Txog Thaum Peb Rov Sib Pom Dua
Los ntawm Thawj Tswj Hwm Thomas S. Monson
Thov kom peb yuav haj yam ua siab zoo ib leeg rau ib leeg, thiab thov kom peb yuav ua tus Tswv tej hauj lwm tsis tu tsis tseg.
Kuv cov kwv tij thiab cov muam, kuv lub siab puv nkaus thaum peb xaus lub Koom Txoos lub tuam rooj sab laj zoo kawg no. Peb sab ntsuj plig tau txais dab zog thaum peb mloog cov lus ntuas thiab cov lus tim khawv los ntawm cov neeg hauv txhua tuas.
Peb muaj hmoov vim peb muaj cuab kav los sib ntsib hauv Tsev Rau Rooj Saj Laj zoo kawg no muaj kev thaj yeeb nyab xeeb thiab kev puaj phais. Peb twb tshaj tawm lub rooj sab laj no, mus rau txhua thaj teb mus rau tib neeg uas nyob txhua qhov txhia chaw. Txawm tias peb nyob deb deb ntawm nej coob leej, peb tseem hnov tau nej tus ntsuj plig.
Rau peb cov Kwv Tij uas raug tso tawm hauj lwm hauv lub rooj sab laj no, kuv xav sawv tag nrho lub Koom Txoos ua nej tsaug rau ntau ntau xyoo uas nej tau rau siab ntso ua tej hauj lwm no. Twb suav tsis tau cov neeg uas tau koob hmoov vim nej los ua tus Tswv tej hauj lwm no.
Kuv xav hais ua tsaug rau Tsev Kheej Pawg Hu Nkauj thiab lwm pawg nkauj uas tau sib koom tes hauv lub rooj sab laj no. Cov nkauj yeej zoo mloog thiab tau ntxiv rau peb txoj kev hnov tus Ntsuj Plig hauv txhua tuas.
Kuv ua nej tsaug rau nej tej kev thov Vajtswv pab kuv thiab pab tag nrho cov Tuam Thawj Coj thiab lwm cov tuam nom tswv hauv lub Koom Txoos. Lawv ntxiv zog rau peb txhua tus.
Thov kom lub ntuj yuav nrog nraim nej nyob. Thov kom nej vaj nej tsev yuav muaj kev hlub thiab kev ua siab zoo thiab tus Tswv tus ntsuj plig puv npo. Thov kom nej yuav saib xyuas nej zaj lus tim khawv txog txoj moo zoo xwv kom tej zaj lus tim khawv ntawd yuav tiv thaiv nej ntawm Dab Ntxwg Nyoog tej kev tsim txom.
Lub rooj sab laj no tiav tas lawm. Thaum peb mus tsev, thov kom peb yuav mus dawb mus huv. Thov kom tus ntsuj plig uas peb tau hnov hauv lub rooj sab laj no yuav nrog nraim peb nyob thaum peb niaj hnub ua peb tej hauj lwm. Thov kom peb yuav haj yam ua siab zoo ib leeg rau ib leeg, thiab thov kom peb yuav ua tus Tswv tej hauj lwm tsis tu tsis tseg.
Kuv cov kwv tij thiab cov muam, thov Vajtswv foom koob hmoov rau nej. Thov kom Nws txoj kev kaj siab lug yuav nrog nraim nej tam sim no thiab tas mus li. Kuv hais sib ntsib dua mus txog thaum peb rov sib pom dua rau lub hli tom ntej no. Los ntawm peb tus Cawm Seej uas yog Yexus Khetos lub npe, amees.