Nej Tsis Yog Ib co Pej Kum Neeg Lawm
Los ntawm Npisov Gérald Caussé
Pab Cuam Thib Ib ntawm Pawg Thawj Npisov
Nyob hauv lub Koom Txoos no tsis muaj neeg pej kum thiab tsis muaj neeg raug ncaws tawm. Tsuas muaj nus thiab muam xwb.
Peb feem coob muaj ib lub sij hawm uas peb tau ua ib yam dab tsi uas peb tsis tau ua dua li, uas peb xav tias nws txawv thiab peb nyob tsis khab seeb. Kuv tsev neeg muaj ib yam tshwm sim li ntawd kwv yees li tsib xyoo tas los thaum Thawj Tswj Hwm Thomas S. Monson hu kuv los ua ib tug Tuam Thawj Coj rau lub Koom Txoos. Vim kuv raug hu li no es peb tsev neeg thiaj li yuav tsum tsiv tawm ntawm ib qhov chaw zoo nkauj uas peb tau nyob kaj siab lug tau nees nkaum tawm xyoo lawm. Kuv tus poj niam wb tseem nco tias wb cov me nyuam xav li cas thaum lawv paub tias peb yuav tsum tsiv. Wb tug tub 16 xyoo hais tias, “Tsis muaj dab tsi. Nej kav tsij mus; kuv mam li nyob!”
Ces tom qab ntawd nws txiav txim siab nrog peb mus thiab tso siab rau lub cib fim tshiab no hauv nws lub neej. Lub caij uas peb nyob ntau qhov chaw tshiab tau tsib xyoo tas los no yog ib lub caij uas peb tsev neeg kawm thiab ua ntau yam lom zem, feem ntau yog vim neeg Ntseeg Hauv Hnub Nyoog Kawg tos txais thiab ua zoo rau peb. Thaum peb nyob tej teb chaws txawv, peb zoo siab pom thiab paub tias Vajtswv cov neeg nyob thoob plaws ntiaj teb koom ib lub siab tiag tiag.
Thaum kuv ua txoj hauj lwm no kuv mus ntau lub teb chaws thiab kuv muaj lub cib fim tshwj xeeb coj kav ntau lub rooj sab laj. Thaum kuv ntsia rau tej pawg ntseeg, kuv pom coob leej uas tuaj ntau lub teb chaws tuaj, hais ntau yam lus, thiab coj kev cai txawv. Ib qho zoo heev txog peb lub caij nyoog txoj moo zoo no yog nws tsis yog rau ib qhov chaw los sis ib haiv neeg xwb. Nws yog ib lub rau thoob plaws lub ntiaj teb thiab rau txhua tus. Nws coj “Vajtswv cov me nyuam ntawm plaub ceg kaum ntuj los”1 npaj rau Vajtswv Leej Tub txoj kev rov qab los uas yuav zoo heev.
Txawm tias lub Koom Txoos cov mej zeej muaj ntau haiv neeg zuj zus los, peb caj ceg dawb ceev tseem ceeb tshaj qhov uas peb tsis zoo ib yam. Vim peb yog mej zeej ntawm lub Koom Txoos, peb raug lees txais rau tsev neeg Ixayees lawm. Peb los ua nus muag, txais qub txeeg qub teg los ntawm tib caj ceg ib yam nkaus. Vajtswv cog lus rau Anplaham tias neeg txawm yuav coob npaum cas uas yuav los txais txoj Moo Zoo no yuav raug hu Anplaham lub npe, thiab yuav yog [nws] noob, thiab yuav sawv los foom koob hmoov rau [nws], tus uas yog lawv txiv.2
Muaj lus cog tseg rau txhua tus uas los zwm rau lub Koom Txoos: “Yog li ntawd, nej tsis yog ib co pej kum neeg, los ib co qhua ntxiv, tiam sis yog mej zeej nrog cov neeg ntseeg, thiab Vajtswv tsev neeg.”3
Lo lus pej kum neeg yog los ntawm lo lus Latin extraneus, uas txhais hais tias “sab nraud” los sis “los ntawm sab nraud.” Feem ntau, nws hais txog ib tug uas los “sab nraud” los txawm tias yog vim nws tuaj lwm qhov tuaj, coj kev cai, muaj kev xav, los sis ntseeg lwm yam uas txawv. Vim peb yog neeg pab coj ntawm Yexus Khetos uas xav nyob hauv ntiaj teb tiam sis tsis ua neeg ntiaj teb, tej thaum peb zoo li neeg sab nraud. Peb paub, zoo tshaj luag tej feem coob, tias cov uas luag xav hais tias txawv txawv tsis tau lub cib fim ua ntau yam.
Ib tiam dhau ib tiam Vajtswv yeej txib tib neeg kom hlub txog cov neeg uas yog pej kum neeg los sis cov uas luag saib yog neeg txawv. Puag thaum ub ib tug neeg pej kum tau txais kev hlub tshua ib yam li cov poj ntsuam thiab cov me nyuam ntsuag vim los ntawm tib lo lus txib no. Ib yam li lawv, tus neeg pej kum no pab tsis tau nws tus kheej thiab vam khom cov neeg zej zog kom saib xyuas nws thiab pab nws ua neej. Cov neeg Ixayees tau txais lo lus qhuab qhia txog qhov no: “Ua zoo rau lawv ib yam li nej ua zoo rau nej cov neeg, thiab hlub lawv ib yam li nej hlub nej lub cev. Nco ntsoov hais tias thaum ub nej tau thoj nam ib zaug mus nyob rau nram teb chaws Iziv lawm.”4
Thaum Nws ua Nws dej num hauv ntiaj teb, Yexus ua yam ntxwv tsis lam tos txais thiab saib taug luag tej xwb. Nws hlub thiab hwm cov neeg uas lwm cov pej xeem uas qhuas lawv tus kheej nkaus nkaus tsis yuav thiab xav tias qias neeg. Nws kuj qhuab qhia thiab pab lawv ib yam nkaus.
Piv xam li, tus Cawm Seej tsis ua raws li luag tej ib txwm ua los vim Nws tham nrog ib tug poj niam Xamalis, thiab thov dej ntawm nws. Nws zaum thiab noj mov nrog cov neeg sau se. Nws yeej tsis ua xyem xyav thaum mus rau tus neeg mob ruas, kov thiab kho nws kom zoo. Nws qhuas tus tub rog Loos uas saib xyuas ib puas tus tub rog, thiab hais rau pab neeg tias, “Kuv qhia rau nej hais tias, txawm yog hauv cov [Ixayees] los kuv tsis tau pom ib tug uas muaj kev ntseeg npaum li tus no.”5
Yexus thov peb kom coj txoj kev cai hlub tag nrho, hlub txhua tus txawm tias zoo li cas los xij. Nws hais tias:
“Yog nej tsuas hlub cov uas hlub nej xwb, nej xav hais tias Vajtswv tseem yuav muab nqi zog rau nej thiab no los? Txawm yog cov neeg sau se los lawv twb paub hlub cov neeg uas hlub lawv thiab.
“Yog nej tsuas hwm nej cov kwv tij nkaus xwb, nej ho ua tau zoo tshaj lwm tus qhov twg? Txawm yog cov neeg uas tsis paub Vajtswv los lawv twb paub sib hwm thiab.
“Yog li ntawd, nej yuav tsum ua zoo tag nrho ib yam li nej Leej Txiv tus uas nyob saum ntuj ceeb tsheej, nws yog tus zoo tag nrho.”6
Nyob hauv lub Koom Txoos no tsis muaj neeg pej kum thiab tsis muaj neeg raug ncaws tawm. Tsuas muaj nus thiab muam xwb. Thaum peb paub tias peb muaj ib Leej Txiv Saum Ntuj, qhov no pab peb sib hlub li ib co kwv tij thiab ib co viv ncaus ib yam li txhua tus txiv neej thiab poj niam yuav tsum ua hauv lub ntiaj teb no.
Ib zaj hauv phau ntawv Les misérables qhia txog txoj kev uas cov uas tuav lub pov thawj hwj yuav tsum ua zoo rau cov uas luag saib yog neeg pej kum. Jean Valjean tau nyuam qhuav tawm tsev loj cuj los. Nws sab sab vim nws tuaj deb tuaj thiab nqhis dej thiab mov, ces nws los rau ib lub zos me me nrhiav mov noj thiab chaw pw. Thaum lawv hnov xov hais tias nws los, cov pej xeem cia li kaw lawv tej qhov rooj. Tej tsev ntiav pw thiab lub tsev loj cuj tsis kam cia nws los nyob. Lawv tsis kam txais nws, muab nws ncaws tawm, thiab tsis kam nws rov qab los. Thaum kawg, nws tsis muaj zog lawm, nws cia li tsaus muag qaug tom qhov chaw nkag tus npisov lub tsev.
Tus txiv neej ua hauj lwm rau lub koom txoos no yeej paub txog Valjean lub neej yav tas los, tiam sis nws caw tus neeg tsis muaj tsev nyob no hauv nws lub tsev li no hais tias:
“‘Nov tsis yog kuv lub tsev; yog Yexus Khetos lub tsev. Lub qhov rooj tsis yog qhib rau ib tug neeg vim yog nws muaj npe, tiam sis vim yog nws muaj kev nyuaj siab. Koj muaj kev tsim txom, koj tshaib plab thiab nqhis dej; koj cia li los…Vim li cas kuv yuav tsum paub koj lub npe? Yog kawg, thaum koj tseem tsis tau qhia kuv [koj lub npe] kuv twb paub ua ntej lawm.’
“[Valjean] cia li qhib qhov muag yam xav tsis thoob.
“‘Tiag los? Koj paub kuv hu ua li cas los?’
“‘Yog kawg,’ tus Npisov hais, ‘koj hu ua kuv tus kwv.’”7
Nyob hauv lub Koom Txoos no peb cov pawg ntseeg thiab tej pawg pov thawj hwj tsis yog peb li. Lawv yog Yexus Khetos li. Leej twg nkag peb tej tsev sib ntsib yuav tsum xav tias yog ib yam nkaus li lawv tej tsev. Lub luag hauj lwm tos txais txhua tus tseem ceeb tshaj plaws ntxiv tuaj. Lub ntiaj teb uas peb nyob tam sim no tab tom muaj xwm txheej heev. Vim peb mus tau rau ub rau no, xa xov sai sai, thiab ua laj luam rau txhua lub teb chaws, lub ntiaj teb zoo li ua ib lub zos loj uas muaj ntau haiv neeg tuaj sib ntsib, sib txuas lus, thiab nyob ua ke ib yam li ib txwm tsis tau ua.
Txoj kev uas lub ntiaj teb thoob plaws hloov no yog raws li Vajtswv tus uas Muaj Hwj Chim Loj Kawg Nkaus lub tswv yim. Txoj kev coj cov neeg uas Nws xaiv los ntawm plaub ceg kaum ntuj los ua ke tsis yog muaj los ntawm txoj kev uas peb xa tub txib rau tej teb chaws deb deb xwb tiam sis kuj muaj los thaum neeg txawv teb chaws tsiv los rau peb tej nroog thiab tej zos thiab. Txawm tias lawv tsis paub, coob tug tab tom raug tus Tswv coj lawv rau tej qhov chaw uas lawv hnov tau nws txoj moo zoo thiab los rau Nws pab.
Tej zaum tus uas tom ntej no yuav los zwm rau txoj moo zoo hauv nej pawg ntseeg yuav tsis yog ib tug neeg zoo li cov neeg uas nej ib txwm ua phooj ywg nrog los sis ib tug uas nej paub. Nej yuav pom thiab paub li no vim los ntawm txoj kev nws ua zam, nws hais lus li cas, thiab nws tawv nqaij zoo li cas. Tej zaum tus neeg no loj hlob ntseeg lwm txoj kev teev ntuj, thiab ua lub neej txawv koj lub.
Txoj kev tos txais thiab ua phooj ywg rau luag tej yog lub pov thawj hwj ib lub luag hauj lwm tseem ceeb. Tej pawg Pov Thawj Hwj Aloos thiab Mekhixedes yuav tau koom tes nrog cov muam raws li tus npisov lub tswv yim pab tos txais txhua leej txhua tus muaj kev hlub thiab kev siab zoo. Cov txiv neej thiab poj niam qhia tom tsev yuav tau saib xyuas kom tsis muaj leej twg uas peb hnov qab txog los sis tsis hais lus nrog.
Peb sawv daws yuav tsum ua hauj lwm ua ke kom haj yam muaj kev sib raug zoo hauv peb tej pawg ntseeg thiab ceg ntseeg. Muaj ib co neeg uas yog Vajtswv cov neeg uas twb sib raug zoo tag nrho tom qab Khetos los xyuas teb chaws Amelikas. Hauv ntaub ntawv nws hais tias “tsis muaj Neeg Lamas, los sis ib yam npe lawm ib pab; tiam sis lawv tsuas ua ib pab, Khetos cov me nyuam, thiab cov uas tau Vajtswv lub nceeg vaj ua lawv tug.”8
Tsis muaj kev sib raug zoo sib haum thaum peb tsis quav ntsej thiab tsis tham nrog cov mej zeej uas txawv los sis tsis muaj tswv yim thiab tsuas tham nrog cov uas zoo li peb xwb. Tiam sis, muaj kev sib raug zoo sib haum thaum peb tos txais thiab ua hauj lwm rau cov uas tuaj tshiab los sis xav tau kev pab. Cov mej zeej zoo li no yog ib qho koob hmoov rau lub Koom Txoos thiab pab peb muaj lub cib fim ua hauj lwm rau peb cov neeg zej zog thiab ua peb tej siab kom dawb huv.
Yog li ntawd, kuv cov kwv tij, nej lub luag hauj lwm yog kom tos txais txhua tus uas tuaj nkag lub Koom Txoos tej qhov rooj. Muaj kev ris txiaj tos txais lawv tsis txhob lam muab txim rau lawv. Yog tias cov neeg uas nej tsis paub nkag hauv nej lub tsev sib ntsib, ua siab zoo tos txais thiab caw lawv los zaum nrog nej. Nej kav tsij xub mus pab kom lawv xis nyob thiab hnov nej kev hlub, thiab tsis tos lawv los ntawm nej tso es nej mam li ua.
Tom qab nej ntsib lawv lawm, cia li xav txog tej yam uas nej ua tau kom yuav pab tau lawv tom ntej. Kuv hnov luag hais txog ib pawg ntseeg uas thaum muaj ob tug viv ncaus lag ntseeg ua kev cai raus dej, ob tug viv ncaus hauv Koom Haum Niam Tsev cia li pib kawm piav teg kom yuav tham tau nrog ob tug mej zeej tshiab no. Qhov no qhia txog txoj kev hlub rau peb cov uas yog kwv tij thiab muam hauv txoj moo zoo!
Kuv ua tim khawv tias tsis muaj leej twg uas peb Leej Txiv Saum Ntuj Ceeb Tsheej tsis paub. Tsis muaj leej twg uas Nws saib tsis tseem ceeb. Kuv ua tim khawv ib yam li Petus tias “Vajtswv tsis xaiv leej twg ntsej muag: txawm yog haiv neeg twg los xij, Vajtswv lees yuav txhua tus uas hwm Vajtswv thiab ua haum Vajtswv siab.”9
Kuv thov kom thaum tus Tswv sau Nws tej yaj ua ke thaum hnub kawg, Nws yuav hais rau peb txhua tus tias, “Kuv tuaj ua qhua, thiab nej hu kuv los hauv nej tsev.”
Ces peb yuav hais rau Nws, “Thaum twg koj tuaj ua qhua, thiab peb hu koj lus hauv peb tsev?”
Ces Nws yuav teb peb hais tias, “Kuv qhia tseeb rau nej hais tias, thaum uas nej tau pab kuv cov kwv tij no ib tug, txawm yog tus ntawd muaj hwj chim yau dua cov los nej tseem pab nws thiab, qhov uas nej pab tus ntawd, twb yog nej pab kuv ntag.”10
Los ntawm Yexus Khetos lub npe, amees.