“Kuv Yuav Nrog Nraim Koj Tsis Tso Koj Tseg”
Los ntawm Thawj Tswj Hwm Thomas S. Monson
Peb Leej Txiv Saum Ntuj Ceeb Tsheej … paub tias peb kawm thiab loj hlob thiab haj yam muaj zog thaum peb muaj thiab kov yeej tej kev cov nyom uas peb mus dhau plaws.
Hmo no hauv kuv phau ceev xwm txheej, kuv yuav sau hais tias, “Nov tau yog ib lub tuam rooj sab laj uas tau txhawb nqa kuv lub siab ntau tshaj yav tas los lawm. Txhua yam yeej zoo kawg nkaus thiab los ntawm sab ntsuj plig los tiag.”
Cov kwv tij thiab cov muam, rau lub hli tas los no thaum peb tab tom sib ntsib hauv lub tuam rooj sab loj no, kuv tus poj niam uas kuv hlub, Frances, pw hauv lub tsev kho mob, vim nws tau ntog pem teb ob peb hnub ua ntej ntawd. Thaum lub Tsib Hlis Ntuj, tom qab sim zoo mob zoo nkees los ntawm nws txoj kev raug mob ntawd, nws txawm tso lub neej no tseg. Txoj kev xiam nws yog ib qho nyuaj heev. Kuv yuav nws ua kuv tus poj niam hauv lub Tuam Tsev hauv Salt Lake thaum lub Kaum Hli Ntuj hnub tim 7, 1948. Tag kis yuav yog hnub ua koob tsheej nco txog wb hnub sib yuav 65 xyoo tas los lawm. Nws yog tus uas kuv hlub tshaj plaws hauv lub neej no, tus uas kuv tso siab rau, thiab kuv tus phooj ywg zoo tshaj plaws. Yog kuv hais tias kuv nco nws ces qhov ntawd twb piav tsis tau hais tias kuv nruab siab xav li cas tiag.
Lub rooj sab laj no ua cim qhia txog 50 xyoo tas los lawm thaum Thawj Tswj Hwm David O. McKay hu kuv los rau hauv Pawg Kaum Ob tug Thwj Tim. Hauv ntau xyoo no tsis muaj ib zaug twg uas kuv tus khub no tsis tau txhawb nqa kuv. Nws txi ntau tsav ntau yam uas suav tsis txheeb kom kuv thiaj ua tau kuv txoj hauj lwm no. Kuv yeej tsis tau hnov nws yws yws txawm muaj ntau lub sij hawm uas kuv tsis nyob tsev ob peb hnub mus rau ob peb lim piam es tso nws thiab cov me nyuam nyob lawv xwb. Nws yeej yog ib tug tim tswv lawm tiag.
Kuv xav qhia kuv txoj kev ris txiaj, thiab kuv tsev neeg txoj kev ris txiaj, vim nej sawv daws tau hlub thiab txhawb pab peb txij thaum Frances tso lub neej no tseg. Peb tau txais ntawv los ntawm thoob plaws ntiaj teb no es lawv sau hais tias lawv hwm nws thiab xav qhia kev khuv leej rau peb tsev neeg. Neeg coob heev tau xa paj tuaj rau peb. Peb yeej ua nej tsaug vim nej tau tso nyiaj rau lub Koom Txoos Pob Nyiaj Txhawb Pab cov Tub Txib ua nws npe. Kuv ua tus sawv cev rau cov neeg uas nws tau tso tseg lawm, kuv xav hais ua tsaug rau nej txoj kev ua siab zoo thiab txoj kev hlub.
Qhov uas nplij kuv lub siab tshaj plaws thaum lub caij nyuaj siab no yog kuv zaj lus tim khawv txog Yexus Khetos txoj moo zoo thiab qhov uas kuv paub tias kuv tus me Frances tseem muaj sia nyob. Kuv paub tias wb yuav sib ncaim ib nyuag ntus xwb. Ib tug neeg uas muaj Vajtswv txoj cai khi tej yam hauv ntiaj teb thiab tej yam saum ntuj ceeb tsheej tau muab wb sib khi ua ke hauv Vajtswv lub tsev. Kuv paub hais tias wb yeej yuav rov los sib pom dua thiab yuav tsis sib ncaim ib zaug ntxiv. Qhov kev paub li no yeej txhawb nqa kuv.
Cov kwv tij thiab cov muam, nyaj kuv hais tau hais tias tsis muaj ib tug neeg twg uas tau ua neej nyob uas tsis tau raug kev txom nyem thiab kev nyuaj siab, los yog tsis muaj ib zaug twg hauv tib neeg zaj keeb kwm uas tsis tau muaj kev kub ntxhov thiab kev tu siab.
Thaum twg lub neej no muaj kev nyuaj siab, peb raug ntxias nug hais tias “Ua cas ho raug kuv?” Tej thaum zoo nkaus li peb pom tsis tau qhov kaj uas nyob tom kawg, zoo nkaus li hmo tsaus ntuj nti ntawd yuav tsis pom lub hnub tawm tuaj. Peb los poob siab vim peb tsis tau li peb ua npau suav pom thiab peb txoj kev cia siab ploj mus li. Peb xav hais tib yam li hauv phau vaj lug kub npaiv npaum hais tias, “Tsis muaj tshuaj nyob hauv cheeb tsam Nkile-as li los?”1 Peb xav tias peb nyob peb ib leeg, lub siab tawg nrho, kho siab heev. Peb xav tias peb tej teeb meem tsis zoo kiag cia pib xav tias txhua yam yuav phem xwb. Peb cia li pib ua siab luv rau peb tej teeb meem, tsis nco qab xav tias feem ntau mas lub ntuj ceeb tsheej xav kom peb yuav ua siab ntev.
Tej kev cov nyom uas peb muaj no yeej sim peb txoj kev muaj cuab kav nyiaj mus dhau. Ces peb txhua tus nug tau ib lo lus tseem ceeb heev hais tias: Kuv puas yuav qaug zog, los sis kuv puas yuav mus lawm tom qhov kawg? Ib txhia yuav qaug zog es thiaj tsis muaj cuab kav kov yeej lawv tej kev cov nyom. Kev thev mus txog qhov kawg yog txoj kev nyiaj mus txog thaum tas lub neej no kiag.
Thaum peb xav txog tej yam uas peb sawv daws yuav raug, peb hais tau tib yam li Yauj thaum ub hais, “Neeg lob teeb meem los rau.”2 Yauj yog ib tug neeg uas “hwm thiab muab siab npuab Vajtswv” ib tug txiv neej uas “ntshai Vajtswv, thiab tsis ua kev phem kev qias.”3 Nws coj tu tu, vam meej vim nws muaj hmoov, Yauj yuav raug ib txoj kev sim siab uas ua rau leej twg los tau raug kev puas tsuaj. Nws xiam tag nrho nws cov qub txeeg qub teg, cov phooj ywg ntxub nws lawm, nws raug tej kev txom nyem, nws tu siab kawg vim nws xiam nws tsev neeg, lawv yaum kom nws yuav “cem nws tus Vajtswv thiab tuag mus.”4 Nws tsis tau ua raws li kev ntxias no thiab nws txawm ua siab loj tshaj tawm hais tias:
“Muaj ib tug nyob saum ntuj ceeb tsheej npaj rawv tuaj kuv tog pab kuv.”5
“Kuv paub hais tias muaj ib tug nyob saum ntuj ceeb tsheej.”6
Yauj tau rau siab ntseeg. Peb yuav ua tib yam li ntawd thaum peb ntsib tej kev cov nyom hauv peb lub neej?
Thaum twg peb tau ris nra hnyav hauv lub neej no, cia peb nco qab tias twb muaj dua lwm cov neeg uas tau taug tib txoj kev ntawd, lawv tau nyiaj mus dhau, thiab ces tau kov yeej lawm.
Lub Koom Txoos zaj keeb kwm yog li no, lub caij nyoog uas puv txhua lub caij, peb zaj keeb kwm muaj ntau yam xwm uas qhia txog tej teeb meem tiam sis cov neeg ntawd tseem rau siab ntseeg thiab tau muaj kev cia siab. Yog vim li cas? Lawv tau muab Yexus Khetos txoj moo zoo nruab rau hauv plawv lawv lub neej. Twb yog tej ntawd uas yuav pab peb nyiaj mus dhau txhua yam teeb meem uas peb muaj. Peb tseem yuav muaj tej kev cov nyom, tiam sis peb yuav muaj cuab kav ntsib tej ntawd, yuav ua tib zoo kho, thiab thaum kawg yuav kov yeej.
Thaum pw hauv txaj muaj mob muaj nkees, thaum pw es los kua muag hauv peb lub tog hauv ncoo, peb raug tsa los rau saum ntuj ceeb tsheej thiab tau lus cog tseg hais tias: “Kuv yuav nrog nraim koj tsis tso koj tseg.”7 Txoj kev nplij siab li ntawd yeej muaj nuj nqi heev.
Thaum kuv taug kev deb thiab thoob plaws ntiaj teb no ua kuv tej hauj lwm hauv lub Koom Txoos, kuv kawm paub ntau yam—ib qho yog qhov uas kuv paub tias kev tu siab thiab kev raug txom nyem yeej los rau txhua leej txhua tus. Kuv suav tsis tau tej kev tu siab thiab kev nyuaj siab uas kuv tau pom thaum kuv ntsib cov neeg uas tab tom muaj kev nyuaj siab, muaj mob muaj nkees, tab tom sib nrauj, muaj ib tug tub los sis ntxhais uas ua loj leeb, los sis raug tej kev rau txim vim lawv tau ua txhaum lawm. Kuv yeej piav tau ntau mus ntxiv, vim muaj teeb meem uas peb suav tsis txheeb uas peb raug tau. Nyuaj heev los hais txog ib qho piv txwv xwb, thaum twg kuv xav txog tej kev cov nyom, kuv pheej xav txog Tij Laug Brems, uas yog kuv ib tug qhia ntawv hauv Hnub Caiv Kev Kawm Vaj Lug Kub thaum kuv tseem ua tub hluas. Nws yog ib tug mej zeej uas rau siab ntseeg lub Koom Txoos, uas muaj siab zoo zoo. Nws thiab nws tus poj niam, Sadie, muaj yim leej me nyuam, lawv coob tug muaj hnub nyoog ib yam li cov me nyuam hauv kuv tsev neeg thiab.
Tom qab kuv yuav Frances ua poj niam thiab tau tsiv ntawm peb pawg ntseeg, wb tau pom Tij Laug thiab Muam Brems thiab lawv tsev neeg thaum twg muaj neeg sib yuav thiab cov ntees tuag, thiab thaum peb pawg ntseeg los sib sau ua ke.
Hauv xyoo 1968, Tij Laug Brems tus poj niam, Sadie, tau tas sim neej. Ob tug ntawm nws cov me nyuam kuj tau tso lub neej no tseg thiab.
Muaj ib hnub ze li 13 xyoos tas los lawm, Tij Laug Brems tus ntxhais xeeb ntxwv hlob tau hu xov tooj tuaj rau kuv. Nws piav hais tias nws yawg twb nto txog 105 xyoos lawm. Nws hais tias, “Nws nyob hauv ib lub tsev laus me me tiam sis nws ntsib tag nrho nws tsev neeg txhua txhua Hnub Caiv, nyob no nws tseem qhia txoj moo zoo ib zaj lus qhia.“ Nws hais ntxiv, “Hnub Caiv tas los no, Yawg tshaj tawm rau peb tias, ‘Kuv cov me nyuam uas kuv hlub no, kuv yuav tuag lub lim piam no. Nej puas kam hu mus rau Tommy Monson. Nws yuav paub hais tias nws yuav tsum ua li cas.’”
Tag kis yav tsaus ntuj kuv txawm mus ntsib Tij Laug Brems. Kuv tsis tau pom nws ntev los lawm. Kuv nrog nws tham tsis tau, vim nws twb lag ntseg lawm. Kuv los sau tsis tau ntawv mus rau nws, vim nws twb tsis pom kev lawm. Lawv qhia kuv tias nws tsev neeg nrog nws sib txuas lus thaum lawv tuav nws tus ntiv tes ntawm sab tes xis thiab maj mam sau ntawv hauv nws xib teg ntawm sab tes laug es sau hais tias leej twg thiaj tuaj xyuas nws. Yuav tsum maj mam sau tej zaj xov li no rau nws. Kuv tau ua li no ces tau tuav nws tus ntiv tes thiab sau hais tias T-O-M-M-Y M-O-N-S-O-N, uas yog lub npe nws ib txwm hu kuv. Tij Laug Brems zoo siab heev, ces tau tuav kuv ob txhais tes, ces tau muab tso rau saum nws taub hau. Kuv txawm paub tias nws xav tau lub pov thawj hwj ib txoj koob hmoov. Tus neeg uas tau thauj kuv mus rau lub tsev laus tau nrog kuv sib koom tso tes rau saum Tij Laug Brems taub hau thiab tau muab ib txoj koob hmoov rau nws. Tom qab ntawd, nws los kua muag txawm nws tsis pom kev li. Nws muaj kev ris txiaj tuav wb txhais tes. Tab txawm nws tsis tau hnov cov lus ntawm txoj koob hmoov ntawd, peb tau hnov tus Ntsuj Plig, thiab kuv ntseeg hais tias nws tau kev tshoov siab hnov seb peb tau foom koob hmoov li cas. Tus txiv neej zoo no tsis pom kev lawm. Nws tsis hnov lus lawm. Nws tau nyob hauv ib lub tsev tu neeg laus thaum nruab hnub thiab hmo ntuj tib si. Tiam sis qhov uas nws luag nyav thiab hais lus tau raug kuv lub siab. Nws hais tias, “Ua koj tsaug.“ “Kuv Leej Txiv Saum Ntuj Ceeb Tsheej tau ua zoo zoo rau kuv.”
Hauv lub lim piam ntawd, ib yam li Tij Laug Brems hais, nws tau tso lub neej no tseg. Nws tsis tau xav txog tej yam uas nws tsis muaj, tiam sis, nws yeej muaj kev ris txiaj rau nws txhua txoj koob hmoov.
Peb Leej Txiv Saum Ntuj Ceeb Tsheej, uas ua rau peb zoo siab, kuj paub tias peb kawm thiab loj hlob thiab haj yam muaj zog thaum peb muaj thiab kov yeej tej kev cov nyom uas peb mus dhau plaws. Peb yuav tsum paub hais tias muaj tej lub sij hawm thaum peb raug kev nyuaj siab kawg, thaum peb yuav tu siab heev, thiab thaum peb yuav raug kev sim siab uas tej zaum peb xav tias peb yuav nyiaj tsis tau. Tiam sis, tej teeb meem ntawd cia peb hloov hlo los ua neeg zoo dua, kho peb lub neej kom ua zoo li Leej Txiv Saum Ntuj Ceeb Tsheej qhia peb, thiab rais los mus ua ib tug neeg txawv yav nram ntej—ua zoo dua yav tas los lawm, haj yam ua siab ntev, haj yam muaj kev khuv leej, thiab muaj ib zag lus tim khawv uas muaj zog tshaj yav tas los lawm.
Qhov no yuav tsum yog peb lub hom phiaj—muaj tseeb tiag, kom rau siab ntso thiab nyiaj mus dhau, tiam sis kom peb sab ntsuj plig loj hlob tuaj thiab mus dhau plaws qhov kaj thiab qhov kev nyuaj siab. Yog peb tsis muaj tej teeb meem uas peb yuav tau kov yeej thiab tej teeb meem uas peb yuav tau kho, ces peb yuav pheej nyob qhov qub, tsis loj hlob los sis tsis ncav cuag peb lub hom phiaj uas yog txoj sia nyob mus ib txhis. Tus kws sau paj huam sau txog txoj kev xav li no hais tias:
Tej ntoo zoo tsis loj hlob yooj yim,
Thaum cua yim hlob, ces tsob ntoo yim muaj zog.
Thaum lub ntuj nyob deb, ces haj yam yuav ncav cuag.
Thaum haj yam muaj cua daj cua dub, ces yus haj yam muaj zog.
Thaum muaj hnub thiab qhov txias, los nag thiab los daus,
Ces tej ntoo thiab txiv neej, thiaj loj hlob uas tau cov zoo.8
Tus Xib Hwb nkaus xwb thiaj paub tias peb raug txom nyem, peb raug mob, thiab raug kev nyuaj siab npaum li cas tiag. Nws tib leeg xwb thiaj muab tau kev thaj yeeb nyab xeeb uas kav mus ib txhis rau peb txawm muaj kev kub ntxhov ntawm peb ib puag ncig. Nws tib leeg xwb thiaj chwv tau peb lub siab thaum Nws hais cov lus no:
“Nej cov uas sab sab vim nej ris nra hnyav, nej cia li los cuag kuv, kuv yuav cia nej so.
“Kuv yog tus muaj lub siab dawb siab zoo, nej cia li los kwv kuv tus quab thiab kawm tej uas kuv qhia, nej thiaj yuav tau so.
“Tus quab uas kuv muab rau nej kwv yooj yim kwv, thiab lub nra uas kuv muab rau nej ris, lub ntawd tsis hnyav.”9
Txawm yog ib lub caij uas zoo tshaj los sis lub caij uas phem tshaj los xij, Nws tseem nrog peb nyob. Nws tau cov lus hais tias qhov no yeej yuav tsis pauv mus li.
Kuv cov kwv tij thiab cov muam, thov kom peb txoj kev cog lus rau peb Leej Txiv Saum Ntuj Ceeb Tsheej yuav tsis saus thiab su tuaj hauv peb lub neej los sis thaum twg peb muaj teeb meem. Peb yuav tsum tsis txhob raug kev cov nyom peb thiaj yuav nco txog Nws, thiab peb yuav tsum tsis txhob raug yuam kom txo hwj chim peb thiaj muab peb txoj kev ntseeg thiab kev cia siab rau Nws.
Thov kom peb yuav sim kho peb lub neej kom peb nyob ze peb Leej Txiv Saum Ntuj Ceeb Tsheej. Yog yuav ua li no, peb yuav tau thov Nws thiab mloog Nws lus txhua txhua hnub. Peb yeej xav tau Nws txoj kev pab txhua txhua lub caij, txawm yog ib lub caij ntawd kaj nrig los sis los nag los xij peem. Thov kom Nws txoj lus cog tseg yuav yog ib lo lus zoo rau peb hais tias: Kuv yuav nrog nraim koj tsis tso koj tseg.”10
Kuv hais lus tim khawv tas siab tas ntsws hais tias, Vajtswv muaj sia nyob thiab hlub peb, Nws Tib Leeg Tub tau muaj sia nyob thiab tau tuag theej peb, thiab tias Yexus Khetos txoj moo zoo yog qhov kaj uas ci hauv peb lub neej thaum muaj kev tsaus ntuj nti. Thov kom yuav muaj li no tas mus li, kuv thov los ntawm Yexus Khetos lub npe dawb ceev, amees.