Cov Lus Qhuab Qhia thiab Ntsiab Cai Nyob Hauv Tej Nqe Kev Ntseeg
By Elder L. Tom Perry
Ntawm Pawg Kaum Ob tug Thwj Tim
Txhua nqe kev ntseeg muaj nqi kom pab peb to taub Yexus Khetos txoj moo zoo.
Thaum lawv txib kuv hais lus nyob hauv tuas pov thawj hwj ntawm lub tuam rooj sab laj no, ua rau kuv xav kiag txog ib tug xib hwb zoo nyob hauv lub Koom Haum Me Nyuam Yaus. Nws xav xav npaj peb ua neeg tsim nyog txais lub pov thawj hwj. Nws ntsuam xyuas seb peb puas paub txhua yam kom kawm lub Koom Haum Me Nyuam Yaus tiav—cim ntsoov Pawg Kaum Ob tug Thwj Tim tej npe thiab tej Nqe Kev Ntseeg. Nws kuj cog lus rau peb hais tias yog peb txhua tus cim ntsoov kaum peb Nqe Kev Ntseeg, ces nws yuav cia peb hoob kawm xaiv ib qho chaw mus ua si thaum peb koom ua ke zaum kawg.
Peb txiav txim siab hais tias peb yuav mus rau ib qho chaw peb nyiam mus pem roob me ntsis nyob ze qhov chaw tauv dej thib ib ntawm qhov chaw mus hauv lub Kwj Hav Logan, nyob hauv Utah sab qaum teb. Muaj ib qhov chaw tiaj tiaj nyob nruab nrab ntawm tej pob tsuas uas muaj chaw rau yus rauv taws thiab ci nqaij thiab khoom qab zib marshmallows. Thaum peb twb xaiv qhov chaw ntawd, peb tsis tau xav txog peb tus xib hwb, uas yog ib tug neeg laus thiab tsis tshua dhia cev ntau. Yog tias peb tau xav me ntsis ntxiv, ces tej zaum peb yuav xav tias yuav nyuaj rau nws taug kev mus ped. Tiam sis nws ua raws li nws tau cog lus, thiab nws txaus siab lawv peb qab mus.
Thaum xub thawj, peb nce lub toj me me. Lub caij ntawd tsis tau muaj txoj hlua hluav taws xob uas tav peb kev. Nrog peb txoj kev pab peb tus xib hwb twb nce toj. Tom qab ntawd peb mus nram nqaj roob rau ib qho chaw peb hu ua “Turtle Back” los yog “Vaub Kib lub Nraub Qaum.”
Thaum peb tuaj txog qhov chaw ntawd, peb tus xib hwm siv sij hawm me ntsis kom ua tau pa. Thaum txog lub sij hawm uas peb tau npaj zaum noj, nws twb muaj zog qhia peb peb zaj lus kawg. Nws qhia peb hais tias nws nyiam qhia peb nyob hauv lub Koom Haum Me Nyuam Yaus tau ob xyoos ntawd lawm. Nws qhuas peb vim peb tau cim ntsoov tej Nqe Kev Ntseeg lawm. Nws hais tau ib tug naj npawb, ces peb txawj hais tau nqe ntawd rau nws. Ces nws hais tias qhov uas peb tau cim ntsoov Tej Nqe Kev Ntseeg yuav tsis muaj nqi dab tsi tsuas yog peb paub hais ib co lus xwb yog peb tsis to taub cov lus qhuab qhia thiab tej ntsiab cai nyob haud. Nws yaum peb kom peb kawm cov lus qhuab qhia ntawm txoj moo zoo nyob hauv txhua Nqe Kev Ntseeg. Nws piav hais tias muaj ob peb hom lus qhuab qhia nyob hauv Tej Nqe Kev Ntseeg.
1. Pawg Vajtswv thiab Khetos cov Lus Qhuab Qhia Tseem Ceeb
Peb kawm los ntawm nqe kev ntseeg thib ib hais tias Pawg Vajtswv yog peb tug neeg: Vajtswv Leej Txiv, Yexus Khetos, thiab tus Vaj Ntsuj Plig Dawb Huv.
Nqe ob qhia hais tias peb lav ris tej yam peb ua nyob hauv lub ntiaj teb.
Nqe peb qhia peb txog tus Cawm Seej lub luag hauj lwm kom cawm Leej Txiv Saum Ntuj Ceeb Tsheej cov me nyuam dim.
Nqe plaub qhia tias tej ntsiab cai thiab cov kab ke tseem ceeb npaum li cas.
Lub hwj chim ntawm peb tus xib hwb tej lus yog ib qho kev tshoov siab rau kuv vim nws qhia tias kev kawm txog txoj moo zoo muaj nqi heev. Cov vaj lug kub qhia peb txog qhov tseeb uas peb siv tau kom txiav txim siab txog kev txawj ntse uas peb txais, sim seb puas tseeb los sis tsis tseeb. Cov lus qhuab qhia tseeb los ntawm Vajtswv, lub hauv paus ntawm txhua yam tseeb. Cov lus qhia thiab tej lub ntsiab ntawm cov lus qhuab qhia los muaj nyob hauv peb tus Tswv thiab tus Cawm Seej txoj moo zoo. Tej lus qhia cuav lso ntawm Dab Ntxwg Nyoog, leej txiv ntawm txhua txoj kev dag. Nws xav hloov thiab pauv tej yam tseeb uas tau muab tshwm sim los. Nws xav ntxias peb kom peb yuav poob zoo thaum peb taug kev rov qab mus rau peb lub tsev nyob saum ntuj ceeb tsheej.
Cov vaj lug kub qhia peb paub tiv thaiv kom txhob raug tej lus qhia cuav. Piv xam hais tias, nyob hauv Povlauj tsab ntawv rau Timautes, peb nyeem hais tias:
“Vajtswv Txoj Lus txhua zaj puav leej yog Vajtswv tshoov neeg lub siab kom neeg sau thiab yog txoj uas qhia qhov tseeb, qhuab ntuas tus uas ua txhaum, pab tau tus uas ua yuam kev, thiab qhia kom sawv daws paub ua lub neej ncaj ncees:
“Vajtswv Txoj Lus qhia li ntawd kom tus uas ua Vajtswv txoj hauj lwm thiaj paub txhij thiab txawj ua txhua yam hauj lwm zoo” (2 Timautes 3:16–17).
Cov lus qhuab qhia hauv lub Koom Txoos nws zoo nkaus li ib lub roj teeb nyob hauv ib lub cell phone. Thaum yus tshem lub roj teeb ntawm koj lub cell phone mus, ces nws tsis muaj nqi dab tsi. Ib lub koom txoos uas tsis qhia lus qhuab qhia tseeb kuj tsis muaj nqi dab tsi. Ib lub koom txoos zoo li ntawd coj tsis tau peb rov qab mus rau peb Leej Txiv Saum Ntuj Ceeb Tsheej thiab peb qhov chaw nyob mus ib txhis.
2. Tus Txheej Txheem ntawm lub Pov Thawj Hwj
Tom qab peb pib to taub cov lus qhuab qhia ntawm Khetos, nqe kev ntseeg tsib thiab rau qhia peb txog tus txheej txheem ntawm lub pov thawj hwj. Raws li tus Tswv qhia, Yauxej Xamiv txhim tsa tus Cawm Seej lub Koom Txoos los ntawm txoj cai pov thawj hwj---uas yog Vajtswv lub hwj chim. Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg yog tib lub koom txoos uas Khetos txhim tsa thiab coj thaum Nws nyob hauv lub ntiaj teb.
Yog ib hnub zoo kawg nkaus thaum Yauxej Xamiv thiab Oliver Cowdery thaum lub Tsib Hlis Ntuj 1829 thaum nkawd mus hauv hav zoov thov Vajtswv txog cov lus qhuab qhia ntawm kev cai raus dej kom zam txim rau tej kev txhaum uas nkawd tau nyeem thaum nkawd txhais Phau Ntawv Maumoos. Thaum tej xyoo 1800, ntau lub koom txoos qhia tej yam txog kev cai raus dej uas sib txawv, thiab Yauxej thiab Oliver paub tias tag nrho tej yam no tsis muaj tseeb. Nkawd xav paub tus txheej txheem ua kev cai raus dej uas yog thiab leej twg muaj txoj cai muab neeg ua kev cai raus dej.
Tus Tswv teb nkawd tej lus thov thaum Nws xa ib tug tub txib los saum ntuj los, Yauhas tus uas Muab Neeg Ua Kev Cai Raus Dej, tshwm sim rau nkawd. Ib tug dhau ib tug, nws tso nws tes saum nkawd taub hau thiab muab txoj cai ua kev cai raus dej rau nkawd nrog cov lus no hais tias: “Rau neb kuv ob tug kwv luag tub qhe, los ntawm Mexiyas lub npe, kuv muab lub Pov Thawj Hwj Aloos rau neb” (Q&K 13:1).
Yog ib hnub zoo kawg nkaus nyob hauv lub ntiaj teb no zaj keeb kwm! Lub pov thawj hwj twb tau txum tim rov qab los rau hauv lub ntiaj teb lawm.
Thaum peb txais lub pov thawj hwj, peb txais txoj cai tuav Vajtswv lub npe ua tej yam dab tsi thiab coj lwm tus ua raws li qhov tseeb thiab kev ncaj ncees. Txoj cai no yog ib lub hauv paus ntawm lub hwj chim ncaj ncees thiab kev pab Vajtswv cov me nyuam nyob hauv lub ntiaj teb thiab yuav muaj txoj cai no tom qab peb tso lub ntiaj teb no tseg. Yuav tsum muab lub pov thawj hwj txum tim rov qab los ua ntej lawv txhim tsa Yexus Khetos lub Koom Txoos. Nov yog qhov tseem ceeb uas peb kawm los ntawm nqe kev ntseeg tsib thiab rau.
3. Tej Kev Pab Mus Ib Txhis Thaum Taug Kev Hauv lub Ntiaj Teb No
Peb Nqe Kev Ntseeg tom qab ntawd---nqe xya, yim, thiab cuaj---qhia txog tej kev pab uas qhia peb ua neej nyob hauv lub ntiaj teb no. Peb txais tej txiaj ntsim ntawm sab ntsuj plig kom coj peb thaum peb ua raws li tus Tswv tej lus qhia thiab tiv thaiv peb kom txhob raug kev phem. Cov vaj lug kub yog tej yam uas pab peb ntxiv: yog peb ua tib zoo nyeem Vajtswv txoj lus, ces Nws yuav muab txoj kev txais txoj sia nyob mus ib txhis tshwm sim rau peb.
Nqe kev ntseeg cuaj qhia peb tus Vajtswv tau qhia, tab tom qhia, thiab yuav qhia tej yam tseem ceeb rau Nws cov yaj saub, cov pom tau, thiab cov txais kev tshwm sim. Peb kawm hais tias peb yuav tsum mloog tus Ntsuj Plig lub suab yau yau thiab nyeem vaj lug kub tiam sis kuj muaj peb lub Koom Txoos cov thawj coj, uas Vajtswv tau xaiv, hu thiab tsa kom foom koob hmoov rau peb lub neej los ntawm lawv tej lus qhia.
4. Mej Zeej uas Ua Tub Txib
Nqe kev ntseeg kaum, kaum ib, thiab kaum ob qhia peb tias peb yuav tsum ua cov tub txib tej hauj lwm thiab qhia txoj moo zoo rau neeg ntiaj teb nyob hauv ntau haiv neeg thiab raws li ntau yam txoj kev cai. Peb kawm txog kev muab Ixayees sib sau ua ke ua ntej tus Cawm Seej txoj Kev Los Zaum Ob. Nqe kev ntseeg no qhia tias cov txiv neej thiab cov poj niam xaiv tau lawv tus kheej, thiab lawv muaj cai lees txais los sis xyeej Vajtswv txoj lus raws li lawv xav. Qhov kawg, peb kawm hais tias thaum peb tshaj tawm Yexus Khetos txoj moo zoo mus rau plaub ceg kaum ntuj ces peb yuav tsum ua raws li txhua lub teb chaws lub tseem fwv hais. Muaj tseeb tiag, peb nseeg tias peb yuav tsum ua raws, hwm, thiab txhawb nqa tej kev cai.
5. Tej Cwj Pwm Ntxim Ntshaw
Nqe kev ntseeg kaum peb muaj tej lus qhia tshwj xeeb txog qhov uas peb yuav tsum ua neej li cas thiab ua neeg zoo li cas. Nws hais tias: “Peb ntseeg txoj kev ua ncaj ncees, ua siab dawb, coj dawb huv, ua siab zoo, tsim txiaj, thiab ua zoo rau tib neeg; muaj tseeb tiag, peb hais tau hais tias peb ua raws li Pov Lauj cov lus ntuas---Peb ntseeg txhua yam, peb cia siab rau txhua yam, peb tau nyiaj ntau yam, thiab cia siab peb yuav nyiaj tau txhua yam. Yog tias muaj ib yam twg uas tsim txiaj, ntxim hlub, los sis muaj moo zoo los sis txaus qhuas, peb nrhiav kom tau tej ntawd.
Peb txhua tus yuav tsum coj tej cwj pwm no thiab ua neej raws li tej yam no qhia. Tej yam tseeb uas Tej Nqe Kev Ntseeg qhia nyias txhawb nqa nyias ib yam li tej yam ntawm ib lub cell phone nyias muaj nyias tej hauj lwm. Zoo ib yam li tus txheej txheem uas tsim tej yam khoom kom ua tau ib lub cell phone, tej Nqe Kev Ntseeg yog tus txheej txheem qhia peb txog tej lus qhuab qhia tseem ceeb ntawm Kev Muab Txoj Moo Zoo Txum Tim Rov Qab Los. Txhua nqe kev ntseeg muaj nqi kom pab peb to taub Yexus Khetos txoj moo zoo.
Kuv tus xib hwb hauv lub Koom Haum Me Nyuam Yaus tau ua rau kuv txiav txim siab kuv uav kawm txog cov lus qhuab qhia ntawm lub nceeg vaj. Nws qhia kom kuv nrhiav tej lub ntsiab tseem ceeb ntawm tej Nqe Kev Ntseeg no. Nws cog lus rau kuv tias yog kuv yuav kawm txog tej yam tseeb dawb huv no ces tej kev txawj ntse uas kuv txais yuav hloov kuv lub neej, thiab kuv ua tim khawv hais tias twb muaj li no tiag lawm.
Tom qab kuv tus xib hwb zaj lus qhia nyob pem roob hauv Logan Canyon, peb pom hais tias peb twb nyob ntev dua li peb tau xav. Twb yuav luag tsaug ntuj lawm, thiab peb paub tias peb muaj ib qho teeb meem.
Nyuaj rau kuv tus xib hwb tuaj txog qhov chaw tshwj xeeb ntawd, tiam sis txoj kev rov qab los yog ib qho nyuaj tshaj. Qhov no qhia peb tias peb txoj kev txiav txim siab tias yuav tuaj rau qhov chaw no yeej tsis zoo hlo li. Kev nce toj rov qab mus nyuaj nyuaj rau peb, tiam sis nyuaj tshaj rau ib tug neeg laus li nws.
Thaum peb pab nws nce toj, muaj ob tug tub ceev xwm tshwm sim. Lub Koom Haum Me Nyuam Yaus tus thawj tswj hwm tau xa nkawd tuaj nrhiav peb, vim nws ntshai peb tau poob zoo. Tej xwm txheej ntawd thiab tej yam uas nws qhia ua rau kuv nco txog lub sij hawm no tas kuv lub neej.
Nej cov tub hluas---kuv yaum kom nej siv nej txoj kev txawj ntse kom kawm Tej Nqe Kev Ntseeg thiab cov lus qhuab qhia nyob haud. Tej Nqe Kev Ntseeg no yog lub Koom Txoos cov lus qhuab qhia tseem ceeb tshaj thiab yog tej lus luv tshaj uas piav txog peb cov lus qhuab qhia. Yog tias nej siv tej nqe no pab nej kawm txog Yexus Khetos txoj moo zoo, nej yuav npaj siab ua tim khawv txog qhov uas tau muab qhov tseeb txum tim rov qab los rau hauv lub ntiaj teb lawm. Nej yuav muaj peev xwm hais lus uas meej, yooj yim thiab muaj zog hais txog tej yam tseem ceeb uas nej ntseeg vim nej yog mej zeej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg.
Kuv kuj ua tim khawv txog qhov uas kaum peb Nqe Kev Ntseeg muaj tseeb los ntawm peb tus Tswv thaib tus Cawm Seej lub npe, tus uas yog Yexus Khetos, amees.