Zoo Siab Tos Txais Nej rau lub Tuam Rooj Sab Laj
Los ntawm Thawj Tswj Hwm Thomas S. Monson
Kuv thov kom peb yuav muaj tus Tswv tus Ntsuj Plig los puv peb tej siab thaum peb mloog thiab kawm.
Kuv cov kwv tij thiab cov muam uas kuv hlub, kuv zoo siab nrog nej sib koom ua ke dua. Tus Tswv tau qhia kom tus Yaj Saub Yauxej Xamiv txhim tsa lub Koom Txoos 183 xyoo tas los. Thaum lub rooj sab laj ntawd, thaum lub Plaub Hlis Ntuj 6, 1830, tsuas muaj rau tus mej zeej uas tuaj lawm. 1
Kuv zoo siab qhia tias ob lub lim piam tas los, peb tau 15 lab tus mej zeej hauv lub Koom Txoos lawm. Lub Koom Txoos tseem vam meej ntxiv mus thiab hloov coob tug neeg lub neej txhua xyoo. Nws mus thoob lub ntiaj teb no xws li peb cov tub txib mus nrhiav cov uas tab tom nrhiav qhov tseeb.
Nyuam qhuav tau ib xyoos lawm thaum kuv qhia tias yuav cia cov mus ua tub txib mus ntxov dua. Thaum ntawd, thaum lub Kaum Hlis Ntuj xyoo 2012, cov uas mus ua tub txib muaj 58,500 tug mus txog hnub no peb muaj 80,333. Peb tau pom ib qho zoo tshaj plaws tshwm los lawm!
Cov vaj lug kub dawb huv tsis qhia dab tsi tseem ceeb dua, tsis muaj hauj lwm uas khi peb dua, los sis tsis muaj lus qhia uas ncaj qha dua tej uas the Tswv uas Sawv Rov Los tau qhia thaum Nws ntsib kaum ib tug thwj tim nyob tim Kalilais. Nws hais tias, “Yog li ntawd, nej cia li tawm mus qhia txhua haiv neeg hauv qab ntuj no, kom lawv los ua kuv cov thwj tim. Thaum nej muab lawv ua kev cai raus dej nej yuav tsum tuav Leej Txiv, Leej Tub, thiab tus Ntsuj Plig lub npe.”2 Tus Yaj Saub Yauxej Xamiv qhia tias, “Tom qab tau hais txhua yam lawm, txoj hauj lwm uas tseem ceeb tshaj plaws yog txoj hauj lwm mus qhia Txoj Moo Zoo.”3 Hnub no tseem muaj nej ib co uas nco txog Thawj Tswj Hwm David O. McKay tej lus, uas hais tias “Txhua tus mej zeej yog ib tug tub txib lawm!”4
Kuv tuav lawv tej lus, ntxiv kuv ib co. Lub caij no yog lub caij rau cov mej zeej thiab cov tub txib los ua hauj lwm ua ke, kom mus ua hauj lwm hauv tus Tswv lub vaj txiv hmab kom coj neeg los cuag Nws. Nws tau npaj ntau yam uas pab peb qhia txoj moo zoo, thiab Nws yuav pab peb ua tej dej tes num no yog peb yuav muaj lub siab ntseeg ua Nws txoj hauj lwm no.
Kom thiaj txhawb nqa pawg tub txib loj no, kuv tau thov kom peb cov mej zeej pub nyiaj, zoo li lawv muaj peev xwm ua tau, rau pawg tub txib hauv lawv pawg ntseeg los sis rau cov tub txib hauv lub Koom Txoos. Kuv zoo siab pom neeg ua li no thiab lawv txoj kev txhawb pab no tau pab ntau txhiab tus tub txib uas tsis muaj nyiaj txaus them lawv txoj kev mus. Kuv ua nej tsaug vim nej pub cov nyiaj no. Peb tseem toob kas txoj kev pab no ntxiv, kom peb tseem pab cov uas xav mus ua tub txib tiam sis lawv tus kheej tsis muaj nyiaj txaus mus ua tub txib.
Nim no, cov kwv tij thiab cov muam, peb los sib sau ua ke kom thiaj txais tej lus qhia. Ob hnub no yuav muaj neeg hais ntau yam txog txoj moo zoo. Cov txiv neej thiab cov poj niam uas yuav hais lus rau nej no tau thov Vajtswv saib lawv yuav tsum hais dab tsi rau nej lawm.
Kuv thov kom peb yuav muaj tus Tswv tus Ntsuj Plig los puv peb tej siab thaum peb mloog thiab kawm. Los ntawm peb tus Cawm Seej, Yexus Khetos lub npe zoo, amees.