Koj Puas Xav Kom Koj Zoo?
Los ntawm Txwj Laug Timothy J. Dyches
Ntawm Pawg Xya Caum
Thaum peb hloov siab lees txim thiab hloov siab los ntseeg tus Tswv, nws kho peb kom zoo, thiab peb tej kev txhaum raug muab cheb pov tseg lawm.
Thaum ib lub sij hawm uas muaj neeg coob ua kev zoo siab noj ib pluag mov loj hauv Yeluxalees, tus Cawm Seej ncaim cov neeg no mus nrhiav cov uas xav tau kev pab ntau tshaj. Nws pom lawv nyob ntawm Npexathas, ib lub pas dej uas muaj tsib lub qab khav nyob npuab lub chaw muag yaj uas sawv daws paub tias cov neeg muaj mob nyiam mus nyob.
Phau ntawv Yauhas qhia peb tias nyob ze lub pas dej “muaj ib co neeg mob coob coob tuaj pw hauv tej qab khav ntawd, cov neeg dig muag, cov neeg ceg tawv thiab cov neeg tuag tes tuag taw. Lawv tuaj nyob ntawd tos saib thaum twg lub pas dej ntas.”
“Rau qhov tus Tswv ib tug tim tswv pheej los do lub pas dej ntawd. Thaum lub pas dej ntawd ntas, yog tus neeg mob twg xub nqis mus rau hauv lub pas dej, ces tus ntawd tej mob zoo” (Yauhas 5:3–4).
Carl Bloch tau kos ib daim duab zoo nkauj hu ua Khetos Kho cov Neeg Muaj Mob ntawm lub Pas Dej Npexathas uas qhia txog thaum tus Cawm Seej mus xyuas cov neeg mob no. Bloch kos Yexus maj mam tsaws ib daim tsev ntaub, thiab pom ib “tus neeg muaj mob” (Yauhas 5:7) uas nyob tos npuab lub pas dej. Ntawm no tus neeg muaj mob yog ib tug neeg uas tsis muaj peev xwm pab tau nws tus kheej thiab nws qhia txog tus Cawm Seej kev hlub tshua thiab kev zoo. Tus Cawm Seej ua siab mos muag los pab cov uas pab tsis tau lawv tus kheej.
Nyob hauv daim duab, tus txiv neej mob nyob khoov pob hauv av tom duab ntxoov ntxoo, tsis muaj zog thiab poob siab heev vim nws muaj mob tau 38 xyoo lawm.
Thaum tus Cawm Seej tab tom muab ib txhais tes tsaws ib npoo ntawm daim ntaub, Nws yoj nws sab tes u thiab nug zoo zoo hais tias: “Koj puas xav kom koj zoo?”
Tus txiv neej teb hais tias, “Yawg hlob, thaum dej ntas tsis muaj leej twg pab tuav kuv mus rau hauv lub pas dej; thaum kuv tab tom yuav nqis mus rau hauv, twb muaj lwm tus xub nqis ua kuv ntej mus rau hauv lawm” (Yauhas 5:6–7).
Txawm tias zoo li yuav nyuaj tshaj rau tus txiv neej ua, Yexus teb ib co lus zoo uas tus txiv neej yeej tsis xav tias Yexus yuav hais:
“Koj cia li sawv, yaws koj daim lev thiab mus.
“Tam sim ntawd nws tus mob txawm cia li zoo hlo; ces nws txawm yaws hlo nws daim lev thiab mus lawm” (Yauhas 5:8–9).
Hauv lwm zaj dab neeg, Lukas qhia peb tias thaum tus Cawm Seej tseem tab tom mus rau Yeluxalees, nws ntsib 10 tus neeg mob ruas. Vim lawv muaj mob, lawv “sawv deb deb” (Lukas 17:12). Lawv yog cov neeg uas raug ncaws tawm-tsis huv thiab luag tsis xav.
Lawv quaj hais tias, “Tswv Yexus! Thov koj hlub peb!” (Lukas 17:13)—tiag tiag, lawv thov hais tias, “Puas muaj dab tsi uas Koj ua pab tau rau peb?”
Tus Kws Tshuaj Zoo Tshaj, uas muaj kev hlub tshua puv npo, yeej paub tias lawv yuav tsum muaj kev ntseeg ua ntej lawv yuav raug kho kom zoo thiab yog li ntawd nws thiaj qhia lawv tias, “Nej cia li mus cuag cov pov thawj kom lawv saib nej” (Lukas 17:14).
Thaum lawv ntseeg thiab tab tom mus, qhov txuj ci tseem ceeb tshwm sim. Nej sim xav txog lawv txoj kev xyiv fab puv npo thaum lawv taug kev thiab ntsia pom nrog lawv tej qhov muag lawv tej cev raug kho zoo, tsis muaj mob, thiab ua zoo li qub?
“Lawv cov ntawd muaj ib tug pom hais tias, nws tej ruas zoo tas lawm, nws txawm rov qab los thiab hais nrov nrov ua Vajtswv tsaug,
“Thiab nws txhos caug ntua ntawm [tus Tswv] ko taw ua Yexus tsaug. …
“Thiab [Yexus] hais rau tus ntawd hais tias, Koj cia li sawv mus tsev; koj txoj kev ntseeg twb ua rau koj tej ruas zoo lawm” (Lukas 17:15–16, 19).
Thaum kuv ua kuv txoj qub hauj lwm ua ib tug kws kho mob thiab kws phais neeg, kuv lub hom phiaj yog kho lub cev kom zoo. Yexus Khetos kho lub cev, lub hlwb thiab tus ntsuj plig, thiab Nws txoj kev kho pib muaj thaum peb ntseeg.
Koj puas nco thaum koj txoj kev ntseeg thiab kev xyiv fab puv npo tshaj plaws? Cia li nco qab lub sij hawm uas koj nyuam qhuav muaj koj cov lus tim khawv los sis thaum Vajtswv qhia koj tias koj yog Nws leej tub los sis leej ntxhais thiab tias Nws hlub koj heev—thiab koj xav tias koj huv lawm? Yog tias zoo li koj tsis tshua nco qab tej sij hawm ntawd, koj yeej nco qab tau lawv dua.
Tus Cawm Seej ntuas peb txog txoj kev uas peb yuav raug ua kom huv—raug kho kom zoo tag nrho:
“Nej cov uas sab sab vim ris nra hnyav, nej cia li los cuag kuv, kuv yuav cia nej so.
“Kuv yog tus uas muaj siab dawb siab zoo; yog li ntawd, nej cia li los kwv kuv tus quab thiab kawm tej uas kuv qhia, nej thiaj yuav tau so.
“Tus quab uas kuv muab rau nej kwv yooj yim kwv, thiab lub nra uas kuv muab rau nej ris, lub ntawd tsis hnyav” (Mathais 11:28–30).
“Koj cia li tuaj nrog kuv mus” (Lukas 18:22) hais kom peb tso peb lub neej qub thiab kev siab xav tau khoom ntiaj teb tseg thiab los ua ib tug neeg tshiab uas “nws lub neej qub twb dua lawm nim no nws muaj lub neej tshiab” (2 Kauleethaus 5:17), kom muaj ib lub siab ntseeg tshiab. Thiab nws ua rau peb rov qab huv dua.
Yexus hais tias peb yuav tau txav los ze Nws thiab Nws yuav txav los ze peb; peb yuav tau kub siab lug nrhiav Nws thiab peb yuav ntsib Nws; peb yuav tau thov thiab peb yuav txais; peb yuav tau khob thiab nws yuav qhib rau peb (saib Q&K 88:63).
Thaum peb txav los ze Nws, peb pom tau tias lub neej ntiab teb yeej txhob txwm nyuaj thiab tias “txhua txhia yam nyias yeej muaj nyias qhov fab ntxeev” (2 Nifais 2:11), tsis yog ib qho yuam kev ntawm txoj kev cawm seej. Txoj kev muaj fab ntxeev yog yam tseem ceeb tshaj plaws uas neeg txawj tuag yuav tsum muaj thiab nws pab peb paub peb lub siab nyiam zoo zog thiab pab peb txiav txim siab zoo zoo rau tej yam peb yuav tsum xaiv. Tej yam nyuaj uas tshwm sim hauv peb lub neej pab peb sib raug zoo nrog Vajtswv ntev dhawv ib txhis-thiab muaj Nws tus meej yim yees rau saum peb tej ntsej muag thaum peb tso plhuav peb tej siab rau Nws (saib Amas 5:19).
Peb tus Cawm Seej thov peb tias, “Nej ua li no, nej thiaj yuav nco ntsoov kuv” (Lukas 22:19) thaum Nws qhia peb ua lub cim nco txog thawj zaug. Txoj kab ke siv mov mog thiab dej no ua rau peb rov qab khi tej kev khi lus dawb ceev uas peb tau khi nrog Vajtswv thiab peb rov muaj lub hwj chim ntawm txoj Kev Theej Txhoj hauv peb lub neej. Peb raug kho kom zoo thaum peb tsis ua tej yam phem peb pheej ua thiab tsis ua neej nyob tsis zoo uas ua rau peb muaj siab tawv thiab peb tej caj dab tawv qhwb qhawv. Thaum peb tso “tej cuab yeej uas siv ntxeev siab” (Amas 23:7) tseg, peb xaiv rau peb tus kheej (saib Q&K 58:28), es Xatas lub tswv yim thiaj li tsis npog tau peb ob lub qhov muag los sis neeg ntiaj teb thiaj li ua tsis tau nrov nrov rau peb tsis hnov lawm.
Thaum peb hloov siab lees txim thiab hloov siab los ntseeg tus Tswv, nws kho peb kom zoo, thiab peb tej kev txhaum ploj mus. Tej zaum peb yuav xav, ib yam li Enos xav tias, “Ua li cas es thiaj ua tau tiav li ntawd?” Tus Tswv teb hais tias: “Vim yog koj txoj kev ntseeg Khetos. … Yog li ntawd, cia li mus, koj txoj kev ntseeg tau ua rau koj huv lawm” (Enos 1:7, 8).
Corrie ten Boom, ib tug poj niam Dutch uas ntseeg Khetos, raug kho kom zoo li ntawd txawm tias luag muab nws txhom kaw nkuaj nrog nws haiv neeg thaum ua tsov rog ntawm tag nrho lub ntiaj teb thib ob. Nws raug txom nyem ntau, tiam sis tsis zoo li nws tus viv ncaus Betsie uas nws hlub, uas tau tas sim neej hauv ib lub nkuaj, Corrie tsis tau tas sim neej.
Tom qab ua tsov rog tas nws hais lus ntau zaus rau pej xeem sawv daws txog tej yam uas tau tshwm sim thiab txog txoj kev kho kom zoo thiab kev zam txim. Muaj ib zaug ib tug neeg Nazi uas zov nws thiab pab tsim txom Corrie thaum ub thaum nws nyob hauv lub nkuaj hauv Ravensbrück, Germany, tau los hais lus rau Corrie, es zoo siab rau Corrie cov lus hais txog Khetos txoj kev zam txim thiab kev hlub.
“Nws hais tias, ‘Kuv zoo siab heev rau cov lus uas koj hais, Fraulein. Thaum kuv hnov koj cov lus, kuv xav tias Nws tau ntxuav kuv tej kev txhaum mus lawm!’”
Corrie nco hais tias, “Nws ncav nws txhais tes es xav tuav tes nrog kuv. Thiab, txawm tias kuv tau hais lus ntau zaus … tias peb yuav tau zam txim rau luag, kuv tsis kam txav kuv txhais tes ntawm kuv ib sab.
“Thaum kuv tab tom xav txog thaum ub, ua rau kuv chim heev thiab xav pauj tej yam nws tau ua, tiam sis thaum ntawd kuv kuj paub hais tias xav li no txhaum lawm. … Kuv thov hais tias, Tswv Yexus, thov zam txim rau kuv thiab pab kuv zam txim rau nws.
“Kuv sim luag ntxhi, [thiab] kuv siv zog tsa kuv txhais tes. Tiam sis kuv ua tsis tau. Kuv xav tsis tau dab tsi li, kuv lub siab tsis sov thiab tsis muaj kev hlub ib qho li. Thiab ces kuv rov qab thov Vajtswv hauv kuv lub siab dua. Yexus, kuv zam txim tsis tau rau nws. Thov koj muab Koj txoj kev zam txim rau kuv.
“Thaum kuv tuav nws txhais tes muaj ib yam zoo tshaj plaws tshwm sim. Muaj ib qho kev hluav taws xob los ntawm kuv xub pwg mus rau kuv txhais npab thiab dhau kuv txhais tes mus rau nws, thiab thaum ntawd kuv lub siab txawm hlub tus neeg kuv tsis paub no tias ua rau kuv yuav luag tsis paub xav li cas li.
“Thiab kuv thiaj li to taub tias tsis yog peb txoj kev zam txim los yog peb txoj kev siab zoo uas ua rau neeg ntiaj teb raug kho kom zoo, tiam sis yog Yexus. Thaum Nws qhia peb kom hlub peb cov yeeb ncuab, Nws tsis muab lo lus txib xwb, tiam sis kuj muab txoj kev hlub ntawd thiab.”1
Corrie ten Boom raug kho kom zoo.
Thawj Tswj Hwm Thomas S. Monson tau hais tias, “Muaj ib tug uas txhawb nqa cov uas ntxhov siab los sis nyuaj siab thiab tu siab-tus ntawd yog tus Tswv Yexus Khetos.”2
Yog nej xav tias nej tsis huv, tsis muaj leej twg hlub nej, nej tsis zoo siab, tsis tsim nyog, los sis tsis zoo, cia li nco qab tias “txhua yam uas tsis ncaj ncees hauv lub neej no yuav muab kho tau kom ncaj los ntawm Yexus Khetos txoj Kev Theej Txhoj.”3 Cia li ntseeg thiab ua siab ntev tias tus Cawm Seej muaj ib lub tswj yim thiab tej hom phiaj rau nej. “Koj tsis txhob ntshai, cia li ntseeg” (Malakaus 5:36).
Cia li ntseeg tias tus Cawm Seej yeej tseem xav kho peb cov ntsuj plig thiab kho peb tej siab. Nws tos ntawm lub qhov rooj thiab khob. Cia peb qhib rau Nws thaum peb rov qab pib thov Vajtswv, hloov siab lees txim, zam txim, thiab hnov qab. Cia peb hlub Vajtswv thiab pab peb cov neeg zej zog thiab sawv ntawm tej chaw dawb huv kom muaj ib lub neej uas raug ua huv. Tus txiv neej muaj mob ntawm lub pas dej Npexathas, tus neeg mob ruas ntawm txoj kev mus rau Yeluxalees, thiab Corrie ten Boom tau raug kho kom zoo. “Koj puas xav kom koj zoo?” Cia li sawv, thiab mus. Nws “kev hlub tshua txaus lawm” (2 Kauleethaus 12:9), thiab koj yuav tsis taug koj ib leeg.
Kuv los paub tias Vajtswv muaj sia nyob. Kuv paub tias peb sawv daws yog Nws cov me nyuam thiab tias Nws hlub tus neeg uas peb yog tam sim no thiab tus neeg uas nws paub tias peb muaj peev xwm ua tom ntej. Kuv paub tias Nws tau xa Nws Leej Tub los rau lub ntiaj teb los tuag theej tib neeg sawv daws tej kev txhaum thiab tias cov uas txais Nws txoj moo zoo thiab lawv Nws qab yuav raug kho kom zoo tag nrho—raws li Nws luj sib hawm, thiab raws li Nws txoj hau kev, thiab raws li Nws lub siab nyiam (saib Q&K 88:68), los ntawm Nws tej kev hlub tshua. Kuv hais lus tim khawv li no rau nej los ntawm Yexus Khetos lub npe, amees.