Rau Kuv cov Xeeb Leej Xeeb Ntxwv
Los ntawm President Henry B. Eyring
Tus Pab Cuam thib Ib hauv Thawj Pawg Thawj Tswj Hwm
Muaj ib txoj lus txib uas yuav pab peb kov yeej peb tej teeb meem thiab pab ib tse neeg muaj kev zoo siab.
Xyoo no wb thawj ob tug me nyuam xeeb ntxwv mam li yuav poj niam. Ob peb xyoo tom ntej no yuav muaj lawv cov kwv tij coob npaum li 10 leej uas yuav xav pib ib tse neeg li lawv thiab.
Qhov no ua rau kuv zoo siab heev kuv thiaj muab xav mus xav los thaum lawv nug kuv seb kuv yuav ntuas lawv li cas. Tiag tiag mas lawv tau nug kuv hais tias, “Kuv yuav xaiv ua dab tsi kuv thiaj tau kev zoo siab?” Thiab ua lwm yam lus hais, “Kuv yuav xaiv ua dab tsi kuv thiaj tau kev tsis zoo siab?”
Leej Txiv Saum Ntuj Ceeb Tsheej paub hais tias peb sawv daws nyias txawv nyias tus. Peb leej twg tsis raug tej xwm tib yam nkaus. Ob tsev neeg twg yeej tsis zoo tib yam. Ces yog li ntawd yuav nyuaj heev piav meej meej seb ib tse neeg twg yuav ua li cas thiaj tau kev zoo siab. Tab sis mas Leej Txiv Saum Ntuj Ceeb Tsheej uas hlub peb tau pua ib txoj kev rau tag nrho Nws cov me nyuam tau taug kom lawv tau kev zoo siab. Txawm peb muaj cwj pwm zoo li cas los yog raug xwm dab tsi los xij, tsuas muaj ib txoj kev nrhiav kev zoo siab xwb. Txoj kev ntawd yog kom ua raws nraim li tag nrho Vajtswv cov lus txib.
Rau peb sawv daws, kuj hais txog kuv cov me nyuam xeeb ntxwv uas xav yuav poj niam yuav txiv, muaj ib txoj lus txib uas yuav pab peb kov yeej peb tej teeb meem thiab pab ib tse neeg muaj kev zoo siab. Txoj no hais txog txhua txoj kev nrog lwm tus neeg sib raug zoo txawm yus zoo li cas los xij peem. Yus nrhiav pom ntau zaus hauv cov vaj lug kub thiab cov yaj saub hauv peb lub caij nyoog no twb qhia txog txoj lus qhia no. Tus Tswv hais lus ntuas hauv Phau Vaj Lug Kub Npaiv Npaum rau cov neeg uas xav nyob ua ke muaj kev zoo siab tas mus li hais tias:
“Muaj ib tug xib hwb qhia Vajtswv txoj Kev Cai uas nyob hauv lawv pab ntawd, nws xaub Yexus hais tias,
“Xib Hwb, Vajtswv txoj Kev Cai nqe twg yog nqe uas tseem ceeb dua ntais huv tib si?“
“Yexus teb hais tias, Hlub tus Tswv uas yog nej tus Vajtswv kom kawg siab kawg ntsws, kawg plab kawg plawv thiab kawg nej lub dag lub zog.
“Nqe no thiaj yog lus txib uas tseem ceeb dua ntais.
“Thiab nqe ob uas tseem ceeb hais li no hais tias: Hlub koj tej kwv tij zej zog ib yam li koj hlub koj lub cev.
“Mauxes txoj Kev Cai thiab cov cev Vajtswv lus tej lus qhia puav leej nyob tag nrho hauv ob nqe no.”1
Los ntawm kab lus ntawd kuv thiaj piav tau meej hais tias kuv tau kawm dab tsi lawm hais los txog tej kev xaiv uas ua rau ib tse neeg muaj kev zoo siab. Kuv xav pib nug ib lo lus nug hais tias, “Kuv tau xaiv li cas los hlub tus Tswv kawg siab kawg ntsws kawg plab kawg plawv?” Hais los txog kuv mas yog qhov uas kuv tau xaiv los txais kev zoo siab thaum kuv tau kev zam txim dhau los ntawm tus Tswv txoj Kev Theej Txhoj.
Ntau xyoo tas los lawm kuv tau muab ib tug tub hluas ua kev cai raus dej hauv lub zos Albuquerque, New Mexico, uas kuv thiab kuv tus khub ua tub txib tau qhia lawm. Kuv muab tus tub hluas ntawd raus dej thiab tsa nws los. Nws siab ib yam li kuv ces nws txawm ntxhi lus hauv kuv pob ntseg. Txawm nws ntub dej thiab los los kua muag nws zoo siab hais tias, “Kuv huv lawm, kuv huv lawm.”
Kuv tau pom lwm tus neeg muaj kev zoo siab los kua muag li ntawd thaum nws hais Vajtswv ib tug Thwj Tim cov lus. Tom qab nws tau ua tib zoo xam phaj ib tug poj niam nws hais tias, “Kuv ua tus uas sawv tus Tswv cev kuv yeej zam txim rau koj. Nws yuav qhia koj tias nws tau zam txim pub rau koj raws Nws sij hawm thiab raws li Nws siab nyiam.” Thiab nws tau ua li ntawd.
Kuv pom yog vim li cas tus Tswv hais tau tias thaum zam txim lawm, Nws tsis nco qab txog tej ntawd lawm. Los ntawm txoj Kev Theej Txhoj lub hwj chim, tib neeg uas kuv paub thiab hlub heev tau rais los mus ua neeg tshiab, thiab tau tshem tej kev txim txhaum mus. Kuv lub siab thiaj muaj kev hlub puv npo rau tus Cawm Seej thiab Leej Txiv uas tau txib Nws los.
Txoj koob hmoov ntawd los thaum kuv txhawb pab cov neeg uas kuv hlub kom mus cuag tus Cawm Seej kom tau kev pab dim tej kev mob, uas yog kev dim uas Nws tib leeg thiaj muab tau. Yog vim li ntawd kuv yaum cov neeg uas kuv hlub kom txais thiab ua txhua txoj hauj lwm uas lawv raug hu los ua hauv lub Koom Txoos. Txoj kev xaiv ntawd yog ib qho tseem ceeb rau tsev neeg txoj kev zoo siab.
Tej teeb meem hauv txhua lub caij hauv peb lub neej yuav ua rau peb raug ntxias kom tsis kam txais yuav los sis tsis quav ntsej tej hauj lwm uas tus Cawm Seej hu peb los ua. Qhov ntawd yeej ua rau peb, peb tus khub, thiab peb tsev neeg raug tau xwm txheej ntawm sab ntsuj plig. Zoo nkaus li ib txhia txoj hauj lwm ntawd tsis tseem ceeb dab tsi, tiam sis kuv lub neej, thiab kuv tsev neeg, tau hloov hlo ua zoo dua vim kuv kam los ua tus qhia hauv pawg dikas. Kuv twb pom tias cov dikas ntawd hlub tus Cawm Seej thiab Nws los hlub lawv thiab.
Kuv twb pom muaj li ntawd rau ib tug neeg uas thaum i ua ceg txheem ntseeg thiab qhov chaw tshaj tawm txoj moo zoo tus thawj tswj hwm thaum nws raug hu los ua ib tug thawj coj hauv pawg xib hwb. Kuv paub txog lwm tus neeg uas thaum ub ua ib tug npisov thiab ces ib tug Xya Caum Coj Cheeb Tsam uas tus Tswv tau siv los txhawb nqa ib tug tub hluas hauv ib pawg xib hwb uas tau raug mob loj heev. Tej txuj ci tseem ceeb uas los vim nws ua txoj hauj lwm ntawd tau pab tib neeg coob heev, kuj tau pab kuv, thiab tau ua rau lawv haj yam hlub tus Cawm Seej.
Thaum ua hauj lwm pab lwm tus neeg, peb haj yam yuav taij thov kom tau tus Vaj Ntsuj Plig Dawb Huv ua peb tus khub. Thaum ua zoo pab tus Tswv khiav hauj lwm peb yeej yuav tau tej txuj ci loj dua peb ua tau peb tus kheej xwb. Ib tug niam txiv uas tab tom muaj me nyuam uas tawm tsam qhov yog tus ntawd paub tias qhov no muaj tseeb, ib yam li tug neeg mus xyuas tom tsev uas ntsib ib tug poj niam uas thov kev nplij siab vim nws tus txiv twb qhia tias nws yuav khiav ntawm lawv tsev neeg. Ob tug tub qhe no muaj kev ris txiaj tias tag kis ntawd nkawd tau thov tus Tswv txib tus Vaj Ntsuj Plig Dawb Huv los ua nkawd tus khub.
Tsuas yog dhau ntawm tus Vaj Ntsuj Plig Dawb Huv txoj kev ua peb tus khub peb thiaj yuav ua niam txiv uas nyob sib txig tsis muaj kev sib cav sib ceg. Ib txoj kev ua txij ua nkawm uas yuav zoo yuav tsum muaj txoj kev ua khub li ntawd. Qhov txuj ci loj uas pab ob tug neeg koom ib lub siab yeej xav tau lub ntuj txoj kev pab, thiab yuav tau siv sij hawm ntev tsawv. Peb lub hom phiaj yog kom nyob ua ke tas mus li nrog Leej Txiv Saum Ntuj Ceeb Tsheej thiab peb tus Cawm Seej.
Kuv niam thiab txiv nyias txawv nyias tus. Kuv niam yog ib tug neeg hu nkauj thiab ua duab. Kuv txiv yog neeg nyiam tej txuj ci thiab kev ua tshuaj. Muaj ib zaug nkawd mus saib lawv qoj nkauj, kuv niam xav tsis thoob thaum kuv txiv sawv yuav mus tsev ua ntej sawv daws tau pib npuaj tes. Kuv niam nug kuv txiv seb nws tab tom mus dab tsi. Nws ua zoo zoo teb hais tias, “Twb tas los lawm, puas yog?” Yeej yog tus Vaj Ntsuj Plig Dawb Huv txoj kev tshoov siab uas tau hais kom nws nrog kuv niam mus saib zaum ntawd thiab ntau zaus tom qab ntawd.
Kuv niam tau nyob hauv lub xeev New Jersey rau 16 xyoo kom kuv txiv thiaj txhawb pab tau peb tsev neeg thaum nws tshawb nrhiav txog thiab qhia ntawv txog tej txuj ci thiab kev ua tshuaj. Rau kuv niam qhov no yeej yog ib qho kev txi vim nws ncaim nws niam uas yog poj ntsuam thiab nws tus niam laus uas tsis tau yuav txiv uas thaum ub tau tu nws hauv ib lub tsev tom teb. Nkawd ob leeg tuag thaum kuv Niam nyob deb deb hauv lub xeev New Jersey. Qhov ntawd yog tib lub sij hawm uas kuv pom kuv niam los kua muag.
Ntau xyoo tom qab ntawd lawv xav ntiav kuv txiv los ua hauj lwm hauv Utah. Nws nug kuv niam, tsis paub tias hais li ntawd txhaum thaum nws tias, “Mildred, koj xav tias kuv yuav tsum ua li cas?”
Nws tias, “Henry, koj ua qhov uas koj xav tias yuav zoo xwb.”
Nws tsis tau kam txais txoj hauj lwm ntawd. Tag kis sawv ntxov kuv niam sau ib tsab ntawv rau nws uas kheev lam kuv tau khaws cia. Kuv nco qab tias nws qhia kuv txiv tias, “Txhob qhib ntawm no. Mus tom koj qhov chaw hauj lwm thiab muab qhib los nyeem.” Tsab no pib cem nws me ntsis. Vim ntau xyoo tas los lawm kuv txiv tau cog lus tias, yog thaum twg nws muaj cuab kav nws mam li coj nws los nyob ze nws tsev neeg. Kuv txiv xav tsis thoob vim kuv niam npau taws li ntawd. Vim nws tsis nco qab tias kuv niam lub siab xav li cas. Ces nws txawm ua ntawv tsuag tsuag hais tias nws mam li txais txoj hauj lwm ntawd.
Nws hais tias, “Mildred, ua cas koj tsis qhia kuv paub xwb?”
Kuv niam tias, “Koj yuav tau nco qab ntsoov cov lus cog tseg ntawd los sav.”
Nws yeej tau hais tias qhov uas txiav txim siab tsiv mus nyob tim Utah yog nws li, nws tsis tau hais tias ua li ntawd nws tau xiam ib txoj hauj lwm zoo. Nkawd tau pom qhov txuj ci loj uas los vim nkawd koom ib lub siab. Yuav zoo dua yog tias kuv Txiv tau tus Vaj Ntsuj Plig Dawb Huv kev tshoov siab kom nco txog lo lus cog tseg uas nws tau cog ntau xyoo tas los lawm. Tiam sis nws twb cia tus Vaj Ntsuj Plig Dawb Huv ua rau nws txo hwj chim ces nws tau xaiv ua ib yam li kuv niam xav xaiv ua thiab.
Leej Txiv Saum Ntuj Ceeb Tsheej yeej paub txhua nrho, nws paub peb txhua tus, thiab paub yav tom ntej peb yuav zoo li cas. Nws paub tias peb yuav mus dhau tej teeb meem dab tsi. Nws tau txib Nws Tus Tub los raug kev tsim txom kom Nws thiaj paub nplij peb thaum twg peb muaj kev cov nyom.
Peb paub tias Leej Txiv Saum Ntuj Ceeb Tsheej muaj ib co me nyuam ntsuj plig hauv ntiaj teb no uas tej thaum xaiv los ua txhaum thiab kev tsis zoo siab. Yog vim li ntawd Nws thiaj txib Nws Tib Leeg Tub los ua peb tus Cawm Dim, qhov ntawd yog txoj kev hlub loj tshaj plaws txij thaum tsim ntuj tsim teb raug. Yog vim li ntawd peb yuav tsum paub tias yeej yuav xav tau Vajtswv txoj kev pab thiab sij hawm los kho tau peb rau txoj sia nyob mus ib txhis, thiaj nrog peb Leej Txiv nyob tau ua ke.
Kev ua neej nyob hauv ib tse neeg yeej yuav sim peb siab. Qhov ntawd yog Vajtswv lub ntsiab uas qhia seb vim li cas thiaj muab qhov khoom plig uas yog kev txawj tuag rau peb—vim tsev neeg yuav ntxiv zog rau peb thaum peb tab tom raug kev sim siab no. Qhov no haj yam muaj tseeb rau ib tse neeg uas ua rau peb zoo siab thiab nyuaj siab thiab muaj kev cov nyom uas tej thaum zoo nkaus li peb tsis muaj cuab kav nyiaj mus dhau.
Thawj Tswj Hwm George Q. Cannon hais li no qhia seb Vajtswv ua li cas thiaj npaj koj thiab kuv thiab peb cov me nyuam los ntsib tej teeb meem uas kawj hauv peb lub neej hais tias: Tsis muaj peb ib tug neeg twg uas Vajtswv tsis hlub li. Tsis muaj ib tug twg uas Nws tsis tau tu thiab saib xyuas. Tsis muaj ib tug twg uas Nws tsis muaj lub siab xav cawm kom dim, thiab Nws yeej muaj cuab kav cawm kom dim. Tsis muaj ib tug twg uas Nws tsis tau xa Nws cov tim tswv los saib xyuas. Tej zaum peb xav tias peb tsis tseem ceeb thiab tsis ntxim hlub, thiab xav tias luag tej xav li ntawd txog peb, tiam sis qhov tseeb yog tias peb yog Vajtswv cov me nyuam, thiab tias Nws twb tso Nws cov tim tswv los—cov neeg uas peb pom tsis tau uas muaj hwj huam thiab hwj chim—uas saib xyuas peb, thiab lawv yeej saib peb thiab tu peb zoo zoo.”2
Thawj Tswj Hwm Cannon cov lus no muaj tseeb tiag. Koj yuav xav paub li ntawd, ib yam li kuv tau xav paub li ntawd thiab yeej vam qhov ntawd.
Kuv tau muaj siab rau ntseeg thov Vajtswv kom ib tug neeg uas kuv hlub yuav nrhiav thiab hnov lub hwj chim ntawm txoj Kev Theej Txhoj. Kuv tau muaj siab rau ntseeg thov Vajtswv kom tib neeg uas yog tim tswv yuav los pab lawv, thiab lawv yeej tau los.
Vajtswv ntaus tswv yim los pab cawm Nws txhua tus me nyuam kom dim. Rau neeg coob ces, qhov ntawd yog qhov uas yus muaj ib tug kwv tij los sis ib tug muam los sis pog yawg uas hlub lawv txawm lawv ua dab tsi los xij.
Ntau xyoo tas los lawm kuv ib tug phooj ywg hais lus txog nws pog. Nws tau ua neej nyob ntev mus lawm, ib txwm rau siab ntseeg tus Tswv thiab Nws lub Koom Txoos. Tiam sis nws ib tug tub xeeb ntxwv tau xaiv los ua txhaum kev cai tas li. Thaum kawg tus tub no raug kaw qhov taub. Kuv tus phooj ywg nco qab tias nws pog, thaum nws tsav tsheb mus xyuas nws tus tub xeeb ntxwv hauv qhov taub, nws los kua muag thaum nws tu siab nrho thov Vajtswv hais tias, “Kuv tau sim ua neeg zoo. Vim li cas, vim li cas kuv thiaj muaj tus tub xeeb ntxwv uas ua rau nws lub neej puas tsuaj li no?”
Nyob hauv nws lub paj hlwb nws tau lo lus teb hais tias: “Kuv muab nws rau koj vim kuv paub tias koj thiaj muaj cuab kav thiab yuav kam hlub nws txawm nws ua txhaum dab tsi los xij.”
Nov yog ib zaj lus qhia zoo rau peb sawv daws. Txoj kev rau niam txiv thiab pog yawg uas hlub cov me nyuam thiab tag nrho Vajtswv cov tub qhev yuav tsis yooj yim hauv lub ntiaj teb no uas tab tom puas tsuaj mus. Peb yuam tsis tau Vajtswv cov me nyuam kom lawv taug txoj kev mus rau kev zoo siab. Vajtswv los tsis muaj cuab kav ua li ntawd vim peb muaj kev ywj siab xaiv uas Nws tau muab rau peb.
Leej Txiv Saum Ntuj Ceeb Tsheej thiab Nws Tib Leeg Tub hlub tag nrho Vajtswv cov me nyuam txawm lawv xaiv ua dab tsi los sis rais los mus ua leej twg los xij peem. Tus Cawm Seej tau them tus nqi rau txhua yam kev txhaum, txawm ua loj npaum li cas los xij. Tab txawm yuav tsum muaj kev txim lij los, sawv daws muaj cai tau kev zam txim uas yeej txeeb tsis tau kev txim lij chaw.
Amas piav txog kev cia siab li ntawd rau nws tus tub Khali-atoos hais tias: “Yog li ntawd, raws li txoj kev ncaj ncees, txoj kev txhiv dim yuav ua tau hauj lwm tsuas yog tias tib neeg yuav hloov siab lees txim nyob hauv lub caij sim siab no xwb, muaj tseeb tiag, lub caij sim siab no; vim yog tsis muaj tej yam no, ces txoj kev zam txim yeej pab tsis tau tsuas muaj yuav rhuav txoj kev ncaj ncees txoj hauj lwm xwb. Nim no txoj kev ncaj ncees txoj hauj lwm yuav raug rhuav tsis tau; yog rhuav tau ces, Vajtswv yuav tseg tsis ua Vajtswv lawm.”3
Yog li ntawd kuv zaj xov rau kuv cov me nyuam xeeb ntxwv, thiab rau peb sawv daws uas tab tom sim tsa tej yim neeg uas nyob mus ib txhis, yog hais tias cov uas rau siab ntseeg yeej yuav tau kev zoo siab. Puag ua ntej tsim ntuj tsim teb raug, ib Leej Txiv Saum Ntuj Ceeb Tsheej thiab Nws Tib Leeg Tub uas hlub peb yeej hlub thiab ua hauj lwm pab cov neeg uas Nkawd paub tias yuav ua loj leeb. Vajtswv yuav hlub lawv tas mus li.
Nej tau qhov zoo vim nej paub tias lawv tau kawm txog txoj kev cawm seej thaum lawv tseem nyob saum lub ntuj ntsuj plig. Nej thiab lawv sawv daws tau rau siab txaus lawv thiaj muaj cai los nyob hauv ntiaj teb no thaum uas lwm tus tsis tau muaj lub cib fim ntawd.
Yog muaj tus Ntsuj Plig Dawb Huv txoj kev pab, peb yuav nco qab txog txhua yam kev tseeb. Peb tsis muaj cuab kav yuam lwm tus neeg ua li ntawd, tiam sis peb muaj cuab kav cia peb pom tej kev tseeb ntawd hauv peb lub neej. Peb yuav ua siab loj vim peb paub tias peb sawv daws tau kev zoo siab thaum peb tau nyob ua ke ua peb Leej Txiv Saum Ntuj Ceeb Tsheej tsev neeg. Yog muaj Vajtswv txoj kev pab peb sawv daws yuav tau kev cia siab thiab kev zoo siab ntawd. Kuv thov kom peb sawv daws yuav muaj li ntawd los ntawm tus Tswv Yexus Khetos lub npe, amees.