Lub Tuam Rooj Sab Laj: Ntxiv Dag Zog rau Kev Ntseeg thiab Lus Tim Khawv
Los ntawm Txwj Laug Robert D. Hales
Ntawm Pawg Kaum Ob tug Thwj Tim
Auj, peb yeej xav tau lub tuam rooj sab laj no! Dhau los ntawm tej tuam rooj sab laj li no, peb txoj kev ntseeg thiaj muaj zog thiab peb tej zaj lus tim khawv thiaj muaj feem ntau dua.
Ua tsaug, Thawj Tswj Hwm Monson, rau koj cov lus qhia thiab koj tus yam ntxwv zoo txog kev pab lwm tus neeg li Khetos thiab rau koj cov lus txib kom peb txhua tus ua tub txib qhia txoj moo zoo. Peb yeej los thov Vajtswv pab koj.
Hauv peb lub caij nyoog, tus Cawm Seej Yexus Khetos hu ib pawg Ntseeg uas tau sib sau ua ke ua Nws lub tuam rooj sab laj.1
Txawm peb nyob qhov twg hauv lub ntiaj teb no, txawm peb txais tej kev coj ua no li cas, kuv ua tim khawv hais tias peb sib sau ua ke ua tus Cawm Seej lub tuam rooj sab laj. Kuv kuj ua tim khawv hais tias peb yuav hnov tau Nws cov lus, vim Nws tau hais tias, txawm yog los ntawm Nws lub suab los sis los ntawm Nws cov tub qhe tej suab, los zoo tib yam nkaus.2
Tej tuam rooj sab laj yeej los yog ib feem ntawm Yexus Khetos lub Koom Txoos uas muaj tseeb. Adas tau coj nws cov tub ki xeeb leej xeeb ntxwv los sib sau ua ke thiab tau qhia lawv txog tej yam uas yuav muaj los yav tom ntej. Mauxes tau coj cov neeg Ixayees los sib sau ua ke thiab qhia lawv txog cov lus txib uas nws tau txais los ntawm Vajtswv los. Tus Cawm Seej tau qhia coob tug neeg uas sib sau ua ke, txawm yog nyob hauv teb chaws Dawb Huv los yog teb chaws Amelikas huv tib si. Petus tau sau cov ntseeg hauv Yeluxalees los nyob ua ke. Thawj thawj lub tuam rooj sab laj hauv lub caij nyoog kawg no yog ob hlis tom qab uas tau txhim tsa lub Koom Txoos rov qab los xwb thiab tau muaj li no mus txij thaum ntawd los.
Tej tuam rooj sab laj no yeej los yog tus Tswv coj thiab kav, raws li Nws tus Ntsuj Plig.3 Ua cov uas hais lus pub rau nej, tsis muaj leej twg uas qhia peb hais tias peb yuav tsum hais txog dab tsi. Ntau lim tiam thiab ntau hli, ib hmo dhau ib hmo thaum peb tuaj tsis tau dab ntub li feem ntau, peb tos ntsoov tus Tswv. Dhau los ntawm kev yoo mov, kev thov Vajtswv, kev kawm, thiab kev xav mus xav los, peb kawm tej lus qhia uas tus Tswv xav kom peb qhia rau nej.
Tej zaum ib txhia neeg yuav nug hais tias, “Yog vim li cas tej kev tshoov siab tsis los yooj yim dua thiab ceev zog?” Tus Tswv tau qhia Oliver Cowdery hais tias, nws yuav tsum ua tib zoo xav mus xav los hauv nws lub siab; ces nws mam li nug tus Tswv saib qhov uas nws xav txog ntawd puas yog.4 Tej zaj lus uas yuav hais hauv lub tuam rooj sab laj los rau peb tom qab uas peb ua tib zoo thov Vajtswv npaj, dhau los ntawm tus Vaj Ntsuj Plig Dawb Huv.
Txoj ntsiab cai no muaj tseeb rau tag nrho cov mej zeej ntawm lub Koom Txoos thaum peb npaj koom tej rooj sab laj, txawm yog nyob hauv pawg ntseeg, ceg txheem ntseeg, los yog tej tuam rooj sab laj li no. Peb yuav tsum xav mus xav los saib peb xav tau dab tsi los ntawm Leej Txiv Saum Ntuj Ceeb Tsheej, thiab peb yuav tsum thov Vajtswv kom to taub thiab ua raws li tej yam uas peb kawm lawm. Thaum lub sij hawm rau lub tuam rooj sab laj ze zuj zus tuaj, peb tso tseg lwm yam uas peb ua, muab tej yam ntawm lub ntiaj teb no tseg, thiab nrhiav tej yam ntawm lub zoo dua.5 Ces peb mam li sau peb tej tsev neeg ua ke kom mloog tus Tswv cov lus, ib yam li tus Vaj Ntxwv Npeyamis cov neeg tau ua.6
Cov me nyuam thiab cov tub hluas ntxhais hluas nyiam mloog heev thiab. Peb yuam kev ntau yog tias peb xav tias lub tuam rooj sab laj cov lus yog ib co lus uas lawv yuav tsis to taub zoo rau ntawm lawv sab laj lim plab plaw thiab sab ntsuj plig. Hais rau lub Koom Txoos cov mej zeej uas tseem hluas, kuv cog lus tias yog nej yuav ua tib zoo mloog, nej yuav hnov tau tus Ntsuj Plig tshoov nej lub siab. Tus Tswv yuav qhia nej saib Nws xav kom nej ua li cas hauv nej lub neej.
Hauv tej rooj sab laj li no peb txais tau tus Tswv txoj lus rau peb tus kheej thiab. Muaj ib tug mej zeej tau hais rau kuv hais tias: “Thaum kuv mloog koj zaj lus ntawd, kuv xav tsis thoob. … Koj zaj lus hais ntawd yog kev tshwm sim los ntawm tus Tswv ncaj qha rau kuv tsev neeg. Kuv yeej tsis tau muaj tus Ntsuj Plig tshoov kuv lub siab yam muaj zog heev npaum li ob peb na this ntawd thaum tus Vaj Ntsuj Plig Dawb Huv hais ncaj qha rau kuv.”
Muaj dua ib tug hais tias, “Kuv yeej tsis tau xav tias ib zaj lus yog hais ncaj qha rau kuv npaum li koj zaj lus ntawd.”
Muaj tau li no vim tus Vaj Ntsuj Plig Dawb Huv coj tus Tswv txoj lus mus nkag peb tej siab tej ntsws ua cov lus los yog cov tswv yim uas peb to taub tau.7 Thaum kuv ceev tej yam uas luag hais hauv lub tuam rooj sab laj no tseg rau hauv ntawv, feem ntau kuv tsis sau tib co lus uas tus hais lus hais; kuv sau tseg tus Ntsuj Plig cov lus qhuab qhia uas Nws hais rau kuv.
Cov lus uas hais tsis tseem ceeb npaum li cov lus uas peb hnov thiab cov lus uas peb hnov hauv nruab sia.8 Yog vim li ntawd peb thiaj rau rau siab npaj qhov chaw uas peb sib ntsib sib sab laj no kom ua ib qho chaw uas peb yuav hnov tau tus Ntsuj Plig, hnov tau hauv nruab siab thiab to taub zoo.
Auj, peb yeej xav tau lub tuam rooj sab laj no! Dhau los ntawm tej tuam rooj sab laj li no, peb txoj kev ntseeg thiaj muaj zog thiab peb tej zaj lus tim khawv thiaj muaj feem ntau dua. Thiab thaum peb hloov siab lawm, peb ib leeg pab ib leeg muaj zog kom sawv ruaj khov tiv tau tej xib xub hluav taws ntawm tej hnub nyoog kawg no.9
Tau ntau xyoo lawm lub Koom Txoos cov ntseeg tsis tau raug tej kev tsis to taub thiab tej kev tsim txom uas cov Ntseeg thaum ntxov raug. Yuav tsis zoo li ntawd mus li. Lub ntiaj teb txav deb deb ntawm tus Tswv ceev dua thiab deb dua tshaj plaws. Tus yeeb ncuab tab tom khiav mus txhua qhov txhia chaw hauv qab ntuj khwb no. Peb saib, mloog, kawm, thiab tshaj tawm cov yaj saub cov lus kom peb thiaj txais tau lus ceeb toom thiab kev pov hwm. Piv txwv hais tias, peb tau tshaj tawm “Tsev Neeg: Ib zaj Lus Tshaj Tawm rau lub Ntiaj Teb” ntev sij hawm ua ntej peb pom tau tej kev cov nyom uas tsev neeg raug niaj hnub nim no. “Tus Khetos uas Muaj txoj Sia Nyob: cov Thwj Tim tej Lus Tim Khawv” yog npaj ua ntej lub sij hawm uas peb yuav xav tau ntau tshaj plaws.
Tej zaum peb tsis paub saib yog vim li cas cov yaj saub thiab cov uas hais lus hauv lub tuam rooj sab laj no hais tej yam uas lawv hais rau peb, tiam sis tus Tswv paub. Thawj Tswj Hwm Harold B. Lee tau qhia hais tias: “Tib qho kev puaj phais uas peb muaj ua mej zeej ntawm lub koom txoos no yog kom … mloog cov lus thiab cov lus txib uas tus Tswv yuav qhia rau peb dhau ntawm Nws tus yaj saub. Yeej yuav muaj tej yam uas peb yuav tsum muaj siab ntseeg thiab rub siab ntev txog. Tej zaum nej yuav tsis nyiam tej lus uas lub Koom Txoos ib tug thawj coj hais. Tej zaum qhov uas nws hais ntawd yog qhov fab ntxeev ntawm nej [tus kheej] tej kev xav. Tej zaum qhov uas nws hais ntawd yog qhov fab ntxeev ntawm nej tej kev xav txog saib tib neeg yuav tsum coj cwj pwm li cas. Tej zaum qhov uas nws hais ntawd yuav ua rau lwm tus neeg tsis tshua nyiam nej. Tiam sis yog tias nej ua tib zoo mloog tej no, ib yam li los ntawm tus Tswv lub qhov ncauj los, rub siab ntev thiab muaj siab ntseeg, txoj lus cog tseg yog hais tias lub qhov rooj ntuj txiag teb tsaus yuav kov yeej tsis tau nej, thiab tus Tswv Huab Tais Ntuj yuav ntiab tej qhov tsaus ntuj nti tawm ntawm nej mus, thiab yuav ua rau lub ntuj ua zog koog rau nej, thiab kom nws lub npe tau yeeb koob (saib D&C 21:6).”10
Thawj Tswj Hwm Lee ua li cas paub hais tias peb yuav tawm tsam dab tsi niaj hnub nim no? Nws paub vim nws yog ib tug yaj saub, ib tug pom tau, thiab ib tug txais kev tshwm sim. Thiab yog tias peb mloog thiab ua raws li cov lus uas cov yaj saub hais nim no, suav lawv cov uas hais hauv lub tuam rooj sab laj no thiab, ces peb yuav muaj zog thiab txais tau kev pov hwm.
Tej koob hmoov zoo tshaj plaws ntawm lub tuam rooj sab laj los rau peb sawv daws tom qab lub tuam rooj sab laj tiav tas. Nco qab ntsoov tus qauv uas sau tseg feem ntau hauv vaj lug kub: peb sib sau kom mloog tus Tswv cov lus, ces peb rov qab mus tsev thiab ua raws li cov lus ntawd.
Tom qab tus Vaj Ntxwv Npeyamis tau qhia nws cov neeg, “nws tso cov neeg mus tsev, thiab lawv rov qab mus, txhua tus, raws li lawv tsev neeg, mus rau lawv tej tsev.” 11 Hauv nws lub sij hawm, tus Vaj Ntxwv Limhi ua ib yam nkaus.12 Tom qab uas nws qhia thiab pab cov neeg ntawm lub tuam tsev hauv Bountiful, tus Cawm Seej thov caw cov neeg hais tias, “nej cia li mus rau hauv nej tej tsev, thiab ua tib zoo xav txog tej yam uas kuv tau hais lawm, thiab thov Leej Txiv, los ntawm kuv lub npe, xwv kom nej yuav to taub, thiab npaj nej tej siab rau tag kis, thiab kuv yuav rov los cuag nej dua.”13
Peb txais yuav tus Cawm Seej txoj lus caw no thaum peb ua tib zoo xav txog thiab thov Vajtswv kom to taub tau qhov uas peb tau kawm thiab tig los mus ua raws li tus Cawm Seej lub siab xav. Nco qab ntsoov Thawj Tswj Hwm Kimball cov lus hais tias: “Kuv tau txiav txim siab hais tias thaum kuv rov qab mus tsev los ntawm lub [tuam] rooj sab laj no … yeej muaj ntau yam hauv kuv lub neej uas kuv kho tau. Kuv twb teev tseg lawm hauv kuv lub paj hlwb, thiab kuv npaj siab pib kho thaum peb sib ntsib tiav tas lawm.”14 Tsis ntev tas los no Thawj Tswj Hwm Monson tau hais tias: “Kuv yaum kom nej nyeem tej zaj lus no … thiab xav txog tej yam uas tej zaj ntawd hais. Kuv nrhiav pom hauv kuv lub neej tias thaum kuv yim kawm tej zaj lus no zoo zoo ces kuv yim loj hlob ntawm sab ntsuj plig xwb.”15
Tsis hais qhov uas peb kawm vaj lug kub peb tus kheej thiab ua ke nrog peb tsev neeg, Leej Txiv Saum Ntuj Ceeb Tsheej xav kom peb rau siab kawm thiab ua raws li tej yam uas peb tau kawm hauv lub rooj sab laj no. Kuv ua tim khawv hais tias lawv cov uas tso siab rau tus Tswv thiab ua raws li cov lus ntuas no yuav muaj zog kom thiab foom koob hmoov rau lawv tus kheej thiab lawv tsev neeg ntau tiam neeg tom ntej mus.
Leej Txiv Saum Ntuj Ceeb Tsheej tau npaj kev rau peb taug. Nyob ntawm lub rooj sab laj no, 97 feem pua ntawm lub Koom Txoos hnov tau cov lus qhia no ua lawv yam lus. Muaj cov mej zeej coob heev hauv 197 lub teb chaws yuav saib lub tuam rooj sab laj no ntawm 95 yam lus. Ob los sis peb hnub, tej zaj lus qhia no yuav tshwm tawm hauv LDS.org ua lus As Kiv, thiab ib lim xwb ces tej zaj lus no yuav muaj ua 52 yam lus. Nim no peb txais tau lub Koom Txoos cov ntawv xov xwm uas luam tawm ua ntej peb lim tiam tom qab lub tuam rooj sab laj. Peb tsis tas tos ntev hli kom thiaj txais tau cov ntawv lus hais hauv ntawv xa. Nyob hauv ib lub koom pis tawj, xov tooj, los yog lwm yam tshuab khoom, peb nyeem tau, mloog rau, saib tau, thiab faib tawm cov yaj saub cov lus. Thaum lub sij hawm twg los tau, nyob qhov twg los tau, peb ua tau rau peb tej kev txawj ntse loj hlob tuaj, peb ntxiv tau dag zog rau peb txoj kev ntseeg thiab cov lus tim khawv, pov hwm tau peb tsev neeg, thiab coj lawv los mus txog tsev raws li kev puaj phais.
Cov lus hais ntawm lub tuam rooj sab laj no kuj yuav ntxiv rau tus txheej txheem qhia vaj lug kub rau cov tub hluas ntxhais hluas uas muaj nyob saum Internet. Ib tsoom niam txiv, nej txuas tau tej lus qhia rau cov hluas no nyob ntawm LDS.org. Nrhiav saib nej cov me nyuam kawm dab tsi, thiab kom nws ua lub ntsiab ntawm nej qhov kev kawm nej tus kheej, hauv tsev neeg tej kev sib tham, tsev neeg hmo ua ke, tsev neeg kev sib sab laj, thiab kev xam phaj nej cov me nyuam saib yuav tsum qhia dab tsi rau lawm ib leej zuj zus.
Kuv yaum kom tag nrho cov mej zeej siv tej kev pab cuam uas muaj nyob ntawm lub Koom Txoos tej website thiab mobile apps. Peb yeej meem kho tej no kom tej no yuav yooj yim siv dua thiab pab tau peb lub neej zoo dua tuaj. Nyob ntawm LDS.org nej yuav nrhiav tau tej kev pab cuam uas yuav pab nej kawm txoj moo zoo, ntxiv dag zog rau nej tsev neeg, thiab ua nej tej hauj lwm hu tom tshawj. Nej kuj nrhiav tau nej tej poj koob yawm ntxwv uas xav tau tej kab ke tuam tsev thiab lwm yam kev pab ntawm txoj hauj lwm ntawm txoj kev cawm seej, hais txog kev tshaj tawm txoj moo zoo thiab. Nej cov niam txiv yeej pab tau nej cov me nyuam npaj rau lawv txoj kev ua kev cai raus dej, txais lub pov thawj hwj, thiab mus ua tub txib, thiab lub tuam tsev. Niam txiv pab tau peb taug tau txoj kev ncaj thiab nqaim mus txais kom tau tej kab ke tuam tsev thiab tej kev khi lus uas ua rau peb txais tau tej koob hmoov ntawm lub neej nyob mus ib txhis.
Thaum lub tuam rooj sab laj lub Plaub Hlis Ntuj tas los no, hauv lub pov thawj hwj txoj kev sib ntsib, kuv tau qhia txog qhov uas kuv txiv teeb ib daim duab txog ib tug tub rog uas hnav ris tsho hlau kom thiaj qhia kuv txog Vajtswv cev ris tsho hlau uas tiv thaiv tau peb sab ntsuj plig.
Tom qab tuas ntawd tiav tas, muaj ib tug txiv tsev uas qhia nws tsev neeg saib nws tau kawm dab tsi. Nws ib tug tub nyiam heev thiab nrhiav hauv LDS.org kom thiaj hnov tau kuv zaj lus ntawd nws tus kheej. Ob peb hnub tom qab ntawd nws qhia kuv zaj lus hauv tsev neeg hmo ua ke rau nws cov kwv tij thiab cov muam. Nws nyob no.
Ib zaj lus hais hauv lub tuam rooj sab laj, uas yog los ntawm tus Tswv los, yog ib tug me nyuam yaus txais thiab coj mus qhia rau nws tsev neeg yam ntxim muaj feem heev. Kuv nyiam nws daim hlau thaiv hauv siab ntawm kev ncaj ncees. I love his shield of faith to thwart the fiery darts of the adversary. Tej no yog tej koob hmoov ntawm lub tuam rooj sab laj.
Kuv cov kwv tij thiab cov muam, kuv ua tim khawv tshwj xeeb hais tias tus Tswv Yexus Khetos muaj txoj sia nyob thiab yog tus thawj coj ntawm lub Koom Txoos no. Nov yog Nws lub tuam rooj sab laj. Kuv cog lus tuav Nws lub npe hais tias yog tias nej yuav rau rau siab thov Vajtswv hnov Leej Txiv Saum Ntuj Ceeb Tsheej lub suab hauv tej lus hais hauv lub tuam rooj sab laj no, nej yuav pom tau hais tias Nws tau hais lus rau nej kom pab nej, ntxiv dag zog rau nej, thiab coj nej rov qab mus txog tsev nrog Nws nyob saum ntuj ceeb tsheej. Los ntawm Yexus Khetos lub npe, amees.