. Cov uas muaj siab mos siab muag txo hwj chim thiab txawj yaum lwm tus kom lawv ua zoo ib yam li ntawd. Vajtswv cog lus rau cov uas txo hwj chim hais tias Nws yuav tuav lawv tes coj lawv mus. Kuv ntseeg tiag tiag hais tias peb yuav tsis lug kev thiab tsis muaj kev tu siab hauv peb lub neej tsuas yog peb tuav tes nrog tus Tswv mus kev.
Hauv lub caij nyoog kawg no, ib tug yam ntxwv zoo txog kev txo hwj chim yog Tij Laug Moses Mahlangu txoj kev hloov siab los ntseeg. Nws txoj kev hloov siab los ntseeg pib thaum xyoo 1964, thaum nws txais ib Phau Ntawv Maumoos. Nws xav tsis thoob thaum nws nyeem phau ntawv no, tiam sis nws tsis tau pom ib lub Koom Txoos LDS mus txog thaum tej xyoo 1970 thaum nws pom ib daim uas muab dai rau ntawm ib lub tsev thaum nws taug ib txoj kev mus nyob hauv Johannesburg, South Africa. Tij Laug Mahlangu xav paub ntxiv thiab nws nkag mus hauv lub tsev ntawd kawm ntxiv txog lub Koom Txoos. Lawv cia li qhia nws hais tias lawv tsis muaj cai pub nws koom nrog lawv los yog ua kev cai raus dej vim lub teb chaws ntawd tej kev cai tsis pub lawv ua li ntawd thaum lub sij hawm ntawd.
Tij Laug Mahlangu txo hwj chim, muaj siab mos siab muag thiab tsis tu siab txog qhov kev txiav txim li ntawd, tiam sis nws tseem xav kawm ntxiv txog lub Koom Txoos. Nws nug lub Koom Txoos cov thawj coj seb lawv puas kam qhib qhov rais ntawm lub tsev sib ntsib thaum hnub Sunday nws thiaj zaum tau sab nraud thiab mloog lawv tej kev sib ntsib. Tau ob peb xyoos, Tij Laug Mahlangu thiab nws tsev neeg thiab phooj ywg tau koom lub koom Txoos “dhau ntawm lub qhov rais.” Muaj ib hnub thaum xyoo 1980 cov thawj coj qhia lawv tias lawv muaj cai koom lub koom txoos thiab ua kev cai raus dej. Tij Laug Mahlangu zoo siab kawg.
Tom qab ntawd, lub Koom Txoos tau tsa ib ceg ntseeg nyob hauv nws lub zej zog hauv Soweto. Muaj li no tsuas yog muaj tib neeg zoo li Tij Laug Mahlangu uas rau siab, ua siab loj, thiab muaj siab ntseeg tau ntev txawm nyuaj rau lawv ua li ntawd los yog.
Ib tug ntawm Tij Laug Mahlangu cov phooj ywg, uas tau koom lub Koom Txoos thaum tib lub sij hawm ntawd, tau hais zaj dab neeg rau kuv thaum kuv mus xyuas ceg txheem ntseeg Soweto. Thaum wb sib tham tiav lawm, nws khawm kuv. Kuv cov kwv tij thiab cov muam, thaum tib lub sij hawm ntawd, ua rau kuv xav tias yog tus Cawm Seej khawm kuv. Twb pom kev txo hwj chim nyob hauv tus tij laug zoo no ob lub qhov muag. Nws muaj lub siab dawb siab zoo thiab ris Vajtswv txiaj, nug seb kuv puas kam qhia Thawj Tswj Hwm Thomas S. Monson nws thiab coob tus ntxiv tau koob hmoov ntau npaum li cas vim muaj txoj moo zoo tseeb nyob rau hauv lawv lub neej. Tij Laug Mahlangu thiab nws tus phooj ywg kev txo hwj chim tau pab ntau tus neeg kom lawv xav ua zoo---qhov tseem ceeb nkawd tau pab kuv heev.
Kwv tij thiab cov muam, kuv ntseeg tias tus Cawm Seej Yexus Khetos yog tus uas coj yam ntxwv txo hwj chim zoo tshaj plaws. Zaum kawg ntawm nws lub neej hauv ntiaj teb no, tom qab nws raug txim tsis ncaj ncees, tom qab nws yuav tsum kwv nws tus ntoo khaub lig mus pem Golgotha, tom qab nws cov yeeb ncuab thuam thiab foom phem rau nws, tom qab ntau tus uas tau pom Nws tej txuj ci tseem ceeb tau tso nws tseg, nws txawm raug ntsia saum ntoo khaub lig.
Tom qab nws raug mob uas sab kawg nkaus li no, tus Tswv tseem thov Nws Leej Txiv thiab ua siab mos siab muag kawg nkaus hais tias: “Txiv thov koj zam txim rau lawv; rau qhov lawv tsis paub hais tias lawv ua dab tsi.”16 Tus Khetos raug mob ntawm sab nqaij daim tawv thiab sab ntsuj plig, ua rau peb muaj cib fim hloov peb tej cwj pwm sab ntsuj plig thiab txo hwj chim zoo ib yam li nws.
Kuv ua tim khawv tias Yexus Khetos yog peb tus Cawm Seej. Kuv ua tim khawv rau nej tias, vim Nws hlub peb, peb thiaj muaj peev xwm hloov tau. Peb muaj peev xwm tso peb tej kev qaug zog tseg. Peb muaj peev xwm tso tej kev phem hauv peb lub neej tseg, tswj hwm peb txoj kev chim siab, ua neeg txo hwj chim, thiab muaj tej cwj pwm zoo li peb tus Cawm Seej. Nws tau qhia kev rau peb. Nws coj ib tug yam ntxwv zoo tag nrho thiab txib peb txhua tus rais los ua neeg zoo ib yam li Nws. Nws caw peb lawv Nws qab, ua raws li Nws tus yam ntxwv, thiab ua neeg zoo li Nws. Kuv ua tim khawv txog tej yam tseeb no los ntawm Nws lub npe dawb ceev, Yexus Khetos, amees.