Muaj Vajtswv lub Hwj Chim thiab Txoj Cai thaum Qhia
Los ntawm David M. McConkie
Tus Pab Cuam Thib Ib ntawm Pawg Thawj Tswj Hwm hauv Hnub Caiv Kev Kawm Vaj Lug Kub
Tus Tswv tau npaj kev rau txhua tus neeg ntawm Ib Tsoom Haiv Neeg Ntseeg hauv Hnub Nyoog Kawg uas tsim nyog kom lawv qhia tau raws li tus Cawm Seej qhia.
Peb ris nej txiaj heev hais tsis tau lus ua tsaug txaus rau cov kws qhia thoob plaws lub Koom Txoos. Peb hlub nej heev thiab yeej tso siab rau nej. Nej yog ib qho txuj ci loj heev hauv txoj moo zoo uas raug muab txum tim rov qab los lawm.
Yeej muaj lus zais cia uas qhia seb yuav ua li cas thiaj ua tau ib tug kws qhia zoo txog txoj moo zoo, uas yog kom muaj Vajtswv lub hwj chim thiab txoj cai thaum qhia. Kuv siv lo lus lus zais cia vim ib tug kws qhia yuav qhia tau zoo yog tias cov uas mloog nws muaj ib zaj lus tim khawv tias tau muaj xwm dab tsi yav sawv ntxov uas kaj ntuj nrig, thaum lub caij nplooj ntoo hlav xyoo 1820.
Los teb ib tug tub hluas uas muaj 14 xyoos zaj lus thov Vajtswv, txawm qhib rooj ntuj ceeb tsheej. Vajtswv Leej Txiv uas Nyob Mus Ib Txhis thiab Nws tus Tub, Yexus Khetos, tau tshwm los thiab hais lus rau tus Yaj Saub Yauxej Xamiv. Txoj kev muab txhua yam txum tim rov qab los uas tos tau ntev ntev lawm twb pib muaj lawm, thiab txoj ntsiab cai rau kev tshwm sim uas kav mus ib txhis txawm pib hauv peb lub caij nyoog. Yauxej zaj xov, thiab peb zaj xov rau lub ntiaj teb, yus muab ob lo lus hais tau kom qhia txhij txhua hais tias: “Vajtswv hais lus.” Nws hais lus puag thaum ub, Nws tau hais lus rau Yauxej, thiab Nws yuav hais lus rau nej. Qhov no yog qhov uas ua kom nej txawv lwm cov kws qhia hauv ntiaj teb no. Yog vim li ntawd nej tsis muaj peev xwm poob qab.
Nej raug hu los ntawm tus ntsuj plig ntawm kev qhia qhov uas yuav muaj los yav tom ntej thiab raug tsa los ntawm txoj cai ntawm lub pov thawj hwj. Qhov no txhais tau li cas?
Qhov thib ib, nej yeej los ua tus Tswv txoj hauj lwm. Nej yog tus uas sawv Nws cev, thiab nej muaj cai thiab raug txib kom sawv Nws cev thiab ua ib yam li Nws ua yog tias Nws nyob ntawm no. Ua tus neeg sawv Nws cev, nej muaj cai txais tau Nws txoj kev pab. Nej yuav tsum nug nej tus kheej tias, “Tus Cawm Seej yuav hais dab tsi yog tias hnub no Nws tab tom qhia kuv hoob, thiab Nws yuav hais li cas?” Ces nej yuav tsum ua li ntawd thiab.
Txoj kev lav ris no yuav ua rau ib txhia xav tias lawv ua tsis tau los sis yuav ntshai me ntsis. Txoj kev twb tsis nyuaj li. Tus Tswv tau npaj kev rau txhua tus neeg ntawm Ib Tsoom Haiv Neeg Ntseeg hauv Hnub Nyoog Kawg uas tsim nyog kom lawv qhia tau raws li tus Cawm Seej qhia.
Qhov thib ob, nej raug hu mus tshaj tawm Yexus Khetos txoj moo zoo. Nej yuav tsum tsis txhob qhia nej tej tswv yim los sis tej kev xav, nrog rau cov vaj lug kub. Txoj moo zoo yog “Vajtswv lub hwjchim uas cawm tau,”1 thiab tsuas yog dhau ntawm txoj moo zoo peb thiaj tau kev cawm dim.
Qhov thib peb, nej raug txib kom qhia tej ntsiab cai hauv txoj moo zoo raws li muab sau tseg hauv lub Koom Txoos cov vaj lug kub, kom qhia cov yaj saub thiab cov thwj tim uas muaj sia nyob cov lus qhia, thiab kom qhia tej yam uas tus Vaj Ntsuj Plig Dawb Huv qhia rau nej.
Yog li ntawd peb yuav pib qhov twg?
Qhov kev lav ris tseem ceeb tshaj plaws thiab yog qhov uas peb yuav tsum xub ua yog kom ua neej nyob kom peb yuav tsim nyog tau tus Vaj Ntsuj Plig Dawb Huv ua peb tus khub thiab tus uas coj peb kev. Thaum Hyrum Smith sim pib ua txoj hauj lwm hauv lub caij nyoog kawg no, tus Tswv hais tias nov yog nws txoj hauj lwm, kom ua raws li tus Tswv tej lus txib kawg siab kawg ntsws kawg plab kawg plawv.2 Nov yog lub hauv paus. Txoj lus ntuas, uas tus Tswv hais rau Hyrum, yog tib cov lus ntuas uas Nws tau hais rau ib Tsoom Haiv Neeg Ntseeg hauv txhua lub caij nyoog.
Thawj Pawg Thawj Tswj Hwm hais rau cov kws qhia tias: “Qhov tseem ceeb tshaj plaws ntawm txoj hauj lwm no yog qhov uas nej yuav tsum niaj hnub yog npaj ntawm sab ntsuj plig, nov hais txog kev thov Vajtswv, kawm vaj lug kub, thiab ua raws li cov lus txib. Peb yaum kom nej yuav rau siab ntso ua raws nraim li txoj moo zoo qhia kom zoo tshaj nej tau ua yav nram ntej.”3
Tseem ceeb heev vim Thawj Pawg Thawj Tswj Hwm tsis tau hais tias qhov tseem ceeb tshaj plaws ntawm nej txoj hauj lwm no tsis yog kom ua tib zoo npaj nej zaj lus qhia los sis kawm kom txawj qhia ntawv. Nej yeej yuav tsum rau siab npaj rau txhua zaj lus thiab sim kawm seb nej yuav ua li cas thiaj pab tau cov tub kawm siv lawv txoj kev ywj siab xaiv thiab cia txoj moo zoo nkag mus hauv lawv nruab siab, tiam sis qhov tseem ceeb tshaj plaws thiab qhov uas nej yuav tsum xub ua yog kom ua tib zoo npaj nej sab ntsuj plig. Thaum nej ua raws li cov lus ntuas no, Thawj Pawg Thawj Tswj Hwm tau cog lus hais tias: “Tus Vaj Ntsuj Plig Dawb Huv yuav pab nej paub hais tias nej yuav tsum ua li cas. Nej zaj lus tim khawv yeej yuav loj hlob tuaj, nej haj yam yuav hloov siab los ntseeg, thiab nej yuav tau dag tau zog los pab nej kov yeej nej tej teeb meem hauv lub neej no.”4
Puas muaj lwm txoj koob hmoov zoo tshaj qhov no uas ib tug kws qhia yuav xav tau?
Tom qab ntawd, tus Tswv tau txib kom peb yuav tsum xub nrhiav kom tau nws cov lus ua ntej peb yuav pib tshaj tawm Nws txoj lus.5 Nej yuav tsum ua cov txiv neej thiab cov poj niam uas to taub zoo vim nej tau rau siab kawm cov vaj lug kub thiab khaws tej ntawd cia hauv nej nruab siab. Ces nej mam li thov tus Tswv los pab, Nws yuav foom koob hmoov rau nej thiab yuav muab Nws tus Ntsuj Plig thiab Nws txoj lus rau nej. Nej thiaj yuav muaj Vajtswv lub hwj chim uas pab tau tib neeg to taub qhov tseeb.
Pov Lauj qhia peb tias tib neeg txais tau txoj moo zoo ua ob yam, uas yog txoj lus thiab hwj chim.6 Txoj lus rau txoj moo zoo muab sau tseg hauv cov vaj lug kub, thiab peb txais tau txoj lus ntawd thaum peb rau siab kawm. Lub hwj chim ntawm txoj moo zoo los rau hauv tib neeg lub neej thaum lawv ua neej nyob tsim nyog tau tus Vaj Ntsuj Plig Dawb Huv ua lawv tus khub thiab lawv kam ua raws li tej kev tshoov siab uas lawv txais. Ib txhia tsuas xav txog txoj kev nrhiav kom tau txoj lus, thiab lawv txawm txawj qhia tej xov xwm. Lwm cov neeg tsis nco qab npaj siab thiab cia siab tias tus Tswv vim Nws ua siab zoo yuav cia li pab lawv thaum tab tom qhia hoob kawm. Nej yuav tsum tsis txhob xav tias tus Ntsuj Plig yuav pab nej nco qab cov vaj lug kub thiab tej ntsiab cai uas nej tsis tau kawm los sis xav txog. Yog tias yuav txawj qhia txoj moo zoo, ces nej yuav tsum tau txoj lus thiab lub hwj chim ntawm txoj moo zoo tib si hauv nej lub neej.
Amas to taub tej ntsiab cai no thaum uas nws piav txog Mauxiyas cov tub thiab qhov uas lawv muaj Vajtswv lub hwj chim thiab txoj cai thaum lawv qhia neeg. Peb nyeem hais tias:
“Lawv yog neeg ruaj ntawm txoj kev to taub thiab lawv tau rau siab nrhiav vaj lug kub, xwv kom lawv yuav paub Vajtswv txoj lus.
“Tiam sis tsis tas li no xwb; lawv tau muab lawv tus kheej thov Vajtswv thiab yoo mov heev; yog li ntawd lawv tau muaj … tus ntsuj plig ntawm kev tshwm sim.”7
Tom qab ntawd, nej yuav tsum kawm los mloog lus. Txwj Laug Jeffrey R. Holland qhia txoj ntsiab cai no rau cov tub txib. Kuv yuav hais Txwj Laug Holland cov lus tiam sis tau pauv ob lo lus tub txib thiab cov uas kawm txoj moo zoo rau ob lo lus cov kws qhia thiab cov tub kawm nws hais li no: “Txoj kev lav ris thib ib uas [cov kws qhia] yuav tsum ua yog mloog tus Ntsuj Plig cov lus, es txoj kev lav ris thib ob yog kom lawv mloog [cov tub kawm] cov lus. … Yog tias peb yuav cuab pob ntseg mloog lus ntawm sab ntsuj plig, … [peb cov tub kawm] yuav qhia peb tias lawv xav hnov tej zaj lus qhia twg!”
Txwj Laug Holland piav ntxiv tias: “Tiag tiag mas [cov kws qhia] tseem mob siab qhia tej zaj lus uas yooj yim qhia, thiab piav qhov qub xwb tsis tsuas xav txog lawv [cov tub kawm] hais tias lawv nyias xav tau nyias yam.”8
Tom qab nej twb npaj tau nej tus kheej thiab nej zaj lus qhia zoo npaum li nej muaj cuab kav npaj, nej yuav tsum cia li xwb. Ces thaum nej hnov tus Vaj Ntsuj Plig Dawb Huv tej kev tshoov siab, nej yuav tsum muaj siab loj txaus nej tso tau nej cov ntawv tseg thiab cia li qhia raws li tej kev tshoov siab ntawd qhia koj. Thaum nej ua li no, zaj lus qhia uas nej qhia ntawd tsis yog nej zaj lus qhia lawm, tiam sis txawm yog tus Cawm Seej zaj lus qhia lawm.
Thaum nej rau siab ntso ua raws li txoj moo zoo qhia es ua zoo tshaj yav tas los lawm thiab tshawb nrhiav hauv cov vaj lug kub, muab tej lus ntawd khaws cia hauv nej nruab siab, tib tug Vaj Ntsuj Plig Dawb Huv, uas tau qhia cov lus no rau cov thwj tim thiab cov yaj saub thaum ub, yuav ua tim khawv rau nej tias tej no muaj tseeb. Ua li, tus Vaj Ntsuj Plig Dawb Huv yuav rov qab qhia tej no rau nej ntag. Thaum muaj li no, cov lus uas nej nyeem no tsis yog Nifais los yog Pov Lauj los yog Amas cov lus lawm, tiam sis cov lus ntawd rais los mus ua nej cov lus. Ces, thaum nej qhia, tus Vaj Ntsuj Plig Dawb Huv yuav ua rau nej nco qab txog txhua yam. Muaj tseeb tiag, yuav qhia rau nej thaum lub sij hawm ntawd kom nej paub tias yuav hais li cas.9 Thaum muaj li no lawm, nej yuav pib hais tej lus uas nej yeej tsis tau npaj siab los hais. Ces, yog tias nej ua tib zoo mloog, nej yuav kawm ib yam tshiab los ntawm tej lus uas nej qhia ntawd. Thawj Tswj Hwm Marion G. Romney hais tias, “Kuv yeej paub thaum twg kuv hais lus raws li tus Vaj Ntsuj Plig Dawb Huv txoj kev tshoov siab vim thaum ntawd kuv thiaj kawm ib yam dab tsi los ntawm cov lus uas kuv hais.”10 Nco ntsoov tias, ib tug kws qhia kuj yog ib tug tub kawm ntawv thiab.
Thaum kawg, nej yuav tsum sawv los ua tim khawv txog tej yam uas nej qhia thiab tsis yog lam hais lus qog tej lus hauv ib phau ntawv los sis hais lwm tus neeg cov tswv yim xwb. Thaum nej tshawb nrhiav Khetos cov lus thiab sim ua raws li txoj moo zoo kom zoo tshaj yav tas los lawm, tus Vaj Ntsuj Plig Dawb Huv yuav ua pov thawj rau nej tias tej yam uas nej qhia yeej muaj tseeb. Nov yog tus ntsuj plig rau kev tshwm sim, thiab tib tug ntsuj plig ntawd yuav coj nej zaj xov mus rau hauv tib neeg siab thaum lawv muaj lub siab xav thiab lub siab kam txais yuav tej ntawd.
Nim no cia peb xaus ntawm tib qhov uas peb pib—uas yog hauv Koog Ntoo Dawb Ceev. Vim muaj qhov xwm ntawd thaum lub caij nplooj ntoo hlav yav tas los lawm, nej txhua tus muaj cai qhia nrog Vajtswv lub hwj chim thiab txoj cai. Kuv hais kuv zaj lus tim khawv txog qhov no los ntawm tus Tswv Yexus Khetos lub npe, amees.