Txoj Kev Muaj Kev Pov Hwm ntawm Sab Ntsuj Plig
Los ntawm Thawj Tswj Hwm Boyd K. Packer
Thawj Tswj Hwm ntawm Pawg Kaum Ob tug Thwj Tim
Txhua tus neeg lub siab yuav nyob kaj siab lug thaum lawv nyeem cov vaj lug kub thiab tau kev pov hwm thiab cawm dim uas tau cog lus tias yuav tau.
Tsis ntev tas los, kuv muab ob tug hluas sib khi hauv lub tuam tsev. Nkawm niam txiv no coj dawb huv mus txog hnub uas ib tug tub thiab ib tug ntxhais ncaim nkawd tsev thaum hluas los ua txij ua nkawm. Thaum lub sij hawm no, nkawd dawb huv. Tsis ntev tom ntej ntawd, nkawd yuav yug thiab tu me nyuam loj hlob, raws li tus txheej txheem uas peb Leej Txiv Saum Ntuj Ceeb Tsheej tsa. Xwv kom lawv thiab lawv tej tub ki tom ntej yuav muaj kev zoo siab, lawv sawv daws yuav tsum coj raws li tej kev cai uas tus Cawm Seej qhia hauv Nws cov vaj lug kub.
Cov niam txiv hnub no tsis paub xyov puas muaj ib qhov chaw tsis muaj xwm txheej uas lawv tu tau me nyuam loj hlob. Yeej muaj ib qhov chaw tsis muaj xwm txheem mas. Nws yog nyob hauv ib lub tsev uas muaj txoj moo zoo ua nws lub hauv paus. Hauv lub Koom Txoos peb saib tsev neeg yog qhov tseem ceeb, thiab peb ntuas tej niam txiv nyob txhua qhov chaw kom tu me nyuam loj hlob hauv kev ncaj ncees.
Tus Thwj Tim Povlauj tau qhia tej uas yuav muaj yav tom ntej tias “thaum lub sij hawm uas ntiaj teb yuav kawg yuav muaj kev ntxhov siab heev.
“Rau qhov tej neeg nyias yuav xav txog nyias xwb, lawv yuav xav tsis txog lwm tus li. Lawv yuav ntshaw nyiaj, yuav khav theeb, yuav muab hlob, yuav tsis mloog niam txiv lus, yuav tsis ris luag txiaj ntsig, thiab yuav saib tsis taus Vajtswv txoj kev cai,
“Lawv yuav tsis sib hlub, tsis zam txim rau lwm tus, nyiam taug xaiv, tsis tswj lawv lub siab, ua neeg tsiv tsaim thiab tsis nyiam ua zoo;
“Lawv yuav ua neeg ntxeev siab, ua neeg siab heev, thiab lawv saib lawv tsim txiaj dua lwm tus; lawv nyiam kev lom zem heev dua nyiam Vajtswv;
“Lawv yuav hais tias lawv yog cov uas ntseeg Vajtswv. Tiam sis lawv yeej tsis ua raws li Vajtswv txoj kev cai. Koj tsis txhob nrog cov neeg uas zoo li ntawd ua ke hlo li.”1
Povlauj kuj qhia, “Cov neeg uas ua phem thiab cov neeg uas dag ntxias lwm tus, lawv tseem yuav ua phem heev zuj zus. Txawm yog lawv mus dag ntxias lwm tus los lawv twb tsis paub hais tias lwm tus twb dag ntxias lawv lawm thiab.”2
Cov nqe no muaj lus ceeb toom, lawv qhia txog tej yam uas peb yuav tsum tsis txhob ua. Peb yuav tsum saib ntsoov thiab mob siab. Thaum peb rov qab xyuas tej yam uas thaum ub lawv qhia tias yuav muaj los yav tom ntej no peb cuv tau hais tias lawv puav leej tab tom muaj hauv ntiaj teb tam sim no:
Lub caij muaj kev ntxhov siab—muaj tam sim no. Peb nyob ib lub sij hawm uas muaj xwm txheej heev.
Neeg ntshaw nyiaj, khav theeb, muab hlob—lawv puav leej nyob ib ncig peb tam sim no.
Neeg dag, tsis mloog niam txiv lus, tsis ris luag txiaj ntsig, saib tsis taus Vajtswv kev cai, tsis sib hlub—tab tom muaj cov no thiab.
Tsis ua raws li twb cog lus, nyiam taug xaiv, thiab li no—cuv tau tej no puav leej huv si raws li peb pom muaj nyob ib ncig.
Maulaunais kuj ceeb toom txog tej kev phem uas yuav muaj thaum peb lub caij hais tias:
“Thaum nej yuav pom tej yam no los rau hauv nej … nej yuav ras paub txog nej qhov chaw phem heev. …
“Yog li ntawd, kuv Maulaunais, tau raug txib kom sau tej yam no xwv kom txoj kev phem yuav muaj qhov kawg, thiab kom lub sij hawm yuav los kom Dab Ntxwg Nyoog yuav tsis muaj hwj chim rau saum tej siab ntawm noob neej, tiam sis kom lawv yuav raug yaum ua zoo tsis tu ncua, xwv kom lawv yuav los tau rau hauv qhov chaw txhawv ntawm tag nrho tej kev ncaj ncees thiab raug cawm dim.”3
Tej yam uas muaj tam sim no yeej raws li Povlauj thiab Maulaunais cov lus piav, es peb yuav tsum lees hais tias lawv tseeb xwb. Coob tug yuav tsis nyiam mloog lawv, thiab yuav poob siab. Txawm li ntawd los, thaum kuv xav txog yav tom ntej, kuv yeej tseem muaj kev cia siab ntau.
Hauv Povlauj zaj tshwm sim, nws tsis qhia txog kev cov nyom thiab teeb meem xwb, tiam sis nws kuj qhia tias peb ua tau dab tsi kom pov hwm peb tus kheej thiab:
“Ua raws li Vajtswv txoj lus uas koj tau kawm thiab cia siab rau lawv. Rau qhov koj yeej paub hais tias cov neeg uas qhia koj, lawv yeej tsis dag koj ib zaug li;
“Thiab koj yeej paub hais tias txij thaum koj tseem yau, koj yeej kawm Vajtswv txoj lus los lawm. Vajtswv txoj lus pab tau kom tus uas kawm muaj tswv yim; thiab yog nws los ntseeg Yexus Khetos, nws yuav dim nws lub txim.”4
Cov vaj lug kub yog yam uas yuav pab tiv thaiv peb sab ntsuj plig . Lawv qhia tej lus qhuab qhia thiab tej kev cai thiab tej kab ke uas yuav coj Vajtswv cov me nyuam txhua tus los muaj zaj lus tim khawv tias Yexus Khetos yog tus Cawm Seej thiab tus Txhiv Dim.
Peb siv sij hawm ntau xyoo, thiab mob siab txhais kom tau cov vaj lug kub rau txhua txhia yam lus thiab kom muaj lus sau rau ntawm qab nplooj ntawv thiab lus piv rau lwm nqe. Peb xav ua kom txhua tus uas xav kawm yuav nyeem tau lawv. Lawv qhia peb tig rau qhov twg thiab ua dab tsi. Lawv pab peb muaj kev cia siab thiab qhia kom peb txawj ntse.
Ntau xyoo tas los, Txwj Laug S. Dilworth Young ntawm Pawg Xya Caum qhia kuv dab tsi txog txoj kev nyeem vaj lug kub. Muaj ib ceg txheem ntseeg uas cov mej zeej tsis sib haum thiab muaj teeb meem, thiab lawv xav tau kev qhuab ntuas.
Kuv nug Thawj Tswj Hwm Young, “Kuv yuav tau hais li cas?”
Nws tsuas hais tias, “Hais kom lawv nyeem cov vaj lug kub.”
Kuv nug tias, “Cov vaj lug kub twg?”
Nws hais tias, “Vaj lug kub twg los tau. Piv xam lis, hais kom lawv nthuav Phau Ntawv Maumoos thiab cia li pib nyeem. Tsis ntev xwb kev kaj siab thiab kev tshoov siab yuav los, thiab lo lus teb yuav tshwm sim.”
Siv sij hawm txhua hnub nyeem vaj lug kub, thiab cov koob hmoov yuav los. Cov vaj lug kub yeej muaj lus ceeb toom, tiam sis nws kuj pab tau peb loj hlob heev thiab.
Yog tias thaum nej nyuam qhuav pib nyeem cov lus hauv vaj lug kub es lawv zoo txawv rau nej, nyeem ntxiv. Tsis ntev nej yuav pom hais tias cov nplooj ntawd muaj tej yam zoo nkauj thiab uas muaj hwj chim zis.
Povlauj hais tias, “Vajtswv txoj lus txhua zaj puav leej yog Vajtswv tshoov neeg lub siab kom neeg sau. Vajtswv txoj lus yog txoj uas qhia qhov tseeb, qhiab ntuas tus uas ua txhaum, pab tau tus uas ua yuam kev, thiab qhia kom sawv daws paub ua lub neej ncaj ncees.”5
Nej sim tau cov lus cog tseg no rau nej tus kheej seb puas muaj tseeb.
Peb tab tom nyob ib lub sij hawm uas muaj kev ntxhov siab; txawm li ntawd los, peb nrhiav tau kev cia siab thiab kev kaj siab rau peb tus kheej thiab rau peb tej tsev neeg. Cov uas ua neej muaj kev nyuaj siab, tag kev cia siab tias me nyuam yuav dim tau qhov chaw uas lub ntiaj teb coj lawv mus lawm, tsis txhob tag kev cia siab mas. “Tsis txhob ntshai, cia li ntseeg.”6 Kev ncaj ncees kov yeej tau kev phem.
Cov me nyuam uas kawm thiab to taub vaj lug kub thaum tseem yaus yuav paub txoj kev uas lawv yuav tau mus thiab haj yam yuav nyob txoj kev ntawd dua lwm tus. Cov uas mus yuam kev rov los tau thiab rov nrhiav tau txoj kev dua, yog muaj neeg pab.
Mauxiyas cov tub tau tawm tsam lub Koom Txoos ib ntus tiam sis tom qab ntawd lawv hloov siab lees txim thiab muaj kev xav tshiab. Hauv Amas peb nyeem, “Nim no Mauxiyas cov tub no…tau loj hlob muaj zog nyob hauv txoj kev paub ntawm qhov tseeb; vim lawv tau yog neeg ruaj ntawm txoj kev to taub thiab lawv tau rau siab nrhiav vaj lug kub, xwv kom lawv yuav paub Vajtswv txoj lus.”7
Thawj Tswj Hwm Joseph F. Smith muaj tsib xyoo thaum nws txiv, Hyrum, raug luag tua hauv lub qhov taub nyob hauv Carthage. Tom qab ntawd, Joseph hla tej tiaj nrag nrog nws niam uas yog poj ntsuam lawm.
Thaum nws muaj 15 xyoo, nws raug hu mus ua tub txib rau teb chaws Hawaii. Nws xav li nws poob zoo thiab kho siab thiab sau hais tias: “Kuv nyuaj siab heev. … Kuv xav tias kuv txom nyem heev, tsis muaj tswv yim thiab kev paub dab tsi, ib tug tub hluas xwb, es kuv tsis kam tsa muag ntsia [leeg twg] ntsej muag.”
Thaum nws tseem xav txog nws tus kheej ib hmo, tus tub hluas Joseph npau suav tias nws tsiv mus deb deb, nws khiav sai li sai tau. Nws nqa ib pob khoom me me. Ces nws los rau ib lub tsev loj loj uas yog qhov chaw nws txhob txwm mus. Thaum nws tuaj txog, nws pom ib daim paib hais tias, “Chaw da dej.” Nws tsuag tsuag mus da dej. Nws nthuav nws pob khoom thiab pom khaub ncaws dawb thiab huv nyob hauv. Nws hais tias, “Nws yog ib qho uas kuv tsis tau pom ntev los.” Nws muab hnav ces khiav mus rau lub tsev loj lub qhov rooj.
Nws hais tias, “Kuv khob thiab lub qhov rooj qhib, thiab tus txiv neej uas sawv ntawd yog tus Yaj Saub Yauxej Xamiv. Nws ntsia kuv zoo li nws yuav cem kuv me ntsis, ces thawj cov lus uas nws hais, hais tias: ‘Joseph, koj tuaj lig.’ Tiam sis kuv ua siab loj hais tias:
“‘Yog, tiam sis kuv dawb huv-kuv dawb huv!’”8
Peb txhua tus muaj tau li no thiab.
Yog koj nyob txoj kev uas yuav coj koj mus muaj kev ntseeg thiab nquag koom lub Koom Txoos, nyob txoj kev no ntxiv mus thiab ua raws li koj cov lus cog tseg. Taug mus tom ntej txog thaum tus Tswv cov koob hmoov los rau koj thiab tus Vaj Ntsuj Plig Dawb Huv yuav yog yam uas pab coj koj kev hauv koj lub neej.
Yog koj tab tom taug ib txoj kev uas tsis raws li txoj kev uas cov vaj lug kub qhia, kuv qhia koj tias muaj ib txoj kev uas coj tau koj rov qab los.
Yexus Khetos tau qhia meej meej txog txoj kev uas peb hloov siab lees txim tau thiab nrhiav tau txoj kev kho peb lub neej kom nws zoo. Thaum peb thov Vajtswv peb tus kheej thiab thov kev zam txim peb nrhiav tau txoj kev kho peb tej kev yuam kev kom zoo. Tiam sis, muaj qee yam kev txhaum, ib yam li cov txhaum kev nkauj kev nraug, uas peb yuav tau muaj kev pab thiab kev kho los ntawm ib tug kws kho mob ntawm sab ntsuj plig uas muaj cai.
Ntau xyoo tas los, ib tug ntxhais hluas thiab nws txiv uas laus tau tuaj xyuas kuv ntawm kuv chaw ua hauj lwm. Nws coj nws txiv tuaj kev deb xwv kom dim nws txiv txoj kev txaj muag uas nws tau vim los ntawm kev txhaum. Thaum nws yog tub hluas nws ua txhaum loj, thiab thaum nws laus nws mam rov qab xav txog qhov ntawd. Nws yeej ua tsis tau kom kev txaj muag thiab kev nyuaj siab ploj mus. Nws kho tsis tau qhov teeb meem uas nws ua thaum hluas nws ib leeg, tiam sis yog nws pib lub sij hawm ntawd mus, thiab los ntawm lwm tus kev pab thiab, nws muab tau txoj kev txaj muag uas nws muaj ntau xyoo ntawd pov tseg tau.
Kuv zoo siab tias thaum kuv qhia nws tej ntsiab lus los ntawm Phau Ntawv Maumoos zoo li ib lub nra uas hnyav heev tau raug tshem ntawm nws lub xub pwg mus lawm. Thaum nws thiab nws tus ntxhais tsav rov qab mus tsev ntau ntau mais, tus txiv neej laus muab nws txoj kev txaj muag txog txoj kev txhaum tas los pov tseg rau tom qab.
Yog nej “ras paub txog nej qhov chaw phem heev”9 thiab xav rov qab noj qab nyob zoo ntawm sab ntsuj plig, mus ntsib nej tus npisov. Nws tuav tej yuam sij thiab pab tau nej taug txoj kev coj nej mus hloov siab lees txim.
Txoj kev uas peb hloov siab lees txim txawv ib leeg rau ib leeg, thiab kev zam txim ib yam nkaus thiab. Tus Tswv tsuas xav kom ib tug neeg yuav tig ntawm nws kev txhaum, thiab “[Nws] yuav zam txim rau lawv thiab … yuav tsis cim ntsoov lawv tej kev txhaum li lawm.”10
Thaum koj hloov siab lees txim tas, koj yuav to taub lub ntsiab ntawm Yaxayas lo lus cog tseg txog txoj kev Theej Txhoj: “Peb cia los sib hais txog zaj no, txawm yog nej tej kev txhaum yuav liab cuag ntshav los kuv yuav ua kom dawb paug li daus, txawm yog nej tej kev txhaum dub doog los kuv yuav ua kom dawb paug li tej plaub yaj.”11
Ib yam li peb so tau cwj mem av dawb ntawm daim txiag dub, yog peb hloov siab lees txim tiag tej yam uas muaj vim peb tau ua txhaum yuav ploj mus dhau los ntawm Yexus Khetos txoj kev Theej Txhoj. Lo lus cog tseg no muaj tseeb txhua zaus tsis hais ua txhaum li cas los xij.
Txoj moo zoo qhia peb muaj kev zoo siab, muaj kev ntseeg tsis txhob ntshai, nrhiav kev cia siab thiab txhob tag kev cia siab, ncaim qhov chaw tsaus ntuj thiab tig mus rau qhov kaj ntawm txoj moo zoo uas nyob mus ib txhis.
Povlauj thiab lwm tus ceeb toom txog tej yam nyuaj uas yuav muaj thaum peb lub caij thiab tom ntej. Tiam sis txhua tus neeg lub siab yuav nyob kaj siab lug thaum lawv nyeem cov vaj lug kub thiab tau kev pov hwm thiab kev cawm dim uas twb qhia txog hauv lawv lawm. Peb thov caw sawv daws tig los rau tus Cawm Seej Yexus Khetos, rau Nws tej lus qhia uas muaj hauv Phau Tim Khawv Qub, Phau Tim Khawv Tshiab, Phau Ntawv Maumoos, phau Lus Qhuab Qhia thiab Kev Khi Lus, thiab phau Hlaws Muaj Nqis Loj.
Kuv ua tim khawv tseeb txog txoj kev vaj lug kub pov hwm peb sab ntsuj plig. Kuv kuj ua tim khawv txog txoj kev Yexus Khetos txoj kev Theej Txhoj kho tau peb zoo, kom dhau los ntawm Nws sawv daws dim tau,12 cov uas xav dim. Tus Tswv lub Koom Txoos rov qab raug tsa hauv ntiaj teb dua. Kuv ua tim khawv tias txoj moo zoo muaj tseeb. Kuv yog ib tug ua tim khawv txog Nws. Los ntawm Yexus Khetos lub npe, amees.