Tuav Ruaj Ruaj

Los ntawm Txwj Laug Kevin S. Hamilton

Ntawm Pawg Xya Caum

Daim Duab

Cia peb tuav ruaj ruaj tus nqaj hlau uas yuav coj peb mus rau peb Leej Txiv Saum Ntuj Ceeb Tsheej.

Kuv txiv nco tau hnub twg, thiab teev twg, uas nws tsev neeg-txiv, niam, thiab plaub tus me nyuam-tau ncaim lub Koom Txoos, ob peb tug uas tsis rov qab los koom ntxiv lawm. Nws muaj 13 xyoo, yog ib tug dikas, thiab thaum lub sij hawm ntawd ces tej tsev neeg mus koom Hnub Caiv Kev Kawm Vaj Lug Kub thaum sawv ntxov thiab ces mus koom kev noj lub cim nco txog kev sib ntsib thaum tav su. Muaj ib hnub tshav ntuj nrig lub caij nplooj ntoos hlav, tom qab uas peb los ntawm kev teev tiam thaum hnub Sunday sawv ntxov thiab tau noj su ua ib tsev neeg ua ke, nws niam tig nug nws txiv hais tias, “Es, koj txiv, koj puas xav tias peb yuav tsum mus koom kev noj lub cim nco txog kev sib ntsib los sis coj peb tsev neeg mus tsav tsheb ncig teb chaws me ntsis no?”

Kuv txiv yeej tsis xav tias lawv muaj cai yuav mus ua lwm yam uas tsis yog mus koom kev noj lub cim nco txog kev sib ntsib li, tiam sis nws thiab nws peb tus kwv tij muam txhua tus zaum zoo thiab mloog nkawd hais. Tej zaum hnub Sunday ntawd uas lawv mus caij tsheb ncig teb chaws yeej lom zem rau lawv tsev neeg heev, tiam sis thaum lawv txiav txim siab ua ib yam me li ntawd ces nws coj lawv mus taug ib txoj kev tshiab uas thaum kawg coj nws tsev neeg mus deb ntawm lub Koom Txoos, ib qhov chaw uas pab tiv thaiv lawv, pab lawv muaj kev nyab xeeb, thiab foom koob hmoov rau lawv, thiab coj lawv mus rau ib txoj kev txawv lawm.

Nyob hauv Phau Ntawv Maumoos tus yaj saub Lihais qhia nws tsev neeg txog thaum nws ua yog toog pom xwv kom ua ib zaj lus qhia rau peb cov uas niaj hnub no raug ntxias mus xaiv lwm txoj kev. Nws qhia tias nws “tau pom ntau pab neeg coob coob uas suav tsis txheeb, coob leej ntawm cov neeg ntawd tau txiv mus lawm tom hauv ntej, xwv kom lawv yuav tau los txog ntawm txoj kev uas coj mus rau ntawm tsob ntoo uas [nws] sawv.

“Thiab … lawv tau los, thiab tau pib taug txoj kev uas coj mus txog tsob ntoo.

“Thiab … tau muaj ib qhov kev tsaus ntuj uas muaj huab zig niab sawv los; … kawg tias ua rau lawv ib co uas twb tau taug txoj kev ntawd lawm nrhiav tsis tau txoj kev, kom lawv mus yuam kev thiab ploj mus.”¹

Ces Lihais pom pab thib ob uas “tab tom sib txiv mus lawm tom hauv ntej, thiab lawv tau los thiab tuav tus nqaj hlau tom qhov kawg; thiab lawv tau txiv los dhau hauv qhov kev tsaus ntuj uas muaj huab zig niab, tuav rawv tus nqaj hlau tsis tso, twb tsis tso mus txog thaum uas lawv tau los txog thiab tau los noj cov txiv ntawm tsob ntoo ntawd tso.” Tu siab tias, “tom qab uas lawv tau noj cov txiv ntawm tsob ntoo ntawd tas lawm lawv tau tsa muag ntsia ib puag ncig zoo li lawv tau pom tias lawv txaj muag” vim muaj ib co nyob hauv “ib lub tsev loj thiab dav” uas “tau luag thuam thiab taw tes ntshis rau cov uas tau los … thiab tau tab tom noj cov txiv.” Ces pab neeg no “tau ncaim mus rau hauv cov kev txwv tsis pub mus thiab tau ploj mus lawm.”² Lawv nyiaj tsis tau mus txog thaum kawg los yog tsis xav ua li ntawd.

Tiam sis, muaj pab thib peb uas tsis tau mus txog tsob ntoo uas cawm neeg txoj sia xwb, tiam sis thaum lawv mus txog lawm lawv kuj tsis ncaim mus hlo li. Cov vaj lug kub hais txog cov no tias lawv “tau tuav tus nqaj hlau ruaj ruaj txiv los mus lawm tom hauv ntej mus txog thaum lawv tau los mus txog thiab tau qhau cev thiab tau noj cov txiv ntoo ntawd.”³ Tus nqaj hlau yog tib qho khoom pab neeg no nrhiav tau uas yuav pab tiv thaiv lawv thiab pab lawv muaj kev nyab xeeb thiab kev kaj siab, thiab lawv tuav ruaj ruaj; lawv tsis kam tso nws kiag li, txawm yog ib yam me npaum kev mus caij tsheb ncig teb chaws thaum hnub Sunday tav su.

Txwj Laug David A. Bednar qhia txog pab neeg no hais tias: “Cov lus uas tseem ceeb tshaj hauv nqe no yog ‘tuav ruaj ruaj’ rau tus nqaj hlau. … Tej zaum pab neeg thib peb no pheej nyeem txog thiab kawm txog thiab nrhiav Khetos cov lus. … Pab no yog pab uas nej thiab kuv yuav tsum rau siab nrhiav kom koom tau.”⁴

Peb cov uas yog mej zeej hauv Vajtswv lub Koom Txoos hnub no tau khi lus tias peb yuav lawv Yexus Khetos qab thiab ua raws li Vajtswv tej lus qhuab qhia. Thaum peb ua kev cai raus dej peb tau khi lus tias peb yuav sawv ua tus Cawm Seej cov tim khawv,⁵ pab cov uas tsis muaj zog thiab xav tau kev pab,⁶ coj raws nraim li Vajtswv tej lus txib, thiab hloov siab lees txim, vim tus Thwj Tim Povlauj tau qhia hais tias, “Txhua tus puav leej ua txhaum, thiab tsis tau Vajtswv lub yeeb koob.”⁷

Txhua lub lim tiam peb muaj lub cib fim mus koom kev sib ntsib txais lub cim nco txog, qhov chaw uas peb rov qab khi lus tseg dua thaum peb noj cov mov mog thiab haus dej ntawm txoj kab ke noj lub cim nco txog. Thaum peb ua qhov me me no peb rov qab cog lus tias peb yuav lawv Yexus Khetos qab thiab yuav hloov siab lees txim thaum peb ua tsis tau li peb cov lus cog. Vajtswv cog lus rau peb tias yog peb ua li no peb yuav txais Nws tus Ntsuj Plig los coj thiab tiv thaiv peb.

Nyob hauv phau Qhia Kuv txoj Moo Zoo, cov tub thiab ntxhais txib qhia tias thaum peb mus koom peb lub Koom Txoos tej kev sib ntsib hnub Sunday peb txais kev tshwm sim thiab peb cov lus tim khawv loj hlob tuaj: “Thaum peb mus koom tej kev sib ntsib hauv lub Koom Txoos thiab teev tiam Vajtswv ua ke, peb txhawb nqa ib leeg dhau ib leeg lub zog. Peb raug txhawb zog los ntawm peb cov phooj ywg thiab peb cov tsev neeg. Peb txoj kev ntseeg raug txhawb zog thaum peb kawm cov vaj lug kub thiab kawm ntxiv txog txoj moo zoo uas raug txum tim rov qab los.”⁸

Tej zaum ib tug yuav nug hais tias vim li cas muaj peb qho kev sib ntsib thaum hnub Sunday thiab vim li cas yuav tsum mus koom txhua qhov. Cia peb tham me ntsis txog peb qho kev sib ntsib no:

Txoj kev sib ntsib txais lub cim nco txog cia peb muaj lub cib fim ua txoj kab ke ntawm lub cim nco txog. Peb rov qab khi peb tej lus tseg, peb tus Ntsuj Plig raug txhawb zog, thiab tus Vaj Ntsuj Plig Dawb Huv kuj qhuab qhia thiab tshoov peb lub siab thiab.
Hnub Caiv Kev Kawm Vaj Lug Kub cia peb sib qhia cov lus qhuab qhia ntawm lub nceeg vaj ib leeg rau ib leeg,⁹ xwv kom txhua tus yuav raug txhawb zog thiab zoo siab ua ke.¹⁰ Peb muaj hwj chim loj thiab kev kaj hauv peb lub siab thaum peb to taub cov lus qhuab qhia ntawm txoj moo zoo uas txum tim rov qab los.
Tej kev sib ntsib ntawm lub pov thawj hwj yog ib lub sij hawm rau cov txiv neej thiab cov tub hluas los kawm lawv tej dej num¹¹ thiab raug qhuab qhia zoo tshaj,¹² thiab txoj kev sib ntsib ntawm Koom Haum Niam Tsev pab cov poj niam hauv lub Koom Txoos muaj lub cib fim txhawb lawv txoj kev ntseeg kom loj hlob tuaj …, txhawb lawv tej tsev neeg kom ruaj khov, thiab pab cov uas xav tau kev pab.¹³

Ib yam li ntawd, peb cov ntxhais hluas thiab me nyuam yaus kuj muaj lawv tej kev sib ntsib thiab hoob kawm thiab, uas luag qhia lawv txog txoj moo zoo xwv kom pab lawv npaj rau tej dej num tseem ceeb uas lawv yuav muaj yav tom ntej. Nyob hauv txhua txoj kev sib ntsib no uas ib qho txawv ib qho tiam sis muaj tib lub hom phiaj, peb kawm cov lus qhuab qhia, tus Ntsuj Plig tshoov peb lub siab, thiab peb ua hauj lwm ib leeg pab ib leeg. Tej zaum peb ib txhia mus koom tsis tau tag nrho peb tej kev sib ntsib hnub Sunday vim nyob kev deb, tas nyiaj sam roj ntau dhau, los sis peb muaj mob, tiam sis peb cov uas ua tau yuav tau rau siab mus koom. Kuv cog lus rau nej tias peb yuav txais tej koob hmoov uas yog kev xyiv fab thiab kev kaj siab thaum peb teev tiam Vajtswv thaum hnub Sunday tej kev sib ntsib uas siv sij hawm peb teev.

Peb tsev neeg tau cog lus tias peb yuav mus koom tag nrho peb tej kev sib ntsib hnub Sunday tas mus li. Peb pom tias thaum peb ua li no peb txoj kev ntseeg loj hlob tuaj thiab peb to taub txoj moo zoo zoo zog. Peb pom tias peb nyob kaj siab lug vim peb txiav txim siab mus koom peb lub Koom Txoos tej kev sib ntsib thaum peb rov qab los nyob hauv tsev thiab ua raws li peb yuav tsum ua Hnub Caiv. Peb kuj mus koom tag nrho peb tej kev sib ntsib hnub Sunday thaum peb mus ua si lwm chaw thiab ncig teb chaws. Tsis ntev tas los peb ib tug ntxhais sau ntawv los hais tias nws tau mus koom peb lub koom txoos hauv ib lub zos uas nws tab tom mus ncig thiab ces hais ntxiv tias, “Aws, kuv Txiv, kuv yeej mus koom tag nrho peb qho kev sib ntsib hnub Sunday os.” Peb paub tias nws raug foom koob hmoov vim nws txiav txim siab ua ncaj ncees li no.

Peb txhua tus yuav tau txiav txim siab rau peb tus kheej tej yam uas peb yuav ua thaum Hnub Caiv. Yeej yuav muaj tej yam “zoo” uas peb xav ua uas peb yuav tsum tsis ua vim nws zoo dua tias peb mus koom lub Koom Txoos tej kev sib ntsib. Qhov no yog ib yam uas tus yeeb ncuab “thiaj dag ntxias tau [peb] tej ntsuj plig, thiab yuav maj mam coj [peb] mus.”¹⁴ Nws ntxias peb mus ua tej yam “zoo” txawm tias muaj tej yam “zoo dua” los yog “zoo tshaj.”¹⁵

Tuav tus nqaj hlau ruaj ruaj txhais hais tias thaum peb mus tau ces peb mus koom peb tej kev sib ntsib hnub Sunday: txoj kev sib ntsib txais lub cim nco txog, Hnub Caiv Kev Kawm Vaj Lug Kub, thiab tej kev sib ntsib ntawm lub pov thawj hwj los sis Koom Haum Niam Tsev. Peb cov me nyuam yaus thiab tub ntxhais hluas yuav mus koom lawv tej hoob hauv Koom Haum Me Nyuam Yaus, Koom Haum Tub Hluas, thiab Koom Haum Ntxhais Hluas. Peb yuav tsum tsis txhob xaiv seb peb yuav mus koom los sis tsis koom lub hoob twg. Peb tuav Vajtswv txoj lus ruaj ruaj thaum peb mus teev tiam thiab mus koom peb tej kev sib ntsib thaum Hnub Caiv.

Tuav tus nqaj hlau ruaj ruaj txhais hais tias peb yuav rau siab ua raws li tag nrho Vajtswv cov lus txib, thov Vajtswv txhua hnub ntawm peb tus kheej thiab ntawm peb tsev neeg, thiab nyeem cov vaj lug kub txhua hnub.

Yexus Khetos ib co lus qhuab qhia nyob hauv Phau Ntawv Maumoos yog kom tuav ruaj ruaj. Peb ntseeg Yexus Khetos, hloov siab lees txim, thiab hloov peb tej siab, ces lawv Nws qab mus ua kev cai raus dej thiab txais lub txiaj ntsim Vaj Ntsuj Plig Dawb Huv, tus uas coj thiab siab xyuas peb. Thiab, ces, li Nifais qhia, peb “thawb lawm tom hauv ntej, mloog nkaus rau Khetos tej lus”, mus kom tas peb ib sim neej.¹⁶

Kuv cov kwv tij thiab muam, peb yog ib co neeg uas khi lus. Peb kam khi lus thiab ua raws li tej kev khi lus, thiab Vajtswv tau cog lus tseg rau peb tias peb yuav txais tag nhro txhua yam uas Leej Txiv muaj.¹⁷ Thaum peb tuav tus nqaj hlau ruaj ruaj thaum peb ua raws li peb tej kev khi lus, peb yuav muaj zog tiv tej kev ntxias thiab kev xwm txheej hauv lub ntiaj teb. Peb yuav muaj peev xwm taug txoj kev hauv lub neej hauv ntiaj teb no txawm tias nws muaj teeb meem ntau, mus txog thaum peb ncav tsob ntoo uas muaj cov txiv “uas muaj nuj nqis tshaj thiab yog cov txiv uas qab tshaj txhua yam txiv huv tib si.”¹⁸

Kuv txiv muaj hmoov vim nws yuav tau ib tug poj niam zoo uas pab txhawb nws rov qab los rau lub koom txoos uas nws mus thaum nws tseem hluas thiab rov qab pib taug txoj kev dua. Vim nkawd ua neej muaj kev ntseeg nkawd foom koob hmoov rau tag nrho nkawd cov me nyuam, cov xeeb ntxwv, thiab nim no cov xeeb ntxwv cov me nyuam.

Ib yam nkaus li thaum kuv yawm thiab pog txiav txim siab mus koom los sis tsis mus koom nkawd ib txoj kev sib ntsib thaum Hnub Caiv ua rau nkawd tsev neeg lub neej hloov kiag, txhua hnub peb kuj txiav txim siab tau txog ntau yam uas yuav hloov peb lub neej mus yav tom ntej thiab. Txawm tias thaum yus txiav txim siab mus koom los sis tsis mus koom txoj kev sib ntsib txais lub cim nco txog zoo li ib yam me me xwb, ua li no muaj peev xwm hloov yus lub neej mus tas ib txhis.

Cia peb rau siab thiab txais cov koob hmoov thiab kev tiv thaiv uas los thaum peb sib koom ua ke thiab coj tej kev khi lus. Cia peb tuav tus nqaj hlau ruaj ruaj uas yuav coj peb mus rau peb Leej Txiv Saum Ntuj Ceeb Tsheej kuv thov los ntawm Yexus Khetos lub npe dawb ceev, amees.