Qhwv Lawv tej Qhov Txhab
Los ntawm Thawj Tswj Hwm Henry B. Eyring
Tus Pab Cuam thib Ib hauv Thawj Pawg Thawj Tswj Hwm
Kuv thov kom peb yuav npaj peb tus kheej kom ua txhua txoj hauj lwm pov thawj hwj uas tus Tswv yuav muab rau peb nyob hauv peb lub neej hauv lub ntiaj teb no.
Peb txhua tus muaj kev lav ris pab lwm tus. Vim peb tuav Vajtswv lub pov thawj hwj, ces Vajtswv kom peb lav ris Nws cov me nyuam tej txoj sia nyob mus ib txhis. Qhov no muaj tseeb, nws zoo kawg nkaus, thiab tej lub sij hawm ua rau yus xav tsis thoob.
Muaj tej pawg txwj laug cov thawj tswj hwm uas paub lub ntsiab ntawm qhov kuv hais no. Nov yog ib qho uas tau tshwm sim rau ib tug ntawm nej. Nyaj qhov no twb tshwm sim rau nej feem coob---thiab tau muaj ntau zaus. Tej zaum muaj tej yam me me uas txawv, tiam sis lub ntsiab zoo ib yam.
Ib tug txwj laug uas koj tsis paub zoo tau thov koj los pab. Nws nyuav qhuav kawm hais tias nws yuav tsum muab nws tus poj niam thiab me nyuam tub nyaib tsev ntawm ib lub tsev kem mus rau lwm lub uas nyob ze.
Nws thiab nws tus poj niam tau thov ib tug phooj ywg qiv nws lub tsheb tau ib hnub kom thauj lawv tej khoom mus. Tus phooj ywg thiaj muab nws lub tsheb qiv rau nkawd. Tus txiv tsev hluas no pib tso tag nrho lawv tej khoom rau hauv lub tsheb ntawd, tiam sis tom qab ob peb feeb xwb, nws mob nrob qaum. Tus phooj ywg uas muab nws lub tsheb qiv rau nws tsis khoom pab. Tus txiv tsev tsis paub ua dab tsi. Nws xav txog koj, nws pawg txwj laug tus thawj tswj hwm.
Thaum nws thov koj pab nws, ces yog thaum tav su. Thaum tsaus ntuj koj twb muaj ib txoj kev sib ntsib. Hnub ntawd, koj twb cog lus tias koj yuav pab koj tus poj niam ua ib txoj hauj lwm hauv neb lub tsev. Koj cov me nyuam tau thov koj ua dab tsi nrog lawv, tiam sis koj tseem tsis tau khoom ua li ntawd.
Koj twb paub lawm tias cov mej zeej ntawm koj pawg, qhov tseem ceeb yog cov uas muaj siab ntseeg, yog cov uas koj pheej hu los pab, ntshe lawv tsis muaj sij hawm ib yam li koj.
Tus Tswv twb paub lawm tias nej yuav muaj tej lub sij hawm zoo li no thaum Nws hu nej los ua txoj hau lwm no, yog li ntawd Nws tau qhia ib zaj dab neeg kom txhawb nqa nej. Yog ib zaj lus piv txwv rau cov tuav lub pov thawj hwj uas muaj hauj lwm ntau dhau. Tej lub sij hawm peb hu zaj dab neeg no ua zaj dab neeg txog tus Neeg Xamalis zoo. Tiam sis nws yog ib zaj dab neeg txog ib tug uas tuav lub pov thawj hwj zoo nyob hauv lub caij nyoog kawg no.
Zaj dab neeg no yeej piav txog ib tug tub qhe pov thawj hwj uas muaj hauj lwm ntau dhau ua. Cia li nco ntsoov tias nej yog tus Neeg Xamalis thiab tsis yog tus pov thawj los yog tus Neeg Levis uas hla dhau tus txiv neej uas raug txom nyem.
Tej zaum thaum nej muaj tej kev cov nyom nej tsis tau xav txog zaj dab neeg ntawd. Tiam sis kuv thov kom nej yuav xav li ntawd thaum muaj tej lub sij hawm zoo li kuv tau hais txog, nyaj nej yeej yuav muaj.
Cov vaj lug kub tsis qhia peb vim li cas tus Neeg Xamalis taug txoj kev ntawm Yeluxalees mus rau Yelikaus. Nyaj nws tsis mus nws ib leeg xwb vim nws paub lawm tias muaj tub sab uas tos ntsoov rau tus uas tsis ceev faj. Nws taug kev ua ib yam tseem ceeb, thiab raws li kab lig kev cai qhia, nws muaj ib tug nees luav thiab muaj roj thiab cawv txiv hmab.
Raws li tus Tswv hais, tus Neeg Xamalis, thaum nws pom tus neeg mob ntawd, nws nres vim “nws muaj kev khuv leej.”
Tsis yog nws muaj kev khuv leej xwb, nws tau pab. Nco ntsoov tej uas tau tshwm sim hauv zaj dab neeg ntawd:
“[Nws] txav zog mus xyuas, nws muab roj thiab muab cawv txiv hmab hliv rau tus mob ntawd tej qhov txhab thiab muab ntaub qhwv; nws tsaws tus mob ntawd caij nws tus nees luav, nws coj tus mob mus pw tom ib lub tsev so, thiab tu tus mob ntawd.
“Thaum kaj ntug tus neeg Xamalis muab tau ob lub nyiaj rau tus tswv tsev ntawd thiab hais tias, ’Thov koj pab tu tus neeg mob no, yog koj siv tshaj ob lub nyiaj no, thaum kuv rov qab los, kuv mam li ntxiv rau koj.”1
Muaj peb yam uas nej thiab cov uas tuav lub pov thawj hwj uas nej coj yuav paub tseeb. Qhov ib, yog nej thov, tus Tswv yuav muab kev khuv leej ib yam li Nws muaj rau cov uas xav tau kev pab. Qhov ob, Nws yuav muab lwm tus rau nej, ib yam li tus tswv tsev, kom lawv koom nrog nej txoj kev pab. Thiab qhov peb, tus Tswv, zoo li tus Neeg Xamalis zoo, yuav them nqi zog rau tag nrho uas koom tes pab cov uas xav tau.
Nyaj nej tej pawg cov thawj tswj hwm tau ua raws li tej yam uas nej paub tseeb li ntawd ntau zaus. Nej tau thov kom lwm tus uas tuav tus Tswv lub pov thawj hwj pab, rau qhov nej paub tias lawv yuav muaj kev khuv leej pab. Nej tsis tau ntshai thov cov uas tau pab thaum yav tas los ntau heev vim nej paub tias yooj yim rau lawv muaj kev khuv leej. Nej tau thov lawv vim nej paub tias thaum yav tas los lawv tau txais tus Tswv tej txiaj ntsim thaum lawv pab lwm tus. Nej tau thov cov uas tau ris nra hnyav lawm, vim nej paub tias yog yus ua kev txi loj heev, ces tus Tswv yuav muab nqi zog loj rau yus. Cov uas tau pab thaum yav tas los tau txais tus Cawm Seej txoj kev ris txiaj.
Tej zaum nej twb tshoov siab kom tsis thov leej twg pab thauj khoom hauv lub tsheb ntawd. Vim nej yog cov thawj coj nej paub nej pawg cov mej zeej thiab lawv tsev neeg zoo. Tus Tswv paub lawv zoo tag nrho.
Nws paub leej twg tus poj niam nyiaj tsis tau ntxiv vim nws tus txiv tsis muaj sij hawm ua tej yam uas nws tus poj niam xav kom ua nyob hauv tsev. Nws paub leej twg cov me nyuam yuav txais koob hmoov thaum lawv pom lawv txiv mus ib zaug ntxiv mus pab lwm tus los sis cov me nyuam puas xav paub tias lawv txiv saib lawv rau nqi nws thiaj yuav siv sij hawm nrog lawv hnub ntawd. Tiam sis Nws kuj paub tias leej twg xav tau kev caw mus pab tiam sis nws tsis coj yam txwv zoo li nws yuav txaus siab mus pab.
Nej yeej yuav tsis paub tag nrho cov mej zeej hauv nej pawg zoo tag nrho, tiam sis Vajtswv yeej paub. Yog li ntawd, ib yam li nej tau ua ntau zaus, nej twb thov Vajtswv kom paub yuav thov leej twg pab lwm tus. Tus Tswv paub leej twg yuav txais cov koob hmoov vim nej thov lawv pab thiab leej twg tsev neeg yuav txais cov koob hmoov vim nej tsis thov lawv mus pab. Qhov no yog kev tshwm sim uas nej yuav txais thaum nej ua ib tug thawj coj ntawm lub pov thawj hwj.
Kuv pom tias tau muaj li no thaum kuv yog ib tug tub hluas. Kuv yog tus pab cuam thib ib hauv pawg pov thawj. Muaj ib hnub tus npisov hu kuv thaum kuv nyob hauv tsev. Nws hais tias nws xav kom kuv nrog nws mus xyuas ib tug poj ntsuam uas xav tau kev pab heev. Nws hais tias nws xav tau kuv mus.
Thaum kuv tseem tos nws tuaj coj kuv mus, kuv ntxhov siab. Kuv paub tias tus npisov muaj ob tug pab cuam uas muaj zog thiab muaj tsev yim. Ib tug yog ib tug txiav txim uas muaj npe. Ib tug ntxiv yog tus tswv ntawm ib lub koom haum loj heev thiab yav tom ntej yuav ua ib tug Tuam Thawj Coj. Tus npisov kuj yuav ua ib tug Tuam Thawj Coj thiab. Vim li cas tus npisov hais rau ib tug pov thawj uas tsis paub dab tsi hais tias, “Kuv xav tau koj pab”?
Nim no, kuv paub zoo dua hais tias nws hais tau li no hais tias: “Tus Tswv xav foom koob hmoov rau koj.” Thaum wb mus ntsib tus poj ntsuam, ua rau kuv xav tsis thoob, kuv pom nws qhia tus poj niam tias nws yuav tsis txais kev pab los ntawm lub Koom Txoos mus txog thaum nws sau ntawv npaj nyiaj uas nws twb muab rau nws dhau los lawm. Thaum wb mus tsev, thaum nws pom tias kuv xav tsis thoob, nws luag vim kuv xav tsis thoob thiab hais tias, “Hal, thaum twg nws tswj hwm nws txoj kev siv nyiaj nws yuav txawj pab lwm tus.”
Muaj lwm lub sij hawm kuv tus npisov coj kuv mus rau ib lub tsev uas ob niam txiv quav cawv nyob es nkawd xa nkawd ob tug me nyuam ntxhais mus ntsib wb ntawm lub qhov rooj. Tom qab nws sib tham nrog ob tug me nyuam ntxhais, wb tau mus thiab nws hais rau kuv tias, “Wb hloov tsis tau kev txom nyem hauv lawv lub neej tam sim no, tiam sis lawv yuav paub tias tus Tswv hlub lawv.”
Lwm zaus nws coj kuv mus xyuas ib tug txiv neej uas tsis tau tuaj koom lub koom txoos tau ntau xyoo. Tus npisov qhia nws hais tias tus npisov hlub nws thiab lawv pawg ntseeg xav tau nws heev. Zoo li cov lus ntawd tsis tau hloov tus txiv neej ntawd lub siab. Tiam sis thaum ntawd, thiab txhua zaus tus npisov coj kuv nrog nws mus, ces nws twb hloov kuv lub siab.
Yeej tsis muaj ib txoj kev uas kuv yuav paub seb tus npisov puas thov Vajtswv kom paub tus pov thawj twg yuav txais koob hmoov los ntawm tej kev mus xyuas tib neeg no. Tej zaum nws twb coj lwm tus pov thawj nrog nws mus ntau zaus lawm. Tiam sis tus Tswv paub hais tias yuav muaj ib hnub kuv yuav ua ib tug npisov uas caw cov neeg uas tsis tshua muaj siab ntseeg rov qab los ntseeg txoj moo zoo. Tus Tswv paub hais tias muaj ib hnub kuv yuav lav ris ntau pua thiab ntau txhiab tus ntawm Leej Txiv Saum Ntuj Ceeb Tsheej cov me nyuam uas xav tau tej yam ntawm sab cev nqaij daim tawv.
Nej cov tub hluas yeej tsis paub tus Tswv npaj nej ua tej hau lwm pov thawj hwj dab tsi. Tiam sis qhov nyuaj tshaj rau txhua tus uas tuav lub pov thawj hwj yog kev pab ntawm sab ntsuj plig. Vajtswv tau txib peb txhua tus ua txoj hauj lwm ntawd. Tau txib li no rau txhua tus mej zeej hauv ib pawg pov thawj hwj. Tau txib li no rau txhua tus mej zeej hauv ib tsev neeg. Yog tias Dab Ntxwg Nyoog tawm tsam ib tug hauv nej pawg los yog nej tsev neeg txoj kev ntseeg, nej yuav muaj kev khuv leej. Ib yam li tus Neeg Xamalis txoj kev pab thiab kev hlub, nej kuj yuav txhawb pab lawv nrog cov tshuaj kho lawv tej qhov txhab thaum lawv xav tau.
Thaum nej ua tub txib ua nej tej hauj lwm, nej yuav mus pab ntau txhiab tus neeg uas xav tau kev pab ntawm sab ntsuj plig. Mus txog thaum nej qhia lawv, ntau tus neeg yuav tsis paub tias lawv muaj qhov txhab ntawm sab ntsuj plig uas yuav ua rau lawv nyuaj siab tas mus li. Nej yuav ua tus Tswv lub luag hauj lwm mus cawm lawv dim. Tus Tswv yog tib tug uas qhwv tau lawv tej qhov txhab ntawm sab ntsuj plig thaum lawv txais cov kab ke uas coj lawv mus rau txoj sia nyob mus ib txhis.
Nej cov mej zeej, cov mus qhia tom tsev, thiab cov tub txib, nej pab tsis tau tib neeg kho txoj kev mob ntawm sab ntsuj plig tsuas yog nej txoj kev ntseeg muaj zog xwb. Yog li ntawd yuav tsum ua ntau tshaj kev nyeem vaj lug kub txhua hnub thiab thov Vajtswv. Yeej yuav tsis txaus yog tias yus thov Vajtswv tam sim ntawd thiab nyeem vaj lug kub ib me npliag xwb. Kev paub tseeb uas nej xav tau los ntawm phau Lus Qhuab Qhia thiab Kev Khi Lus tshooj 84: “Thiab tsis txhob txhawj ua ntej hais tias nej yuav hais dab tsi; tiam sis khaws tej lus cawm neeg txoj sia cia rau hauv nej lub siab kom cuag ncua, thiab yuav muab qhov nej yuav tsum hais rau txhua tus neeg los rau nej nyob rau lub sij hawm ntawd kiag.”2
Yuav muaj raws li qhov kev cog lus ntawd tsuas yog peb “khaws” tej lus cawm neeg txoj sia thiab ua txhua lub sij hawm. Qhov uas nqe vaj lug kub hais txog kev khaws tej lus ua rau kuv xav tej yam txog tej lus ntawd. Piv xam hais tias, thaum kuv twb mus pab ib tug uas tsis tshua muaj siab ntseeg hais tias tus Yaj Saub Yauxej Xamiv txoj hauj lwm tau los ntawm Vajtswv, ces tej kev xav ntawd rov qab los rau kuv.
Tsis yog tej lus los ntawm Phau Ntawv Maumoos xwb. Yog tej kev paub tseeb uas los thaum twg kuv nyeem ob peb los lus los ntawm Phau Ntawv Maumoos xwb. Kuv tsis cog lus tias yuav muaj li no rau txhua tus uas ua xyem xyav txog tus Yaj Saub Yauxej Xamiv los yog Phau Ntawv Maumoos. Tiam sis kuv paub tias Yauxej Xamiv yog tus Yaj Saub ntawm txoj Kev Muab txoj Moo Zoo Txum Tim Rov Qab Los. Kuv paub tias Phau Ntawv Maumoos yog Vajtswv txoj lus, vim kuv tau saib phau ntawv no rau nqi.
Kuv paub tias tus Ntsuj Plig qhia tau kom yus paub tseeb vim nws twb qhia kuv lawm. Nej thiab kuv yuav tsum paub tseeb li ntawd ua ntej tus Tswv coj peb mus ntsib ib tug neeg uas peb hlub uas cov yeeb ncuab ntawm qhov tseeb tau ua rau nws raug mob.
Muaj ib qho ntxiv uas peb yuav tsum npaj. Ib tug cwj pwm ntawm tib neeg yog kev ua siab tawv thaum twg lwm tus raug mob. Yog li ntawd tus Cawm Seej tau qhia ntau yam txog Nws txoj Kev Theej Txhoj thiab txog qhov uas Nws ris tag nrho peb Leej Txiv Saum Ntuj Ceeb Tsheej cov me nyuam tej kev mob thiab kev txom nyem kom Nws thiaj yuav paub tsom kwm lawv.
Txawm yog tus uas tuav Leej Txiv Saum Ntuj Ceeb Tsheej lub pov thawj hwj zoo tshaj plaws tsis muaj kev khuv leej ntau npaum li ntawd. Vim peb yog neeg ntiaj teb peb tsis ua siab ntev rau tus neeg uas tsis pom qhov tseeb uas peb twb pom meej meej heev. Peb yuav tsum ceev faj kom lawv xav tias peb txoj kev tsis ua siab ntev tsis yog kev rau txim rau lawv.
Thaum peb uas yog tus Tswv cov tub qhe pov thawj hwj npaj tsom kwm lwm tus, muaj ib nqe vaj lug kub uas coj peb kev. Nqe no hais txog ib lub txiaj ntsim uas peb xav tau thaum peb taug kev mus, txhua qhov chaw uas tus Tswv txib peb mus. Tus Neeg Xamalis Zoo muaj lub txiaj ntsim ntawd. Peb yuav tsum muaj lub txiaj ntsim n, thiab tus Tswv tau qhia peb paub nrhiav tau:
“Yog li ntawd, kuv cov kwv tij uas kuv hlub es, yog nej tsis muaj txoj kev siab hlub ces, nej twb tsis muaj nuj nqis dab tsi, vim txoj kev siab hlub yeej tsis plam ib zaug li. Yog li ntawd, cia li npuab rau txoj kev siab hlub, uas yog yam uas zoo tshaj plaws tag nrho, vim txhua yam yeej yuav plam--
“Tiam sis txoj kev siab hlub yog txoj kev hlub dawb paug ntawm Khetos, thiab nws yuav nyob tas mus li; thiab tus uas raug nrhiav pom muaj nws nyob hauv hnub kawg, tus ntawd yuav tau zoo.
“Yog li ntawd, kuv cov kwv tij uas kuv hlub es, cia li thov Leej Txiv tag nrho lub zog ntawm lub siab, xwv kom nej yuav muaj txoj kev hlub no puv npo, txoj uas nws tau muab rau tag nrho cov uas raws qab tiag ntawm nws Leej Tub, Yexus Khetos; xwv kom nej yuav rais tau los mus ua Vajtswv tej tub; kom thaum nws yuav tshwm los peb yuav zoo li nws, vim peb yuav pom nws zoo li uas nws yog; kom peb yuav muaj txoj kev cia siab no; kom peb yuav raug ua kom dawb huv tib yam li nws twb dawb huv.”3
Kuv thov kom peb yuav npaj peb tus kheej kom ua txhua txoj hauj lwm pov thawj hwj uas tus Tswv yuav muab rau peb nyob hauv peb lub neej hauv lub ntiaj teb no. Los ntawm Yexus Khetos lub npe dawb ceev, amees.